నరేంద్ర మోడీ భజన ఆపండి

తిరువనంతపురం: కేంద్ర మాజీ మంత్రి, తిరువనంతపురం ఎంపీ శశిథరూర్ ప్రధాని నరేంద్ర మోడీని ప్రశంసించడాన్ని కేరళ కాంగ్రెస్ నాయకులకు కోపం తెప్పించింది. నరేంద్ర మోడీని పొగడటం మానుకోవాలని థరూర్కు సూచించారు. నరేంద్ర మోడీ ప్రారంభించిన స్వచ్ఛ భారత్ కార్యక్రమానికి థరూర్ మద్దతు తెలిపి ప్రశంసించారు. ఈ కార్యక్రమంలో పాల్గొనాల్సిందిగా మోడీ ఆహ్వనించగా, థరూర్  అంగీకరిస్తూ ట్వీట్ చేశారు.

థరూర్ వ్యవహారశైలిపై కేరళ కాంగ్రెస్ నాయకులు మండిపడ్డారు. స్వచ్ఛ భారత్ ప్రారంభం రోజు గాక థరూర్ కొంతకాలంగా మోడీ జపం చేస్తున్నారని విమర్శించారు. థరూర్ ఎందుకిలా చేస్తున్నారో అర్థం కావడం లేదని కేరళ కాంగ్రెస్ ఉపాధ్యక్షుడు హసన్ అన్నారు. ఈ అంశాన్ని జాతీయ నాయకుల దృష్టికి తీసుకెళ్లాలని భావిస్తున్నారు.