గ్రామీణ ప్రతిభకు వెలుగుల వేదిక

పిడుగురాళ్ల రూరల్‌ /సత్తెనపల్లి: పాఠశాలలో చదువుతోపాటు క్రీడలు కూడా విద్యార్థి ఉజ్వల భవిష్యత్తుకు కీలకం. ఈ సత్యాన్ని మరోసారి రుజువు చేస్తూ, గ్రామీణ ప్రాంతాల్లోని అణగారిన ప్రతిభను వెలికితీసేందుకు స్కూల్‌ గేమ్స్‌ ఫెడరేషన్‌ (ఎస్‌జీఎఫ్‌) క్రీడా సమరానికి ఉమ్మడి గుంటూరు జిల్లాలో, పల్నాడు జిల్లాలో ఫేజ్‌–1కు రంగం సిద్ధమైంది. మారుమూల పల్లెల్లోని మట్టి మైదానాల నుంచి జాతీయ స్థాయి వేదికల వరకు విద్యార్థులను తీసుకెళ్లే ఈ ప్రక్రియ విద్యార్థులకు ఎంతో ఉపయోగకరం.

గ్రామీణ క్రీడాకారులకు అవకాశం

విద్యార్థుల్లో దాగి ఉన్న క్రీడా నైపుణ్యాన్ని వెలికితీసేందుకు స్కూల్‌ గేమ్స్‌ ఫెడరేషన్‌ (ఎస్‌జీఎఫ్‌) మోగిస్తున్న గంట.. పల్నాటి గ్రామీణ విద్యార్థుల పాలిట నిజమైన వరంలా మారనుంది. గ్రామీణ ప్రభుత్వ పాఠశాలల్లో చదివే విద్యార్థుల్లో సహజమైన నైపుణ్యాలు, పట్టుదల మెండుగా ఉంటాయి. సరైన వసతులు, ఖరీదైన కోచింగ్‌ లేక వెనుకబడుతున్న వీరికి ఎస్‌జీఎఫ్‌ పోటీలు చక్కటి రాజమార్గం వేస్తున్నాయి. మండల స్థాయి నుంచి ప్రారంభమయ్యే ఈ ప్రయాణం.. జాతీయ స్థాయి పోటీల వరకు అత్యంత పారదర్శకంగా సాగుతుంది.

పలు క్రీడాంశాల వైవిధ్య వేదిక

ఈ ఏడాది ఏకంగా 46 విభిన్న క్రీడాంశాల్లో (అథ్లెటిక్స్‌, టీమ్‌ గేమ్స్‌, మార్షల్‌ ఆర్ట్స్‌ తదితర విభాగాల్లో) అండర్‌–14, 17, 19 వయసుల వారీగా పోటీలు హోరాహోరీగా జరగనున్నాయి. కేవలం కొన్ని సంప్రదాయ ఆటలకే పరిమితం కాకుండా, విభిన్న రంగాల్లో గ్రామీణ విద్యార్థులు సత్తా చాటేందుకు ఇది అరుదైన అవకాశం. ప్రతి దశలోనూ నిపుణులైన వ్యాయామ ఉపాధ్యాయులు అందించే సాంకేతిక మెలకువలు క్రీడాకారులకు శ్రీరామరక్షగా నిలుస్తున్నాయి.

28 నుంచి ఎస్‌జీఎఫ్‌ ఫేజ్‌–1 ప్రారంభం

పల్నాడు జిల్లాలో ఈ నెల 28వ తేదీ నుంచి ఎస్‌జీఎఫ్‌ ఫేజ్‌–1 ప్రారంభం కానుంది. వేదికలను కూడా ఖరారు చేశారు.

గుంటూరు జిల్లాలో ఇలా...

ఈ నెల 28వ తేదీ నుంచి గుంటూరు జిల్లాలో ఎస్‌జీఎఫ్‌ ఫేజ్‌–1 ప్రారంభం కానుంది. వేదికలు కూడా ఖరారు అయ్యాయి.

ఉన్నత విద్య, ఉద్యోగాల్లో రిజర్వేషన్‌

ఎస్‌జీఎఫ్‌ వేదికగా జిల్లా, రాష్ట్ర, జాతీయ స్థాయి పోటీల్లో పతకాలు సాధించిన విద్యార్థులకు భవిష్యత్తులో మంచి ప్రయోజనాలు ఉంటాయి. ఇంజినీరింగ్‌, మెడికల్‌ వంటి ఉన్నత విద్యా కోర్సుల్లో, ప్రభుత్వ రంగ ఉద్యోగాల నియామకాల్లో స్పోర్ట్స్‌ కోటా ద్వారా ప్రత్యేక రిజర్వేషన్లు పొందవచ్చు. తద్వారా జీవితంలో ఆర్థికంగానూ ప్రయోజనం పొందవచ్చు.