సెల్‌ఫోన్‌ రికవరీలో ‘అనంత’ టాప్‌

అనంతపురం: సెల్‌ఫోన్ల రికవరీలో 10 వేల మైలురాయిని దాటి అనంతపురం పోలీసులు దేశంలోనే అగ్రస్థానంలో నిలిచారు. ఇప్పటివరకు మొత్తం 10,195 ఫోన్ల రికవరీ చేసి, బాధితులకు అందజేశారు. వీటివిలువ సుమారు రూ.18.85 కోట్లుగా నిర్ధారించారు.

 తాజాగా రికవరీ చేసిన 1,309 మొబైల్‌ ఫోన్లను బాధితులకు మంగళవారం అనంతపురంలోని పోలీస్‌ పరేడ్‌ మైదానంలో ఎస్పీ పి.జగదీష్‌ అందజేశారు. వీటివిలువ రూ.3.45 కోట్లు ఉంటుందని పోలీస్‌ అధికారులు తెలిపారు. సెల్‌ఫోన్‌ పోగొట్టుకున్న తర్వాత ఆచూకీ దొరకదనుకునే ఫోన్లను సైతం రికవరీ చేసి అందజేయడంతో బాధితులు హర్షం వ్యక్తం చేస్తూ పోలీసులను అభినందించారు. ఇప్పటివరకు దేశవ్యాప్తంగా 20 రాష్ట్రాల్లోని బాధితులకు 1,156 ఫోన్లు అందజేశారు.