ఆ సినిమా నా జీవితాన్ని మార్చేసింది

ముంబై: సంజయ్‌ లీలా భన్సాలీ దర్శకత్వంలో తెరకెక్కిన చారిత్రక ప్రేమకథా చిత్రం బాజీరావ్‌ మస్తానీ తన జీవితాన్ని మార్చివేసిందని బాలీవుడ్‌ హీరో రణవీర్‌ సింగ్‌ అన్నాడు. ఈ సినిమా టైటిల్‌ రోల్‌లో రణవీర్‌ నటించిన సంగతి తెలిసిందే. అతనికి జోడీగా దీపికా పదుకోన్‌, ప్రియాంక చోప్రా నటించారు. గతేడాది డిసెంబర్‌ 18న విడుదలైన ఈ సినిమా ప్రేక్షకుల మన్ననలు పొందింది. ఈ సినిమా విడుదలై ఏడాది పూర్తయిన సందర్భంగా రణవీర్‌ తన అనుభూతిని అభిమానులతో పంచుకుంటూ ట్వీట్‌ చేశాడు.

‘బాజీరావ్‌ మస్తానీ సినిమాలో మరాఠా వీరుడు బాజీరావ్‌ పాత్రలో నటించడం వల్ల నా జీవితం ఎంతో మారిపోయింది. నాకు ఈ అవకాశం ఇచ్చిన సంజయ్‌ సర్‌కు కృతజ్ఞతలు. నాతో పాటు నటించిన దీపిక, ప్రియాంక, చిత్ర బృందానికి ధన్యవాదాలు’ అని రణవీర్‌ ట్వీట్‌ చేశాడు. హీరోయిన్లు దీపిక, ప్రియాంక కూడా దర్శకుడు సంజయ్‌ ఇతర యూనిట్‌కు కృతజ్ఞతలు చెబుతూ ట్వీట్‌ చేశారు.