ఇందు ఇబ్బందులు

కియారా అద్వానీ

ఇందు ఓ సింగిల్‌ అమ్మాయి. బాయ్‌ఫ్రెండ్‌ కోసం ఎందెందు వెతికినా దొరకలేదు. ఇక లాభం లేదని డేటింగ్స్‌ యాప్స్‌ అన్నీ చూడటం మొదలుపెట్టింది. మరి ఇందూకు జోడీ కుదిరిందా లేదా? అనేది తెలియాలంటే ‘ఇందూకీ జవానీ’ చిత్రం చూడాల్సిందే. కియారా అద్వానీ ముఖ్యపాత్రలో తెరకెక్కనున్న చిత్రం ఇది. బెంగాలీ దర్శకుడు అభిర్‌ సేన్‌ గుప్తా ఈ చిత్రం ద్వారా బాలీవుడ్‌కు దర్శకుడిగా పరిచయం అవుతున్నారు.

నిఖిల్‌ అద్వానీ, నిరంజన్‌ అయ్యంగార్, ర్యాన్‌ స్టీఫెన్‌ సంయుక్తంగా నిర్మించనున్నారు. ‘‘న్యూ ఏజ్‌ కామెడీ చిత్రంగా ఈ సినిమా తెరకెక్కబోతోంది. డేటింగ్‌ సైట్లతో ఇందు పడ్డ ఇబ్బందులు చాలా సరదాగా ఉంటాయి. కియారా చేస్తున్న తొలి ఫీమేల్‌ ఓరియంటెడ్‌ మూవీ ఇది’’ అని నిర్మాతలు పేర్కొన్నారు. ‘‘ఇందు పాత్ర చాలా సరదాగా ఉంటుంది. ఈ పాత్రను పోషించడానికి చాలా ఆత్రుతగా ఎదురు చూస్తున్నాను’’ అని కియారా అన్నారు. ఈ ఏడాది సెప్టెంబర్‌లో ఈ సినిమా సెట్స్‌ మీదకు వెళ్లనుంది.