గాడీని లాగేసిన దాడీ

గాడీని లాగేసిన దాడీ

   తిక్క  లెక్క
చాలామంది దాడీవాలాలు.. అదేనండీ గడ్డంరాయుళ్లు రకరకాల కారణాల వల్ల గడ్డాలను పెంచుకుంటూ ఉంటారు. మేధావుల్లా కనిపించడానికి కొందరు, తీరికలేక ఇంకొందరు, బద్దకం వల్ల మరికొందరు... కొంతమందికి గడ్డం ఒక ఫ్యాషన్ సింబల్. మరీ అపురూపంగా గడ్డాన్ని సంరక్షించుకుంటూ ఉంటారు. గడ్డంలోని ఒక్క వెంట్రుకకు నష్టం కలిగినా విలవిల్లాడిపోతారు. ఈ ఫొటోలో కనిపిస్తున్న దాడీవాలా మాత్రం అలాంటి బాపతేం కాదు. ఎలాంటి చాలెంజ్‌నైనా గడ్డం దువ్వి మరీ సవాలు చేసి, సత్తా నిరూపించుకోవడం అంటే ఇతడికి మాచెడ్డ సరదా. అలాంటి సరదాతోనే టాటా ఇండికా కారును గడ్డంతో లాగిపడేశాడు. ఈ దాడివాలా పేరు కపిల్ గెహ్లాట్. పక్కా రాజస్థానీ. జోధ్‌పూర్‌లో ఉంటాడు. గడ్డంతో అతి బరువైన వాహనం లాగినందుకు గిన్నెస్‌బుక్‌లోకి ఎక్కాడు.