ఎమ్మెల్యే సండ్రకు తప్పిన ప్రమాదం

ఖమ్మంక్రైం: సత్తుపల్లి ఎమ్మెల్యే సండ్ర వెంకటవీరయ్యకు ఆదివారం తృటిలో ప్రమాదం తప్పింది. రాష్ట్ర అవతరణ దినోత్సవం సందర్భంగా పోలీస్‌ పరేడ్‌గ్రౌండ్‌లో జరిగిన కార్యక్రమానికి హాజరై తిరిగి వెళుతుండగా పోలీస్‌ పరేడ్‌ గ్రౌండ్‌ సమీపంలో శివాలయం వద్ద ఎదురుగా వస్తున్న వాహనాన్ని తప్పించబోయిన ఎమ్మెల్యే డ్రైవర్‌ పక్కనే ఉన్న కాల్వను గమనించకపోవటంతో వాహనం టైరు కాల్వలో ఇరుక్కుపోయింది.

వాహనం ఒక పక్కకు ఒరిగి పోతుండగా డ్రైవర్‌ సమయస్ఫూర్తితో వ్యవహరించటంతో బోల్తా పడకుండా ఆగిపోయంది. వెంటనే సండ్ర, ఆయన గన్‌మెన్‌లు కిందకు దిగారు. ఈలోపు ఆ ప్రాంతంలో ఉన్న స్థానికులు అక్కడకు చేరుకొని వాహనాన్ని బయటకు తీసారు. ఆ సమయంలో గుడి ముందు ఎవరూ లేకపోవటంతో ఎలాంటి ప్రమాదం జరగలేదు. ఆ శివుడే తనకు ఎటువంటి ముప్పు కలిగించకుండా కాపాడాడని సండ్ర అంటూ కారెక్కి హైదరాబాద్‌ వెళ్లిపోయారు.