నాలుగు భాషల్లో ‘రంగస్థలం’

మెగా పవర్‌ స్టార్‌ రామ్‌ చరణ్‌ హీరోగా సుకుమార్‌ దర్శకత్వంలో తెరకెక్కిన సూపర్‌ హిట్ సినిమా రంగస్థలం. ఇప్పటికే వందకోట్ల షేర్‌ మార్కును దాటి దూసుకుపోతున్న ఈ సినిమా విజయోత్సవ వేడుకను ఈ రోజు (శుక్రవారం) సాయంత్రం అభిమానుల సమక్షంలో ఘనంగా నిర్వహించనున్నారు. ఈ కార‍్యక్రమానికి పవర్‌ స్టార్‌ పవన్‌ కళ్యాణ్ ముఖ్య అతిథిగా హజరవుతున్నారు. తాజాగా రంగస్థలం సినిమాకు సంబంధించిన మరో ఆసక్తికర వార్త అభిమానులను ఖుషీ చేస్తోంది. ఈ సినిమా రిలీజ్‌కు ముందే.., రామ్‌ చరణ్‌ తమిళ్‌లోకి అనువాదం చేసే ఆలోచన ఉన్నట్టుగా తెలిపారు.

అయితే తాజా సమాచారం ప్రకారం రంగస్థలం సినిమాను తమిళ్‌తో పాటు మరో మూడు భాషల్లోకి అనువదించేందుకు ఏర్పాట్లు చేస్తున్నారట. తమిళ్‌తో పాటు మలయాళం, హిందీ, భోజ్‌పురి భాషల్లోకి కూడా అనువదించనున్నారని తెలుస్తోంది. ప్రస్తుతానికి ఈ విషయంపై చిత్రయూనిట్ నుంచి ఎలాంటి అధికారిక ప్రకటనా రాలేదు. త్వరలోనే డబ్బింగ్‌ వర్షన్‌ల రిలీజ్‌పై క్లారిటీ వచ్చే అవకాశం ఉంది. రామ్‌ చరణ్‌ సరసన సమంత హీరోయిన్‌గా నటించిన ఈ సినిమాలో ఆది పినిశెట్టి, అనసూయ, జగపతి బాబు, ప్రకాష్‌ రాజ్‌లు ఇతర కీలక పాత్రల్లో నటించారు.