నాయుడుపేటలో అగ్నిప్రమాదం

నాయుడుపేట టౌన్‌: నాయుడుపేట పట్టణంలోని చైతన్య ఆస్పత్రి సమీపంలోని ఓ భవనంలో ఆదివారం మధ్యాహ్నం అగ్నిప్రమాదం చోటుచేసుకుంది. స్థానికులు, అగ్నిమాపకశాఖ అధికారుల కథనం.. చైతన్య ఆస్పత్రి వీధి సమీపంలో ఉన్న ఓ భారీ భవనంలో ఒక్కసారిగా మంటలు చెలరేగాయి. గుర్తుతెలియని వ్యక్తులు బాణసంచా కాల్చినప్పుడు నిప్పురవ్వలు భవనంలో పడి మంటలు రేగాయి. పెద్ద ఎత్తున పొగ కమ్మేసింది. దీంతో స్థానికులు భయాందోళనకు గురయ్యారు. గత ఏడేళ్లుగా ఈ భవనాన్ని బ్యాంకు అధికారులు సీజ్‌ చేసి ఉన్నారు. ఈ భవనంలో పాత అట్ట పెట్టెలు, కొంతమేరకు ఐటీసీకి సంబంధించిన సరుకులు, ఇతర సామగ్రి ఉన్నట్టు అగ్నిమాపక శాఖ అధికారులు గుర్తించారు. నాయుడుపేట, సూళ్లూరుపేట అగ్నిమాపక వాహనాలు ఘటనా స్థలానికి చేరుకుని మంటలను అదుపుచేశాయి. ఈ ప్రమాదంలో రూ.50 వేల మేర ఆస్తినష్టం వాటిల్లినట్టు నాయుడుపేట అగ్నిమాపక శాఖ అధికారి కే.సునీల్‌ తెలిపారు. సూళ్లూరుపేట అగ్నిమాపకశాఖ అధికారి హరీష్‌తో పాటు స్థానిక లీడ్‌ ఫైర్‌మన్‌ సుందరం, ఫైర్‌మన్‌ మురళి, పరశురామయ్య, సూళ్లూరుపేట అగ్నిమాపక సిబ్బంది పాల్గొన్నారు.