అల్మాస్‌గూడలో హైడ్రా పంజా

● రోడ్లను ఆక్రమించి ఏర్పాటు చేసిన బాక్స్‌ క్రికెట్‌ స్టేడియం కూల్చివేత

● మూసిన మూడు రోడ్లు, పార్కు స్థలానికి విముక్తి

● హైడ్రా సీఐపై దాడికి భూ యజమానుల యత్నం

బడంగ్‌పేట్‌: కార్పొరేషన్‌ పరిధిలోని అల్మాస్‌గూడలో హైడ్రా పంజా విసిరింది. రోడ్లను ఆక్రమించి నిర్మించిన బాక్స్‌ క్రికెట్‌ స్టేడియాన్ని నేలమట్టం చేసి కాలనీవాసులకు విముక్తి కల్పించింది. వివరాలు ఇలా ఉన్నాయి. అల్మాస్‌గూడలో బోయపల్లి కుటుంబీకులు 1982లో జీపీ లే అవుట్‌ చేశారు. కాలనీకి బోయపల్లి ఎన్‌క్లేవ్‌ అని పేరుపెట్టారు. సర్వే నంబర్‌ 39,40,41,42,44లో 5.7 ఎకరాల లే అవుట్‌ ఉండగా అందులో మూడు రోడ్లు, 236 గజాల పార్కు స్థలం చూపించి ప్లాట్లు విక్రయించారు. భూ యజమానులు మూడు లింక్‌ రోడ్లతో పాటు పార్కు జాగా ఆక్రమించి చుట్టూ ఫెన్సింగ్‌ వేశారు. ఆక్రమించిన రోడ్ల స్థానంలో బాక్స్‌ క్రికెట్‌ స్టేడియం నిర్మించారు. దీనిపై కాలనీవాసులు హైడ్రాకు ఫిర్యాదు చేయడంతో రెండు రోజుల క్రితం హైడ్రా అధికారులు లే అవుట్‌ను పరిశీలించి కబ్జాను నిర్ధారించారు. గురువారం హైడ్రా సీఐ తిరుమలేశ్‌ నేతృత్వంలో 40 మందికి పైగా సిబ్బంది యంత్రాలతో అక్కడికి చేరుకున్నారు.