TV
సాక్షి, హైదరాబాద్: ఐ బొమ్మ రవి రెండవ విడత కస్టడీ పూర్తి అయ్యింది. మూడు రోజులపాటు జరిగిన విచారణలో నిందితుడి మెయిల్స్‌ నుంచి కీలక సమాచారాన్ని పోలీసులు స్వాధీనం చేసుకున్నారు. ఐబొమ్మ, బప్పం వెబ్‌సైట్‌లలో మొత్తం 21 వేల సినిమాలు అప్‌లోడ్‌ అయినట్లు గుర్తించారు. అంతేకాదు.. ఫైరసీకి సంబంధించిన అడ్వాన్స్‌డ్‌ టెక్నాలజీ గురించి రవి సైబర్ పోలీసులకు వివరించినట్లు తెలుస్తోంది.
పోలీసుల విచారణలో రవి తెలిపిన వివరాలు.. విశాఖలో సినిమాను బొమ్మ అనేవాళ్లం. అందుకే ఐ బొమ్మ అని పేరు పెట్టా. బొమ్మను ఇంటర్నెట్‌లో చూపిస్తుందనే అలా పేరు పెట్టా. ఐ బొమ్మ అంటే ఇంటర్నెట్‌ బొమ్మ. అలాగే మరో వెబ్‌సైట్‌ బప్పంగా మొదట అనుకున్న పేరు అది కాదు. బలపం అని పేరు పెడదామని అనుకున్నాం. కానీ, డొమైన్‌ నేమ్‌లో ఎల్‌(L) అనే అక్షరంతో సాంకేతిక సమస్యలు వచ్చాయి. అందుకే బప్పం అని పేరు పెట్టాం.
పైరసీ వెబ్‌సైట్స్‌ నుంచే సినిమాలు రికార్డు చేశాం. ఓటీటీల్లో వచ్చే కంటెంట్‌ను సైతం రికార్డింగ్‌ చేయగలిగాం. అలా రికార్డింగ్‌ చేసిన సినిమా ఆడియో.. వీడియో క్వాలిటీ పెంచేందుకు కరేబియన్‌ దీవుల్లో ఔట్‌ సోర్సింగ్‌ వాళ్లతో ఒప్పందం చేసుకున్నాం. అలాగే తాను న్విహించిన వెబ్‌సైట్ల గురించి కూడా రవి వివరాలు వెల్లడించాడు.
రవి మెయిల్స్‌లో స్పామ్, హైడ్ ఫైల్స్‌లోనే డాటా మొత్తం దాటి ఉన్నట్లు సీసీఎస్‌ పోలీసులు గుర్తించారు. అలాగే ప్రహ్లద్ అనే వ్యక్తి గురించి వివరాలు సేకరించారు. తాము ఎన్జిల ఆన్లైన్ ద్వారానే కనెక్ట్ అయ్యామని రవి తెలిపాడు. అయితే ఆ లింకును సైబర్ క్రైమ్ పోలీసులకు చూపించగా అంతలోపే లింక్ రివోక్ అయ్యాయి. దీంతో వాటిని సైబర్ క్రైమ్ పోలీసులు పరిశీలిస్తున్నారు.
రెండో విడత కస్టడీ మొదటిరోజు విచారణలో.. ఎన్జీల నెట్‌వర్క్‌, ఆర్థిక వ్యవహారాలపై కీలక లీడ్‌ను పోలీసులు సంపాదించారు. ఐపీ మాస్క్ చేసి అనధికారిక వెబ్ సైట్స్ నిర్వహిస్తున్నా ముఠాలపై ఆరా తీశారు. రెండో రోజు విచారణలో మాత్రం రవి సరిగ్గా నోరు విప్పలేదు. పైగా.. బయటకు రాగానే మంచి పనులు చేస్తానంటూ పోలీసులతో అన్నట్లు సమాచారం. మొత్తంగా.. మూడు రోజులపాటు సాగిన రెండో విడత కస్టడీ నేటితో పూర్తైంది. దీంతో రవిని నాంపల్లి కోర్టుకు హాజరుపరిచి.. అక్కడి నుంచి చంచల్‌గూడ జైలుకు తరలించారు. సినీ పైరసీ కేసులో ఐపీ మాస్క్ లింక్స్ పై త్వరలోనే పోలీసులు కీలక ప్రకటన చేసే అవకాశం కనిపిస్తోంది.
