ఏసీపీ దామోదర్‌పై సీపీకి వల్లభనేని వంశీ లాయర్ ఫిర్యాదు

సాక్షి,విజయవాడ: సెంట్రల్ ఏసీపీ దామోదర్ తీరుపై మాజీ ఎమ్మెల్యే వల్లభనేని వంశీ ఆగ్రహం వ్యక్తం చేశారు. రోజులన్నీ ఒకేలా ఉండవనే విషయాన్ని గుర్తుంచుకోవాలని ఆయన హెచ్చరించారు.

బుధవారం వల్లభనేని వంశి, న్యాయవాది దేవి సత్యశ్రీలు పోలీస్ కమిషనర్ రాజశేఖర్ బాబును కలిశారు. సివిల్ వివాదాలతో ఎలాంటి సంబంధం లేకపోయినా, ఏసీపీ దామోదర్ అందులో జోక్యం చేసుకుంటున్నారని సీపీకి ఫిర్యాదు చేశారు.

ఈ సందర్భంగా సంబంధం లేని సివిల్ వివాదాల విషయంలో తరచూ లొకేషన్‌కు రావాలని తమను బెదిరిస్తున్నారని న్యాయవాది దేవి సత్యశ్రీ ఆరోపించారు.ఈ మేరకు మాజీ ఎమ్మెల్యే వల్లభనేని వంశీతో కలిసి పోలీస్ కమిషనర్‌ను కలిసిన ఆమె.. సివిల్ వివాదాల్లో అక్రమంగా జోక్యం చేసుకుంటున్న ఏసీపీ దామోదర్‌పై తగిన చర్యలు తీసుకోవాలని కోరుతూ వినతిపత్రం అందజేశారు.