నేడు మెడికల్‌షాపులు బంద్‌

కర్నూలు(హాస్పిటల్‌): ఆన్‌లైన్‌ ఈ-ఫార్మసీ వ్యాపారానికి వ్యతిరేకంగా డ్రగ్‌ యాక్ట్‌లో చేస్తున్న మార్పులకు నిరసనగా ఈ నెల 30న జిల్లా వ్యాప్తంగా మెడికల్‌షాప్‌ల బంద్‌ పాటిస్తున్నట్లు సీమాంధ్ర డ్రగ్‌ డీలర్స్‌ అసోసియేషన్‌ ప్రధాన కార్యదర్శి ఎం. రామకృష్ణారావు తెలిపారు. ఇందుకు సంబంధించి సోమవారం కర్నూలులోని కెమిస్ట్‌భవన్‌లో ఏర్పాటు చేసిన విలేకరుల సమావేశంలో ఆయన మాట్లాడారు. ఆన్‌లైన్‌ ఈ-ఫార్మసీ అమలుతో ప్రస్తుత డ్రగ్స్, కాస్మోటిక్స్‌ యాక్ట్‌ 1940, రూల్స్‌ 1945కి వ్యతిరేకంగా చట్టబద్ధత, నాణ్యతలేని మందులు మార్కెట్‌లోకి వచ్చే అవకాశం ఉందన్నారు. వైద్యుల పర్యవేక్షణలేని మందులు వాడటం వల్ల డ్రగ్‌ రియాక్షన్‌కు సంబంధించి దుష్ఫలితాలు పెరిగే అవకాశం ఉందన్నారు. ఈ విధానాలకు వ్యతిరేకంగా 30వతేదీ రాత్రి 12 గంటల వరకు జిల్లా వ్యాప్తంగా ఉన్న 600 హోల్‌సేల్, 1470 రిటైల్‌ మెడికల్‌షాప్‌లు బంద్‌ చేస్తున్నట్లు తెలిపారు. అత్యవసర మందుల కోసం ఫోన్‌( 9989766966, 9246472006, 9848024555)లో సంప్రదించాలన్నారు. విలేకరుల సమావేశంలో కర్నూలు జిల్లా డ్రగ్‌ డీలర్స్‌ అసోసియేషన్‌ కార్యదర్శి వై. పుల్లయ్య, కోశాధికారి ఎస్‌. మధుసూదన్‌గుప్త పాల్గొన్నారు.