అమ్మకానికి సువెన్‌ ఫార్మా! 

హైదరాబాద్, బిజినెస్‌ బ్యూరో: కంపెనీ అమ్మకం లేదా మెజారిటీ వాటా విక్రయానికి సువెన్‌ ఫార్మాస్యూటికల్స్‌ కసరత్తు చేస్తున్నట్టు సమాచారం. మెజారిటీ వాటా అమ్మకం విషయమై సలహా కోసం ఇన్వెస్ట్‌మెంట్‌ బ్యాంక్‌ను నియమించు కున్నట్టు తెలుస్తోంది. కంపెనీని విక్రయించేందుకు ప్రైవేట్‌ ఈక్విటీ, వ్యూహాత్మక సంస్థలతో చర్చలు జరుగుతున్నాయి. సువెన్‌ ఫార్మాస్యూటికల్స్‌లో ప్రమోటర్లకు 60 శాతం వాటా ఉంది.

డీల్‌ ద్వారా వచ్చే మొత్తాన్ని సువెన్‌ లైఫ్‌ సైన్సెస్‌లో ఔషధాల అభివృద్ధికి ఖర్చు చేయనున్నారు. ఇప్పటి వరకు సువెన్‌ ఫార్మా నుంచి డివిడెండ్‌ రూపంలో సమకూరిన మొత్తాన్ని ప్రమోటర్లు ఇందుకోసం వ్యయం చేశారు. సువెన్‌ లైఫ్‌ నుంచి 2020లో సువెన్‌ ఫార్మా విడిపోయింది. క్రితం ముగింపుతో పోలిస్తే సువెన్‌ ఫార్మాస్యూటికల్స్‌ షేరు ధర బీఎస్‌ఈలో బుధవారం 1.52 శాతం ఎగసి రూ.491.10 వద్ద స్థిరపడింది.