ప్రజారోగ్యంపై ఇంత నిర్లక్ష్యమా..?

సాక్షి, అమరావతి: పోలవరం జిల్లా, ఎటపాక మండలం, గొల్లగూపు గ్రామంలో ఈ ఏడాది సెప్టెంబర్‌ 1న మలేరియా మాత్రలు వికటించి ఎం.జమున అనే ఏడేళ్ల బాలిక మృతి చెందడంతో పాటు 53 మంది తీవ్ర అస్వస్థతకు గురైన ఘటనను ప్రభుత్వం తీవ్రంగా పరిగణించకపోవడం పట్ల హైకోర్టు అసంతృప్తి వ్యక్తం చేసింది. ఈ ఘటనపై ఓ ఎస్‌ఐ స్టేటస్‌ రిపోర్ట్‌ దాఖలు చేయడంపై అసహనం వ్యక్తం చేసింది. కనీసం డీఎస్‌పీ స్థాయి అధికారి స్టేటస్‌ రిపోర్ట్‌ దాఖలు చేయాల్సి ఉండగా, ఓ ఎస్‌ఐ నివేదిక దాఖలు చేశారంటే, ఈ మొత్తం ఘటన విషయంలో ప్రభుత్వానికి ఉన్న సీరియస్‌నెస్‌ ఏంటో అర్థమవుతోందని ఘాటుగా వ్యాఖ్యానించింది. 

ఎస్‌ఐ దాఖలు చేసిన స్టేటస్‌ రిపోర్ట్‌లో కూడా బాలిక మృతికి దారి తీసిన పరిస్థితులు, అం­దుకు సంబంధించిన ఆధారాల సేకరణ వంటి  అవసరమైన వివరాలేవీ లేవని పేర్కొంది. ఈ మొత్తం వ్యవహారంలో ఇప్పటి వరకు తీసుకున్న చర్యలతోపాటు ఘటనపై పూర్తి వివరాలతో 10 రోజుల్లో అఫిడవిట్లు దాఖలు చేయాలని ప్రభుత్వాన్ని ఆదేశించింది. ఈ వ్యవహారంలో వ్యక్తిగతంగా పరిశీలించాలని వైద్య ఆరోగ్య శాఖ ముఖ్య కార్యదర్శి, పోలవరం జిల్లా ఎస్‌పీ, జిల్లా వైద్య అధికారిని ఆదేశించింది. ఇందుకు అనుగుణంగా జిల్లా ఎస్‌పీ, వైద్య అధికారిని ప్రతివాదులుగా చేర్చింది. ఈ మేరకు ప్రధాన న్యాయమూర్తి (సీజే) జస్టిస్‌ లీసా గిల్, న్యాయమూర్తి చల్లా గుణరంజన్‌ ధర్మాసనం బుధవారం ఉత్తర్వులు జారీ చేసింది.

మృతురాలి వైద్య రికార్డులు పరిశీలించలేదు
మాత్రలు ఎక్కడి నుంచి వచ్చాయి.. ఎవరు కొన్నారు.. ఎక్కడ తయారయ్యాయి.. ఎప్పు­డు తయారయ్యాయి.. వంటి వివరాలేవీ స్టేటస్‌ రిపోర్ట్‌లో లేవు.  ఎక్స్‌పర్ట్‌ మెడికల్‌ నివేదికను కూడా తీసుకోలేదు. మృతురాలి వైద్య రికార్డులు కూడా పరిశీలించలేదు. ఫోరెన్సిక్‌ సైన్స్‌ ల్యాబ్‌ రిపోర్ట్‌ (ఎఫ్‌ఎస్‌ఎల్‌) కూడా లేదు.  ఈ వివరాలేవీ లేకుండా స్టేటస్‌ రిపోర్ట్‌ దాఖలు చేశారు.  ఇంతటి ముఖ్యమైన వ్యవహారాన్ని అలా ఎలా తేలిగ్గా తీసుకుంటారు?   – ప్రభుత్వానికి హైకోర్టు ధర్మాసనం ప్రశ్న

విచారణ జరపాలని హైకోర్టుకు పంపిన సుప్రీంకోర్టు
ఈ ఘటనపై తెలంగాణకు చెందిన నల్లపు మణిదీప్‌ అనే న్యాయవాది సుప్రీంకోర్టుకు లేఖ రాశారు. ఈ లేఖ ఆధారంగా సుమోటోగా విచారణ చేపట్టిన సుప్రీంకోర్టు.. ఈ వ్యవహారంపై విచారణ జరపాలని ఏపీ హైకోర్టును ఆదేశించింది. దీంతో ఈ వ్యాజ్యంపై హైకోర్టు సుమోటోగా విచారణ చేపట్టింది. ఈ వ్యాజ్యం గత నెలాఖరున విచారణకు రాగా, సీనియర్‌ న్యాయవాది ఎ.ఛాయాదేవిని కోర్టు సహాయకారి (అమికస్‌ క్యూరీ)గా నియమిస్తూ సీజే ధర్మాసనం ఉత్తర్వులు జారీచేసింది.