TV
దాములూరు(ఇబ్రహీంపట్నం): విద్యుతాఘాతంతో ఝార్ఖండ్ రాష్ట్రానికి చెందిన కార్మికుడు మృతి చెందిన ఘటన మండలం పరిధిలోని దాములూరులో ఆదివారం చోటు చేసుకుంది. సేకరించిన వివరాల ప్రకారం ఝార్ఖండ్ రాష్ట్రానికి చెందిన కొంతమంది కార్మికులు దాములూరులో నూతన విద్యుత్ స్తంభాలు ఏర్పాటు పనుల కోసం ఓ కాంట్రాక్టర్ తీసుకొచ్చారు. ఈ క్రమంలో విద్యుత్ లైన్మన్ విద్యుత్ తీగల పనులు చేయిస్తుండగా డుంబి సింకు (33) అనే కార్మికుడు విద్యుదాఘాతానికి గురయ్యాడు. వెంటనే అతడిని 108 వాహనంలో నిమ్రా వైద్యశాలకు తరలించగా వైద్యులు పరీక్షించి అప్పటికే మృతి చెందినట్లు నిర్ధారించారు. విద్యుత్ లైన్మన్ నిర్లక్ష్యం కారణంగానే కార్మికుడు మరణించాడని తోటి కార్మికులు ఆరోపించారు. మృతుడి కుటుంబానికి న్యాయం చేయాలని తోటి కార్మికులు డిమాండ్ చేశారు. గ్రామం వెలుపల ఉన్న విద్యుత్ లైన్లు ఒకదానికి ఒకటి కలుసుకోవడంతో ప్రమాదం జరిగిందని విద్యుత్ శాఖ అధికారులు చెబుతున్నారు. విషయం తెలుసుకున్న ఇబ్రహీంపట్నం పోలీసులు ఘటనా స్థలానికి చేరుకుని వివరాలు సేకరించారు. అనంతరం మృతదేహాన్ని పోస్టుమార్టం నిమిత్తం విజయవాడ ప్రభుత్వ వైద్యశాలకు తరలించారు. ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.
సురక్షితంగా బయటపడిన ప్రయాణికులు
