ఇక పల్లె పోరు !

● ఈ నెల 13 నుంచి డిసెంబర్‌ 2 దాకా ఎన్నికల ప్రక్రియ

● జిల్లాలో 615 సర్పంచు, 5960 వార్డు పదవులకు ఎన్నికలు

● పోటికి సిద్ధమవుతున్న అభ్యర్థులు

● పార్టీలకతీతంగా అభ్యర్థుల ఎన్నిక

● జిల్లాలో మహిళా ఓటర్లు అధికం

కడప సెవెన్‌రోడ్స్‌: మున్సిపాలిటీ, జిల్లా, మండల పరిషత్‌ ఎన్నికలు ముగిసిపోగా, ఇప్పుడు పార్టీలకు అతీతంగా నిర్వహించే గ్రామ పంచాయతీ ఎన్నికల ప్రక్రియ మొదలుకానుంది. పంచాయతీ ఎన్నికలతో పల్లెల్లో రాజకీయ వేడి రాజుకోనుంది. ప్రధానంగా సర్పంచ్‌ పదవులకు పోటీ చేసేందుకు రాజకీయ పార్టీలు మద్దతు ఇచ్చే అభ్యర్థులు రంగంలోకి దిగనున్నారు. దీనికోసం పార్టీల మద్దతు కోసం అభ్యర్థులు ప్రయత్నాలు ముమ్మరం చేశారు. పరిషత్‌ ఎన్నికలు ఒక విధానంలో జరిగితే, పంచాయతీ ఎన్నికలు పూర్తి విరుద్ధంగా జరుగుతాయి. స్థానిక అభ్యర్థుల వ్యక్తిగతం, ప్రజలకు ఉపయోగపడే అవకాశాలను గుర్తించడం ద్వారా ప్రజలు వారిని ఆదరించే పరిస్థితులు ఉంటాయి. దీనికి పార్టీల మద్దతు ఉంటుంది కాబట్టి అభ్యర్థుల గెలుపు అవకాశాలపై రాజకీయ ప్రభావం తక్కువగా ఉంటుంది. ఈ నేపథ్యంలో జిల్లాలో గ్రామపంచాయతీ ఎన్నికల వేడి మొదలైంది. నవంబర్‌ 13న జరిగే ఎన్నికల తొలి నోటిఫికేషన్‌ నుంచి డిసెంబర్‌ రెండు వరకు మూడు దశల్లో ఎన్నికలను నిర్వహించేందుకు జిల్లా అధికార యంత్రాంగం కసరత్తు చేస్తోంది. ఇప్పటికే అన్ని చర్యలు పూర్తి చేయడంతో ఎన్నికల నిర్వహణకు సిద్దమయ్యారు.

6136 పోలింగ్‌ కేంద్రాలు

బద్వేలు డివిజన్‌లో 1126, రాజంపేట డివిజన్‌లో 618, కడప రెవెన్యూ డివిజన్‌లో 1268, జమ్మలమడుగు డివిజన్‌లో 1888 పోలింగ్‌ కేంద్రాలను ఏర్పాటు చేశారు. పులివెందుల డివిజన్‌లో 1236 మొత్తం మీద జిల్లా వ్యాప్తంగా 39 మండలాల్లో 615 గ్రామ పంచాయతీలకు, 5960 వార్డులకు ఎన్నికలు నిర్వహించనున్నారు. పోలింగ్‌ నిర్వహణకు 6136 పోలింగ్‌ కేంద్రాలు ఏర్పాటు చేశారు.