బ్యాటర్లదే ఇక భారం

సఫారీతో ఆడుతోంది భారతగడ్డపైనే అయినా సవాల్‌ మాత్రం భారత్‌కే ఎదురవుతోంది. తొలి మ్యాచ్‌లో బౌలింగ్‌ అదిరింది... కానీ బ్యాటింగ్‌ కుదరక, చిన్న లక్ష్యాన్ని సైతం చేధించలేక శుభారంభం చెదిరింది. ఈ రెండో టెస్టులో ప్రత్యర్థి బ్యాటర్లను బెంబేలెత్తించాల్సిన మన పేస్‌ బేల చూపులు చూసింది. తిప్పేయాల్సిన స్పిన్‌ తెల్లమొహమేసింది. వెరసి దక్షిణాఫ్రికా భారీ స్కోరే చేసింది. ఇప్పుడు భారమంతా భారత బ్యాటర్లపైనే పడింది.  

గువాహటి: రెండో టెస్టులో దక్షిణాఫ్రికా దంచేసింది. ఈ రెండు రోజులూ సఫారీదే పైచేయి! భారత బౌలింగ్‌ భారత గడ్డపై ఎంతలా భంగపడిందంటే... ఏడో వరుస బ్యాటింగ్‌కు దిగిన స్పిన్‌ ఆల్‌రౌండర్‌ సేనురాన్‌ ముత్తుసామి (206 బంతుల్లో 109; 10 ఫోర్లు, 2 సిక్స్‌లు) శతక్కొట్టగా... తొమ్మిదో వరుస పేస్‌ ఆల్‌రౌండర్‌ మార్కో యాన్సెన్‌ (91 బంతుల్లో 93; 6 ఫోర్లు, 7 సిక్స్‌లు) సెంచరీ మిస్‌ చేసుకున్నా... వన్డే తరహా ధాటిని కనబరిచాడు. దీంతో దక్షిణాఫ్రికా తొలి ఇన్నింగ్స్‌లో 151.1 ఓవర్లలో 489 పరుగుల భారీస్కోరు వద్ద ఆలౌటైంది. 

భారత బౌలర్లలో కుల్దీప్‌ యాదవ్‌కు 4 వికెట్లు దక్కాయి. బుమ్రా, సిరాజ్, జడేజా తలా 2 వికెట్లు తీశారు. అనంతరం తొలి ఇన్నింగ్స్‌ ఆరంభించిన భారత్‌ 6.1 ఓవర్లలో వికెట్‌ నష్టపోకుండా 9 పరుగులు చేసింది. ఓపెనర్లు యశస్వి జైస్వాల్‌ (7 బ్యాటింగ్‌), కేఎల్‌ రాహుల్‌ (2 బ్యాటింగ్‌) క్రీజులో ఉన్నారు. ఇంకా 480 పరుగుల సుదూరంలోనే ఆతిథ్య జట్టు ఉంది.  

తొలి సెషన్‌లో ఫిఫ్టీ, రెండో సెషన్‌లో శతక్కొట్టి... 
సఫారీ ఓవర్‌నైట్‌ స్కోరు 247/6. అంటే స్పెషలిస్టు బ్యాటర్లంతా అవుటయ్యారు. ఇక మిగిలిందల్లా బౌలింగ్‌ ఆల్‌రౌండర్లే. వీరిని మన స్పిన్‌ త్రయం, పేస్‌ త్రయం తేలిగ్గా పడేస్తుందనుకుంటే ఓవర్‌నైట్‌ బ్యాటర్లు ముత్తుసామి, వెరీన్‌ ఆ అవకాశం ఎవరికీ ఇవ్వలేదు. దీంతో తొలిసెషన్‌లో ఆరుగురి ఆతిథ్య బౌలర్ల శ్రమ ఏమాత్రం ఫలించనేలేదు. ముత్తుసామి ఫిఫ్టీ పూర్తి చేసుకోగా... వెరీన్‌ ఆ దిశగా కదిలాడు. 

జట్టు స్కోరు 316/6 వద్ద టీ విరామానికెళ్లారు. ఎట్టకేలకు తొలిసెషన్‌లో లభించని సాఫల్యం రెండో సెషన్‌లో దక్కింది. వెరీన్‌ (45; 5 ఫోర్లు)ను జడేజా అవుట్‌ చేయడంతో ఏడో వికెట్‌కు 88 పరుగుల భాగస్వామ్యం ముగిసింది. అయితే ఈ వికెట్‌ ఆనందం ఆలౌట్‌కు తీసుకెళ్లలేదు. యాన్సెన్‌ రాకాతో అంతలోనే ఆవిరైంది.  ఈ క్రమంలో ముత్తుసామి శతకం, యాన్సెన్‌ అర్ధశతకం పూర్తయ్యాయి. 

428/7 వద్ద లంచ్‌ విరామానికి వెళ్లారు. ఆఖరి సెషన్‌ ఆరంభంలో ముత్తుసామి అవుటైనప్పటికీ హార్మర్‌ (5), కేశవ్‌ మహారాజ్‌ (12 నాటౌట్‌)ల కొసరంత అండతోనే యాన్సెన్‌ మరో 58 పరుగులు జతచేశాడు. సెంచరీకి 7 పరుగుల దూరంలో అవుటవడంతో సఫారీ ఇన్నింగ్స్‌కు 489 వద్ద తెరపడింది.

స్కోరు వివరాలు 
దక్షిణాఫ్రికా తొలి ఇన్నింగ్స్‌: మార్క్‌రమ్‌ (బి) బుమ్రా 38; రికెల్టన్‌ (సి) పంత్‌ (బి) కుల్దీప్‌ 35; స్టబ్స్‌ (సి) రాహుల్‌ (బి) కుల్దీప్‌ 49; బవుమా (సి) జైస్వాల్‌ (బి) జడేజా 41; టోని జోర్జి (సి) పంత్‌ (బి) సిరాజ్‌ 28; ముల్డర్‌ (సి) జైస్వాల్‌ (బి) కుల్దీప్‌ 13; ముత్తుసామి (సి) జైస్వాల్‌ (బి) సిరాజ్‌ 109; వెరీన్‌ (స్టంప్డ్‌) పంత్‌ (బి) జడేజా 45; యాన్సెన్‌ (బి) కుల్దీప్‌ 93; హార్మర్‌ (బి) బుమ్రా 5; కేశవ్‌ (నాటౌట్‌) 12; ఎక్స్‌ట్రాలు 21; మొత్తం (151.1 ఓవర్లలో ఆలౌట్‌) 489. వికెట్ల పతనం: 1–82, 2–82, 3–166, 4–187, 5–201, 6–246, 7–334, 8–431, 9–462, 10–489. బౌలింగ్‌: బుమ్రా 32–10–75–2, సిరాజ్‌ 30–5–106–2, నితీశ్‌ 6–0–25–0, సుందర్‌ 26–5–58–0, కుల్దీప్‌ 29.1–4–115–4, జడేజా 28–2–94–2. 

భారత్‌ తొలి ఇన్నింగ్స్‌: జైస్వాల్‌ బ్యాటింగ్‌ 7; రాహుల్‌ (బ్యాటింగ్‌) 2; ఎక్స్‌ట్రాలు 0; మొత్తం (6.1 ఓవర్లలో వికెట్‌ నష్టపోకుండా) 9. బౌలింగ్‌: యాన్సెన్‌ 3.1–1–9–0, ముల్డర్‌ 3–3–0–0.