డ్రగ్స్‌ కట్టడికి డీసీఏ, ఈగల్‌ ఉమ్మడి కార్యాచరణ

మంగళగిరి టౌన్‌: రాష్ట్రంలో మాదకద్రవ్యాల అక్రమ రవాణా, విక్రయాలను అరికట్టడంతోపాటు యువతను డ్రగ్స్‌ బారి నుంచి రక్షించేందుకు డ్రగ్స్‌ కంట్రోల్‌ అడ్మినిస్ట్రేషన్‌, ఈగల్‌ విభాగాల మధ్య సమన్వయాన్ని మరింత బలోపేతం చేయాలని నిర్ణయించినట్లు ఈగల్‌ చీఫ్‌ ఐజీ ఆకే రవికృష్ణ, డీసీఏ డైరెక్టర్‌ జనరల్‌ పి.అరుణ్‌బాబు పేర్కొన్నారు. మంగళగిరి పట్టణంలోని ఈగల్‌ ప్రధాన కార్యాలయంలో మంగళవారం ఉన్నతాధికారులతో సమావేశం నిర్వహించారు. ఈ సందర్భంగా వారు మాట్లాడుతూ ఎన్‌ఆర్‌ఎక్స్‌ మందులు, ఓపియాయిడ్స్‌ దుర్వినియోగాన్ని అరికట్టడం, ఔషధాల అక్రమ సరఫరాపై నిఘా పెంచడం, సమాచార మార్పిడి, సంయుక్త తనిఖీలను విస్తృతం చేయడంపై దృష్టి సారించామని తెలిపారు. గంజాయి సహా ఇతర మాదకద్రవ్యాల అక్రమ రవాణా, విక్రయాలను నిరోధించేందుకు ఆపరేషన్‌ గరుడ వంటి కార్యక్రమాలను సమర్థంగా అమలు చేయాలని నిర్ణయించినట్లు పేర్కొన్నారు.