దంచింది.. ముంచింది!

దంచింది.. ముంచింది!

ఎడతెరిపి లేని వానతో జిల్లా అతలాకుతలం

సాక్షి ప్రతినిధి, విజయవాడ: గత రెండు రోజులుగా కురుస్తున్న వర్షాలు జిల్లాను వణికిస్తున్నాయి. వాగులు, వంకలు పొంగి ప్రవహిస్తుండటంలో పలు గ్రామాలకు రాకపోకలు నిలిచి పోయాయి. పలు ప్రాంతాల్లో పంట పొలాలు నీట మునిగాయి. కృష్ణా నది ఎగువ పరీవాహక ప్రాంతాల నుంచి వరద భారీగా వస్తోంది. దీనికితోడు పాలేరు నుంచి 5,660 క్యూసెక్కులు, కీసర నుంచి 27,902 క్యూసెక్కులు, బుడమేరు నుంచి 3,500 క్యూసెక్కుల నీరు ప్రకాశం బ్యారేజీలోకి వచ్చి చేరుతోంది. దీంతో మధ్యాహ్నం 2గంటల సమయంలో ప్రకాశం బ్యారేజీకి సంబంధించిన 69 గేట్లు ఎత్తి 4,16,622 క్యూసెక్కుల నీటిని సముద్రంలోకి విడుదల చేస్తున్నారు. పులిచింతల ప్రాజెక్టుకు మధ్యాహ్నం 3గంటల నుంచి కొంత మేర వరద తగ్గడంతో, శుక్రవారం ఉదయానికి వరద తగ్గుతుందని అధికారులు అంచనా వేస్తున్నారు. అయితే నేడు కూడా అల్పపీడన ప్రభావంతో వర్షాలు కురిసే అవకాశం ఉందన్న వాతావరణ శాఖ హెచ్చరికల నేపథ్యంలో కృష్ణా ఎగువ, దిగువ పరీవాహక ప్రాంతాల ప్రజలను అధికారులు అప్రమత్తం చేశారు. ఈ ఏడాది జూన్‌ నుంచి ఇప్పటి వరకు ప్రకాశం బ్యారేజీ నుంచి 551 టీఎంసీల నీటిని విడుదల చేశారు. జూలై 20వ తేదీ నుంచి ప్రకాశం బ్యారేజి నుంచి వరద నీటిని నిరంతరాయంగా సముద్రంలోకి విడుదల చేస్తూనే ఉన్నారు.

విజయవాడను వదలని వాన..

బుధవారం వినాయక చవితి పండుగ రోజు ఉదయం బెజవాడలో భారీ వర్షం కురిసింది. నగరంలో వీధులన్నీ జలమయమయ్యాయి. డ్రెయిన్‌లు పొంగి ప్రవహించాయి. ప్రధాన రహదారులన్నీ మోకాళ్లలోతు పైన నీటితో వాగులను తలపించాయి. వాహనదారులు తీవ్ర ఇబ్బందులు పడ్డారు. వినాయక మండపాల వద్దకు నీరు చేరింది. గురువారం తేలికపాటి వర్షాలు కురిశాయి. ఎగువన కురిసిన వర్షాలకు బుడమేరుకు 3,500 క్యూసెక్కుల నీరు వస్తోంది. అయితే డైవర్షన్‌ చానల్‌ ద్వారా ఆ నీటిని కృష్ణా నదిలోకి విడుదల చేస్తున్నారు. కొంత మేర వరద పెరిగినా ఇబ్బంది ఏమి ఉందడని నీటి పారుదల శాఖ అధికారులు పేర్కొన్నారు. డైవర్షన్‌ కాలువ ద్వారా 10,500 క్యూసెక్కుల నీటిని మళ్లించే అవకాశం ఉందని తెలిపారు.

జిల్లాలో గడచిన 48 గంటల్లో భారీ వర్షాలు కురిశాయి. బుధవారం ఉదయం నుంచి గురువా రం ఉదయం 8.30 గంటల మధ్య 80.43 మిల్లీమీటర్ల వర్షపాతం నమోదైంది.

బుధవారం ఉదయం 8.30 గంటలకు..

జగ్గయ్యపేటలో 32.4, చందర్లపాడులో 24.4, పెనుగంచిప్రోలులో 23.4, తిరువూరులో 22.6, మైలవరంలో 18.4, గంపలగూడెంలో 18.2, కంచికచర్లలో 17.6, విజయవాడ ఈస్ట్‌లో 17.2, నార్త్‌లో 17.0, సెంట్రల్‌, వెస్ట్‌లో 16.4 చొప్పున, నందిగామ, జి కొండూరు మండలాల్లో 15.6 మిల్లీమీటర్ల చొప్పున వర్షపాతం నమోదైంది.

గురువారం ఉదయం 8.30 వరకు..

జి. కొండూరులో 152.8, చందర్లపాడులో 123.0, కంచికచర్లలో 98.8, తిరువూరులో 98.4, వీరులపాడులో 96.2, ఏ కొండూరులో 88.4, ఇబ్రహీంపట్నంలో 88.4, గంపలగూడెంలో 87.6, విస్సన్నపేటలో 84.4, రెడ్డిగూడెంలో 78.4, మైలవరంలో 69.2, వత్సవాయిలో 67.8, పెనుగంచిప్రోలులో 67.4, నందిగామలో 64.4, జగ్గయ్యపేటలో 62.4, విజయవాడ రూరల్‌లో 56.8మిల్లీమీటర్ల వర్షపాతం నమోదైంది.

1/3

దంచింది.. ముంచింది!

2/3

దంచింది.. ముంచింది!

3/3

దంచింది.. ముంచింది!