IPL 2022: లక్నో సూపర్‌ జెయింట్స్‌పై రాజస్తాన్‌ రాయల్స్‌ విజయం

లక్నో సూపర్‌ జెయింట్స్‌తో జరిగిన మ్యాచ్‌లో రాజస్తాన్‌ రాయల్స్‌ 3 పరుగుల తేడాతో విజయం సాధించింది. 166 పరుగుల లక్ష్యంతో బరిలోకి దిగిన లక్నో నిర్ణీత 20 ఓవర్లలో 8 వికెట్లు కోల్పోయి 162 పరుగులు మాత్రమే చేయగలిగింది. డికాక్‌ 39 పరుగులు చేయగా.. స్టోయినిస్‌ 38 పరుగులు నాటౌట్‌ చివరివరకు నిలిచినా లక్నోను గెలిపించలేకపోయాడు. రాజస్తాన్‌ బౌలర్లలో చహల్‌ 4, బౌల్ట్‌ 2, ప్రసిధ్‌ కృష్ణ, కుల్దీప్‌ సేన్‌ చెరొక వికెట్‌ తీశారు.

రాజస్తాన్‌ రాయల్స్‌తో జరుగుతున్న మ్యాచ్‌లో లక్నో ఓటమి దిశగా పయనిస్తోంది. 166 పరుగుల లక్ష్యంతో బరిలోకి దిగిన లక్నో ప్రస్తుతం 6 వికెట్ల నష్టానికి 101 పరుగులు చేసింది. 39 పరుగులు చేసిన డికాక్‌ చహల్‌ బౌలింగ్‌లో రియాన్‌ పరాగ్‌కు క్యాచ్‌ ఇచ్చి వెనుదిరిగాడు. 

దీపక్‌ హుడా(25) రూపంలో లక్నో సూపర్‌జెయింట్స్‌ నాలుగో వికెట్‌ కోల్పోయింది. కుల్దీప్‌ సేన్‌ బౌలింగ్‌లో దీపక్‌ హుడా క్లీన్‌బౌల్డ్‌ అయ్యాడు. ప్రస్తుతం లక్నో 4 వికెట్ల నష్టానికి 52 పరుగులు చేసింది.

166 పరుగుల లక్ష్యంతో బరిలోకి దిగిన లక్నోకు ఆదిలోనే షాక్‌ తగిలింది. ఓపెనర్‌ కేఎల్‌ రాహుల్‌ బౌల్ట్‌ వేసిన తొలి బంతికే గోల్డెన్‌ డకౌట్‌ అయ్యాడు. ఆ తర్వాత ఓవర్ రెండో బంతికి కె గౌతమ్‌ కూడా గోల్డెన్‌ డక్‌ అయ్యాడు. దీంతో ఒక పరుగుకే రెండు వికెట్లు కోల్పోయింది. ఆ తర్వాత 8 పరుగులు చేసిన జాసన్‌ హోల్డర్‌ ప్రసిధ్‌ కృష్ణ బౌలింగ్‌లో వెనుదిరిగాడు. ప్రస్తుతం లక్నో 3 వికెట్ల నష్టానికి 19 పరుగులు చేసింది. 

లక్నో సూపర్‌జెయింట్స్‌తో జరుగుతున్న మ్యాచ్‌లో రాజస్తాన్‌ రాయల్స్‌ నిర్ణీత 20 ఓవర్లలో 6 వికెట్ల నష్టానికి 165 పరుగులు చేసింది. షిమ్రోన్‌ హెట్‌మైర్‌ 36 బంతుల్లో  ఒక ఫోర్‌, ఆరు సిక్సర్లతో 59 పరుగుల మెరుపు ఇన్నింగ్స్‌ ఆడాడు. దేవదత్‌ పడిక్కల్‌ 29 పరుగులు చేయగా.. అశ్విన్‌ 28 పరుగుల వద్ద రిటైర్డ్‌ ఔట్‌గా వెనుదిరిగాడు. లక్నో బౌలర్లలో జాసన్‌ హోల్డర్‌, కృష్ణప్ప గౌతమ్‌ చెరో రెండు వికెట్లు తీయగా.. ఆవేశ్‌ ఖాన్‌ ఒక వికెట్‌ తీశాడు.

17 ఓవర్లు ముగిసేసరికి రాజస్తాన్‌ రాయల్స్‌ 4 వికెట్ల నష్టానికి 116 పరుగులు చేసింది. హెట్‌మైర్‌ 21 , అశ్విన్‌ 26 పరుగులతో ఆడుతున్నారు.

లక్నో సూపర్‌ జెయింట్స్‌తో మ్యాచ్‌లో రాజస్తాన్‌ రాయల్స్‌ ఒకే ఓవర్లో రెండు వికెట్లు కోల్పోయింది. కె గౌతమ్‌ వేసిన ఇన్నింగ్స్‌ 10వ ఓవర్‌ తొలి బంతికి పడిక్కల్‌(29)‌ఔట్‌ కాగా.. ఐదో బంతికి వాండర్‌ డుసెన్‌ క్లీన్‌బౌల్డ్‌ అయ్యాడు. ప్రస్తుతం రాజస్తాన్‌ 10 ఓవర్లలో 4 వికెట్ల నష్టానికి 67 పరుగులు చేసింది.

8 ఓవర్లు ముగిసేసరికి రాజస్తాన్‌ రాయల్స్‌ వికెట్‌ నష్టానికి 58 పరుగులు చేసింది. పడిక్కల్‌ 28, శాంసన్‌ 12 పరుగులతో ఆడుతున్నారు.

సూపర్‌ ఫామ్‌లో ఉన్న జాస్‌ బట్లర్‌ 13 పరుగులు చేసి ఆవేశ్‌ ఖాన్‌ బౌలింగ్‌లో క్లీన్‌బౌల్డ్‌ అయ్యాడు. ప్రస్తుతం రాజస్తాన్‌ రాయల్స్‌ వికెట్‌ నష్టానికి 44 పరుగులు చేసింది. పడిక్కల్‌ 25, శాంసన్‌ 2 పరుగులతో ఆడుతున్నారు.

లక్నోతో జరుగుతున్న మ్యాచ్‌లో రాజస్తాన్‌ రాయల్స్‌ 4 ఓవర్లలో వికెట్‌ నష్టపోకుండా 38 పరుగులు చేసింది. పడిక్కల్‌ 24, జాస్‌ బట్లర్‌ 12 పరుగులతో ఆడుతున్నారు.

ఐపీఎల్‌ 2022లో భాగంగా ఆదివారం రాజస్తాన్‌ రాయల్స్‌, లక్నో సూపర్‌ జెయింట్స్‌ మధ్య ఆసక్తికర పోరు మొదలైంది. టాస్‌ గెలిచిన లక్నో సూపర్‌ జెయింట్స్‌ బౌలింగ్‌ ఎంచుకుంది. ఈ సీజన్‌లో రాజస్తాన్‌ రాయల్స్‌.. లక్నో సూపర్‌ జెయింట్స్‌లు బలంగా కనిపిస్తున్నాయి. లక్నో తాను ఆడిన నాలుగు మ్యాచ్‌ల్లో మూడు గెలిచి ఒక పరాజయం చూసింది. అదే సమయంలో రాజస్తాన్‌ మూడు మ్యాచ్‌ల్లో రెండింటిలో గెలిచి ఒక మ్యాచ్‌ ఓడింది.