అప్పుడు మలేసియా... ఇప్పుడు దుబాయ్‌!

రజనీకాంత్‌ ‘రోబో’ (తమిళంలో ‘ఎందిరన్‌’) ఆడియో వేడుక ఎక్కడ జరిగిందో గుర్తుందా? మలేసియాలో! ఇంటర్నేషనల్‌ ఆడియన్స్‌ను ఎట్రాక్ట్‌ చేయాలనే ఉద్దేశంతో అప్పట్లో దర్శకుడు శంకర్‌ ‘ఎందిరన్‌’ ఆడియోను అలా ప్లాన్‌ చేశారు. ఆ తర్వాత చాలామంది సౌతిండియన్‌ ఫిల్మ్‌ మేకర్స్‌ విదేశాల్లో ప్రచార కార్యక్రమాలను ముమ్మరం చేశారు. ఇప్పుడు ‘2.0’ ఆడియోకు కూడా సేమ్‌ ప్లాన్‌ను ఫాలో అవుతున్నారు. దుబాయ్‌లో ఈ సినిమా పాటలను విడుదల చేస్తున్నట్టు చిత్రనిర్మాణ సంస్థ లైకా ప్రొడక్షన్స్‌ ప్రకటించింది.

దీపావళి టైమ్‌లో అంటే అక్టోబర్‌లో ఆడియో విడుదల చేయనున్నారు. ‘త్రీడీ దివాలి’ పేరుతో రూ. 25 కోట్ల ఖర్చుతో ఈ వేడుక నిర్వహిస్తారని చెన్నై టాక్‌. రజనీకాంత్‌కు ప్రపంచవ్యాప్తంగా బోల్డంత మంది అభిమానులున్నారు. దుబాయ్‌ చుట్టుపక్కల దేశాల్లో అభిమానులు ఆడియో వేడుకకు వెళ్లాలని ప్లాన్‌ చేసుకుంటున్నారట! హిందీ హీరో అక్షయ్‌కుమార్‌ విలన్‌గా, అమీ జాక్సన్‌ హీరోయిన్‌గా నటించిన ఈ సిన్మాను త్రీడీలో తెరకెక్కించారు. వచ్చే ఏడాది జనవరి 26న సినిమాను రిలీజ్‌ చేసే నాటికి సౌతిండియన్‌ థియేటర్లలో వీలైనన్ని వాటిని త్రీడీ ప్రొజెక్షన్‌కి అనుగుణంగా కన్వర్ట్‌ చేసే ఆలోచనలో ‘2.0’ టీమ్‌ ఉంది.