ఉరి వేసుకుని బాలిక ఆత్మహత్య

ఎచ్చెర్ల : కుప్పిలి పంచాయితీ యాతపేటకు చెందిన ముంత గీత (17) అనే బాలిక శుక్రవారం ఇంట్లో ఫ్యాన్‌కు ఉరివేసుకుని ఆత్మహత్య చేసుకుంది. ఎచ్చెర్ల ఎస్సై జి.లక్ష్మణరావు, గ్రామస్తులు తెలిపిన వివరాల ప్రకారం.. గీత తండ్రి ఎర్రయ్య ఉపాధి నిమిత్తం చేపల వేటకు గుజరాత్‌ వెళ్లాడు. తల్లి రమణమ్మ కూలి పనిచేస్తూ జీవనం సాగిస్తోంది. వీరికి ముగ్గురు బిడ్డలు. పెద్ద కుమార్తెకు వివాహం కాగా, చిన్న కుమారుడు స్థానిక జెడ్పీ ఉన్నత పాఠశాలలో చదువుతున్నాడు. రెండో కుమార్తె గీత పదో తరగతి చదివి ఇంటి వద్దే ఉంటోంది. ఈ క్రమంలో లావేరు మండలం కేశవరాయునిపాలెం గ్రామానికి చెందిన ఓ యువకుడితో పరిచయం ఏర్పడింది. వీరిని చూసి తల్లి మందలించింది. దీంతో గీత మనస్థాపానికి గురై ఉరి వేసుకుంది. తల్లి వచ్చి చూసేసరికి ఫ్యాన్‌కు వేలాడుతుండటంతో ఇరుగుపొరుగు వారికి చెప్పింది. అప్పటికే మృతి చెందినట్లు గుర్తించిన స్థానికులు పోలీసులకు సమాచారం అందించారు. ఘటనా స్థలానికి చేరుకున్న పోలీసులు మృతదేహాన్ని పోస్టుమార్టం నిమిత్తం రిమ్స్‌కు తరలించారు. తల్లి ఫిర్యాదుమేరకు ఎచ్చెర్ల ఎస్సై కేసు నమోదు చేసి దర్యాప్తు చేస్తున్నారు.