సబ్‌స్టేషన్‌ను ముట్టడించిన రైతులు

గాండ్లపెంట: పది రోజులుగా వ్యవసాయ కనెక్షన్లకు విద్యుత్ సరఫరాను నిలిపివేయడంతో ఆగ్రహించిన రైతులు సోమవారం ఉదయం  సబ్‌స్టేషన్‌ను ముట్టడించారు. అనంతపురం జిల్లా గాండ్లపెంట మండలం చెరువుముందరి తాండా, వేపరాల గ్రామాల వ్యవసాయ కనెక్షన్లకు విద్యుత్ సరఫరా కావడం లేదు.

ఈ గ్రామాలకు పనిచేసే లైన్‌మన్‌ను సస్పెండ్ చేయడంతో ఆ లైన్‌కు విద్యుత్ సరఫరా ఆగిపోయింది. ఎన్నిసార్లు అధికారులకు విన్నవించినా పునరుద్ధరించలేదు. దాంతో ఆగ్రహించిన రెండు గ్రామాల రైతులు సోమవారం ఉదయం గాజులవారిపలిలెలోని విద్యుత్ సబ్‌స్టేషన్‌ను ముట్టడించారు. స్పందించిన ఏఈ గౌరీశంకర్ లైన్‌మన్‌ను పంపి విద్యుత్‌ను పునరుద్ధరించారు.