TV
స్టీల్‌ మెల్ట్‌ షాప్‌–2లో 72 హీట్లతో కొత్త రికార్డు
ఉక్కునగరం: విశాఖ స్టీల్‌ప్లాంట్‌ మరో అద్భుతమైన ఘనతను సాధించింది. స్టీల్‌ మెల్ట్‌ షాప్‌–2 (ఎస్‌ఎంఎస్‌–2) విభాగంలో మంగళవారం అత్యధికంగా 72 హీట్లను ఉత్పత్తి చేసి సరికొత్త రికార్డును నెలకొల్పింది. గతంలో 2021 జనవరి 30న సాధించిన 68 హీట్ల రికార్డును ఇది అధిగమించింది. ఈ రికార్డు సాధనలో భాగంగా మూడు షిఫ్టుల్లోనూ 24 చొప్పున మొత్తం 72 హీట్లు ఉత్పత్తి అయ్యాయి. దీంతో రెండు స్టీల్‌ మెల్ట్‌ షాపులలో కలిపి మొత్తం 133 హీట్లు ఉత్పత్తి అయ్యాయి. అంతేకాకుండా మూడు బ్లాస్ట్‌ ఫర్నేస్‌లలో కలిపి 19,037 టన్నుల హాట్‌ మెటల్‌ ఉత్పత్తి కావడం విశేషం. ఈ రికార్డు సాధనలో కృషి చేసిన ఉద్యోగులను స్టీల్‌ప్లాంట్‌ ఉన్నతాధికారులు అభినందించారు.
