ఢిల్లీ సదస్సులో పాల్గొన్న గురుకుల పాఠశాల ప్రిన్సిపాల్‌

గన్నవరంరూరల్‌: బోధన, అభ్యాస ప్రక్రియలో సృజనాత్మక ఆచరణలపై జాతీయ స్థాయి వర్క్‌షాప్‌కు గన్నవరం మండలం వీరపనేనిగూడెం డాక్టర్‌ బీఆర్‌ అంబేద్కర్‌ సాంఘిక సంక్షేమ బాలికల గురుకుల పాఠశాల ప్రిన్సిపాల్‌ వై.యశోదలక్ష్మి రాష్ట్ర ప్రభుత్వం తరఫున హాజరయ్యారు. ఢిల్లీలో వారం రోజుల పాటు ఏపీ సమగ్ర శిక్షణ ఆధ్వర్యాన జరుగుతున్న జాతీయ విద్య ప్రణాళిక, పరిపాలన సంస్థ నిర్వహిస్తున్న ఈ సదస్సులో పాల్గొనే అరుదైన గౌరవం ఆమెకు దక్కింది. విద్యార్థుల సామర్థ్య వికాసం కోసం సూచనలు, సలహాలు సదస్సులో అందించాల్సి ఉంది. స్వదేశీ జ్ఞానాన్ని అమలు చేయటం, సృజన పెంచటం వంటి అంశాలపై యశోదలక్ష్మి ప్రసంగాలకు ప్రశంసలు లభించాయి.