సాక్షి, అమరావతి: రాష్ట్రంలోని 65 బీసీ గురుకులాల్లో రెండు చొప్పున మొత్తం 130 గెస్ట్‌ టీచర్‌ పోస్టులను భర్తీ చేయాలని మహాత్మా జ్యోతిబా పూలే బీసీ సంక్షేమ గురుకుల విద్యాసంస్థల సొసైటీ(ఎంజేపీబీసీడబ్ల్యూఆర్‌ఈఎస్‌) బోర్డ్‌ ఆఫ్‌ గవర్నెన్స్‌(బీవోజీ) సమావేశం నిర్ణయించింది. సోమవారం బీసీ సంక్షేమ శాఖ మంత్రి ఎస్‌.సవిత అధ్యక్షతన నిర్వహించిన సమావేశంలో పలు నిర్ణయాలు తీసుకున్నారు.715 మంది ఉద్యోగులను పర్మినెంట్‌ చేసే విషయాన్ని ప్రభుత్వం దృష్టికి తీసుకెళ్లాలని నిర్ణయించారు. ఉమ్మడి 13 జిల్లాల్లో డిస్ట్రిక్ట్‌ కో–ఆర్డీనేటర్‌ పోస్టుల భర్తీకి, ఆర్ట్, క్రాఫ్ట్, సంగీత టీచర్లకు టీజీటీ స్కేల్‌ వర్తింపజేసేందుకు ఆమోదం తెలిపారు. గురుకులాల్లో విద్యార్థి మరణిస్తే బాధిత కుటుంబానికి రూ.3 లక్షల నష్టపరిహారంతోపాటు దహన సంస్కారాలకు రూ.10 వేలు అందించేందుకు నిర్ణయించారు.

సాక్షి, రాజమహేంద్రవరం: కూటమి ప్రభుత్వం ప్రభుత్వ విద్యారంగాన్ని నిర్వీర్యం చేసేందుకు కుట్ర పన్నిందా..? ఇందులో భాగంగానే పాఠశాలల పునర్మిర్మాణ ప్రక్రియ పేరుతో గందరగోళానికి తెర తీసిందా..? ఈ పరిణామం ప్రాథమిక విద్యపై తీవ్ర ప్రభావం చూపనుందా..? మిగులు ఉపాధ్యాయులు పెరిగి ఉపాధ్యాయ పోస్టుల భర్తీకి భంగం కలగనుందా..? అంటే అవుననే సమాధానం వస్తోంది ఉపాధ్యాయులు, ఆయా సంఘాల నుంచి.అంతా అస్తవ్యస్తం..!ప్రభుత్వ పాఠశాలలను నిర్వీర్యం చేసే క్రమంలో కూటమి ప్రభుత్వం అసంబద్ధ విధానాల అమలుకు శ్రీకారం చుట్టింది. గత ప్రభుత్వం అమల్లోకి తీసుకువచ్చిన క్లస్టర్‌ విధానాన్ని తొలగించి మోడల్‌ స్కూల్స్‌ విధానానికి శ్రీకారం చుట్టింది. జాతీయ విద్యా విధానానికి అనుగుణంగా గత ప్రభుత్వం జీవో 117 పేరిట పాఠశాలల విలీన ప్రక్రియ చేపట్టింది. కూటమి అధికారంలోకి వచ్చాక జీఓను రద్దు చేసింది. ఇటీవల నిర్వహించిన ఉపాధ్యాయుల సర్దుబాటు ప్రక్రియలోనూ ఉపాధ్యాయుల నుంచి విమర్శలు ఎదుర్కొంది. తాజాగా పాఠశాలల పునర్మిర్మాణం పేరుతో కొత్త విధానానికి తెర తీసింది. ఇందులో భాగంగా తొమ్మిది రకాల పాఠశాలలకు గ్రీన్‌ సిగ్నల్‌ ఇచ్చింది. కొన్ని రోజులుగా చేసిన కసరత్తు మేరకు మంగళవారం ప్రభుత్వం ఉత్తర్వులు జారీ చేసింది. అయితే కూటమి ప్రభుత్వం చేపట్టిన తాజా చర్యలతో మిగులు పోస్టులు పెరిగి, ప్రాథమిక విద్యకు నష్టం తప్పదని ఉపాధ్యాయ సంఘాలు మండిపడుతున్నాయి.యూపీ స్కూళ్ల కొనసాగింపుపాఠశాలల పునర్మిర్మాణం పేరుతో కూటమి ప్రభుత్వం ప్రాథమికోన్నత (యూపీ) పాఠశాలలను ఎత్తివేయాలని భావించింది. తల్లిదండ్రులు, ఆయా ప్రాంతాల ప్రజల నుంచి తీవ్ర వ్యతిరేకత వ్యక్తం అవడంతో ప్రభుత్వం వెనక్కు తగ్గింది. ఈ విషయాన్ని జిల్లా కలెక్టర్‌ ద్వారా ప్రభుత్వానికి నివేదించారు. దీంతో ఆయా ప్రాంతాల్లో ఉన్న యూపీ స్కూళ్లను యథావిధిగా కొనసాగించేందుకు అంగీకరించింది. తూర్పుగోదావరి జిల్లా వ్యాప్తంగా 72 అప్పర్‌ ప్రైమరీ పాఠశాలలున్నాయి. ఇవి యథావిధిగా కొనసాగనున్నాయి.767 పోస్టుల సర్దుబాటుఉపాధ్యాయుల సర్దుబాటుపై గురువులు గుర్రుగా ఉన్నారు. అసంబద్ధ విధానాలతో ప్రక్రియ చేపట్టిందని ఆగ్రహావేశాలు వ్యక్తం చేస్తున్నారు. గతంలో ఇదే విషయమై ప్రభుత్వాన్ని ప్రశ్నించగా సర్దుబాటు ప్రక్రియ కాస్తా గందరగోళంగా మారింది. ఉమ్మడి తూర్పుగోదావరి జిల్లావ్యాప్తంగా విద్యార్థి, ఉపాధ్యాయ నిష్పత్తి ఆధారంగా ప్రభుత్వ, జెడ్పీ, మండల పరిషత్‌, మున్సిపల్‌ పాఠశాలల వారీగా మంగళవారం జాబితా విడుదల చేసింది. ఉమ్మడి తూర్పుగోదావరి జిల్లావ్యాప్తంగా 767 మిగులు ఉపాధ్యాయులు ఉన్నారు. వారిని వివిధ పాఠశాలలకు సర్దుబాటు చేస్తూ నిర్ణయం తీసుకున్నారు. దీంతో భవిష్యత్తులో ఎస్‌జీటీ (సెకండరీ గ్రేడ్‌) పోస్టుల భర్తీ కలగానే మారనుంది. ఉమ్మడి తూర్పుగోదావరి జిల్లాలో 371 మంది ఉపాధ్యాయులను వివిధ పాఠశాలల్లో స్కూల్‌ అసిస్టెంట్‌, హెచ్‌ఎం పోస్టులకు, మోడల్‌ ప్రైమరీ పాఠశాల్లో సర్దుబాటు చేశారు. 31 స్కూల్‌ అసిస్టెంట్‌ పోస్టులను సెకండరీ గ్రేడ్‌ టీచర్లుగా సర్దుబాటు చేశారు. హెచ్‌ఓడీ పూల్‌లో ఉన్న 355 మంది ఉపాధ్యాయులను సైతం వివిధ పాఠశాలలకు సర్దుబాటు చేస్తున్నారు.డీఎస్సీని మరిపించేందుకు ఎత్తులుటీడీపీ ప్రభుత్వం అధికారంలోకి వచ్చిన వెంటనే మెగా డీఎస్సీ నిర్వహిస్తామని చంద్రబాబు, లోకేష్‌ ఎన్నికల సమయంలో హామీలు గుప్పించారు. ప్రభుత్వం ఏర్పాటైంది. ఇక డీఎస్సీ నిర్వహించాల్సిన సమయం ఆసన్నం కావడంతో ఎలాగోలా మెగా డీఎస్సీని కాలయాపన చేసేందుకు ఉపాధ్యాయుల సర్దుబాటు ప్రక్రియకు శ్రీకారం చుట్టారు. సర్దుబాటుకు ఉన్న అర్థాన్నే మార్చేశారని ఉపాధ్యాయ సంఘాలు స్పష్టం చేస్తున్నాయి. వర్క్‌ అడ్జెస్ట్‌మెంట్‌ (సర్దుబాటు) అంటే ఒకటి లేదా రెండు నెలల పాటు మిగులు టీచర్లను అవసరమైన చోట తాత్కాలికంగా వినియోగించుకోవడం. ఇదిలా ఉంటే టీడీపీ ప్రభుత్వం మాత్రం అందుకు భిన్నంగా వ్యవహరిస్తోందన్న వాదన ఉపాధ్యాయుల నుంచి వినిపిస్తోంది.ఉపాధ్యాయుల నియామకం ఇలా..● ఫౌండేషన్‌ స్కూల్‌ (పీపీ1, పీపీ2 1–2వ తరగతి)1–30 మంది విద్యార్థులకు 1 ఎస్జీటీ, 31–60 విద్యార్థులకు 2 ఎస్జీటీలను నియమించారు.● బేసీక్‌ ప్రైమరీ స్కూల్‌ (పీపీ–1, పీపీ2, 1–5వ తరగతి)లో 20 మందికి ఒక ఎస్జీటీ, 60 మందికి ఇద్దరు ఎస్జీటీలను నియమించారు.● మోడల్‌ ప్రైమరీ స్కూల్స్‌ (పీపీ1, 2, 1–5వ తరగతి వరకు)59 మంది విద్యార్థులకు ముగ్గురు (హెచ్‌ఎం లేదా స్కూల్‌ అసిస్టెంట్‌, ఎస్జీటీ) ఉపాధ్యాయులను కేటాయించారు. అంతేగాక 150 మంది విద్యార్థులకు నలుగురిని నియమిస్తారు.● అప్పర్‌ ప్రైమరీ పాఠశాలల్లో 1–10 వరకు ఒక స్కూల్‌ అసిస్టెంట్‌, 11 నుంచి 30 వరకు ఇద్దరు, 31 నుంచి 140 విద్యార్థులుంటే నలుగురు, 141 నుంచి 175 మందికి ఐదుగురు స్కూల్‌ అసిస్టెంట్లను నియమిస్తున్నారు.

సాక్షి, అమరావతి: డీఎస్సీ అభ్యర్థులను కూటమి ప్రభుత్వం ముప్పు తిప్పలు పెడుతోంది. అర్హత మార్కుల నిబంధన పేరుతో దరఖాస్తు దశలోనే ఎంతో మందిని అనర్హులను చేసింది. ఈ అంశంలో సుప్రీంకోర్టు మార్గదర్శకాలు, జాతీయ ఉపాధ్యాయ విద్యా మండలి (ఎన్‌సీటీఈ) నిబంధనలను సైతం పరిగణనలోకి తీసుకోకుండా సగం మంది అభ్యర్థులపై ప్రాథమిక దశలోనే వేటు వేసింది. అభ్యర్థుల నుంచి వచ్చిన ఒత్తిడి మేరకు రిజర్వుడు కేటగిరీలో ఉన్న అభ్యర్థుల అర్హత మార్కులు తగ్గించినా, జనరల్‌ అభ్యర్థుల మార్కుల నిబంధనను సడలించలేదు. డీఎస్సీ ఆన్‌లైన్‌ దరఖాస్తుకు ఇంకా తొమ్మిది రోజులే మిగిలి ఉండడంతో లక్షల మంది జనరల్‌ అభ్యర్థులు తమనూ పరిగణనలోకి తీసుకోవాల్సిందిగా ప్రభుత్వానికి విజ్ఞప్తి చేస్తున్నారు. వాస్తవానికి టెట్‌ అర్హత సాధించిన అందరికీ డీఎస్సీ రాసేందుకు అర్హత కల్పించాల్సి ఉన్నా, ప్రభుత్వం ఆ దిశగా కనీసం ఆలోచించక పోవడంపై అభ్యర్థులు ఆందోళన వ్యక్తం చేస్తున్నారు. మెగా డీఎస్సీ–2025 పేరుతో గత నెల 20న 16,347 ఉపాధ్యాయ పోస్టులకు నోటిఫికేషన్‌ ఇచ్చిన సంగతి తెలిసిందే. దాదాపు 10 నెలల పాటు ఊరించి ఇచ్చిన ఈ నోటిఫికేషన్‌లో పేర్కొన్న నిబంధనలు అభ్యర్థులకు తీరని నష్టం కలిగించాయి. గతంలో ఎన్నడూ లేని విధంగా ఎస్జీటీ పోస్టులకు ఇంటర్మీడియట్‌లో, స్కూల్‌ అసిస్టెంట్‌ పోస్టులకు డిగ్రీలో 50 శాతం మార్కులు తప్పనిసరి చేసింది. వాస్తవానికి 2011 జూలై 29కి ముందు బీఈడీ, డీఈడీ చేసిన వారికి ఈ నిబంధన వర్తించదని 2019 నవంబర్‌లో భారత ప్రభుత్వం గెజిట్‌ విడుదల చేసినా.. ఇవేమీ పట్టించుకోని కూటమి ప్రభుత్వం రాష్ట్రంలో డీఎస్సీ అభ్యర్థుల జీవితాలతో ఆడుకుంటోంది. కనీస మార్కుల అంశంలో భిన్న వైఖరి అభ్యర్థుల అర్హత మార్కుల అంశంలో అటు ప్రభుత్వం, ఇటు పాఠశాల విద్యాశాఖలు భిన్నంగా వ్యవహరించడం విస్తుగొలుపుతోంది. తొలుత ఇంటర్, గ్రాడ్యుయేషన్‌లో జనరల్‌ అభ్యర్థులకు 50 శాతం, రిజర్వుడు అభ్యర్థులకు 45 శాతం అర్హత మార్కులు తప్పనిసరి చేసింది. అనంతరం టీచర్‌ అర్హత పరీక్ష (టెట్‌)లో రిజర్వుడు అభ్యర్థులకు 40 శాతం మార్కు­లే పేర్కొన్నందున డీఎస్సీ అర్హత మార్కులను 40 శాతానికి తగ్గిస్తూ అనుబంధ జీవోలను ప్రభుత్వం విడుదల చేసింది. కానీ జనరల్‌ అభ్యర్థులకు మాత్రం 50 శాతం అలాగే ఉంచింది. వాస్తవా­నికి జనరల్‌ అభ్యర్థులకు టెట్‌లో అర్హత మార్కులు 45 శాతం ఉన్నా, ఆ మేరకు అయినా తగ్గించక పో­వడం గమనార్హం. పొరుగు రాష్ట్రమైన తెలంగాణలో గతేడాది ఫిబ్ర­వరిలో విడుదల చేసిన డీఎస్సీ–­2024లో తొలుత 50 శాతం మార్కుల నిబంధన విధించగా అభ్యర్థులు కోర్టును ఆశ్రయించారు. దాంతో ఎన్‌సీటీఈ నిబంధనల మేరకు ఇంటర్మీడియట్, డిగ్రీలలో కనీస మార్కులు జనరల్‌ అభ్యర్థులకు 45 శాతం, రిజర్వేషన్‌ అభ్యర్థులకు 40 శాతానికి తగ్గించారు. ఈ మేరకు నియమకాలు కూడా జరిగిపోయాయి. కానీ ఏపీలో మా­త్రం ఎన్‌సీటీఈ నిబంధనల అమలు చేయలేదు. నిబంధనలు ఏం చెబుతున్నాయంటే.. ఉపాధ్యాయ నియామకాలపై రాజస్థాన్, ఉత్తరఖండ్‌ రాష్ట్రాల్లో ఇదే సమస్య ఉత్పన్నమైనప్పుటు అక్కడి అభ్యర్థులు ఆయా రాష్ట్రాల హైకోర్టులను ఆశ్రయించారు. దాంతో డిగ్రీలో కనీస అర్హత మార్కులపై ఇచ్చిన తీర్పులకు అనుగుణంగా సుప్రీంకోర్టు ఎన్‌సీటీఈకి మార్గదర్శకాలు విడుదల చేసింది. కనీస మార్కులపై తగిన నిర్ణయాన్ని ప్రకటించాలని, హైకోర్టు తీర్పునకు అనుగుణంగా ఉండేలా సూ­చ­నలు చేసింది. ఎన్‌సీటీఈ 2019 నవంబర్‌ 21న గెజిట్‌ నోటిఫికేషన్‌ విడుదల చేసింది. దీని ప్రకారం ‘ఉపాధ్యాయ నియామకాల్లో 2011 జూలై 29కి ముందు బీఈడీ, డీఈడీ లేదా సమానమైన కో­ర్సులో ప్రవేశం పొందిన వారికి గ్రాడ్యుయేషన్‌లో కనీస మార్కుల శాతం వర్తించదు’ అని ప్రకటించింది. 2011 ఆగస్టు 2నాటి ఎన్‌సీటీఈ గెజిట్‌ నోటిఫికేషన్‌లోనూ కనీసం 45 శాతం మార్కులతో గ్రాడ్యు­యేషన్, ఏడాది కాల పరిమితి గల బీఈడీ చేసినవారు డీఎస్సీకి అర్హులుగా పేర్కొంది. ఈ లెక్కన ఎలా చూసినా జనరల్‌ అభ్యర్థులకు డీఎస్సీ రాసేందుకు అర్హత మార్కులు 45 శాతం మించరాదు. నిబంధనల్లో వివక్షపై తీవ్ర విమర్శలు రాష్ట్ర ప్రభుత్వం ఉపాధ్యాయ నియామకాల కోసం విడుదల చేసిన డీఎస్సీ నోటిఫికేషన్‌ నిబంధనలు పూర్తి వివక్షతో ఉన్నాయని అటు అభ్యర్థులు, ఇటు ఉపాధ్యాయ సంఘాలు విమర్శిస్తున్నాయి. ప్రభు­త్వం ఇచ్చిన జీవో నంబర్‌ 15లో 2007 వరకు డిప్లొ­మా ఇన్‌ ఎలిమెంటరీ ఎడ్యుకేషన్‌లో ప్రవేశం పొందిన వారు కనీసం 45 శాతం మార్కులతో ఇంటర్మీడియ­ట్‌ ఉంటే ఎస్జీటీకి అర్హులుగా పేర్కొంది. కానీ స్కూల్‌ అసిస్టెంట్‌ పోస్టులకు 29 జూలై 2011కు ముందు బీఈడీ లేదా బ్యాచిలర్‌ ఆఫ్‌ ఎలిమెంటరీ ఎడ్యుకేషన్‌ లేదా తత్సమాన కోర్సులో ప్రవేశం పొందిన వారికి గ్రాడ్యుయేషన్‌లో కనీస మార్కుల శాతం వర్తించ­దన్న ఎన్‌సీటీఈ గెజిట్‌ నోటిఫికేషన్‌ నిబంధనలను మెగా డీఎస్సీ ఉత్తర్వుల్లో పేర్కొనలేదు. ఈ నిబంధనను తెలంగాణ డీఎస్సీ–2024 కోసం ఇ­చ్చిన సవరణ జీవో నంబర్‌ 14లో పేర్కొన్నారు. దీని ప్రకారం రిజర్వుడు అభ్యర్థులకు 40 శాతం, జనరల్‌ అభ్యర్థులకు 45 శాతం అర్హత మార్కులుగా నిర్ణయించారు. దీంతోపాటు ఎన్‌సీటీఈ గెజిట్‌ నోటిఫి­కేషన్‌ ప్రకారం 2011 జూలై 29 నాటికి బీఈడీ, డీఈడీ చేసిన వారికి అర్హత మార్కుల నిబంధన తొలగించారు. కానీ ఏపీ ప్రభుత్వం ఎన్‌సీటీఈ నిబంధనలను పట్టించుకోకపోవడంతో అర్హులైన జనరల్‌ అభ్యర్థులకు తీవ్ర అన్యా­యం జరిగినట్లయింది. దీనిపై జనరల్‌ అభ్యర్థులు హైకోర్టును ఆశ్రయించేందుకు సిద్ధమవుతున్నట్టు సమాచారం.సీబీఎస్‌ఈ అభ్యర్థులకు అన్యాయం పదో తరగతి వరకు సీబీఎస్‌ఈలో చదివి, డీఈడీ ఇంగ్లిష్‌ మీడియంలో పూర్తి చేసిన వారికీ ప్రభుత్వం డీఎస్సీలో అన్యాయం చేసింది. సీబీఎస్‌ఈ విద్యార్థులకు మొదటి భాష ఇంగ్లిష్‌ మాత్రమే ఉంటుంది. రెండో భాషగా తెలుగు/హిందీ/ ఉర్దూ తదితర భాషలు ఎంచుకుంటారు. అయితే, మొదటి భాష తెలుగు ఉంటేనే ఎస్జీటీ పోస్టుకు దరఖాస్తు చేసుకోవాలని నిబంధన పెట్టడంతో సీబీఎస్‌ఈ అభ్యర్థులు నష్టపోతున్నారు. ఫిబ్రవరి–2024 డీఎస్సీ నోటిఫికేషన్‌లో ఈ సమస్య లేదని అభ్యర్థులు చెబుతున్నారు. జూలై–2024 టెట్‌లోనూ కూటమి ప్ర­భు­త్వం ఈ నిబంధన పేర్కొనలేదంటున్నారు. ఉన్న ఫళంగా నిబంధలు మార్చేసి అన్యాయం చేస్తే సహించమని, తాజా టెట్‌ అర్హత సాధించిన అందరికీ డీఎస్సీకి అవకాశం కల్పించాలని డిమాండ్‌ చేస్తున్నారు.

సాక్షి, అమరావతి: పాఠశాల విద్యాశాఖలో రెగ్యులర్‌ ఉపాధ్యాయులుగా పనిచేస్తున్న 2,260 టీచర్‌ పోస్టులను స్పెషల్‌ ఎడ్యుకేషన్‌ టీచర్‌ పోస్టులుగా ప్రభుత్వం మార్పు చేసింది. ఈమేరకు మంగళవారం జీవో విడుదల చేసింది. ఇలా మార్చిన పోస్టుల్లో 1,136 ఎస్‌జీటీలు, 1,124 స్కూల్‌ అసిస్టెంట్‌ పోస్టులు ఉన్నాయి. ప్రభుత్వ రెగ్యులర్‌ టీచర్లలో మిగులు (సర్‌ప్లస్‌) పోస్టులను స్పెషల్‌ టీ­చర్లుగా మా­ర్చి, ఆయా ఖాళీలను జిల్లాల వారీగా సృష్టించి ఆ స్థానాల్లో మార్పుచేసిన ఉపా­ధ్యా­యులను సర్దుబాటు చేయనున్నారు. స్కూల్‌ అసిస్టెంట్‌ స్పెషల్‌ ఎడ్యుకేషన్‌ విభా­గంలో 1,984 పోస్టులు అవసరం ఉండగా,860 పోస్టులకు అనుమతి ఉంది. మిగి­లిన 1,124 పోస్టులను కొత్త­గా మంజూరు చేసి, రెగ్యులర్‌ టీచర్లను స్పెషల్‌ టీచర్లుగా మార్పు చే­శారు. స్కూల్‌ అసిస్టెంట్‌ స్పెషల్‌ ఎడ్యుకేషన్‌ పో­స్టులను గరిష్టంగా ఉమ్మడి తూర్పుగోదావరి జిల్లాకు 151, కనిష్టంగా ఉమ్మడి నెల్లూరు జిల్లాకు 44 మంజూరు చేశారు. ఇప్పటి వరకు ప్రాథమిక పాఠశాలల్లో స్పెషల్‌ ఎడ్యుకేషన్‌ టీచర్లు లేరు. తాజాగా 1,136 ఎస్‌జీటీ పోస్టులను స్పెషల్‌ ఎడ్యుకేషన్‌ విభాగానికి మంజూరు చే­యడంతో ప్రత్యేక అవస­రాల గల పిల్లల బోధనకు అవకాశం కల్పించినట్టయింది.

మేం అధికారంలోకి రాగానే మెగా డీఎస్సీ ప్రకటించి ఖాళీగా ఉన్న అన్ని ఉపాధ్యాయ పోస్టు లను భర్తీ చేస్తాం. సీఎంగా తొలి సంతకం మెగా డీఎస్సీ ఫైలు పైనే చేస్తా..!– ఎన్నికల సభల్లో టీచర్‌ పోస్టుల ఆశావహులకు చంద్రబాబు హామీ16,347 పోస్టులతో మెగా డీఎస్సీ ఇస్తాం. త్వరలోనే నోటిఫికేషన్‌ ఇచ్చి మొత్తం నియామక ప్రక్రియను డిసెంబర్‌ నాటికి పూర్తి చేయాలని అధికారులను ఆదేశించాం..– గతేడాది జూన్‌లో సీఎంగా చంద్రబాబు ప్రకటన!మెగా డీఎస్సీకి మేం కట్టుబడి ఉన్నాం. వచ్చే విద్యా సంవత్సరం నాటికి పోస్టులు భర్తీ చేస్తాం..– తాజాగా శాసనసభలో బడ్జెట్‌ ప్రసంగంలో ఆర్థిక మంత్రి పయ్యావుల మాట! గతేడాది అసెంబ్లీ సమావేశాల్లోనూ విద్యాశాఖ మంత్రి నారా లోకేశ్‌ ఇదే మాట చెప్పారు!సాక్షి, అమరావతి: ఎప్పటి మాదిరిగానే సీఎం చంద్రబాబు ఇచ్చిన మరో హామీ నీరుగారింది! అధికారంలోకి వచ్చిన 60 రోజుల్లోనే మెగా డీఎస్సీ నిర్వహిస్తామని నమ్మబలికారు. తీరా అధికారంలోకి వచ్చాక.. త్వరలో.. త్వరలో... అంటూ తొమ్మిది నెలలు గడిచిపోయినా డీఎస్సీపై అతీగతీ లేకుండా ఉపాధ్యాయ అభ్యర్థులను వంచించిన టీడీపీ కూటమి సర్కారు టీచర్‌ పోస్టుల సంఖ్యలోనూ భారీగా కోత పెట్టింది! ఏకంగా 11 వేలకుపైగా పోస్టులను దాచిపెట్టి నిరుద్యోగులతో ఆడుకుంటోంది. ముఖ్యమంత్రిగా చంద్రబాబు తొలి సంతకం చేసిన డీఎస్సీ ఫైలుకు ఇప్పటికీ మోక్షం కలగకపోవడం ఒక ఎత్తయితే.. టీచర్‌ పోస్టుల ఖాళీలకు తూట్లు పొడవడం మరోఎత్తు! రాష్ట్రంలో మొత్తం 27,409 టీచర్‌ పోస్టులు ఖాళీగా ఉన్నట్లు స్వయంగా విద్యాశాఖే వెల్లడించగా.. కేవలం 16,347 మాత్రమే భర్తీ చేస్తామని చెప్పుకొస్తూ నెలల తరబడి కాలయాపన చేయడం గమనార్హం. డీఎస్సీ నిర్వహణ, ఉపాధ్యాయ ఖాళీలపై టీడీపీ కూటమి సర్కారు డ్రామాలపై నిరుద్యోగులు మండిపడుతున్నారు. ఖాళీలపై విద్యాశాఖ వివరాలు.. రాష్ట్రంలోని పాఠశాలలు, ఉపాధ్యాయ పోస్టుల ఖాళీలపై వివరాలు ఇవ్వాలని ‘హెల్ప్‌ ద పీపుల్‌’ చారిటబుల్‌ ట్రస్ట్‌ చైర్మన్‌ గురుతేజ ఇటీవల సమాచార హక్కు చట్టం ద్వారా పాఠశాల విద్యాశాఖను కోరారు. దీనిపై విద్యాశాఖ స్పందిస్తూ.. రాష్ట్రంలో 34,245 ప్రాథమిక పాఠశాలలు, 3,206 ప్రాథమికోన్నత పాఠశాలలు ఉన్నాయని తెలిపింది. వీటితో­పాటు రాష్ట్రంలోని అన్ని ప్రభుత్వ మేనేజ్‌మెంట్‌ పాఠశాలల్లో 2,06,393 టీచర్‌ పోస్టులు మంజూ­రైనట్లు వెల్లడించింది. అయితే ప్రస్తుతం 1,78,984 మంది మాత్రమే పనిచేస్తున్నారని, 27,409 టీచర్‌ పోస్టులు ఖాళీగా ఉన్నాయని పేర్కొంది. ఈ వివరాలతో హెల్ప్‌ ది పీపుల్‌ చారిటబుల్‌ ట్రస్ట్‌ చైర్మన్‌ జాతీయ బాలల హక్కుల పరిరక్షణ కమిషన్‌ (ఎన్‌సీపీసీఆర్‌)ను ఆశ్రయించారు. ఆంధ్రప్రదేశ్‌ ప్రభుత్వం ఉచిత, నిర్బంధ విద్యా హక్కు చట్టాన్ని ఉల్లంఘిస్తోందని, దీనిపై చర్యలు తీసుకోవాలని కోరుతూ ఏపీ పాఠశాల విద్యాశాఖ అందచేసిన వివరాలను సమర్పించారు. దీనిపై స్పందించిన ఎన్‌సీపీసీఆర్‌.. పాఠశాల విద్య డైరెక్టర్‌కు లేఖ రాసింది. నోటిఫికేషనే లేకుండా భర్తీపై హామీలా? రాష్ట్రంలో 25 వేల టీచర్‌ పోస్టులు ఖాళీగా ఉన్నాయంటూ సార్వత్రిక ఎన్నికలకు ముందు టీడీపీ కూటమి నేతలు విస్తృతంగా ప్రచారం చేశారు. తాము అధికారంలోకి వచ్చిన వెంటనే అన్ని ఖాళీలను మెగా డీఎస్సీ ద్వారా భర్తీ చేస్తామని ప్రకటించారు. పైగా గత ప్రభుత్వం 6,100 పోస్టులతో ఇచ్చిన నోటిఫికేషన్‌ను రద్దు చేసి.. మెగా డీఎస్సీ ఇస్తామంటూ ఉపాధ్యాయ అభ్యర్థుల్లో ఆశలు రేకెత్తించారు. అధికారం చేపట్టాక 16,347 డీఎస్సీ పోస్టుల భర్తీ ఫైల్‌పై తొలి సంతకం చేసిన ముఖ్యమంత్రి నారా చంద్రబాబు నాయుడు గతేడాది డిసెంబర్‌ నాటికే పోస్టుల భర్తీ పూర్తి చేస్తామని హామీ ఇచ్చారు. కానీ తొమ్మిది నెలలు గడిచినా నోటిఫికేషన్‌ ఇవ్వకుండా నిరుద్యోగుల జీవితాలతో ఆటలాడుతున్నారు. తాజాగా శాసన సభలో ఈ అంశాన్ని ప్రస్తావిస్తూ వచ్చే విద్యా సంవత్సరం నాటికి పోస్టులు భర్తీ చేస్తామని చెప్పారు. అసలు ఇంతవరకూ నోటిఫికేషన్‌ ప్రక్రియే చేపట్టకుండా భర్తీపై మాట్లాడడం ఏమిటని ఉపాధ్యాయ అభ్యర్థులు వాపోతున్నారు. రాష్ట్రంలో 13.28 శాతం టీచర్‌ పోస్టులు ఖాళీగా ఉండటం విద్యాహక్కు చట్టం ఉల్లంఘన కిందకు వస్తుందని హెచ్చరిస్తూ ఫిబ్రవరి 19వ తేదీన పాఠశాల విద్య డైరెక్టర్‌కు ఎన్‌సీపీసీఆర్‌ రాసిన లేఖ నోరు విప్పని సర్కారు ‘వైఎస్సార్‌సీపీ ప్రభుత్వం విద్యారంగాన్ని నాశనం చేస్తోంది. టీచర్‌ పోస్టులను భర్తీ చేయకుండా కాలయాపన చేస్తోంది. పాఠశాలల్లో 25 వేలకు పైగా పోస్టులు ఖాళీగా ఉన్నా భర్తీ చేయడం లేదు. మేం అధికారంలోకి రాగానే తొలి సంతకం మెగా డీఎస్సీపైనే చేస్తాం. 25 వేల ఉపాధ్యాయ ఉద్యోగాలను భర్తీ చేస్తాం’ అని ఎన్నికల వేళ చంద్రబాబుతో పాటు కూటమి నేతలు నమ్మబలికారు. తీరా అధికారంలోకి రాగానే 25 వేల ఖాళీలు కాదు.. 16,347 పోస్టులే అంటూ మాట మార్చి కనీసం వాటిని కూడా భర్తీ చేయకుండా కాలక్షేపం చేస్తున్నారు. అంతేకాకుండా వైఎస్సార్‌ సీపీ హయాంలో 6,100 పోస్టుతో ఇచ్చిన డీఎస్సీ నోటిఫికేషన్‌ను సైతం సరిగ్గా పరీక్షల ముందు రద్దు చేశారు. కొత్తగా బీఈడీ, డీఈడీ పూర్తి చేసిన వారికి కూడా మెగా డీఎస్సీలో అవకాశం కల్పిస్తామంటూ గతేడాది జూలై 2న టెట్‌ నోటిఫికేషన్‌ ఇచ్చి ఆగస్టులో ఆ పరీక్షలంటూ ప్రచారం చేశారు. అనంతరం టెట్, డీఎస్సీకి మధ్య 90 రోజులు గడువు ఉండాలంటూ టెట్‌ షెడ్యూల్‌ను తొలుత సెప్టెంబర్‌కు తర్వాత అక్టోబర్‌కు మార్చారు. టెట్‌ ఫలితాలు వచ్చి ఐదు నెలలు గడుస్తున్నా డీఎస్సీ నోటిఫికేషన్‌ మాత్రం ఇవ్వలేదు. జాతీయ బాలల హక్కుల కమిషన్‌ సీరియస్‌.. రాష్ట్రంలో వేల సంఖ్యలో టీచర్‌ పోస్టులు ఖాళీగా ఉన్నా ప్రభుత్వం భర్తీ చేయకపోవడాన్ని జాతీయ బాలల హక్కుల పరిరక్షణ కమిషన్‌ (ఎన్‌సీపీసీఆర్‌) తీవ్రంగా పరిగణిస్తోంది. విద్యా హక్కు చట్టం ప్రకారం ఏ రాష్ట్రంలోనూ 10 శాతానికి మించి ఉపాధ్యాయ పోస్టులు ఖాళీలు ఉండకూడదని, ఆంధ్రప్రదేశ్‌లో మాత్రం ఏకంగా 27,409 టీచర్‌ పోస్టులు (13.28 శాతం) ఖాళీగా ఉన్నాయని, వీటిని ఎందుకు భర్తీ చేయడం లేదని నిలదీసింది. ఇన్ని ఖాళీలు ఉన్నా డీఎస్సీ నోటిఫికేషన్‌ ఎందుకు ఇవ్వలేదో వెల్లడించాలని పేర్కొంటూ పాఠశాల విద్య డైరెక్టర్‌కు లేఖ రాసింది. ఉచిత, నిర్బంధ విద్యా హక్కు చట్టానికి విరుద్ధంగా... మంజూరైన ఉపాధ్యాయ పోస్టుల్లో 10 శాతానికి మించి ఖాళీలు ఉండడం పిల్లల విద్యపై తీవ్ర ప్రభావం చూపుతుందని జాతీయ బాలల హక్కుల పరిరక్షణ కమిషన్‌ హెచ్చరించింది. ఈ నేపథ్యంలో దీనిపై వెంటనే తగిన చర్యలు తీసుకోవాల్సిందిగా పాఠశాల విద్య డైరెక్టర్‌కు సూచించింది. పది లక్షల మంది పడిగాపులు..దాదాపు 10 లక్షల మంది ఉపాధ్యాయ అభ్యర్థులు ఆర్ధికంగా నలిగిపోతూ డీఎస్సీ కోసం కళ్లు కాయలు కాసేలా ఎదురు చూస్తున్నా విద్యాశాఖ మంత్రి కనీసం ఫలానా రోజు డీఎస్సీ షెడ్యూల్‌ ఇస్తామని చెప్పే ప్రయత్నం కూడా చేయడం లేదు. ఏళ్ల తరబడి శిక్షణ పొందుతున్న అభ్యర్థులంతా డీఎస్సీపై ప్రభుత్వం నుంచి ఎలాంటి స్పష్టత లేక తీవ్ర ఆందోళన చెందుతున్నారు. 27,409 టీచర్‌ పోస్టులు ఖాళీగా ఉన్నట్లు సాక్షాత్తూ పాఠశాల విద్యాశాఖే చెబుతుండగా ఏకంగా 11 వేలకుపైగా పోస్టులను కుదించడం.. నోటిఫికేషన్‌ ఇవ్వకుండా ఆటలాడటంపై రగిలిపోతున్నారు.10 లక్షల మంది పిల్లలపై ప్రభావం..రాష్ట్రంలోని 45 వేల ప్రభుత్వ పాఠశాలల్లో ఉపాధ్యాయులు, విద్యార్థుల నిష్పత్తి 1 : 40 ప్రకారం బోధనకు 2,06,393 మంది టీచర్లు అవసరం కాగా, ప్రస్తుతం 1,78,984 మంది ఉపాధ్యాయులు మాత్రమే ఉన్నట్లు విద్యాశాఖ వెల్లడించింది. అంటే 27,409 టీచర్‌ పోస్టులు ఖాళీగా ఉన్నాయి. ఫలితంగా రాష్ట్రంలో 10,96,360 మంది విద్యార్థుల బోధనపై తీవ్ర ప్రభావం పడుతోంది. ఇంత భారీగా టీచర్‌ పోస్టులు ఖాళీలు ఉన్నా ప్రభుత్వం డీఎస్సీలో పోస్టులు తగ్గించి చూపడంతో పాటు అసలు నోటిఫికేషన్‌ ఎప్పుడిస్తుందో కూడా చెప్పడం లేదు.

సాక్షి, అమరావతి: ఈ ఏడాది జూన్‌ వరకు ప్రభుత్వ పాఠశాలల్లో 13,497 ఉపా­ధ్యాయ పోస్టులు ఖాళీగా ఉన్నాయని విద్యాశాఖ మంత్రి నారా లోకేశ్‌ చెప్పారు. కూటమి ప్రభుత్వం ఏర్పడ్డాక తొలి సంతకం 16,347 టీచర్‌ పోస్టుల భర్తీపై చేసినట్టు వివరించారు. శాసనసభలో సభ్యులు అడిగిన ప్రశ్నలకు సమాధానమిస్తూ.. వచ్చే ఆరు నెలల్లో నోటిఫికేషన్‌ జారీచేసి, వచ్చే విద్యా సంవత్సరం నాటికి ఉపాధ్యాయ పోస్టులు భర్తీ చేస్తామన్నారు. గత ప్రభుత్వం ఈ ఏడాది ఫిబ్రవరిలో 6,100 పోస్టుల భర్తీకి నోటిఫికేషన్‌ ఇచ్చి మభ్యపెట్టే ప్రయత్నం చేసిందన్నారు. అభ్యర్థుల వయోపరిమితి పెంచే ఆలోచన చేస్తున్నామన్నారు. జీవో 117కు ప్రత్యామ్నాయం తీసుకొచ్చే ఆలోచనచేస్తున్నామని మంత్రి తెలిపారు. గతంలో ఉపాధ్యాయులు ధర్నా చేసినప్పుడు అనేక కేసులు పెట్టారని, త్వరలో వాటిని తొలగిస్తామని చెప్పారు. ఉన్నత విద్యపై అడిగిన మరో ప్రశ్నకు సమాధానమిస్తూ.. ఇంటర్మీడియట్‌ ఎడ్యుకేషన్‌లో సంస్కరణలు తెస్తున్నామని, తమ ప్రభుత్వం వచ్చాక ఇంటర్‌లో 15 వేల అడ్మిషన్స్‌ పెరిగాయని చెప్పారు. తాము నారాయణ విద్యాసంస్థలతో పోటీపడేలా పనిచేస్తున్నామని, 9వ తరగతి నుంచే క్వాలిటీ ఎడ్యుకేషన్‌ పెంచేందుకు కృషి చేస్తున్నామని చెప్పారు. దీనికోసం ప్రత్యేక డాష్‌ బోర్డు ఏర్పాటు చేసి స్కూల్స్‌కు ర్యాంకింగ్స్‌ ఇస్తామన్నారు. నాడు–నేడుతో ప్రయోజనం లేదు గత ప్రభుత్వం టీచర్‌ నోటిఫికేషన్‌ ఇవ్వకుండా ఘనంగా మోసం చేసిందని నెల్లిమర్ల ఎమ్మెల్యే లోకం నాగమాధవి అన్నారు. గత ప్రభుత్వంలో ఉపాధ్యాయులకు జీతాలు కూడా సరిగా ఇవ్వకుండా చాకరీ చేయించిందని విమర్శించారు. ఉపాధ్యాయులకు అదనపు పనులు చెప్పడంతో వారు పాఠాలు చెప్పలేకపోతున్నారని, దీంతో విద్యార్థులు ప్రైవేటు స్కూళ్లకు వెళ్లిపోతున్నారని చెప్పారు. ప్రభుత్వ పాఠశాలలకు పూర్వ వైభవం రావాలన్నారు. గత ప్రభుత్వంలో నాడు–నేడు కార్యక్రమంతో ఎలాంటి ప్రమోజనం లేదని, దీనివల్ల చాలా నష్టం జరిగిందన్నారు.. పాఠశాలలు శిథిలమైపోయాయన్నారు. విద్యారంగానికిరూ.29 వేల కోట్లు కేటాయించడం హర్షించతగ్గ విషయమన్నారు.

సాక్షి, హైదరాబాద్‌: ఎట్టకేలకు 10 వేల మంది వరకూ రాష్ట్ర విద్యాశాఖలో ఉపాధ్యాయులుగా చేరబోతున్నారు. ముఖ్యమంత్రి ఎ.రేవంత్‌రెడ్డి వీరికి బుధవారం నియామక ఉత్తర్వులు నేరుగా అందించనున్నారు. హైదరాబాద్‌ ఎల్‌బీ స్టేడియంలో సాయంత్రం 4 గంటలకు పెద్దఎత్తున జరిగే ఈ కార్యక్రమానికి భారీ ఏర్పాట్లు చేశారు. కార్యక్రమ ఏర్పాట్లను ప్రభుత్వ ప్రధాన కార్యదర్శి శాంతికుమారి స్వయంగా పర్యవేక్షిస్తున్నారు. ఇప్పటికే ఎంపికైన కొత్త టీచర్లకు సంబంధిత జిల్లా కేంద్రాల డీఈవోల నుంచి ఫోన్‌కాల్స్‌ వచ్చాయి. ఉదయం డీఈవో ఆఫీసుకు రావాలని కోరారు. జిల్లాల నుంచి రవాణా సౌకర్యం ఏర్పాటు చేసినట్టు అధికార వర్గాలు తెలిపాయి. ప్రభుత్వ స్కూళ్లలో ఎస్‌జీటీలు, స్కూల్‌ అసిస్టెంట్లు, ఇతర టీచర్లు కలిపి మొత్తం 11,062 పోస్టుల భర్తీకి మార్చి 1న డీఎస్సీ నోటిఫికేషన్‌ విడుదల చేశారు. ఈ పరీక్షకు 2.45 లక్షల మంది హాజరయ్యారు. జూలై 18 నుంచి ఆగస్టు 5 వరకూ ఆన్‌లైన్‌ విధానంలో డీఎస్సీ నిర్వహించారు. సెపె్టంబర్‌ 30న డీఎస్సీ మెరిట్‌ లిస్ట్‌ను విడుదల చేశారు. ప్రతి పోస్టుకు ముగ్గురు చొప్పున ఎంపిక చేసి, జిల్లా సెలక్షన్‌ కమిటీకి పంపారు. వారం రోజుల్లోనే ధ్రువపత్రాల పరిశీలన చేశారు. ముగ్గురిలో ఒకరిని జిల్లా సెలక్షన్‌ కమిటీ ఎంపిక చేసింది. వీరికి నియామక పత్రాలను అందించబోతున్నారు. 10,006 పోస్టుల భర్తీ.. మొత్తం 11,062 టీచర్‌ పోస్టులకు నోటిఫికేషన్‌ ఇచ్చినప్పటికీ, ప్రస్తుతం 10,006 పోస్టులను మాత్రమే భర్తీ చేస్తున్నారు. మిగతా పోస్టుల్లో కొన్ని బ్యాక్‌లాగ్‌లపై నిర్ణయం తీసుకోలేదు. కొన్ని న్యాయపరమైన వివాదాల వల్ల ఆగిపోయాయి. కొన్ని పోస్టులకు సరైన అభ్యర్థి దొరకలేదని అధికారులు తెలిపారు. ఎస్‌జీటీ, ఎస్‌ఏ రెండు ఉద్యోగాలు వచ్చిన వాళ్లు 700 మంది వరకూ ఉన్నారు. వీరిని గుర్తించి, ఏదైనా ఒకదానిలో కొనసాగేందుకు ఐచ్ఛికం ఇచ్చారు. ఇతర ఉద్యోగాల్లో ఉన్న వారికి టీచర్‌ పోస్టులు వచ్చాయి. ఇవన్నీ క్రోడీకరించిన తర్వాతే తుది జాబితాను విడుదల చేశారు.

సాక్షి, హైదరాబాద్‌: ఉపాధ్యాయ నియామక పత్రాల అందజేత ప్రక్రియ గందరగోళానికి దారితీస్తోంది. ప్రభుత్వం ప్రకటించినట్లు ఈ నెల 9న నియామక పత్రాలు అందిస్తారో లేక వాయిదా వేస్తారోననే సందేహాలు అభ్యర్థుల్లో వ్యక్తం అవుతున్నాయి. చాలా మంది అభ్యర్థులు నకిలీ స్థానికత పత్రాలు సమర్పిస్తున్నట్లు ఫిర్యాదులు వస్తుండటంతో వాటిని పరిశీలించాకే నియామక పత్రాలు ఇవ్వాలని అధికారులు అభిప్రాయపడుతున్నారు. ఎక్కడ ఏ పొరపాటు జరిగినా న్యాయ సమస్యలు వస్తాయని ఉన్నతాధికారులు భావిస్తున్నారు.అడ్డదారిలో సర్టిఫికెట్లు..: టీచర్‌ పోస్టును ఎలాగైనా చేజిక్కించుకోవడానికి అన్ని జిల్లాల్లోనూ అభ్యర్థులు నకిలీ స్థానికతతో సర్టిఫికెట్లు తెస్తున్నట్లు ఫిర్యాదులు వస్తున్నాయి. ఒక్కో పోస్టుకు ముగ్గురు చొప్పున రాష్ట్ర అధికారులు మెరిట్‌ లిస్ట్‌ను జిల్లాలకు పంపగా అందులో ఎవరి లోపాలు ఏమిటని అభ్యర్థులు పరస్పరం కూపీ లాగుతున్నారు. ఈ నేపథ్యంలోనే ఒకరిపై మరికొకరు ఫిర్యాదులు చేసుకుంటున్నారు. నిబంధనల ప్రకారం ఒకటి నుంచి ఏడో తరగతి వరకు అభ్యర్థి నాలుగేళ్లు ఎక్కడ చదివితే అక్కడే స్థానికతగా పరిగణిస్తారు. గతంలో నాలుగు నుంచి పదో తరగతి వరకు నాలుగేళ్లు పరిగణనలోకి తీసుకొనేవాళ్లు. ఉన్నత క్లాసులు ఉంటాయి కాబట్టి ప్రభుత్వం వద్ద ఆ రికార్డు తప్పకుండా లభించే వీలుండేది. కానీ ఇప్పుడు ఒకటి నుంచి ఏడో తరగతి నిబంధన ఉండటంతో ఏదో ఒక స్కూల్‌ నుంచి అభ్యర్థులు ధ్రువీకరణ తెస్తున్నారు. దీన్ని పరిశీలించేందుకు విద్యాశాఖ వద్ద సరైన రికార్డులు కూడా ఉండటం లేదు. కరోనా వ్యాప్తి అనంతరం చాలా వరకు ప్రైవేటు ప్రాథమిక స్కూళ్లు మూతపడటం వల్ల వాటిల్లో చదివిన విద్యార్థుల రికార్డులు ప్రభుత్వం వద్ద పక్కాగా లేవు. దీన్ని అవకాశంగా తీసుకున్న అభ్యర్థులు నకిలీ సర్టిఫికెట్లు తెస్తున్నారని అధికారులకు అందుతున్న ఫిర్యాదులనుబట్టి తెలుస్తోంది. మరోవైపు ఆర్థికంగా వెనుకబడిన వర్గాల కోటాలోనూ నకిలీ సర్టిఫికెట్లు వస్తున్నాయనే ఫిర్యాదులు వస్తున్నాయి. సాధారణంగా ఇవి అధికారికంగా వచ్చే ధ్రువపత్రాలు కావడంతో పెద్దగా ఇబ్బంది ఉండదని అధికారులు భావించగా చాలాచోట్ల అనర్హులు ఈ పత్రాలు తీసుకురావడం గందరగోళానికి దారితీస్తోంది.మోసాల్లో మచ్చుకు కొన్ని ..∙ఆదిలాబాద్‌ జిల్లాలో ఓ అభ్యర్థి ఎస్జీటీ కేటగిరీలో ర్యాంకు సాధించాడు. ఉట్నూర్‌లోని ఓ ప్రైవేటు స్కూల్లో ప్రాథమిక విద్యాభ్యాసం చేసినట్లు స్థానికత సర్టిఫికెట్‌ జత చేశాడు. అయితే ఆ సర్టిఫికెట్‌తో బోనఫైడ్, ఇతర సర్టిఫికెట్లను అధికారులు పోల్చి చూడగా అడ్మిషన్‌ నంబర్, పుట్టిన తేదీ, తండ్రిపేరు తప్పుగా ఉన్నాయి. దీన్ని నిలదీసిన అధికారులకు తన దగ్గరున్న మరో స్థానికత ధ్రువీకరణ పత్రాన్ని సమర్పించాడు. దీనిపై ఇతర అభ్యర్థులు ఫిర్యాదు చేశారు.ఆదిలాబాద్‌ పట్టణంలో మరాఠీ మీడియంలో ఎస్జీటీ పోస్టుకు ఎంపికైన ఓ మహిళా అభ్యర్థి స్థానికంగానే చ దువు పూర్తిచేసినట్లు సర్టిఫికెట్లు సమర్పించింది. అయితే అవి నకిలీవని, ఆమె మహారాష్ట్రలో చదివిందంటూ మరో అభ్యర్థి ఫిర్యాదు చేశారు. దీంతో డీఈవో నుంచి రిజిస్టర్‌ తెప్పించి అధికారులు పరిశీలించగా అభ్యర్థి ఇంటిపేరు, తండ్రిపేరు కొట్టేసి ఉన్నట్లు గుర్తించారు.వరంగల్‌ జిల్లాలో ఓ అభ్యర్థి స్థానికంగా చదివినట్లు ఇచ్చిన సర్టిఫికెట్‌పై కొందరు అభ్యర్థులు ఫిర్యాదు చేశారు. అయితే ఆ పాఠశాల రికార్డులు తెప్పించాలని అధికారులు ప్రయత్నించగా అది ఎప్పుడో మూతపడటంతో రికార్డులు దొరకలేదు.మెదక్‌ జిల్లా హవేలీ ఘనపురం మండలానికి చెందిన భార్యాభర్తలిద్దరూ ప్రభుత్వ శాఖలోనే ఉద్యోగం చేస్తున్నారు. భార్యకు డీఎస్సీలో ర్యాంకు రావడంతో ఈడబ్ల్యూఎస్‌ కోటా కింద ధ్రువీకరణ పత్రం సమర్పించింది. ఇద్దరి వార్షికాదాయం రూ. లక్షల్లో ఉన్నప్పుడు ఆర్థికంగా ఎలా వెనుకబడి ఉన్నారని ఇతర అభ్యర్థులు ఫిర్యాదు చేశారు. దీంతో ఆ అభ్యర్థి సర్టిఫికెట్ల పరిశీలనను అధికారులు ఆపేశారు.కోల్చారం మండలంలోని ఓ గ్రామానికి చెందిన మహిళకు ఈడబ్ల్యూఎస్‌ కోటా కింద ర్యాంకు వచ్చింది. ఆమె భర్త ప్రభుత్వ ఉద్యోగి. దీంతో ఆమె తన తండ్రి పేరుతో ఈడబ్ల్యూఎస్‌ సర్టిఫికెట్‌ సమర్పించింది. నిబంధనల ప్రకారం భర్త ఆదాయం ప్రకారం సర్టిఫికెట్‌ ఉండాలనేది ఇతర అభ్యర్థుల అభ్యంతరం. దీనిపై అధికారులు విచారణకు ఆదేశించారు.

సాక్షి, హైదరాబాద్‌: ప్రభుత్వ పాఠశాలల్లో ఉపా­ధ్యాయుల సంఖ్య సరిగా లేక పేద విద్యార్థులు ఇబ్బంది పడుతున్నారని.. దీన్ని దృష్టిలో పెట్టు­కు­ని అభ్యర్థులు డీఎస్సీ పరీక్ష రాసేందుకు సిద్ధం కావాలని ఉప ముఖ్యమంత్రి మల్లు భట్టి విక్ర­మార్క సూచించారు. ప్రస్తుతం 11 వేల టీచర్‌ పోస్టులను భర్తీ చేస్తున్నామని.. కొన్ని నెలల్లో మరిన్ని పోస్టులతో కొత్త డీఎస్సీ నోటిఫికేషన్‌ వేస్తామని ప్రకటించారు.ఆదివారం గాం«దీభవన్‌లో ఏర్పాటు చేసిన విలేకరుల సమావేశంలో.. వనపర్తి ఎమ్మెల్యే మేఘారెడ్డి, రాష్ట్ర విత్తనాభివృద్ధి సంస్థ చైర్మన్‌ సుంకేట అన్వేశ్‌రెడ్డి తదితరులతో కలసి ఆయన మాట్లాడారు. రాష్ట్రంలో ఉద్యోగాలను స్థానికులకే ఇచ్చేందుకు కాంగ్రెస్‌ పార్టీ తెలంగాణ రాష్ట్రాన్ని ఇచి్చందన్నారు. జాబ్‌ కేలండర్‌ ప్రక్రియ వేగవంతం చేస్తాం గత పదేళ్లలో గ్రూప్స్, డీఎస్సీ పరీక్షలు నిర్వహించకుండా బీఆర్‌ఎస్‌ సర్కారు నిరుద్యోగులను గాలికి వదిలేసిందని భట్టి విక్రమార్క మండిపడ్డారు. రాష్ట్రంలో ఖాళీగా ఉన్న ప్రభుత్వ ఉద్యోగాలన్నీ భర్తీ చేసేందుకు ప్రజాప్రభుత్వం సిద్ధంగా ఉందని.. జాబ్‌ కేలండర్‌ విడుదల ప్రక్రియను వేగవంతం చేస్తామని చెప్పారు.తాము అధికారంలోకి వచి్చన మూడు నెలల్లోనే 30వేల మందికి ఉద్యోగ నియామక పత్రాలు అందజేశామన్నారు. గురుకుల పీఈటీలు, అసిస్టెంట్‌ ఇంజనీర్లు, డివిజనల్‌ అకౌంట్‌ ఆఫీసర్లు, లైబ్రేరియన్లు, జూనియర్‌ లెక్చరర్లు, మెడికల్‌ ల్యాబ్‌ అసిస్టెంట్‌ వంటి మరో 13,321 మంది ఉద్యోగుల నియామక ప్రక్రియ చివరి దశకు చేరుకుందని చెప్పారు. షెడ్యూల్‌ ప్రకారం పరీక్షలు భర్తీ సాధ్యం కాదని తెలిసినా గత ప్రభుత్వం ఎన్నికల్లో లబ్ధి పొందేందుకు డీఎస్సీ నోటిఫికేషన్‌ ఇచి్చందని ఆరోపించారు. తాము వాటికి మరో 6వేల పోస్టులు కలిపి 11వేల టీచర్‌ ఉద్యోగాల భర్తీకి నోటిఫికేషన్‌ ఇస్తే.. 2.79 లక్షల మంది దరఖాస్తు చేసుకున్నారని వివరించారు. జూలై 18 నుంచి ఆగస్టు 5వరకు పరీక్షల షెడ్యూల్‌ ఉందని.. ఆ షెడ్యూల్‌ ప్రకారం పరీక్షలు రాసేందుకు 2.05 లక్షల మంది హాల్‌టికెట్లు డౌన్‌లోడ్‌ చేసుకున్నారని తెలిపారు.ఈ పరీక్షకు సంబంధించిన సమస్యల పరిష్కారం కోసం 24 గంటలు అందుబాటులో ఉండేలా గ్రీవెన్స్‌ సెల్‌ ఏర్పాటు చేశామన్నారు. నిరుద్యోగులెవరూ ఆందోళన చెందాల్సిన పని లేదని.. ఖాళీగా ఉన్న మరో ఐదువేల టీచర్‌ పోస్టులతోపాటు మరికొన్ని పోస్టులు కలిపి త్వరలోనే మరో నోటిఫికేషన్‌ ఇస్తామని హామీ ఇచ్చారు. నిరుద్యోగులు డీఎస్సీని సద్వినియోగం చేసుకోవాలని కోరారు. గతంలో పరీక్ష పెట్టారు.. లీక్‌ చేశారు..! గత ప్రభుత్వం గ్రూప్‌–1 పరీక్షకు నోటిఫికేషన్‌ ఇచి్చందని.. ఆ పేపర్‌ లీక్‌ అయిందని భట్టి చెప్పారు. తమ ప్రభుత్వం అధికారంలోకి రాగానే ఆ నోటిఫికేషన్‌ను రీషెడ్యూల్‌ చేశామని.. ప్రిలిమ్స్‌ పరీక్షను విజయవంతంగా నిర్వహించామని, 31,382 మంది మెయిన్స్‌కు కూడా ఎంపికయ్యారని వివరించారు. గత ప్రభుత్వం గ్రూప్‌–2 పరీక్షలను మూడు సార్లు వాయిదా వేసిందని.. తాము అధికారంలోకి రాగానే ఆగస్టులో పరీక్షలు నిర్వహించేలా తేదీలు ఖరారు చేశామన్నారు.గత సర్కారు గ్రూప్‌–3 కోసం డిసెంబర్‌ 30, 2022న నోటిఫికేషన్‌ ఇచ్చినా పరీక్షలు నిర్వహించలేదని.. తాము నవంబర్‌లో ఆ పరీక్ష తేదీలు ఖరారు చేశామని చెప్పారు. తెలంగాణ బిడ్డలు ఉద్యోగాలు సాధించి జీవితాల్లో స్థిరపడాలన్నదే తమ ప్రభుత్వ ఆశ, ఆలోచన అని.. డీఎస్సీకి సిద్ధమవుతున్న నిరుద్యోగులు పరీక్షలు బాగా రాసి, త్వరగా పాఠశాలల్లో చేరి పేదబిడ్డలకు పాఠాలు చెప్పాలని కోరారు.

నార్కట్‌పల్లి: త్వరలోనే 13,000 కొత్త టీచర్‌ పోస్టుల ను భర్తీ చేస్తామని రోడ్లు, భవనాలు, సినిమాటోగ్రఫీ శాఖమంత్రి కోమటిరెడ్డి వెంకట్‌రెడ్డి తెలిపారు. శుక్రవా రం నల్లగొండ జిల్లా నార్కట్‌పల్లి మండలంలోని బ్రా హ్మణవెల్లంల గ్రామంలో నిర్వహించిన బడిబాట కా ర్యక్రమంలో ఆయన పాల్గొ ని విద్యార్థులకు నోట్‌బుక్స్, యూని ఫాం అందజేశారు. అంగన్‌వాడీ కేంద్రంలో చిన్నారులకు సామూహిక అక్షరాభ్యాసం చేశారు. అంతకుముందు పాఠశాల ఆవరణలో మొక్కలు నాటారు. బాత్‌రూమ్‌లను పరిశీలించారు.ఈ సందర్భంగా కోమటిరెడ్డి మాట్లాడుతూ రాష్ట్రవ్యాప్తంగా రూ.600 కోట్లు విడుదల చేసి ప్రభుత్వ పాఠశాలల్లో అభివృద్ధి పనులు చేపడుతున్నామని చెప్పా రు. నాలుగు నెలల్లో బ్రాహ్మణ వెల్లంల–ఉదయ సముద్రం ప్రాజెక్టులో నీళ్లు నింపి డిసెంబర్‌లోపు సీఎం రేవంత్‌రెడ్డి చేతుల మీదుగా నీటి విడుదలను ప్రారంభిస్తామన్నారు. కార్యక్రమంలో నకిరేకల్‌ ఎమ్మెల్యే వేముల వీరేశం, నల్లగొండ కలెక్టర్‌ హరిచందన, ఎస్పీ చందనాదీప్తి, డీఈఓ భిక్షపతి, పంచాయతీరాజ్‌ ఈఈ బీమన్న, డీఈ మహేశ్, ఉదయ సముద్రం ప్రాజెక్టు సీఈ అజయ్‌కుమార్‌ పాల్గొన్నారు.

సాక్షి, హైదరాబాద్‌: ఉపాధ్యాయ అర్హత పరీక్ష (టీఎస్‌ టెట్‌)కు దరఖాస్తు గడువు పెంచాలని అధికారులు నిర్ణయించినట్టు తెలిసింది. టెట్‌ దరఖాస్తు గడువు ఈ నెల 10(నేటి)తో ముగుస్తుంది. దీన్ని మరో వారం రోజుల పాటు పెంచాలని భావిస్తున్నారు. ఇందుకు సంబంధించిన ప్రతిపాదనను విద్యాశాఖ ప్రభుత్వ ముఖ్య కార్యదర్శికి పంపింది. దీనిపై బుధవారం అధికారిక ఉత్తర్వులు వెలువడే వీలుంది. సర్వీస్‌ టీచర్ల నుంచి వస్తున్న ఒత్తిడి నేపథ్యంలోనే ఈ నిర్ణయం తీసుకున్నట్టు సమాచారం. మరోవైపు టెట్‌ రాసే వారి సంఖ్య గణనీయంగా తగ్గింది.   3లక్షలు వస్తాయనుకుంటే 2లక్షలు కూడా దాటలేదు  టెట్‌కు ఇప్పటి వరకూ 1,93,135 దరఖాస్తులొచ్చాయి. 2016లో 3.40 లక్షలు, 2017లో 3.29 లక్షలు, 2022లో 3.79 లక్షలు,2023లో 2.83 లక్షల దరఖాస్తులొచ్చాయి. ఈ మధ్య కాలంలో బీఈడీ చేసే వారి సంఖ్య గణనీయంగా తగ్గిపోయింది. అయినప్పటికీ పదోన్నతుల కోసం సర్వీస్‌ టీచర్లు కూడా టెట్‌ రాయాలన్న నిబంధన ఉండటంతో ఈసారి 3 లక్షల అప్లికేషన్లు వస్తాయని అధికారులు అంచనా వేశారు.    ఎన్‌సీటీఈ నుంచి సమాధానం వస్తేనే స్పష్టత  80 వేల మంది టీచర్లు టెట్‌ అర్హత కోసం దరఖాస్తు చేయాల్సి ఉండగా వారు ముందుకు రాలేదు. సెకండరీ గ్రేడ్‌ నుంచి స్కూల్‌ అసిస్టెంట్‌ ప్రమోషన్‌కు టెట్‌ అవసరం. కానీ ఎస్‌జీటీగా ఉన్న వ్యక్తి ప్రాథమిక స్కూల్‌ హెచ్‌ఎంగా వెళితే, అది సమాన హోదాగా టీచర్లు చెబుతున్నారు. మరోవైపు స్కూల్‌ అసిస్టెంట్లు ప్రాథమిక, ఉన్నత పాఠశాల హెచ్‌ఎంగా వెళ్ళినా హోదాలో మార్పు ఉండదనే వాదన టీచర్లు లేవనెత్తారు. అలాంటప్పుడు టెట్‌తో అవసరం ఏమిటనే దానిపై ఉపాధ్యాయ సంఘాలు స్పష్టత కోరాయి. ఈ నేపథ్యంలో పాఠశాల విద్య అధికారులు దీనిపై స్పష్టత ఇవ్వాలని నేషనల్‌ కౌన్సిల్‌ ఫర్‌ టీచర్‌ ఎడ్యుకేషన్‌ (ఎన్‌సీటీఈ)కి లేఖ రాశారు. ఒకటి రెండు రోజుల్లో దీనికి సమాధానం వస్తుందని ఆశిస్తున్నారు. దీన్ని దృష్టిలో ఉంచుకుని టీచర్లు ఏయే పేపర్లు రాయాలి? ఎంత మంది రాయాలనే విషయాల్లో స్పష్టత వస్తుంది.    పరీక్ష తేదీల్లో మార్పులు ఉండవు..  కేవలం దరఖాస్తు చేసుకోవడానికి, ఆన్‌లైన్‌ ఫీజు చెల్లింపుకు మాత్రమే గడువు పెంచే ఆలోచనలో ఉన్నట్టు అధికార వర్గాలు చెబుతున్నాయి. అంతే తప్ప పరీక్ష తేదీల్లో మార్పు ఉండదని స్పష్టం చేస్తున్నారు. ముందుగా నిర్ణయించిన ప్రకారం టెట్‌ పరీక్ష మే 20 నుంచి జూన్‌ 3వ తేదీ వరకూ జరుగుతుంది. ఫలితాలను జూన్‌ 12న వెల్లడిస్తారు. ఇందులో అర్హత సాధించిన వారు డీఎస్సీ రాసేందుకు వీలుగా ఆ పరీక్ష గడువునూ పెంచారు.    డీఎస్సీకీ అంతే.. పెద్దగా దరఖాస్తుల్లేవ్‌  డీఎస్సీ జూలై 17 నుంచి 31వ తేదీ వరకూ జరుగుతుంది. అయితే డీఎస్సీకి కూడా ఇప్పటి వరకూ పెద్దగా దరఖాస్తులు రాలేదు. పోస్టులు పెరిగినా కొత్తగా వచ్చిన దరఖాస్తులు తక్కువగానే ఉన్నాయి. రాష్ట్రంలో 11,062 టీచర్‌ పోస్టుల భర్తీకి సర్కారు డీఎస్సీని ప్రకటించింది. దీనికి కొత్తగా వచ్చిన దరఖాస్తులు 37,700. గతేడాది 5,089 పోస్టుల భర్తీకి ఇచ్చిన నోటిఫికేషన్‌ కోసం 1.77 లక్షల మంది దరఖాస్తు చేసుకున్నారు. వీరు మళ్ళీ దరఖాస్తు చేయాల్సిన అవసరం లేదు.    గడువు పెంచాల్సిందే : రావుల మనోహర్‌ రెడ్డి (డీఎడ్, బీఎడ్‌ అభ్యర్థుల సంఘం రాష్ట్ర అధ్యక్షుడు)  టెట్‌ అప్లికేషన్స్‌ గడువు పెంచి ఎడిట్‌ ఆప్షన్‌ ఇవ్వాలి. ఉగాది, రంజాన్‌ సెలవుల కారణంగా రాష్ట్రంలో మీ సేవా సెంటర్లు అందుబాటులో ఉండటం లేదు. మొబైల్‌లో టెట్‌ దరఖాస్తులు పూర్తి చేయడం ఇబ్బందిగా ఉంది.     స్పష్టత వచ్చే దాకా పెంచాలి : చావా రవి (టీఎస్‌ యూటీఎఫ్‌ రాష్ట్ర ప్రధాన కార్యదర్శి)  సర్వీస్‌ టీచర్లలో ఎంత మంది టెట్‌ రాయాలి? ఏ పేపర్‌ రాయాలి? అనే అంశాలపై విద్యాశాఖ స్పష్టత ఇవ్వలేదు. ఎన్‌సీటీఈ వివరణ వచ్చిన తర్వాత ఓ స్పష్టత ఇస్తామని అధికారులు తెలిపారు. దీన్ని దృష్టిలో ఉంచుకుని టెట్‌ దరఖాస్తుల గడువు పెంచాలి.   

సాక్షి, అమరావతి: ఐదేళ్లు సీఎంగా పనిచేసి కేవలం 300 టీచర్‌ ఉద్యోగాలిచ్చిన చంద్రబాబును ఇదేమిటని ఎన్నడూ ప్రశ్నించరు ఈనాడు రామోజీరావు. గత ఐదేళ్లలో ఇప్పటికే 15 వేల టీచర్‌ ఉద్యోగాలిచ్చి పేదల పిల్లలకు చక్కటి చదువులు అందిస్తూ మరో 6,100 మంది ఉపాధ్యాయుల నియామకానికి నోటి­ఫికేషన్‌ ఇచ్చిన ముఖ్యమంత్రి వైఎస్‌ జగన్‌మోహన్‌ రెడ్డి పరిపాలనపై మాత్రం విషం చిమ్ముతారు అదే రామోజీ. ఎందుకంటే.. రామోజీ, చంద్రబాబు అంటేనే పెత్తందార్ల పెద్దలు. పేదల పిల్లల ఎదుగుదల, అభివృద్ధిని సహించలేరు. అందుకే పేదల చదువులపై ఎప్పుడూ విషం చిమ్ముతుంటారు. అదే క్రమంలో రాష్ట్రంలో తాజా డీఎస్సీపై పక్క రాష్ట్రంతో పోలిక పెట్టి.. మెగా.. దగా.. అంటూ ఓ కుటిల కథనం అచ్చేశారు. అసలు ఈ పోలికే ఓ దగా. ఎందుకంటే.. తెలంగాణ రాష్ట్రంలో ఇప్పటికీ 1998, 2018 డీఎస్సీ నోటిఫికేషన్స్‌ పోస్టుల  భర్తీ జరగనే లేదు. అలాంటి పోస్టులన్నీ మురగపెట్టి ఇప్పుడు 11వేల పోస్టులకు అక్కడి ప్రభుత్వం నోటిఫికేషన్‌ ఇచ్చింది. దీనినే రామోజీ మెగా డీఎస్సీ అంటున్నారు. కానీ, మన రాష్ట్రంలో వైఎస్‌ జగన్‌ ప్రభుత్వం 1998 డీఎస్సీ నుంచి 2019 స్పెషల్‌ డీఎస్సీ, మరో 12,00 కేజీబీవీ రెగ్యులర్‌ పోస్టులు కలిపి 15 వేల పోస్టులను ఇప్పటికే భర్తీ చేసింది. తాజాగా 6,100 పోస్టులతో డీఎస్సీ నిర్వహిస్తోంది. ఇవన్నీ కలిపితే సీఎం జగన్‌ ఇచ్చిన ఉపాధ్యాయ ఉద్యోగాలు 21,108. అంటే తెలంగాణలో భర్తీ చేస్తున్న పోస్టులకంటే ఏపీలో పోస్టులే అధికం. ఈ విషయం చెప్పకుండా రామోజీ పాఠకులను తప్పుదోవ పట్టిస్తూ కథనం ఇవ్వడం దగా కాక మరేమిటి?  తాజా డీఎస్సీతో అన్ని ఖాళీల భర్తీ  తాజాగా 2024 డీఎస్సీ­లో 6100 పోస్టుల భ­ర్తీకి నోటిఫికేషన్‌ ఇచ్చా­రు. ఇందులో జిల్లా, మం­డల పరిషత్, ము­న్సి­పల్, మున్సిపల్‌ కా­ర్పొరేషన్, ఏపీ మో­డల్‌ స్కూళ్లు, ఏపీ రెసిడెన్షియల్‌ ఎడ్యుకేషనల్‌ ఇన్‌స్టిట్యూషన్స్‌ సొసైటీ, ఏపీ ట్రైబల్‌ వెల్ఫేర్‌ రెసిడెన్షియల్‌ ఎడ్యుకేషనల్‌ ఇన్‌స్టిట్యూషన్స్‌ సొసైటీ (గురుకులం), ఏపీ ట్రైబల్‌ వెల్పేర్‌ రెసిడెన్షియల్‌ ఎడ్యుకేషనల్‌ ఇన్‌స్టిట్యూషన్స్‌ సొసైటీ (ఆశ్రం), ఏపీ సోషల్‌ వెల్ఫేర్‌ రెసిడెన్షియల్‌ ఎడ్యుకేషనల్‌ ఇన్‌స్టిట్యూషన్స్‌ సొసైటీ, మహాత్మా జోతిబాపూలే బ్యాక్‌వర్డ్‌ క్లాస్‌ వెల్ఫేర్‌ సొసైటీ విద్యా సంస్థల్లో మొత్తం అన్ని ఖాళీలను భర్తీ చేస్తున్నారు. ఇందులో సెకండరీ గ్రేడ్‌ టీచర్స్‌ పోస్టులు 2,280, స్కూల్‌ అసిస్టెంట్స్‌ 2,299, టీజీటీ 1,264, పీజీటీ 215, ప్రిన్సిపల్‌ పోస్టులు 42 ఉన్నాయి. ఇకపై ప్రతి విద్యా సంవత్సరం చివర్లో ఉపాధ్యాయ ఖాళీలను భర్తీ చేసి కొత్త విద్యా సంవత్సరంలో పూర్తిస్థాయి బోధన అందించేందుకు ప్రణాళికలు సిద్ధం చేసింది.  బాబు డీఎస్సీ పెద్ద నాటకం  చంద్రబాబు హయాంలో డీఎస్సీ ఓ పెద్ద నాటకం. చంద్రబాబు నాలుగేళ్లు అధికారాన్ని అనుభవించి ఎన్నికలకు ముందు ఏడాది 2018లో డీఎస్సీ నోటిఫికేషన్‌ ఇచ్చారు. దానిని కూడా సక్రమంగా నిర్వ­హించలేక చేతులెత్తేశారు. ఫలితంగా అ­భ్య­ర్థులకు అన్యాయం జరగడంతో కో­ర్టుకు వెళ్లాల్సివచ్చింది. ఇందులో 7,254 ఉపాధ్యాయ పోస్టులకు గాను.. చంద్రబాబు భర్తీ చేసిన పోస్టులు 300 మాత్రమే. కానీ, డీఎస్సీకి చంద్రబాబు పేటెంట్‌ అన్నట్టు ఈనాడు కలరింగ్‌ ఇస్తోంది.  ఇది సీఎం జగన్‌ చేసిన మేలు  2019లో వైఎస్సార్‌సీపీ ప్రభుత్వం అధికారంలోకి వచ్చిన వెంటనే సీఎం జగన్‌ ప్రభుత్వ విద్యను బలోపేతం చేసేందుకు ప్రత్యేక విధానాన్ని రూపొందించారు. ఒక్క పాఠశాల కూడా మూత పడకుండా, ఏ ఒక్క టీచర్‌ అభ్యర్థికి అన్యా­యం జరగకుండా చర్య­లు చేపట్టారు. ప్రతి పాఠశాలలో నూరు శాతం టీ­చర్లను నియమిస్తున్నారు. దానికి తగ్గట్టుగానే పాత, కొత్త డీఎస్సీల ద్వారా పోస్టులను భర్తీ చేస్తున్నారు. ఈ క్రమంలోనే 2018 డీఎస్సీలో చంద్రబాబు చేతి­లో దగాపడ్డ అభ్యర్థులకు సీఎం జగన్‌ న్యాయం చే­శా­రు. కోర్టు కేసులు పరిష్కారమయ్యేలా ప్రత్యేక దృష్టి సారించి సుమా­రు 6,954 మంది అభ్యర్థులకు ఉపాధ్యాయులుగా పోస్టింగులు ఇచ్చారు. అంతకు ముందు 1998, 2008 డీఎస్సీ అభ్యర్థులు కూడా దశాబ్దాలుగా పోస్టింగ్స్‌ కోసం ఎదురు చూశారు. చంద్రబాబు వీరినీ పట్టించుకోకుండా తీవ్ర అన్యాయం చే­శారు. ఇలా చంద్రబాబు దొంగ నాటకానికి బలైపోయిన అభ్యర్థులను సీఎం జగన్‌ చొరవ తీసుకుని టైం స్కేల్‌ ప్రాతిపదికన నియమించారు. ఇలా 1998 డీఎస్సీలోని 4,059 మంది, 2008 డీఎస్సీ­లోని 2,193 మంది అభ్యర్థులకు పోస్టింగ్స్‌ ఇచ్చా­రు. వీటితో పాటు కేజీబీవీల్లో సుమారు 1,200 మంది రెగ్యులర్‌ టీచర్లను నియమించారు. నిత్యం శుద్దపూస కబుర్లు చెప్పే రామోజీ.. చంద్రబాబు చేతిలో మోసపోయిన డీఎస్సీ అభ్యర్థులకు సీఎం జగన్‌ చేసిన ఈ మేలు గురించి ఒక్క అక్షరం రాయరు.  ఇది రామోజీ కుటిలత్వం  రామోజీ బోడి గుండుకు.. మోకాలికి ముడిపెట్టే ప్రయత్నం కూడా చేశారు. ప్రపంచ బ్యాంకు రుణం కోసం ఉపాధ్యాయ ఖాళీలను దాచేస్తున్నారంటూ పాతరాగానికి కొత్త ట్యూన్‌ కట్టారు. ఇక్కడ పాఠశాలల అభివృద్ధిని కాంక్షిస్తూ రుణం వస్తుంది. పాఠాలు చెప్పే ఉపాధ్యాయులు కీలక భూమిక పోషిస్తేనే ఆ పాఠశాల బాగుపడుతుంది. విద్యార్థికి ఉన్నత భవిష్యత్తు దక్కుతుంది. ఈనాడు చెప్పినట్టు కేవలం రుణం కోసం ఖాళీలను దాచేసి పాఠాలు చెప్పేవారు లేకుండా చేసి విద్యాభివృద్ధిని ఎలా సాధిస్తారు? కొంచెం జ్ఞానంతో ఆలోచిస్తే ఎవరికైనా రామోజీ రాతల్లోని కుటిలత్వం బోధపడుతుంది.   తెలంగాణలో ఇవెందుకు లేవు రామోజీ?  విద్యా రంగంలో సీఎం జగన్‌ విప్లవాత్మక మార్పులు తెస్తున్నారు. దేశంలో ఎక్కడా లేని విధంగా ఒక్క విద్యా రంగంపైనే రూ.73 వేల కోట్లు ఖర్చు చేశారు. ఏపీలో మనబడి నాడు–నేడు కార్యక్రమంతో ప్రభుత్వ విద్యలో సమూల మా­ర్పులు కళ్లకు కడుతున్నాయి. ఇంగ్లిష్‌ మీడియం, టొఫెల్, సీబీఎస్సీఈ సిలబస్, జగనన్న గోరుముద్ద, పేద విద్యార్థులకు ట్యాబ్స్, జగనన్న విద్యా కానుక, అమ్మఒడి సాయం, ద్విభాషా పాఠ్య పుస్తకం, ఐఎఫ్‌పీలు, 3వ తరగతి నుంచే సబ్జెక్ట్‌ టీచర్‌ బోధనతో పాటు ప్రపంచం మెచ్చిన ఇంటర్నేషనల్‌ బాకలారియెట్‌ (ఐబీ) సిలబస్‌ మూరుమూల పల్లెలోని ప్రభుత్వ బడుల్లోకి వస్తున్నాయి. మన పిల్లలను అంతర్జాతీయ స్థాయికి ఎదిగేలా చేస్తున్నాయి. ఇవన్నీ తెలంగాణలో లేవు. అక్కడి పేదల పిల్లలకు ఇలాంటి ఫలాలు దక్కట్లేదని ఈనాడు రాయదు. ఇక్కడ రామోజీ లక్ష్యం ఒక్కటే.. అది సీఎం జగన్‌ ప్రభుత్వంపై ప్రజల్లో ఏదో రకంగా వ్యతిరేకత పెంచడం. 

సాక్షి, హైదరాబాద్‌: డీఎస్సీలో అత్యధిక పోస్టులు రంగారెడ్డి, హైదరాబాద్‌ జిల్లాల్లోనే ఉన్నాయి. హైదరాబాద్‌లో 878 టీచర్‌ పోస్టులు భర్తీ చేయనుండగా రంగారెడ్డి జిల్లాలో 379 ఖాళీలున్నట్లు అధికారులు తేల్చారు. ప్రాథమిక విద్యను బోధించే సెకండరీ గ్రేడ్‌ స్కూల్‌ టీచర్లు (ఎస్‌జీటీల) అవసరం ఎక్కువగా జగిత్యాల జిల్లాలో ఉన్నట్టు గుర్తించారు. రాష్ట్రవ్యాప్తంగా జిల్లాలవారీగా టీచర్‌ పోస్టులు ఈ విధంగా ఉన్నాయి.

సాక్షి, హైదరాబాద్‌: రాష్ట్రంలో ఉపాధ్యాయ నియామక ప్రక్రియకు ప్రభుత్వం శ్రీకారం చుట్టింది. 11,062 టీచర్‌ పోస్టులతో డీఎస్సీని ప్రకటించింది. గత ప్రభుత్వం 5,089 టీచర్‌ పోస్టుల భర్తీకి ఇచి్చన నోటిఫికేషన్‌ను బుధవారం రద్దు చేసిన ప్రస్తుత ప్రభుత్వం వాటికి అదనంగా 5,973 పోస్టులను చేరుస్తూ ఈ నోటిఫికేషన్‌ను విడుదల చేసింది. సీఎం రేవంత్‌రెడ్డి గురువారం డీఎస్సీ నోటిఫికేషన్‌ను విడుదల చేశారు. ఈ కార్యక్రమంలో మంత్రి కోమటిరెడ్డి వెంకట్‌రెడ్డి, ప్రభుత్వ విప్‌ బీర్ల ఐలయ్యతోపాటు విద్యాశాఖ ఉన్నతాధికారులు పాల్గొన్నారు. ఈ సందర్భంగా ఏ కేటగిరీలో ఎన్ని పోస్టులు భర్తీ చేయనున్నారనే వివరాలతో కూడిన పోస్టర్‌ను వారు ప్రదర్శించారు. కొత్తగా ప్రకటించిన పోస్టుల్లో ప్రత్యేక అవసరాలుగల విద్యార్థులకు బోధించే ఉపాధ్యాయ నియామకాలు కూడా ఉండటం విశేషం.  ఈ నెల 4 నుంచి దరఖాస్తుల స్వీకరణ..  డీఎస్సీ నోటిఫికేషన్‌లో స్కూల్‌ అసిస్టెంట్లు, భాషా పండితులు, ఫిజికల్‌ ఎడ్యుకేషన్‌ టీచర్లు, ప్రాథమిక విద్యను బోధించే సెకండరీ గ్రేడ్‌ టీచర్లు, ప్రత్యేక అవసరాలు ఉండే విద్యార్థులకు బోధించే టీచర్లకు సంబంధించిన ఖాళీలను ప్రభుత్వం ప్రకటించింది. అయితే పరీక్షకు సంబంధించిన విధివిధానాలను ఈ నెల 4న విడుదల చేయనున్నట్లు పాఠశాల విద్య కమిషనర్‌ దేవసేన ఓ ప్రకటనలో తెలిపారు. ఆ రోజు నుంచే అభ్యర్థుల నుంచి దరఖాస్తులు స్వీకరించనున్నట్లు పేర్కొన్నారు. గతేడాది సెప్టెంబర్‌లో ఇచి్చన నోటిఫికేషన్‌ సమయంలో 1.75 లక్షల మంది దరఖాస్తు చేశారు. పాత నోటిఫికేషన్‌ను రద్దు చేసినప్పటికీ గతంలో దరఖాస్తు చేసిన వారు మళ్లీ దరఖాస్తులు పంపాల్సిన అవసరం లేదని విద్యాశాఖ స్పష్టత ఇచ్చింది.  కంప్యూటర్‌ ఆధారిత పరీక్ష..  కంప్యూటర్‌ బేస్డ్‌ రిక్రూట్‌మెంట్‌ టెస్ట్‌ (సీబీఆర్‌టీ) పద్ధతిలోనే డి్రస్టిక్‌ సెలక్షన్‌ కమిటీ (డీఎస్సీ) పరీక్ష నిర్వహిస్తామని విద్యాశాఖ వెల్లడించింది. రాష్ట్రవ్యాప్తంగా మొత్తం 11 ఆన్‌లైన్‌ కేంద్రాలను గుర్తించింది. మహబూబ్‌నగర్, రంగారెడ్డి, హైదరాబాద్, మెదక్, నిజామాబాద్, ఆదిలాబాద్, కరీంనగర్, వరంగల్, ఖమ్మం, నల్లగొండ, సంగారెడ్డిలలో పరీక్ష కేంద్రాలు ఉంటాయని తెలిపింది. 2023 జూలై ఒకటవ తేదీ నాటికి 18–46 ఏళ్ల మధ్య ఉన్న వారిని డీఎస్సీకి అనుమతిస్తారు. అయితే రాష్ట్ర ప్రభుత్వ ఉద్యోగులకు ఐదేళ్లు, మాజీ సైనికోద్యోగులకు మూడేళ్లు, ఎస్సీ, ఎస్టీ, బీసీ, ఈడబ్ల్యూఎస్‌ అభ్యర్థులకు ఐదేళ్లు, పీహెచ్‌సీలకు పదేళ్ల గరిష్ట వయోపరిమితి నుంచి మినహాయింపు ఉండనుంది. పరీక్షకు సంబంధించిన సిలబస్, సబ్జెక్టులవారీ పోస్టులు, రిజర్వేషన్‌ నిబంధనలకు సంబంధించిన సమాచార బులెటిన్‌ ఈ నెల 4న  https:// schooledu. telangana. gov. in వెబ్‌సైట్‌లో విడుదల చేస్తామని అధికారులు తెలిపారు. డీఎస్పీ మే 20 తర్వాత 10 రోజులపాటు ఉండే అవకాశం ఉందని విశ్వసనీయంగా తెలిసింది.  21 వేల ఖాళీలను గుర్తించినప్పటికీ..   తెలంగాణ రాష్ట్రం ఏర్పడిన తర్వాత ఉపాధ్యాయ నియామకాలు చేపట్టేందుకు డీఎస్సీని ప్రకటించడం ఇది మూడోసారి. 2017 అక్టోబర్‌ 21న 8,792 పోస్టుల భర్తీకి తొలిసారి టీచర్‌ రిక్రూట్‌మెంట్‌ టెస్ట్‌ (టీఆరీ్ట) పేరుతో తొలిసారి నోటిఫికేషన్‌ ఇచ్చారు. ఆ తర్వాత 2023 సెపె్టంబర్‌ 5న 5,089 టీచర్‌ పోస్టుల భర్తీకి నోటిఫికేషన్‌ ఇచ్చారు. ప్రస్తుతం 11,062 పోస్టులతో నోటిఫికేషన్‌ వెలువడింది. విద్యాశాఖలో ప్రస్తుతం 21 వేల టీచర్‌ పోస్టుల ఖాళీలున్నాయని అధికారులు గుర్తించారు. స్కూల్‌ అసిస్టెంట్‌ ఖాళీలను 70 శాతం ఎస్‌జీటీలకు పదోన్నతులు కల్పించడం ద్వారా భర్తీ చేయనున్నారు. మరో 30 శాతం పోస్టులను డీఎస్సీ ద్వారా భర్తీ చేయాల్సి ఉంటుంది. పదోన్నతులకు న్యాయ సమస్యలు అడ్డంకిగా మారడంతో పూర్తిస్థాయి నియామకాలు చేపట్టలేకపోతున్నారు.

సాక్షి, హైదరాబాద్‌: రాష్ట్రంలో ఉపాధ్యాయ నియా మకాలకు సంబంధించిన డీఎస్సీ నోటిఫికేషన్‌ గురువారం వెలువడే అవకాశం ఉంది. మే 3వ వారంలో పరీక్ష నిర్వహించాలని నిర్ణయించిన అధికారులు ఇందుకు సంబంధించి ఏర్పాట్లు చేస్తున్నారు. పది రోజులపాటు పరీక్ష నిర్వహించే వీలుందని... ఇప్పటికే పరీక్షల షెడ్యూల్‌ కూడా ఖరారైనట్లు విశ్వసనీయంగా తెలిసింది. మొత్తం 11,062 టీచర్‌ పోస్టులను విద్యాశాఖ ప్రతిపాదించగా దీనికి ఆర్థిక శాఖ అనుమతి కూడా లభించింది. దీంతో నోటిఫికేషన్‌ వెలువడటమే తరువాయి. వాస్తవానికి బుధవారమే నోటిఫికేషన్‌ ఇవ్వాలని భావించినా షెడ్యూల్‌ ఖరారు, సాఫ్ట్‌వేర్‌ రూపకల్పనకు తుది మెరుగులు దిద్దాల్సి ఉండటంతో ఒకరోజు ఆలస్యం కావొచ్చని అధికారులు తెలిపారు. గతేడాది 5,089 పోస్టుల భర్తీకి సంబంధించిన నోటిఫికేషన్‌ ఇచ్చారు. వాటితోపాటు కొత్త పోస్టులు కలుపుకొని డీఎస్సీ నిర్వహించాలని ప్రభుత్వం నిర్ణయించింది. ఈ కారణంగా పాత నోటిఫికేషన్‌ను రద్దు చేశారు. అయితే గతంలో వచ్చిన దరఖాస్తులను పరిగణనలోకి తీసుకొనేలా సాఫ్ట్‌వేర్‌కు రూపకల్పన చేస్తున్నారు.   ఎస్‌జీటీ పోస్టులే ఎక్కువ..  విద్యాశాఖలో మొత్తం 21 వేల టీచర్‌ పోస్టుల ఖాళీలున్నట్లు లెక్కగట్టారు. వాటిల్లో ఎస్‌జీటీలను నేరుగా నియమించడానికి వీలుంది. కాబట్టి ప్రస్తుతం డీఎస్సీలో ప్రకటించే 11,062 పోస్టుల్లో 6,500 పోస్టులు ఎస్‌జీటీలే ఉండే వీలుంది. స్కూల్‌ అసిస్టెంట్‌ ఖాళీలపై మరికొంత స్పష్టత రావాల్సి ఉంది. పదోన్నతుల ద్వారా ఎస్‌జీటీలతో 70 శాతం వరకూ భర్తీ చేస్తారు. మిగిలిన 30 శాతం నేరుగా నియామకం చేపడతారు. పదోన్నతులకు సంబంధించి న్యాయ వివాదం ఉండటంతో ఎస్‌ఏ పోస్టులపై ఓ నిర్ణయానికి రాలేకపోతున్నారు. కాబట్టి 1,500–2,000 వరకూ ఎస్‌ఏ పోస్టులను నేరుగా డీఎస్సీ ద్వారా చేపట్టే వీలుంది. భాషా పండితులు, పీఈటీలు ఇతర పోస్టులు కలుపుకొని మొత్తం 11,062 పోస్టులు ఉండే వీలుందని తెలుస్తోంది. గతేడాది ప్రకటించిన డీఎస్సీకి 1,77,502 దరఖాస్తులొచ్చాయి. ఈసారి పోస్టులు పెరగడంతో భారీగా దరఖాస్తులు వచ్చే వీలుందని అధికారులు అంచనా వేస్తున్నారు.  అప్రమత్తంగా అధికారులు  డీఎస్సీపై నిరుద్యోగులు భారీ ఆశలు పెట్టుకున్నారు. దాదాపు 4 లక్షల మంది ఇప్పటికే ఉపాధ్యాయ అర్హత పరీక్ష ఉత్తీర్ణులయ్యారు. వాళ్లంతా డీఎస్సీ కోసం ఎదురుచూస్తున్నారు. ఈ నేపథ్యంలో ఎక్కడా ఎలాంటి సమస్య తలెత్తకుండా అధికారులు జాగ్రత్త పడుతున్నారు. ప్రశ్నపత్రాలు మొదలుకొని ఫలితాల వరకూ సాంకేతికతను ఉపయోగిస్తున్నారు. ఇందులో భాగంగా సాఫ్ట్‌వేర్‌ రూపకల్పనపై మరింతగా దృష్టి పెట్టారు. పాస్‌వర్డ్స్, ఆన్‌లైన్‌ వ్యవస్థ భద్రతాంశాలను ఉన్నతాధికారులు సమీక్షించారు. సాంకేతిక విభాగంలో ప్రైవేటు సంస్థల పాత్ర ఉండటంతో అప్రమత్తంగా ఉండాలని ఉన్నతాధికారులు విద్యాశాఖ సిబ్బందిని ఆదేశించారు. కీలకపాత్ర పోషించే అధికారులు ప్రతి అంశాన్నీ పరిశీలించాలని ప్రభుత్వం నుంచి ఆదేశాలొచ్చాయి.

సాక్షి, హైదరాబాద్‌: లోక్‌సభ ఎన్నికల్లోపే వీలైనంత త్వరగా డీఎస్సీ నిర్వహించాలని రాష్ట్ర ప్రభుత్వం భావిస్తోంది. డీఎస్సీ ద్వారా మొత్తం 11 వేల టీచర్‌ పోస్టుల భర్తీ ఉండొచ్చని అధికార వర్గాలు సూచనప్రాయంగా చెబుతున్నాయి. ముఖ్యమంత్రి రేవంత్‌రెడ్డిని రెండ్రోజుల క్రితం కలిసిన ఉన్నతాధికారులు.. టీచర్‌ పోస్టుల ఖాళీలు, వాటి భర్తీ విధానం, న్యాయపరమైన చిక్కుల గురించి వివరించారు. పదోన్నతుల ద్వారా భర్తీ చేసే ఖాళీలు విడిచిపెట్టి మిగతా వాటిని డీఎస్సీలో చేర్చాలని ఈ భేటీలో సీఎం నిర్ణయించారు. దీంతో టీచర్‌ పోస్టుల భర్తీకి విద్యాశాఖ కసరత్తు ముమ్మరం చేసింది. ఇప్పటికే ఆర్థిక శాఖ ఆమోదానికి ఫైల్‌ను పంపింది. దానికి అనుమతి రావాల్సి ఉంది. ఒకట్రెండు రోజుల్లో ఇది పూర్తవుతుందని, వెనువెంటనే ఏ క్షణమైనా నోటిఫికేషన్‌ ఇచ్చే వీలుందని అధికార వర్గాల సమాచారం.   ఇప్పటికే ఓసారి నోటిఫికేషన్‌...  గత ప్రభుత్వం అసెంబ్లీ ఎన్నికలకు ముందు 5,089 టీచర్‌ పోస్టుల భర్తీకి డీఎస్సీ నోటిఫికేషన్‌ ఇచ్చింది. ఈ పోస్టులకు 1,77,502 మంది దరఖాస్తు చేసుకున్నారు. అయితే డీఎస్సీ పరీక్ష తేదీల సమయంలోనే అసెంబ్లీ పోలింగ్‌ తేదీలు రావడంతో డీఎస్సీని రద్దు చేయాల్సి వచ్చింది. అదీగాక.. డీఎస్సీలో ప్రకటించిన 5,089 పోస్టులు కూడా రోస్టర్‌ విధానం తర్వాత కొన్ని జిల్లాల్లో ఖాళీల్లేని పరిస్థితి తలెత్తింది. నాన్‌–లోకల్‌ జిల్లా కోటాలో డీఎస్సీకి వెళ్లేందుకూ పోస్టులు లేకపోవడం నిరుద్యోగులను నిరాశపరిచింది.   లోపాల్లేకుండా చూడాలి..  నిరుద్యోగుల్లో డీఎస్సీ నిర్వహణ ఆనందం నింపు తోంది. ఈ ప్రక్రియలో ఎలాంటి లోపాల్లే కుండా చూడాలి. వీలైనంత త్వరగా టీచర్ల పదోన్నతులు చేపట్టి.. ఖాళీలను భర్తీ చేయాలి.   – రామ్మోహన్‌రెడ్డి రాష్ట్ర అధ్యక్షుడు, డీఎడ్, బీఎడ్‌ అభ్యర్థుల సంఘం  ఖాళీలు ఎన్ని?.. భర్తీ చేసేవి ఎన్ని?  రాష్ట్రంలోని ప్రభుత్వ స్కూళ్లలో డీఈవోలు, డిప్యూటీ డీఈవోలు సహా మొత్తం టీచర్‌ పోస్టులు 21 వేల వరకూ ఖాళీగా ఉన్నాయి. వాటిలో స్కూల్‌ అసిస్టెంట్లకు పదోన్నతి కలి్పంచడం ద్వారా 1,974 హెచ్‌ఎం పోస్టులను, ప్రమోషన్ల ద్వారా 2,043 ప్రాథమిక పాఠశాలల హెచ్‌ఎం పోస్టులను భర్తీ చేయాల్సి ఉంది. స్కూల్‌ అసిస్టెంట్‌ పోస్టులు 7,200 వరకూ ఖాళీలు ఉండగా వాటిలో 70 శాతం ప్రమోషన్ల ద్వారా మిగిలిన 30 శాతం పోస్టులను నేరుగా భర్తీ చేయాల్సి ఉంటుంది. పదోన్నతుల ప్రక్రియకు కోర్టు చిక్కులున్నాయి. కాబట్టి నేరుగా భర్తీ చేసే పోస్టులను డీఎస్సీ పరిధిలోకి తెచ్చే యోచనలో అధికారులు ఉన్నారు. అలాగే సెకండరీ గ్రేడెడ్‌ ఉపాధ్యాయుల పోస్టుల్లో 6,775 ఖాళీలున్నాయి. వాటిని భర్తీ చేసేందుకే ప్రయత్నిస్తున్నారు. పండిట్, పీఈటీ పోస్టులు దాదాపు 800 వరకూ ఉండొచ్చని అంచనా వేశారు. ఈ లెక్కన మొత్తంగా 11 వేలకుపైగా పోస్టులను డీఎస్సీ ద్వారా భర్తీ చేసే అవకాశం ఉంది.

ఈ ఏడాది రికార్డు స్థాయిలో ధాన్యం ఉత్పత్తి అయ్యింది. ఒకేసారి ఏడు ప్రభుత్వ కాలేజీల ప్రారం¿ోత్సవం, వచ్చే సంవవత్సరానికి మరో ఏడు జిల్లాల్లోనూ మెడికల్‌ కాలేజీల ఏర్పాటుకు ఉత్తర్వులు ఇవ్వడం ద్వారా వైద్యవిద్యకు పెద్దపీట వేశారు. ఇది సాకారం అయితే దేశంలోనే ప్రతిజిల్లాలోనూ మెడికల్‌ కాలేజీలున్న రాష్ట్రంగా తెలంగాణ రికార్డులకెక్కుతుంది. సాగునీటిరంగంలో కాళేశ్వం ప్రాజెక్టు లోపాలు పెద్ద కుదుపుగా చెప్పవచ్చు. పింఛన్లు పెంపు ఆసరా లబ్ధిదారులకు కొంత ఊరట కలిగించింది. ప్రభుత్వ ఉపాధ్యాయులకు నిరాశే మిగిలింది. బదిలీలు, పదోన్నతులకు బ్రేక్‌ పడింది. కేంద్రంతో బీఆర్‌ఎస్‌ ప్రభుత్వం ఘర్షణ వైఖరి కారణంగా ఉపాధి హామీ నిధుల విడుదలలో జాప్యం జరిగింది.    వైద్య, ఆరోగ్యశాఖ ఈ ఏడాది సాధించిన ప్రధాన విజయాల్లో కొత్త మెడికల్‌ కాలేజీలను ప్రారంభించడంగా చెప్పవచ్చు. 2023–24 సంవత్సరంలో కామారెడ్డి, కరీంనగర్, ఖమ్మం, జయశంకర్‌ భూపాలపల్లి, కొమురంభీం ఆసిఫాబాద్, నిర్మల్, రాజన్న సిరిసిల్ల, వికారాబాద్, జనగాం జిల్లాల్లో మెడికల్‌ కాలేజీలను ప్రారంభించింది. ఈ ఏడాది ఇప్పటికే మెడికల్‌ విద్యార్థులు వాటిల్లో చేరారు. ఇక 2024–25 సంవత్సరంలోనూ జోగుళాంబ గద్వాల, నారాయణపేట, ములుగు, వరంగల్, మెదక్, యాదాద్రి భువనగిరి, రంగారెడ్డి, మేడ్చల్‌ మల్కాజిగిరి జిల్లాల్లోనూ మెడికల్‌ కాలేజీలను ప్రారంభించనున్నారు. వచ్చే ఏడాది నుంచి ఒక్కో కాలేజీలో 100 ఎంబీబీఎస్‌ సీట్లతో తరగతులు ప్రారంభించేలా ప్రభుత్వం అవసరమైన చర్యలు తీసుకోనుంది. అంటే 800 మెడికల్‌ సీట్లు అందుబాటులోకి వస్తాయి. 33 జిల్లాలకుగాను  ఇప్పటికే 25 జిల్లాల్లో మెడికల్‌ కాలేజీల ఏర్పాటుకాగా, తాజాగా అనుమతించిన 8 ప్రభుత్వ  మెడికల్‌ కాలేజీలు అందుబాటులోకి వస్తే అన్ని జిల్లాల్లో ఒక మెడికల్‌ కాలేజీ లక్ష్యాన్ని ప్రభుత్వం చేరుకుంటుంది. ఇవి పూర్తయితే రాష్ట్రంలో ఉన్న ప్రభుత్వ మెడికల్‌ కాలేజీల సంఖ్య మొత్తం 34కు చేరుతుంది. తాజా నిర్ణయంతో అన్ని  జిల్లాల్లో ప్రభుత్వ మెడికల్‌ కాలేజీలు ఉండే ఏకైక రాష్ట్రంగా దేశంలోనే తెలంగాణ సరికొత్త రికార్డు సొంతం చేసుకున్నట్టే. అంటే మొత్తంగా రాష్ట్రంలో 10 వేల ఎంబీబీఎస్‌ సీట్లు అందుబాటులోకి వస్తాయి.   పీఆర్‌ అండ్‌ ఆర్‌డీ   పింఛన్‌ రూ. 3,016 నుంచి రూ.4,016కు పెంపు పంచాయతీరాజ్, గ్రామీణాభివృద్ధి శాఖ విషయానికొస్తే..ప్రధానంగా ఆసరాలో భాగంగా దివ్యాంగుల పింఛన్‌ రూ.3,016 నుంచి రూ. 4,016కు బీఆర్‌ఎస్‌ ప్రభుత్వం పెంచింది. పెంపునకు అనుగుణంగా 5,11,656 మందికి నెలకు రూ.­205.48 కోట్లు అందజేయనున్నట్టు ప్రభుత్వం తెలిపింది.   ♦ జీపీలు, సర్పంచ్‌లకు కేంద్ర,రాష్ట్ర ప్రభుత్వాల నిధుల విడుదలలో జాప్యం గ్రామపంచాయతీలకు కేంద్ర, రాష్ట్ర ప్రభుత్వాల నుంచి ఎప్పటికప్పుడు రావాల్సిన నిధులు విడుదల కాకపోవడంతో పలు జీపీల్లో సర్పంచ్‌లు తీవ్ర సమస్యలను ఎదుర్కొన్నారు. వివిధ పనుల కోసం సొంత నిధులు ఖర్చు చేసినా ప్రభుత్వం నుంచి సకాలంలో బిల్లులు రాలేదు. ఈ బిల్లుల కోసం ఎదురుచూస్తూ, ఆర్థిక ఇబ్బందుల్లో మునిగి కొందరు సర్పంచ్‌లు ఆత్మహత్య  చేసుకున్నారు.   ♦ జాతీయ ఉపాధి హామీ పథకం అమల్లోనూ నిధుల సమస్య   ఉపాధి హామీ అమల్లో భాగంగా... తెలంగాణలో నియమ,నిబంధనలు, మార్గదర్శకాలు సరిగ్గా పాటించడం లేదంటూ రాష్ట్రానికి కేంద్రం నిధులు నిలిపేసింది. అయితే కేంద్రం పక్షపాతం ప్రదర్శిస్తూ సకాలంలో నిధులు విడుదల చేయడం లేదంటూ బీఆర్‌ఎస్‌ సర్కార్‌ విమర్శలు సంధించింది. ఇదిలా ఉంటే...ఈ పథకంలో భాగంగా ఫిక్స్‌డ్‌ టెన్యూర్‌ ఎంప్లాయీస్, ఔట్‌సోర్సింగ్‌–కాంట్రాక్ట్‌ పద్ధతుల్లో పనిచేస్తున్న ఉద్యోగులు, సిబ్బందికి గత రెండు, మూడు నెలలుగా వేతనాలు విడుదల కాకపోవడంతో వీరిలో తీవ్ర ఆందోళన నెలకొంది.   మా‘స్టార్‌’ ఏదీ? ♦ సాగని పదోన్నతులు... ఆగిన బదిలీలు ఆఖరులో తప్పని  ♦ టెట్‌ చిక్కులు.. టీచర్‌ పోస్టులకూ బ్రేకులు  ♦ ఉన్నత విద్యామండలిలో మహా నిశ్శబ్దం   దీర్ఘకాలిక డిమాండ్‌ అయిన బదిలీలు, పదోన్నతులుపై ఆశలు రేకెత్తిందీ ఈ ఏడాదే. 10 వేలమంది టీచర్లు ప్రమోషన్లపై కలలుగన్నారు. దాదాపు 50 వేలమంది స్థానచలనం ఉంటుందని ఆశించారు. కానీ నోటిఫికేషన్‌ ఇచ్చిన ఊరట ఎంతోకాలం నిలవలేదు. అడ్డుపడ్డ కోర్టు వ్యాజ్యాలు టీచర్ల ఆనందాన్ని ఆవిరి చేసింది. ప్రమోషన్లకూ బ్రేకులు పడటం 2023 మిగిల్చిన చేదు జ్ఞాపకమే. ఉపాధ్యాయ కొలువుల భర్తీపై నిరుద్యోగుల గంపెడాశలకు 2023 నీళ్లు చల్లింది. విద్యాశాఖలో 20 వేల పోస్టులు ఖాళీగా ఉన్నా, 5 వేల ఉద్యోగాలకే నోటిఫికేషన్‌ రావడం, అదీ అర్ధంతరంగా ఆగిపోవడం నిరుద్యోగులకు 2023 అందించిన ఓ పీడకల. జాతీయ ర్యాంకుల్లో మన విశ్వవిద్యాలయాల వెనుకబాటు, యూనివర్సిటీల్లో ఖాళీల భర్తీ కోసం జరిగిన ఉద్యమాలు దూరమయ్యే కాలంలో కని్పంచిన దృశ్యాలు. బాసర ట్రిపుల్‌ ఐటీలో వెంటవెంట జరిగిన విద్యార్థుల ఆత్మహత్యలు విద్యార్థిలోకాన్ని కలవరపెట్టాయి. టెన్త్‌ పరీక్షల సరళీకరణ, ఇంటర్‌ పరీక్షల్లో మార్పులకు శ్రీకారం 2023లో కనిపించిన కొత్తదనం. ప్రభుత్వం మారిన నేపథ్యంలో ఉన్నత విద్యామండలిలో కుదుపులకు గతించే కాలమే సాక్షీభూతమైంది. మండలి చైర్మన్, వైస్‌చైర్మన్‌ తొలగింపుతో కార్యకలాపాలే మందగించిపోవడం ఈ ఏడాదిలో ఊహించని పరిణామమే. ఉపాధ్యాయ అర్హత పరీక్షకు విద్యార్థులు పోటెత్తడం ఈ సంవత్సరంలో కనిపించిన విశేషం. కరోనా కాలం నుంచి ఆటుపోట్లు ఎదుర్కొంటున్న జేఈఈ మెయిన్‌ కాస్తా గాడిలో పడింది.   రికార్డు స్థాయిలో వరి ఉత్పత్తి ♦ 2022–23 సీజన్లో వరి ఉత్పత్తి  ♦ 2.58 కోట్ల టన్నులు రికార్డులు బద్దలు కొట్టిన తెలంగాణ వ్యవసాయరంగం  రాష్ట్రంలో వరి ఉత్పత్తి రికార్డు స్థాయిలో జరిగింది. 2022–23 వానాకాలం, యాసంగి సీజన్లలో వరి ధాన్యం 2.58 కోట్ల టన్నులు ఉత్పత్తి అయ్యింది. వానాకాలం సీజన్‌లో 1.38 కోట్ల టన్నులు, యాసంగిలో 1.20 కోట్ల టన్నులు ఉంది. ఈ మేరకు తుది నివేదికను ఈ ఏడాది ప్రభుత్వం విడుదల చేసింది. వానాకాలం సీజన్‌లో 65 లక్షల ఎకరాల్లో వరి సాగైంది. ఉత్పాదకత ఎకరానికి 2,124 కిలోలు వచ్చింది. కాగా, ఈ యాసంగిలో 57.46 లక్షల ఎకరాల్లో వరి సాగైంది. వరి ఉత్పాదకత ఎకరానికి 2,091 కిలోలు వచ్చింది. మొత్తంగా చూస్తే ఈ రెండు సీజన్లలో 1.22 కోట్ల ఎకరాల్లో వరి సాగు కాగా, ఎకరానికి 2,108 కిలోల ఉత్పాదకత వచ్చింది. ఆ మేరకు 2.58 కోట్ల టన్నుల వరి ఉత్పత్తి అవుతుందని తెలిపింది. అయితే కేంద్ర ప్రభుత్వం గత మార్చి 15వ తేదీన విడుదల చేసిన నివేదిక ప్రకారం తెలంగాణ వరి ఉత్పత్తిలో రెండో స్థానంలో ఉంది. కాగా, ఈ ఏడాది వరకు 11 విడతల్లో కలిపి రైతుబంధు కింద రైతులకు పెట్టుబడి సాయం రూ. 72,815 కోట్లు ఇచ్చారు. ప్రస్తుతం 12వ విడత సొమ్మును కొత్త ప్రభుత్వం అందజేసే ప్రక్రియ చేపట్టింది. అందులో ఒక ఎకరాలోపు రైతులకు రైతుబంధు సొమ్ము అందజేస్తున్నారు.  కాళేశ్వరం ‘కుదుపు’ మేడిగడ్డ, అన్నారం బ్యారేజీలతో మసకబారిన గత బీఆర్‌ఎస్‌ ప్రభుత్వ ప్రతిష్ట ప్రతిష్టాత్మకంగా నిర్మించిన కాళేశ్వరం ఎత్తిపోతల పథకం చివరకు బీఆర్‌ఎస్‌ ప్రభుత్వ ప్రతిష్టను కుంగదీసింది. కాళేశ్వరం ప్రాజెక్టులో అంతర్భాగంగా నిర్మించిన మేడిగడ్డ, అన్నారం బ్యారేజీల్లో బయటపడిన లోపాలు.. 2023 చివరి త్రైమాసికంలో రాష్ట్ర రాజకీయాలను కుదిపివేశాయి. మేడిగడ్డ(లక్ష్మీ) బ్యారేజీ పియర్లు గత అక్టోబర్‌ 21వ తేదీన కుంగిపోగా, కొన్ని రోజులకే అన్నారం బ్యారేజీలో బుంగలు ఏర్పడ్డాయి. ప్లానింగ్, డిజైన్, నాణ్యత, నిర్వహణ, పర్యవేక్షణ లోపాలతోనే మేడిగడ్డ బ్యారేజీలోని 7వ బ్లాకులోని పియర్లు కుంగినట్టు ..నేషనల్‌ డ్యామ్‌ సేఫ్టీ అథారిటీ(ఎన్డీఎస్‌ఏ) ఆధ్వర్యంలోని నిపుణుల కమిటీ తేల్చి చెప్పింది. 7వ బ్లాక్‌ను పూర్తిగా పునర్నిర్మించాల్సిందేనని సిఫారసు చేసింది. ఇతర బ్లాకులూ విఫలమైతే బ్యారేజీని పూర్తిగా పునర్నిర్మించక తప్పదని స్పష్టం చేసింది. కాళేశ్వరం ప్రాజెక్టులో భాగంగా మేడిగడ్డ బ్యారేజీకి ఎగువన నిర్మించిన అన్నారం, సుందిళ్ల బ్యారేజీలకి సైతం ఇలాంటి డిజైన్లు, నిర్మాణ పద్ధతులనే అవలంబించడంతో భవిష్యత్‌లో వాటికి సైతం ఇలాంటి సమస్యలు తలెత్తవచ్చని ఎన్డీఎస్‌ఏ ఆందోళన వ్యక్తం చేసింది. అన్నారం బ్యారేజీ పునాదుల (రాఫ్ట్‌) కింద నిర్మించిన కటాఫ్‌ వాల్స్‌కి పగుళ్లు రావడంతోనే బ్యారేజీకి బుంగలు ఏర్పడినట్టు ఎన్డీఎస్‌ఏ బృందం మరో నివేదికలో స్పష్టం చేసింది. మేడిగడ్డ బ్యారేజీ పునరుద్ధరణ పనులను సొంత ఖర్చులతో చేస్తామని గతంలో హామీ ఇచ్చిన నిర్మాణ సంస్థ ఎల్‌అండ్‌టీ రాష్ట్రంలో ప్రభుత్వం మారగానే మాట మార్చింది. మేడిగడ్డ బ్యారేజీ పునరుద్ధరణ విషయం ఎవరు చేపట్టాలని అన్న అంశంపై ఎల్‌అండ్‌ టీ, రాష్ట్ర ప్రభుత్వం మధ్య ఇంకా ఎలాంటి అంగీకారం కుదరలేదు.   మిల్లుల్లోనే రూ. 22 వేల కోట్ల విలువైన బియ్యం  పేదలకు ఉచిత బియ్యం పంపిణీతో పాటు రైతుల నుంచి ధాన్యం కొనుగోలు చేసి, బియ్యాన్ని ఎఫ్‌సీఐకి అప్పగించే బృహత్తర బాధ్యత నిర్వహిస్తున్న పౌరసరఫరాల శాఖ 2023లో కొన్ని తప్పటడుగులు వేసింది. తద్వారా కార్పొరేషన్‌కు అప్పులు గుదిబండగా మారాయి. 2022 రబీ(యాసంగి)లో రైతుల నుంచి సేకరించిన సుమారు 60 లక్షల మెట్రిక్‌ టన్నుల ధాన్యాన్ని మిల్లింగ్‌ చేసి, సీఎంఆర్‌ కింద ఎఫ్‌సీఐకి అప్పగించకపోవడంతో ఆ భారం సంస్థపై పడింది. యాసంగి ధాన్యాన్ని ముడిబియ్యంగా మిల్లింగ్‌ చేయడం వల్ల బియ్యం విరిగి తమకు నష్టం వస్తుందని, అందుకే మిల్లింగ్‌ చేయలేమని రైస్‌మిల్లర్ల వాదనను అంగీకరించింది. మిల్లర్ల పట్ల ఉదారత చూపి, ధాన్యాన్ని విక్రయించేందుకు ప్రయత్నించగా, ఎన్నికల సంఘం బ్రేక్‌ వేయడంతో మిల్లుల్లోనే 60 లక్షల మెట్రిక్‌ టన్నుల ధాన్యం నిల్వలు ఉండిపోయాయి. వీటితో పాటు అంతకు ముందు లెక్క తేలని ధాన్యం కలిపి సుమారు రూ. 22వేల కోట్ల విలువైన 83 ఎల్‌ఎంటీ ధాన్యం మిల్లుల్లోనే ఉన్నట్లు మిల్లర్లు చూపారు. కొత్త ప్రభుత్వం కొలువు తీరిన వెంటనే ఈ లెక్కలు తీసిన మంత్రి ఉత్తమ్‌ కుమార్‌ రెడ్డి పౌరసరఫరాల సంస్థ ఏకంగా రూ.56వేల కోట్ల అప్పులు ఉన్నట్లు లెక్కలు చెప్పారు. ఇవి కాకుండా రూ. 11వేల కోట్లు సంస్థ నష్టపోయినట్లు తేల్చారు. మిల్లర్ల పట్ల ఉదాసీనంగా వ్యవహరించిన కారణంగా 2023లో ఆ సంస్థ ప్రజల్లో పలుచనైపోయిందన్న వాదనలు ఇప్పుడు బలంగా వినిపిస్తున్నాయి. 

సాక్షి, హైదరాబాద్‌: శాసనసభలో గవర్నర్‌ ప్రసంగిస్తున్న సమయంలో మెగా డీఎస్సీ ప్రస్తావన రావడంతో ఉపాధ్యాయ పోస్టుల భర్తీపై ఆశలు చిగురిస్తున్నాయి. 22 వేల ఖాళీలున్నట్టు విద్యాశాఖ వర్గాలు చెబుతూ వచ్చాయి. అయితే కొత్త ప్రభుత్వం ఏర్పడిన తర్వాత మాత్రం అధికారులు 18 వేల పోస్టులే ఉన్నట్టు సర్కారుకు నివేదించారు. మెగా డీఎస్సీ ద్వారా ఎన్ని పోస్టులు భర్తీ చేస్తారనే దానిపై ఉత్కంఠ నెలకొంది. రాష్ట్రవ్యాప్తంగా 4 లక్షల మందిదాకా ఉపాధ్యాయ అర్హత పరీక్ష ఉత్తీర్ణులై ఉన్నారు. తెలంగాణ ఏర్పడిన తర్వాత ఒక్క 2017లోనే ఉపాధ్యాయ నియామకాలు చేపట్టి, 8,792 పోస్టులు భర్తీ చేశారు. అప్పటికే 2.5 లక్షల మంది టెట్‌కు అర్హత సాధించి ఉన్నారు.  కొత్త నియామకాలపైనే దృష్టి   ఉపాధ్యాయ ఖాళీల్లో కొన్నింటిని పదోన్నతుల ద్వారా భర్తీ చేస్తారు. స్కూల్‌ అసిసెంట్లు(ఎస్‌ఏ)గా అర్హత ఉన్న సెకండరీ గ్రేడ్‌ టీచర్లకు ప్రమోషన్ల ద్వారా 70 శాతం ఖాళీలు భర్తీ చేసి, 30 శాతం స్కూల్‌ అసిస్టెంట్ల పోస్టుల భర్తీ నేరుగా నోటిఫికేషన్‌ ద్వారా చేయాల్సి ఉంటుంది. కొన్ని స్కూళ్లలో టీచర్ల సంఖ్యకు తగ్గట్టుగా విద్యార్థుల సంఖ్య లేదు. కొన్ని స్కూళ్లల్లో విద్యార్థులున్నా, టీచర్ల సంఖ్య తక్కువగా ఉంది. దీనిని దృష్టిలో ఉంచుకొని హేతుబద్దీకరణ చేయాలని విద్యాశాఖ 2016 నుంచి చెబుతూనే ఉంది. ఈ సమస్యల కార ణంగానే 2022లో డీఎస్సీ ద్వారా కేవలం 5,089 పోస్టుల భర్తీకే నోటిఫికేషన్‌ ఇచ్చారు. ఇప్పుడు పదోన్నతులు కల్పించి, హేతుబద్దీకరణ చేపట్టి వాస్తవ ఖాళీలను భర్తీ చేస్తారా? అనే దానిపై స్పష్టత రావాల్సి ఉంది. ఇదే జరిగితే గత ఏడాది ఆగిపోయిన డీఎస్సీ నోటిఫికేషన్‌ స్థానంలో కొత్త నియామక ప్రక్రియ చేపట్టాల్సి ఉంటుంది.   అడ్డంకులెన్నో...  ఉపాధ్యాయ నియామకాల ప్రస్తావన వచ్చి నప్పుడల్లా లక్షలాదిమంది కోచింగ్‌ల కోసం హైదరాబాద్‌ బాట పడుతున్నారు. అప్పులు చేసి మరీ కోచింగ్‌ తీసుకుంటున్నారు. కొంత మంది ప్రైవేటు స్కూళ్లలో పనిచేస్తున్నా, వాటిని విడిచిపెట్టి ప్రభుత్వ టీచర్‌ పోస్టులకు సన్నద్ధమవుతున్నారు. ప్రభుత్వం మెగా డీఎస్సీ నిర్వహణకు సిద్ధమవుతున్న తరుణంలో ఇలాంటి వాతావరణమే మళ్లీ కనిపించనుంది. అయితే, విద్యాశాఖలో పదోన్నతులు చేపడితేనే స్కూల్‌ అసిస్టెంట్‌ ఖాళీలు తెలుస్తాయి. టెట్‌ అర్హత ఉన్నవారికే పదోన్నతులు ఇవ్వాలని కోర్టు తెలిపింది. మెగా డీఎస్సీ నోటిఫికేషన్‌కు ముందు దీనిని చేపట్టాల్సి ఉంటుంది. వరుసగా స్థానిక సంస్థలు, పార్లమెంట్‌ ఎన్నికలున్నాయి. దీనివల్ల కాలయాపన జరిగే వీలుంది. ఇవేవీ అడ్డంకి కాకుండా నియామకాలు చేపట్టాలని నిరుద్యోగులు కోరుతున్నారు.  పూర్తిస్థాయి నియామకాలు చేపట్టాలి  విద్యాశాఖలో 22 వేల పోస్టులున్నాయి. లక్షల మంది టెట్‌ ఉత్తీర్ణులై టీచర్‌ పోస్టు కోసం ఎదురు చూస్తున్నారు. పూర్తిస్థాయిలో నియామకాలు చేపడితేనే ఎక్కువ మందికి ప్రయోజనం ఉంటుంది. ప్రభుత్వం ఈ దిశగా అడుగులు వేయాలి.   – రావుల రామ్మోహన్‌రెడ్డి (డీఎడ్, బీఎడ్‌ అభ్యర్థుల సంఘం అధ్యక్షుడు) 

సాక్షి, హైదరాబాద్‌: రాష్ట్రంలో టీచర్‌ పోస్టుల ఖాళీపై కొత్త ప్రభుత్వం ఆరా తీసింది. నిలిచిపోయిన నియామకాలు, తీసుకోవాల్సిన నిర్ణయాలపై వాకబు చేసింది. విద్యాశాఖ కార్యదర్శి, పాఠశాల విద్య డైరెక్టర్‌ సమగ్ర వివరాలతో రూపొందించిన నివేదికను ప్రభుత్వ ప్రధాన కార్యదర్శికి సమర్పించారు. దీంతో పాటే ఉపాధ్యాయుల బదిలీలు, పదోన్నతులను వివరించారు. కోర్టు వివాదంలో ఉన్న అంశాలు, ఎన్నికల కోడ్‌ వల్ల నిలిచిపోయిన డీఎస్సీ పరీక్షను నివేదికలో పేర్కొన్నట్టు అధికార వర్గాలు తెలిపాయి. విద్యాశాఖపై సీఎం రేవంత్‌ రెడ్డి సమీక్ష చేసే అవకాశం ఉంది. దీంతో సమగ్ర నివేదిక సిద్ధం చేయాలని ఉన్నతాధికారులు ఆదేశించినట్టు పాఠశాల విద్య డైరెక్టరేట్‌కు చెందిన ఓ ఉన్నతాధికారి తెలిపారు.   డీఎస్సీ రీ షెడ్యూల్‌?  ఎన్నికల ముందు 5,089 టీచర్‌ పోస్టుల భర్తీ ప్రక్రియను చేపట్టారు. అభ్యర్థుల నుంచి దరఖాస్తులు కూడా స్వీకరించారు. రోస్టర్‌ విధానాన్ని స్పష్టం చేశారు. ఈలోగా ఎన్నికల కోడ్‌ అమలులోకి వచ్చింది. దీంతో నియామక ప్రక్రియ వాయిదా పడింది. ఆగిపోయిన డీఎస్సీని ముందుకు తీసుకెళ్ళడమా? కొత్త షెడ్యూల్‌ ఇవ్వడమా? అనే అంశంపై ప్రభుత్వం నిర్ణయం తీసుకోవాల్సి ఉంది. రోస్టర్‌ విధానం వెల్లడించిన తర్వాత కొన్ని జిల్లాల్లో సాధారణ కేటగిరీల్లో పోస్టులు లేకుండా పోయాయి. స్థానికేతరులకూ కేవలం 15 శాతమే అర్హత ఉండటంతో డీఎస్సీపై నిరుద్యోగుల నుంచి తీవ్ర వ్యతిరేకత వచ్చింది. అప్పట్లోనే కొన్ని పో స్టులు కలపాలన్న ఆలోచన గత ప్రభుత్వం చేసింది. కానీ ఇది కార్యాచరణకు నోచుకోలేదు. ఇప్పుడు మళ్ళీ నోటిఫికేషన్‌ ఇచ్చే వీలుందని అధికార వర్గాలు అంటున్నాయి. 20 వేలకుపైగానే ఖాళీలు  విద్యాశాఖలో 20,740 పోస్టులు ఖాళీగా ఉన్నట్టు విద్యాశాఖ అధికారులు లెక్కగట్టారు. 2022లో ప్రభుత్వం 13 వేల ఖాళీలు భర్తీ చేస్తామని తెలిపింది. ఈ మేరకు 2023లో 5,089 పోస్టుల భర్తీకి డీఎస్సీ నిర్వహణకు సిద్ధమైంది. ఈ క్రమంలో ప్రస్తుతం విద్యాశాఖ ఏయే విభాగాల్లో ఎన్ని ఖాళీలున్నాయనే అంశాన్ని ప్రభుత్వ ప్రధాన కార్యదర్శికి అందించిన నివేదికలో పేర్కొంది. పదోన్నతులు కల్పించడం ద్వారా హెచ్‌ఎం పోస్టులను భర్తీ చేస్తారు. స్కూల్‌ అసిస్టెంట్ల పోస్టులు కూడా ఎస్‌జీటీలకు పదోన్నతులు కల్పించడం ద్వారా 70 శాతం భర్తీ చేయాల్సి ఉంటుందని, మిగిలిన 30 శాతం ప్రత్యక్ష నియామకం చేపట్టడం ద్వారా భర్తీ చేయాలనే విషయాన్ని సూచించింది. జిల్లా విద్యాశాఖ అధికారులు కేవలం ఐదు జిల్లాలకే ఉన్నారని, మండల విద్యాశాఖ అధికారుల పోస్టులు 467 ఖాళీగా ఉన్నాయని తెలిపింది. వీటిల్లో ఎన్ని భర్తీ చేస్తారనేది కొత్త ప్రభుత్వం తీసుకునే నిర్ణయాన్ని బట్టి ఉంటుందని అధికార వర్గాలు అంటున్నాయి. ఉన్నత స్థాయి సమీక్ష తర్వాతే ఓ స్పష్టత వచ్చే వీలుందని అధికారులు తెలిపారు. 

సాక్షి, హైదరాబాద్‌: ఉపాధ్యాయ పోస్టుల భర్తీ కోసం నిర్వహిస్తున్న డీఎస్సీ–2023లో సమాంతర రిజర్వేషన్‌ అమలు చేయాలని రాష్ట్ర ప్రభుత్వాన్ని హైకోర్టు ఆదేశించింది. పిటిషనర్లు లేవనెత్తిన ఇతర అంశాలపై కౌంటర్‌ దాఖలు చేయాలని ప్రతివాదులను ఆదేశించింది. ప్రభుత్వ ప్రధాన కార్యదర్శి, పాఠశాల విద్యా శాఖ ముఖ్య కార్యదర్శి, పాఠశాల విద్యా శాఖ డైరెక్టర్‌కు నోటీసులు జారీ చేసింది. తదుపరి విచారణలోగా కౌంటర్‌ దాఖలు చేయాలని ఆదేశాలు జారీ చేస్తూ, విచారణను నవంబర్‌ 15కు వాయిదా వేసింది. డీఎస్సీ ద్వారా 5,089 పోస్టులు భర్తీ చేసేందుకు ప్రభుత్వం నోటిఫికేషన్‌ ఇచ్చిందని, అయితే మహిళా కోటాలో సమాంతర రిజర్వేషన్‌ కాకుండా వర్టికల్‌ రిజర్వేషన్‌ పాటిస్తోందంటూ బోడ శ్రీనివాసులు సహా 23 మంది హైకోర్టులో పిటిషన్‌ దాఖలు చేశారు. ‘డీఎస్సీలో మహిళలకు 33.33 శాతానికి బదులు 51శాతం పోస్టులను కేటాయించారు. గ్రూప్‌–1, గ్రూప్‌–2 తదితర పోస్టుల్లో మహిళా రిజర్వేషన్లను సమాంతరంగా అమలు చేయాలని గతంలోనే హైకోర్టు ఉత్తర్వులు జారీ చేసింది. ఈ ఆదేశాలను విద్యా శాఖ పాటించడం లేదు. ఉపాధ్యాయ నియామకాల్లో కూడా మహిళలు, వికలాంగులు, ఎక్స్‌ సర్వీస్‌ మెన్‌ రిజర్వేషన్లను సమాంతరంగా అమలు చేయాలి. ఈ మేరకు ప్రభుత్వానికి ఆదేశాలు జారీ చేయాలి’అని పిటిషన్‌లో కోరారు. దీనిపై జస్టిస్‌ పి.మాధవీదేవి విచారణ చేపట్టారు. ఇరుపక్షాల వాదనలను విన్న న్యాయమూర్తి.. సమాంతర రిజర్వేషన్‌ పాటించాలని ఆదేశిస్తూ, విచారణ వాయిదా వేశారు.

సాక్షి, హైదరాబాద్‌: రాష్ట్రంలో ఈ నెల 15న జరిగిన ఉపాధ్యాయ అర్హత పరీక్ష (టెట్‌) ఫలితాలు బుధవారం విడుదలయ్యాయి. టెట్‌ రెండు పేపర్లకు కలిపి 4,13,629 మంది అభ్యర్థులు పరీక్ష రాయగా వారిలో 1,11,562 మంది అర్హత పొందారు. పేపర్‌–1ను 2,23,582 మంది రాస్తే 82,489 (36 .98%)మంది అర్హత పొందగా పేపర్‌–2లో మేథ్స్, సైన్స్‌ సబ్జెక్టులను 1,01,134 మంది రాస్తే 18,874 మంది (18.66%), సోషల్‌ స్టడీస్‌సబ్జెక్టును88,913 మంది రాస్తే 10,199 మంది (11.47%) అర్హత సాధించారు. పేపర్‌–2లో 1,90, 047 మందికి గాను 29,073 (15.30%) మంది అర్హత పొందారు. టెట్‌కు సంబంధించిన అధికారిక వెబ్‌సైట్‌ https://cgg.gov.inÌలో తుది ‘కీ’తోపాటు ఫలితాలు అందుబాటులో ఉన్నాయని టీఎస్‌ టెట్‌ కన్వీనర్‌ రాధారెడ్డి ఓ ప్రకటనలో తెలిపారు.   పడిపోయిన ఫలితాలు...: ఉమ్మడి రాష్ట్రంలో 2011లో టెట్‌ నిర్వహించగా తెలంగాణ రాష్ట్రం ఏర్పడిన తర్వాత 2016 నుంచి ఇప్పటి వరకూ ఐదుసార్లు పరీక్ష జరిగింది. ఇప్పటికే దాదాపు 3.5 లక్షల మంది టెట్‌ అర్హులు రాష్ట్రంలో ఉన్నారు. గతంతో పోలిస్తే ఈ ఏడాది టెట్‌ ఫలితాలు దారుణంగా పడిపోయాయి. సాధారణంగా పేపర్‌–1లో 2022లో మినహా అంతకు ముందు రెండేళ్లలో 50 శాతానికిపైగా రిజల్ట్‌ వచ్చింది. పేపర్‌–2లో మొదట్నుంచీ రిజల్ట్‌ తగ్గుతున్నా ఈసారి అతితక్కువగా 15.30 శాతమే నమోదైంది. గతేడాది ప్రభుత్వం వరుస నోటిఫికేషన్లు ఇవ్వడం, ఉపాధ్యాయ పోస్టుల భర్తీ చేస్తామనే ప్రకటనతో అభ్యర్థులు కోచింగ్‌ కేంద్రాలకు వెళ్లి మరీ టెట్‌కు సన్నద్ధమయ్యారు. ఈసారి టీఆర్టీ నోటిఫికేషన్‌ విడుదల చేసినా పోస్టులు తక్కువగా ఉండటం, రోస్టర్‌ విధానం తర్వాత కొన్ని జిల్లాల్లో ఏమాత్రం ఖాళీలు లేకపోవడంతో ఎక్కువ మంది టెట్‌కు ప్రిపేర్‌ కాలేదు.  టీఆర్టీ దరఖాస్తుకు అర్హులు  తాజాగా టెట్‌ ఉత్తీర్ణులు ప్రస్తుతం ప్రభుత్వం నియమించే ఉపాధ్యాయ పోస్టుల భర్తీకి టెట్‌ అర్హతతో దరఖాస్తు చేసుకోవచ్చు. ఫలితాలు వెల్లడవ్వడంతో ఇందుకు సంబంధించిన ధ్రువపత్రాలు కూడా ఆలస్యం చేయకుండా ఇవ్వాలని అధికారులు భావిస్తున్నారు. టీఆరీ్టకి ఇప్పటివరకు పెద్దగా దరఖాస్తులు రాలేదు. కొన్ని జిల్లాల్లో స్థానికత ఉన్నప్పటికీ పోస్టులు లేవని, పోస్టులు ఉన్న చోట నాన్‌–లోకల్‌ కోటాలో వెళ్లినా, ఆ కేటగిరీలో తక్కువ పోస్టులు ఉన్నాయని అభ్యర్థులు టీఆర్టీకి వెనకడుగు వేస్తున్నారు. తాజా టెట్‌ అర్హులు టీచర్‌ పోస్టులకు ఎక్కువగా దరఖాస్తు చేసే వీలుందని భావిస్తున్నారు.  

సాక్షి, హైదరాబాద్‌: ఓపెన్‌ డిగ్రీ చేసి, బీఈడీ పూర్తి చేసిన వారూ ఉపాధ్యాయ నియామక పరీక్షకు దరఖాస్తు చేసుకునే అవకాశం కల్పించాలని విద్యాశాఖ నిర్ణయించింది. ఈ మేరకు దరఖాస్తు విధానంలో స్వల్ప మార్పులు చేసేందుకు సన్నాహాలు చేస్తున్నట్టు అధికారులు తెలిపారు. ఇంటర్మీడియెట్‌ చదవకుండా గతంలో డైరెక్ట్‌ డిగ్రీ (దూర విద్య ద్వారా) చేసినవారు తర్వాత బీఈడీ పూర్తి చేశారు. ఉపాధ్యాయ నియామకాల దరఖాస్తు ఫారంలో ఇంటర్‌ విద్య వివరాలను పొందుపరచాల్సి రావడంతో ఇబ్బంది ఎదురవుతోందని అభ్యర్థులు అధికారుల దృష్టికి తెచ్చారు. దీనిపై విద్యాశాఖ సానుకూలంగా స్పందించినట్టు అధికారవర్గాలు తెలిపాయి. 

గన్‌ఫౌండ్రీ (హైదరాబాద్‌): రాష్ట్రవ్యాప్తంగా ఖాళీగా ఉపాధ్యాయ పోస్టులను వెంటనే భర్తీ చేయాలని ఇందుకు మెగా డీఎస్సీ నోటిఫికేషన్‌ ఇవ్వాలని బీసీ సంక్షేమ సంఘం జాతీయ అధ్యక్షుడు, రాజ్యసభ సభ్యుడు ఆర్‌.కృష్ణయ్య డిమాండ్‌ చేశారు. 25 వేలకు పైగా ఉపాధ్యాయ పోస్టులు ఖాళీగా ఉంటే కేవలం 5 వేలకే నోటిఫికేషన్‌ను విడుదల చేయడం సరికాదన్నారు.  తెలంగాణ నిరుద్యోగ జేఏసీ ఆధ్వర్యంలో మంగళవారం బషీర్‌బాగ్‌లోని విద్యాశాఖ కార్యాలయం ఎదుట బీఈడీ, టీఆర్‌టీ అభ్యర్థులు భారీగా ఆందోళనకు దిగారు. కొన్నేళ్లుగా ఎయిడెడ్‌ పాఠశాలలో ఉపాధ్యాయ పోస్టులను భర్తీ చేయడం లేదని ఆర్‌.కృష్ణయ్య అన్నారు. ప్రభుత్వ పాఠశాలల అభివృద్ధి కోసం రూ.వేల కోట్లు కేటాయిస్తున్న ప్రభుత్వం ఉపాధ్యాయులను భర్తీ చేయడానికి మాత్రం ఎందుకు ఆలోచిస్తుందని ప్రశ్నించారు.   భారీగా తరలివచ్చిన అభ్యర్థులు...  మెగా డీఎస్సీని ప్రకటించాలని కోరుతూ.. బీఈడీ, డీఈడీ అభ్యర్థులు పెద్ద ఎత్తున విద్యా శాఖ కార్యాలయం ముట్టడికి యత్నించారు. అసెంబ్లీ నుంచి కొంతమంది, అబిడ్స్‌ నుంచి కొంతమంది అభ్యర్థులు ఏకకాలంలో దూసుకురావడంతో పోలీసులు వారిని అడ్డుకున్నా రు. దీంతో అక్కడ కొద్దిసేపు ఉద్రిక్త పరిస్థితి ఏర్పడింది. పోలీసులతో వాగ్వాదం, తోపు లాట జరగడంతో పలువురు స్వల్పంగా గాయపడ్డారు. ఆందోళనకారులను పోలీసులు అరెస్టు చేసి వివిధ పోలీస్‌స్టేషన్లకు తరలించారు. ఆందోళనలో బీసీ సంక్షేమ సంఘం జాతీయ కన్వినర్‌ గుజ్జకృష్ణ, నిరుద్యోగ జేఏసీ చైర్మన్‌ నీల వెంకటేశ్‌ పాల్గొన్నారు.  

సాక్షి, హైదరాబాద్‌:  రాష్ట్రంలో పెద్ద సంఖ్యలో ఉపాధ్యాయ శిక్షణ తీసుకుంటున్నా.. ఆ తర్వాత ఉపాధ్యాయ అర్హత పరీక్ష (టెట్‌)లో మాత్రం చాలా మంది ఫెయిలవుతున్నారు. బీఎడ్‌ విద్యార్హతతో రాసే పేపర్‌–2లో 2011 నుంచి ఇప్పటివరకు ప్రతిసారీ ఉత్తీర్ణత శాతం సగం కూడా దాటలేదు. తెలంగాణ ఏర్పాటయ్యాక ఒక్క 2022లో తప్ప ఎప్పుడూ ఉత్తీర్ణత 30% కూడా దాటకపోవడం గమనార్హం. ప్రభు త్వం ఉపాధ్యాయ పోస్టుల భర్తీ నోటిఫికేషన్‌ ఇస్తా మని గతేడాది ప్రకటించడంతో.. ప్రైవేటు బడుల్లో పనిచేస్తున్నవారు సహా పెద్ద సంఖ్యలో అభ్యర్థులు కోచింగ్‌ కేంద్రాలకు వెళ్లి మరీ టెట్‌ కోసం సిద్ధమయ్యారు. అయినా పాస్‌ శాతం తక్కువే నమోదైంది. ఉమ్మడి రాష్ట్రంలో ఉపాధ్యాయ నియామక నోటిఫికేషన్‌తోపాటు టెట్‌ నోటిఫికేషన్‌ ఇచ్చేవారని.. టీచర్‌ పోస్టుల భర్తీపై నమ్మకం ఉండేదని అభ్యర్థులు చెప్తున్నారు. తెలంగాణ ఏర్పడ్డాక 2017లో మినహా ఇంతవరకు టీచర్‌ పోస్టుల భర్తీ జరగలేదు. దీంతో టెట్‌పై అభ్యర్థులు పెద్దగా ఆసక్తి చూపడం లేదని, సీరియస్‌గా ప్రిపేర్‌ కాకుండానే పరీక్షలు రాస్తున్నారని నిపుణులు అంటున్నారు.  అందని అర్హత గీటురాయి: టెట్‌ ప్రశ్నపత్రం 150 మార్కులకు ఉంటుంది. ఇందులో అర్హత పొందాలంటే ఓపెన్‌ కేటగిరీ అభ్యర్థులు కనీసం 90 మార్కు లు, బీసీలు 75 మార్కులు, ఎస్సీ, ఎస్టీలు 60 మార్కులు సాధించాలి. పేపర్‌–1 (డీఎడ్‌ అర్హతతో రాసేది)తో పోలిస్తే, పేపర్‌–2 (బీఎడ్‌ అర్హతతో రాసేది) కష్టంగా ఉంటోందని పరీక్షకు హాజరయ్యే అభ్యర్థులు చెప్తున్నారు. మేథ్స్, ఇంగ్లిష్‌ పై పట్టు ఉంటే తప్ప కనీసం 90 మార్కులు సాధించడం కష్టమేనని.. ముఖ్యంగా మేథ్స్‌లో సరైన సమాధానం రాబట్టేందుకు ఎక్కువ సమయం పడుతోందని అంటున్నారు. కనీసం 6 నెలల పాటు మోడల్‌ ప్రశ్నలు చేసి ఉంటేనే ఇది సాధ్యమవుతుందని వివరిస్తున్నా రు. ఇక ఇంగ్లిష్లో ప్రధానంగా జాతీయాలు, మోడ్రన్, అడ్వాన్స్‌డ్‌ లాంగ్వేజ్‌ నుంచి ప్రశ్నలు ఇస్తున్నారని.. వీటికి తగ్గ ప్రిపరేషన్‌ ఉండటం లేదని స్పష్టం చేస్తున్నారు. అదే పేపర్‌–1 ఇంటర్మీడియట్‌ స్థాయిలో ఉంటోందని.. బోధన మెళకువలు, మోడ్రన్‌ టీచింగ్‌ మెథడ్స్‌పై దృష్టి పెడితే తేలికగా గట్టెక్కగలుగుతున్నారని నిపుణులు అంటున్నారు.  నాలుగున్నర లక్షల మందిలో..  రాష్ట్రంలో 1.5 లక్షల మంది డీఎడ్‌ ఉత్తీర్ణులు, 4.5 లక్షల మంది బీఎడ్‌ ఉత్తీర్ణులు కలిపి ఆరు లక్షల మందికిపైగా ఉపాధ్యాయ అభ్యర్థులు ఉన్నారు. వీరిలో సుమారు 4 లక్షల మంది మాత్రమే ఇప్పటివరకు టెట్‌ ఉత్తీర్ణత సాధించగలిగారు. టెట్‌లో పేపర్‌–1 పాసైతే.. 1–5 వరకూ బోధించే ‘సెకండరీ గ్రేడ్‌ టీచర్‌ (ఎస్జీటీ)’ పోస్టులకు..  పేపర్‌–2 పాసైతే పదో తరగతి వరకు బోధించే ‘స్కూల్‌ అసిస్టెంట్‌ (ఎస్‌ఏ)’ పోస్టులకు పోటీపడే వీలు ఉంటుంది. డీఎడ్‌ పూర్తిచేసినవారు పేపర్‌–1 మాత్రమే రాసే వీలుండగా.. బీఎడ్‌ వారు పేపర్‌–1, పేపర్‌–2 రెండూ రాయవచ్చు. అయితే పేపర్‌–1 కాస్త సులువుగా ఉంటుండటంతో.. చాలా మంది బీఎడ్‌ వారు పేపర్‌–1పైనే ఎక్కువ దృష్టి పెడుతున్నారని, ఇదికూడా పేపర్‌–2లో అర్హత శాతం తగ్గడానికి కారణమవుతోందని నిపుణులు చెప్తున్నారు.  ఇంగ్లిష్, మేథ్స్‌కు కష్టపడాలి  కేవలం 45 రోజుల్లోనే టెట్‌కు ప్రిపేర్‌ అవ్వాలంటే చాలా కష్టపడాలి. ఇంగ్లిష్, మేథ్స్‌లో మంచి మార్కులు సాధిస్తేనే అర్హత సాధించవచ్చు. దీనికి ప్రత్యేక సన్నద్ధత అవసరం. టీచర్‌ పోస్టులు వస్తాయనే ఆశతో కోచింగ్‌ కేంద్రాలకు వెళ్లి శిక్షణ తీసుకుంటున్నాం. కానీ టీచర్‌ నోటిఫికేషన్‌ రాకపోవడం నిరాశగా ఉంది.  – స్వాతి, టెట్‌ అభ్యర్థి, భూపాలపల్లి  నియామకాలుంటేనే ఉత్సాహం  టెట్‌ ఉత్తీర్ణులు లక్షల్లో ఉన్నారు. టీచర్‌ పోస్టులు వస్తాయని ఆశతో ఉన్నాం. కానీ ఏటా నిరాశే ఎదురవుతోంది. నియామక నోటిఫికేషన్‌ వస్తేనే మాకూ ఉత్సాహంగా ఉంటుంది. ఈసారైనా రిక్రూట్‌మెంట్‌ నిర్వహిస్తారని  ఆశిస్తున్నాం.  – ఇఫ్రాన్‌ పాషా, టెట్‌ అభ్యర్థి, ములుగు జిల్లా 

సాక్షి, హైదరాబాద్‌: టీచర్‌ పోస్టుల భర్తీకి ప్రభుత్వం చేసిన ప్రకటనపై సర్వత్రా అసంతృప్తి వ్యక్తమవుతోంది. నిరుద్యోగులు ఆందోళన బాట పడుతుంటే, ఉపాధ్యాయుల నుంచి తీవ్ర విమర్శలు తప్పడం లేదు. 2017 తర్వాత ఇప్పుడు టీచర్ల రిక్రూట్‌మెంట్‌ ఉంటుందంటే నిరుద్యోగులు భారీ ఆశలు పెట్టుకున్నారు. విద్యాశాఖ దాదాపు 22 వేల ఖాళీలున్నాయని లెక్కగట్టడం దీనికి ఓ కారణం. కానీ ప్రభుత్వం మాత్రం అన్నీ కలిపి దాదాపు 6,612 పోస్టుల భర్తీకే సుముఖత వ్యక్తం చేసింది. రాష్ట్రవ్యాప్తంగా 4 లక్షల మంది టెట్‌ అర్హులు టీచర్‌ నియామక నోటిఫికేషన్‌ కోసం ఎదురుచూస్తున్నారు. అయితే ప్రభుత్వ ప్రకటనలో సగం పోస్టులు కూడా లేకపోవడంతో వాళ్లంతా ఆందోళన వ్యక్తం చేస్తున్నారు.   టీచర్లలో అసంతృప్తి  ఇప్పటికే స్కూళ్లలో సబ్జెక్టు టీచర్ల కొరత ఉంది. వేరే సబ్జెక్టు టీచర్లతో బోధన చేయిస్తున్నారు. గత ఏడాది నుంచి ఆంగ్ల మాధ్యమంలో బోధ న చేపట్టారు. దీంతో టీచర్లు తెలుగు, ఇంగ్లిష్‌ మీడియంలో ఉన్న రెండు సెక్షన్లకూ బోధన చే యాల్సి వస్తోంది. ఈ కారణంగా తమపై పని భారం పెరిగిందని టీచర్లు అంటున్నారు. రా ష్ట్రంలోని 26 వేల ప్రభుత్వ స్కూళ్లలో 22 వేల వరకూ ఖాళీలున్నాయని విద్యాశాఖ గత ఏడా ది లెక్కలు వేసింది. ఇందులో 13,086 పోస్టు లు భర్తీ చేస్తామని ప్రభుత్వమే ప్రకటించింది. ఇటీవల మంత్రి వర్గ ఉపసంఘం కూడా 9,370 పోస్టులను తక్షణమే భర్తీ చేయాలని ప్రభుత్వానికి సిఫార్సు చేసింది. ప్రస్తుతం ప్ర త్యేక అవసరాల పిల్లలకు బోధించే టీచర్లను కలుపుకొంటే 6,612 మందిని మాత్రమే నియమించేందుకు ప్రభుత్వం సిద్ధమైంది. దీంతో భారీ ఎత్తున చేపట్టాల్సిన నియామకాల జాడే కన్పించలేదు. స్కూల్‌ అసిస్టెంట్‌ పోస్టుల భర్తీ లో ఎక్కువగా సైన్స్, సోషల్‌ సబ్జెక్టు టీచర్‌ పో స్టులే ఉన్నట్టు తెలుస్తోంది. దీంతో ఇంగ్లిష్, మా థ్స్‌ సబ్జెక్టులకు భారీగా కోత తప్పదని ఉపాధ్యాయ వర్గాలు అంటున్నాయి. దీనివల్ల ఉన్న టీచర్లపై పనిభారం పడుతుందని ఆందోళన వ్యక్తం చేస్తున్నారు. పదోన్నతులు వస్తే తప్ప మి గతా ఖాళీలు భర్తీ చేయడానికి వీల్లేదని ప్రభు త్వం అంటోంది. న్యాయ వివాదం కొన్నేళ్లుగా నలుగుతోంది, దీంతో తమకు అన్యాయం జరుగుతుందని ఉపాధ్యాయులు అంటున్నారు.  ఆందోళన బాటలో నిరుద్యోగులు  టీచర్‌ ఉద్యోగాలపై టెట్‌ ఉత్తీర్ణులు ఎన్నో ఆశ లు పెట్టుకున్నారు. గత ఏడాది వరుస నోటిఫికేషన్ల సమయంలో కొంతమంది ప్రైవేటు ఉద్యోగాలు మానుకొని మరీ కోచింగ్‌ కేంద్రాలకు వెళ్లారు. ఉపాధ్యాయ నియామక పరీక్షలో ఎలాగైనా మంచి ర్యాంకు సాధించాలని అప్పులు చేసి, హాస్టళ్లల్లో ఉండి సిద్ధమయ్యారు. కానీ టీచర్ల పదోన్నతులు ఇస్తేనే స్కూల్‌ అసిస్టెంట్స్, ఎస్‌జీటీ పోస్టుల ఖాళీలు తెలుస్తాయి. వాటిని భర్తీ చేయడానికి వీలుంటుంది. ఇవేవీ జరగకపోవడంతో నిరుద్యోగులు ఏడాదిగా నలిగిపోతున్నారు. తాజాగా 6,612 టీచర్‌ పోస్టుల భర్తీకి ప్రభుత్వం సమ్మతించడంతో వారు ఆందోళనలకు దిగుతున్నారు, 13,500 పోస్టుల భర్తీకి నోటిఫికేషన్‌ ఇవ్వాలని బీఎడ్, డీఎడ్‌ అభ్యర్థులు శుక్రవారం పాఠశాల విద్య డైరెక్టర్‌ కార్యాలయాన్ని ముట్టడించారు.  

సాక్షి, హైదరాబాద్‌: రాష్ట్రంలోని ప్రభుత్వ పాఠశాలల్లో ఉపాధ్యాయ కొలువుల కోసం ఎదురు చూస్తున్న అభ్యర్థులకు ప్రభుత్వం శుభవార్త అందించింది. త్వరలోనే టీచర్‌ పోస్టుల భర్తీ కోసం నోటిఫికేషన్‌ జారీ చేయనున్నట్టు ప్రకటించింది. ఇందుకు సంబంధించిన మార్గదర్శకాలను రెండు రోజుల్లో ప్రకటిస్తామని విద్యా శాఖ మంత్రి పి.సబితారెడ్డి వెల్లడించారు. ఉపాధ్యాయ పోస్టుల భర్తీకి సంబంధించి ఆమె గురువారం ఎస్‌సీఈఆర్‌టీ సమావేశ మందిరంలో మీడియాతో మాట్లాడారు.‘‘రాష్ట్రంలోని ప్రభుత్వ పాఠశాలల్లో నేరుగా భర్తీ చేసేందుకు 6,612 ఖాళీలు ఉన్నాయి. వాటిలో 5,089 పోస్టులు సాధారణ పాఠశాలల్లో, 1,523 పోస్టులు ప్రత్యేక అవసరాలుగల పిల్లల కోసం నిర్దేశించినవి. వీటిని త్వరగా భర్తీ చేయాలని ముఖ్యమంత్రి ఆదేశించా రు. 2017లో తెలంగాణ స్టేట్‌ పబ్లిక్‌ సర్వీస్‌ కమిషన్‌ (టీఎస్‌పీఎస్సీ) ద్వారా టీచర్‌ రిక్రూట్‌మెంట్‌ టెస్ట్‌ (టీఆర్‌టీ) నిర్వహించి 8,792 ఉపాధ్యాయ పోస్టులను భర్తీ చేశాం. కానీ ఇప్పుడు డిస్ట్రిక్ట్‌ సెలెక్షన్‌ కమిటీ (డీఎస్సీ)ల ద్వారా భర్తీ చేయాలని ముఖ్య మంత్రి ఆదేశించారు. దీనితో గతంలో నిర్వహించినట్టుగా డీఎస్సీల ద్వారా నియామకాలు చేపట్టనున్నాం..’’ అని మంత్రి సబితారెడ్డి వివరించారు.  9,979 పోస్టులకు పదోన్నతులు  రాష్ట్రంలోని ప్రభుత్వ పాఠశాలల్లో మొత్తం 1,22,386 ఉపాధ్యాయ పోస్టులు ఉండగా.. వీటిలో 1,03,343 పోస్టుల్లో టీచర్లు పనిచేస్తున్నారని మంత్రి సబితారెడ్డి తెలిపారు. ప్రస్తుతం డైరెక్ట్‌ రిక్రూట్‌మెంట్‌ పద్ధతిలో 6,612 పోస్టులను భర్తీ చేస్తుండగా.. పదోన్నతుల ద్వారా మరో 9,979 పోస్టులు భర్తీ చేయాల్సి ఉందని చెప్పారు. పదోన్నతుల ద్వారా భర్తీ చేయాల్సిన కేటగిరీలో గెజిటెడ్‌ హెచ్‌ఎం ఖాళీలు 1,947 ఉన్నాయని, ప్రాథమిక పాఠశాల హెచ్‌ఎం పోస్టులు 2,162 ఉన్నాయని.. స్కూల్‌ అసిస్టెంట్‌ స్థాయి టీచర్లకు పదోన్నతుతో వీటిని భర్తీ చేయాల్సి ఉంటుందని వివరించారు. మరో 5,870 స్కూల్‌ అసిస్టెంట్‌ పోస్టుల్లోకి ఎస్జీటీ టీచర్లకు పదోన్నతులు కల్పించాల్సి ఉంటుందని తెలిపారు.  వచ్చే నెల 15న టెట్‌  డీఎస్సీ ద్వారా చేపట్టాల్సిన నియామకాలకు టెట్‌ కీలకమని.. ఇందుకోసం వచ్చే నెల 15వ తేదీన టెట్‌ పరీక్ష నిర్వహిస్తామని సబితారెడ్డి ప్రకటించారు. టెట్‌ ఫలితాలను వచ్చేనెల 27వ తేదీన ప్రకటిస్తామని.. ఆ తర్వాత ఉపాధ్యాయ నియామకాల ప్రకటన జారీ చేస్తామని తెలిపారు. పదోన్నతుల ద్వారా భర్తీ చేయాల్సిన ఉపాధ్యాయ పోస్టులకు సంబంధించి కోర్టులో కేసు కొనసాగుతోందని, ప్రభుత్వానికి అనుకూలంగా తీర్పు వస్తే తక్షణమే వాటిని కూడా భర్తీ చేస్తామని చెప్పారు. ఇటీవల కేజీబీవీల్లో 1,264 పోస్టుల భర్తీ ప్రక్రియ జరిగిందని.. కొత్తగా 20 కేజీబీవీల ఏర్పాటుతో మరో 160 పోస్టులు భర్తీ చేయాల్సి ఉందని తెలిపారు. వీటిని కూడా వీలైనంత త్వరగా భర్తీ చేస్తామన్నారు. ఇక వివిధ రాష్ట్ర ప్రభుత్వ శాఖల్లో కాంట్రాక్టు ఉద్యోగుల క్రమబద్ధీకరణ ద్వారా విద్యాశాఖలో 3,896 మందికి లబ్ధి చేకూరిందని, ఇందులో అత్యధికులు విద్యాశాఖ వారే ఉన్నారని మంత్రి చెప్పారు. గురుకుల విద్యాసంస్థల్లో కూడా పలువురు ఉద్యోగులను క్రమబద్ధీకరించామన్నారు. మొత్తంగా విద్యాశాఖ పరిధిలో 8,792 పోస్టులు, కాలేజీల్లో 3,149 పోస్టుల భర్తీ ప్రక్రియలు టీఎస్‌పీఎస్సీ ద్వారా కొనసాగుతున్నాయని తెలిపారు.    భర్తీ చేసే టీచర్‌ పోస్టులు ఇవీ..  మొత్తం ఉపాధ్యాయ ఖాళీలు: 6,612  జనరల్‌ టీచర్లు: 5,089  వీరిలో స్కూల్‌ అసిస్టెంట్లు: 1,739  సెకండరీ గ్రేడ్‌ టీచర్లు: 2,575  భాషా పండితులు: 611  ఫిజికల్‌ ఎడ్యుకేషన్‌ టీచర్లు: 164  స్పెషల్‌ ఎడ్యుకేషన్‌ టీచర్లు: 1,523  వీటిలో ప్రాథమిక స్థాయిలో 796 పోస్టులు  – ప్రాథమికోన్నత స్థాయిలో 727 పోస్టులు    ‘డిస్ట్రిక్ట్‌ సెలెక్షన్‌ కమిటీ’ ఇలా..  ప్రతి జిల్లాకు ఒక ‘డిస్ట్రిక్ట్‌ సెలెక్షన్‌ కమిటీ (డీఎస్సీ)’ ఉంటుంది. దీనికి సదరు జిల్లా కలెక్టర్‌ చైర్మన్‌గా వ్యవహరిస్తారు. వైస్‌ చైర్మన్‌గా అదనపు కలెక్టర్, కార్యదర్శిగా జిల్లా విద్యాశాఖ అధికారి, సభ్యులుగా జిల్లా పరిషత్‌ ముఖ్య కార్యనిర్వాహణ అధికారి (జెడ్పీ సీఈఓ) వ్యవహరిస్తారు. గతంలో డీఎస్సీ ద్వారానే ఉపాధ్యాయ నియామకాలు జరిగేవి. కొత్త జిల్లాల ఏర్పాటు తర్వాత టీఎస్‌పీఎస్సీ ద్వారా భర్తీ చేస్తామంటూ డీఎస్సీలను ప్రభుత్వం రద్దు చేసింది. తాజాగా వీటిని తిరిగి ఏర్పాటు చేయనుంది.  

సాక్షి, అమరావతి: ఉన్నత విద్యకు ఉరి బిగిసింది చంద్రబాబు హయాంలోనే. ఆయన అధికారంలో ఉండగా ఏనాడు విశ్వవిద్యాలయాలను పట్టించుకోలేదు. 14 ఏళ్లు అధికారంలో ఉన్నా ఒక్క ప్రొఫెసర్‌ పోస్టును కూడా భర్తీ చేయలేదు. 2017–18లో తప్పుల తడకగా ఇచ్చిన నోటిఫికేషన్‌తో కోర్టు కేసులు దాఖలయ్యాయి. ఫలితంగా ఆచార్యుల పోస్టుల భర్తీకి బ్రేక్‌ పడింది. ఇదీ వాస్తవం. రామోజీరావు మాత్రం ఈనాడు ముసుగులో విష ప్రచారం చేస్తున్నారు. కోర్టు పరిధిలో ఉన్న అంశాలను ఒక్కొక్కటిగా పరిష్కరించుకుంటూ వర్సిటీల్లో పోస్టుల భర్తీకి ప్రభుత్వం చొరవ చూపుతుంటే పదేపదే నిస్సిగ్గుగా అసత్యాలు వల్లె వేస్తున్నారు.  కనీసం ఇంగితం లేకుండా.. ఇది టెక్నాలజీ యుగం.. అత్యధికంగా కంప్యూటర్, కృత్రిమ మేథ రంగాల వైపు అంతా ఆసక్తి చూపుతున్నారు. అందులో ఉపాధి అవకాశాలను అందిపుచ్చుకుంటున్నారు. ఈ మార్పు దేశవ్యాప్తంగా ఉంది. సహజంగానే అన్ని చోట్లా ఈ ప్రభావం తప్పదు! ఈనాడు మాత్రం ఇతర రాష్ట్రాల్లో పీజీ విద్యార్థులు, అడ్మిషన్లు తగ్గిపోవడాన్ని ప్రస్తావించకుండా ఇదంతా ఒక్క ఏపీలోనే జరిగిపోతున్నట్లు తప్పుడు ప్రచారం చేస్తోంది. సెంట్రల్‌ వర్సిటీల్లో సీట్ల భర్తీ గురించి ఈనాడు ఎందుకు ప్రస్తావించలేకపోయింది? పీజీ కౌన్సెలింగ్‌ జాప్యానికి, అడ్మిషన్లు తగ్గి­పోవడానికి అసలు సంబంధమే లేదు. అన్ని విశ్వవిద్యాలయా­ల డిగ్రీ పరీక్షలు ఆగస్టుకి పూర్తవుతాయి. అందుకే సెప్టెంబర్‌­లో ప్రవేశాల నిర్వహణకు షెడ్యూల్‌ ఇచ్చారు. డిగ్రీ ఫలి­తాలు రాకుండానే వర్సిటీలో అడ్మిషన్లు ఎలా ఇస్తారనే జ్ఞానం లేకుండా ఇష్టమొ­చ్చినట్టు రాయడం ఈనాడుకే చెల్లింది. 2021­–­22లో తొలిసారిగా పీజీ కామన్‌ ఎంట్రన్స్‌ టెస్టు నిర్వహిస్తున్న సందర్భంలో విద్యార్థులకు అవగాహన కల్పించడానికి ఉన్నత విద్యా మండలి వీడియోలు, పోస్టర్లను రూ­పొ­ంది­ంచింది. దీన్ని అపహాస్యం చేస్తూ సీట్లు ఇస్తామని విద్యా­­ర్థుల­ను బతి­మి­లాడుతు­న్నట్టు ఈనాడు కథనాలు ప్రచురించడం హే­యం. నకిలీ అడ్మిషన్లకు అడ్డుకట్ట టీడీపీ హయాంలో ప్రైవేటు కాలేజీలతో కుమ్మక్కై కాగితాలపై పీజీ అడ్మిషన్లు చూపించి ఫీజురీయింబర్స్‌మెంట్‌ దోచిపెట్టారు. యూజీలో సున్నా అడ్మిషన్లు ఉన్న కాలేజీల్లో సైతం పీజీకి వచ్చే సరికి నూటికి నూరు శాతం అడ్మిషన్లు ఉండేవి. యూజీలోనే పాఠాలు చెప్పడానికి అధ్యాపకులు లేని చోట పీజీ విద్యను నడిపించేశారు. వీటికి ఇప్పుడు ప్రభుత్వం అడ్డుకట్ట వేసింది. రాష్ట్రంలోని 26 ప్రభుత్వ వర్సిటీల్లో పీజీ విద్యకు ఫీజురీయింబర్స్‌ ఇస్తోంది. ప్రతిభ ఆధారంగా అన్ని వర్గాల విద్యార్థులకు విద్యను అందిస్తోంది. అప్పుడు ఆర్ట్స్‌ గుర్తు రాలేదా? రామోజీ దృష్టిలో దార్శనికుడైన చంద్రబాబు ఆర్ట్స్, హిస్టరీ సబ్జెక్టులే అవసరం లేదని తేల్చి చెప్పినప్పుడు ఆయన ఏం చేస్తున్నట్లు?లేడీ శ్రీరామ్, లయోలా చెన్నై, శ్రీరామ్‌ కాలేజ్‌ ఆఫ్‌ కామర్స్‌ లాంటి విద్యా సంస్థలు రాష్ట్రంలో ఒక్కటైనా లేవని శోకాలు పెడుతున్న రామోజీకి గతంలో ఈ విషయం గుర్తు రాలేదా? అధికారం దూరమైందనే అక్కసుతో అజ్ఞానపు విమర్శలు చేయడం సిగ్గు అనిపించట్లేదా? ద్రవిడ వర్సిటీలో ఆర్ట్స్‌ కోర్సుల్లో ప్రవేశాలు ఇప్పుడేదో కొత్తగా తగ్గి­పోయినట్టు ఈనాడు చిత్రీకరించింది. నిజానికి 2014 నుంచే తగ్గిపోయాయా? చంద్రబాబు ప్రాతినిధ్యం వహిస్తున్న కుప్పంలో ఆ వర్సిటీ ఉంది కాబట్టే నాడు గుర్తు లేదేమో? పెరిగిన ప్లేస్‌మెంట్లు.. ప్రవేశాలు గత ప్రభుత్వ హయాంలో సాధారణ డిగ్రీలో 37 వేలుగా ఉన్న క్యాంపస్‌ ప్లేస్‌మెంట్లు ఇప్పుడు లక్షకు పైగా పెరిగాయి. సాధారణంగా డిగ్రీ తర్వాత ఉద్యోగాల్లో చేరే విద్యార్థులు పీజీపై ఆసక్తి చూపరు. ఇప్పుడు క్యాంపస్‌ ప్లేస్‌మెంట్లు దాదాపు 3 రెట్లు పెరగడంతో సహజంగానే పీజీ అడ్మిషన్లు తగ్గుతాయి. ఉద్యోగం చేస్తూ ప్రత్యామ్నాయ మార్గాల్లో పీజీ చదువుతారు. ఇంటర్‌ తర్వాత డిగ్రీ కంటే ఇంజనీరింగ్‌ వైపు వెళ్లే విద్యార్థుల సంఖ్య పెరిగింది. కారణం.. ప్రభుత్వం విద్యా దీవెన కింద పూర్తి ఫీజురీయింబర్స్‌మెంట్, వసతి దీవెన కింద మెస్‌ చార్జీలను కూడా అందించడమే. అందుకే 2018–19లో ఇంజనీరింగ్‌లో చేరికలు 87 వేలు ఉంటే ఇప్పుడు 1.20 లక్షలకు చేరుకున్నాయి. అంటే 30 వేల మందికిపైగా డిగ్రీలో చేరాల్సిన విద్యార్థులు సాంకేతిక విద్య వైపు వెళ్తున్నారు. గత ప్రభుత్వంతో పోలిస్తే ఇంటర్‌ తర్వాత డ్రాపవుట్లు 21 శాతం ఉండగా ఇపుడు 6 శాతానికి తగ్గాయి. ఇదంతా విద్యావ్యవస్థ బలోపేతం కాదా రామోజీ? ఇవి మార్పులు కాదా? గత నాలుగేళ్లలో సీఎం జగన్‌ దేశంలోనే తొలిసారిగా ఏపీలోని పలు యూనివర్సిటీల్లో సంస్కరణలు తెచ్చారు. హయ్యర్‌ ఎడ్యుకేషన్‌ ప్లానింగ్‌ బోర్డు, రీజనల్‌ క్లస్టర్‌ గ్రూపులను ప్రవేశపెట్టారు. రాష్ట్రంలో ఏ కోర్సు అభ్యసించినా విద్యార్థికి కచ్చితంగా ఉపాధి లభించేలా ప్రభుత్వం ఉన్నత విద్యారంగంలో విప్లవాత్మక మార్పులు తీసుకొచ్చింది. ఈ ఏడాది డిగ్రీలో కొత్తగా సింగిల్‌ మేజర్‌ సబ్జెక్టును ప్రవేశపెట్టింది. వీటికి తోడు 100కిపైగా మైనర్‌ సబ్జెక్టుల్లో విద్యార్థులు చదువుకోవడానికి అవకాశం కల్పిస్తోంది. ఆఫ్‌లైన్, ఆన్‌లైన్‌లో నైపుణ్య కోర్సులు, ఇంటర్న్‌షిప్, కమ్యూనిటీ డెలప్‌­మెంట్‌ ప్రోగ్రామ్‌లను తీసుకొచ్చింది. ప్రపంచ స్థాయి మేటి వర్సిటీల్లో ఉన్న నాలుగేళ్ల కోర్సును నూతన జాతీయ విద్యా విధానంతో అనుసంధానం చేసి విద్యార్థులను నైపుణ్యవంతులుగా తీర్చిదిద్దేందుకు చేపట్టిన ప్రణాళికలు ఈనాడుకు కనపడవా? యూజీసీ చర్యలూ తప్పేనా? యూజీసీ సైతం సెంట్రల్‌ వర్సిటీలకు కామన్‌ ఎంట్రన్స్‌ టెస్టు నిర్వహిస్తోంది. తెలంగాణ కూడా స్టేట్‌ వర్సిటీలకు ఉమ్మడి ప్రవేశ పరీక్ష నిర్వహిస్తోంది. చాలా రాష్ట్రాల్లో వర్సిటీలు ఇదే పద్ధతి అవలంబిస్తున్నాయి. మరి రామోజీకి తాను నివాసం ఉంటున్న తెలంగాణలోని వర్సిటీలు కనిపించట్లేదు కానీ ఆంధ్రప్రదేశ్‌లోని వర్సిటీలపై మాత్రం వల్లమాలిన ప్రేమ కురిపిస్తున్నారు. ఇది కడుపు మంటతో వచ్చిన కపట ప్రేమే కదా! గతంలో ఒక విద్యార్థి వివిధ విశ్వవిద్యాలయాలకు విడివిడిగా ఎంట్రన్స్‌ టెస్టులు రాయాల్సి వచ్చేది. ప్రతి వర్సిటీకి ఫీజు చెల్లించేందుకు ఆర్థికంగా ఇబ్బందులు పడేవారు. ఇప్పుడు ఒకే టెస్టుతో అర్హత సాధించి ఇష్టమైన వర్సిటీలో చేరే వెసులుబాటు కలిగింది. దీని ద్వారా టాలెంట్‌ కలిగిన విద్యార్థులు ఉన్నత ప్రమాణాలు ఉన్న వర్సిటీలో తొలి ప్రాధాన్య సీటు పొందుతున్నారు.  

సాక్షి, హైదరాబాద్‌: ప్రభుత్వం వరుసగా ఉద్యోగ నియామక నోటిఫికేషన్లు ఇస్తుండటం నిరుద్యోగ యువతలో ఆశలు రేకెత్తించింది. ఉపాధ్యాయ అర్హత పరీక్ష (టెట్‌)ల్లో ఉత్తీర్ణులైన వారూ గంపెడాశలు పెట్టుకున్నారు. టీచర్‌ రిక్రూట్‌మెంట్‌ నోటిఫికేషన్‌ కూడా వెలువడుతుందని భావించారు. కానీ కల నెరవేరకపోవడంతో, నోటిఫికేషన్‌ వెలువడే సూచనలు లేకపోవడంతో వారంతా నిరాశా నిస్పృహల్లో కొట్టుమిట్టాడుతున్నారు. రాష్ట్ర ప్రభుత్వం 2016 నుంచి ఇప్పటివరకు మూడు ఉపాధ్యాయ అర్హత పరీక్ష (టెట్‌)లు నిర్వహించింది. 2016, 2017ల్లో నిర్వహించిన టెట్‌లలో రెండు లక్షల మందికి పైగా ఉత్తీర్ణులయ్యారు. తాజాగా 2022 జూన్‌లో నిర్వహించిన టెట్‌లో మరో రెండు లక్షల మందికి పైగా ఉత్తీర్ణులయ్యారు. మూడు పరీక్షల్లో నాలుగు లక్షల మందికి పైగా అర్హత సాధించినా ఇప్పటివరకు ప్రయోజనం లేకుండా పోయింది. ఏడేళ్లుగా ఎదురుచూపులే మిగులుతున్నాయని టెట్‌ ఉత్తీర్ణులు వాపోతున్నారు.  పదోన్నతులకు, నియామకాలకు ముడి  రాష్ట్రవ్యాప్తంగా దాదాపు 22 వేల టీచర్‌ పోస్టులు ఖాళీగా ఉన్నాయనేది ఓ అంచనా కాగా.. ప్రభుత్వం మాత్రం 12 వేల టీచర్‌ పోస్టులు ఖాళీగా ఉన్నాయని, వీటిని భర్తీ చేస్తామని తెలిపింది. చాలా పాఠశాలల్లో సబ్జెక్టు టీచర్ల కొరత వెంటాడుతోంది. పైగా గత ఏడాది నుంచి ఆంగ్ల మాధ్యమంలో బోధన చేపట్టారు. కొన్ని పాఠశాలల్లో ఎస్‌జీటీలను ఉన్నత తరగతులకు పంపుతున్నారు. ఇందులో చాలామంది స్కూల్‌ అసిస్టెంట్లకు అర్హత ఉన్నా, పదోన్నతులు లేకపోవడంతో ఫలితం దక్కడం లేదు. పదోన్నతులు లేకపోవడంతో బదిలీలు జరగడం లేదు. ఉపాధ్యాయ పదోన్నతులు, బదిలీలు చేస్తే తప్ప కొత్త నియామకాలు చేపట్టలేమని విద్యాశాఖ అధికారులు అంటున్నారు. కానీ ఈ ప్రక్రియ మాత్రం ఎప్పటికప్పుడు వాయిదా పడుతూనే ఉంది. ఎమ్మెల్సీ ఎన్నికల ముందు హడావిడి చేసినా, కోర్టు వివాదాల కారణంగా వాయిదా పడింది. అయితే ఈ వివాదాల పరిష్కారం దిశగా ప్రభుత్వం అడుగులేయడం లేదనే విమర్శలున్నాయి.  కోర్టు వివాదాలకు దారి తీసే రీతిలో విద్యాశాఖ వ్యవహరించడం వల్లే పదోన్నతులు, బదిలీల ప్రక్రియ ముందుకెళ్ళడం లేదనే విమర్శలూ వ్యక్తమవుతున్నాయి.     ప్రభుత్వం వెంటనే చర్యలు చేపట్టాలి  బదిలీలు, ప్రమోషన్స్‌ పేరిట కాలయాపన చేయడం వల్ల ఉపాధ్యాయ ఖాళీల భర్తీ ప్రక్రియ ఆలస్యమవుతోంది. దీంతో 4 లక్షల మంది అభ్యర్థులు తీవ్ర ఆందోళనలో ఉన్నారు. మేమంతా టీచర్‌ పోస్టులు వస్తాయని ఉన్న ఉద్యోగాలు మానేసి, పోటీ పరీక్షకు రూ.వేలు ఖర్చు పెట్టాం. అన్ని రకాల నోటిఫికేషన్లు జారీ చేసిన ప్రభుత్వం, టీఆర్టీ విషయంలో నిర్లక్ష్యంగా వ్యవహరించడం సమంజసం కాదు. ప్రభుత్వం వెంటనే ఆర్థిక శాఖకు అనుమతివ్వాలి.   – రావుల రామ్మోహన్‌ రెడ్డి (రాష్ట్ర డీఎడ్, బీఎడ్‌ అభ్యర్థుల సంఘం అధ్యక్షుడు)  ప్రభుత్వ స్కూళ్లలో టీచర్ల కొరత తీర్చాలి  రాష్ట్రంలో 60 శాతానికి పైగా గెజిటెడ్‌ హెచ్‌ఎంలు, వేలాది స్కూల్‌ అసిస్టెంట్‌ పోస్టులు ఖాళీగా ఉన్నాయంటే విద్యాశాఖ ఎంత దారుణంగా వ్యవహరిస్తోందో అర్థం చేసుకోవచ్చు. కాలయాపన చేయకుండా తక్షణమే బదిలీలు, పదోన్నతుల వివాదాన్ని పరిష్కరించే ప్రయత్నం చేయాలి. పేదలు చదివే ప్రభుత్వ స్కూళ్ళలో ఉపాధ్యాయుల కొరత తీర్చాలి.  – ఎం చెన్నయ్య (పీఆర్‌టీయూ రాష్ట్ర అధ్యక్షుడు)  వ్యయప్రయాసలకోర్చి శిక్షణ తీసుకుని.. బీఈడీ, డీఈడీ కోర్సులు పూర్తి చేసిన వారు ప్రభుత్వ టీచర్‌ పోస్టునే లక్ష్యంగా పెట్టుకుంటారు. అవకాశం వచ్చే వరకు ప్రైవేటు స్కూళ్ళలో టీచర్లుగా పనిచేస్తుంటారు. కొందరు ఇతర ఉద్యోగాలూ చేస్తుంటారు. టెట్‌ పరీక్ష నిర్వహించే కొన్ని నెలల ముందు వీరంతా తాము అంతకుముందు చేస్తున్న ఉద్యోగాలు వదిలేసి, వ్యయప్రయాసలకోర్చి  కోచింగ్‌ సెంటర్లలో శిక్షణ తీసుకుంటారు. ఇదే క్రమంలో గత ఏడాది జూన్‌లో నిర్వహించిన టెట్‌కు హాజరయ్యారు. గతానికి భిన్నంగా ఈసారి 6 లక్షల మంది వరకు పరీక్ష రాశారు. 1–5 తరగతులకు బోధించేందుకు డీఎడ్‌ అర్హతతో టెట్‌ పేపర్‌–1 రాస్తారు. గతంలో ఈ పరీక్ష రాయడానికి బీఈడీ చేసిన అభ్యర్థులు అర్హులు కారు. కానీ ఈసారి బీఈడీ అభ్యర్థులు పేపర్‌–2తోపాటు, పేపర్‌–1 రాసేందుకూ వీలు కల్పించారు. దీంతో అభ్యర్థుల సంఖ్య గణనీయంగా పెరిగింది. ఈ పరీక్షలో ఏకంగా 2 లక్షల మందికి పైగా అర్హత సాధించడంతో మొత్తం అర్హుల సంఖ్య 4 లక్షలు దాటింది. ప్రభుత్వ ఉద్యోగాల భర్తీకి నోటిఫికేషన్లు మొదలవడంతో, తమకూ టీచర్‌ అయ్యే అవకాశం వస్తుందని వీరంతా ఎదురుచూశారు. 

గన్‌ఫౌండ్రీ: రాష్ట్ర ప్రభుత్వం విద్యా వ్యవస్థను నిర్వీర్యం చేస్తోందని రాజ్యసభ సభ్యుడు ఆర్‌.కృష్ణయ్య అన్నారు. శుక్రవారం నిరుద్యోగ జేఏసీ ఆధ్వర్యంలో ప్రభుత్వ పాఠశాలల్లో ఖాళీగా ఉన్న 44 వేల ఉపాధ్యాయ పోస్టులను భర్తీ చేయాలని కోరుతూ బషీర్‌బాగ్‌లోని విద్యాశాఖమంత్రి కార్యాలయాన్ని ముట్టడించారు. ఈ సందర్భంగా కృష్ణయ్య మాట్లాడుతూ  తాత్కాలిక ఉపాధ్యాయుల ద్వారా కాకుండా శాశ్వత ఉపాధ్యాయుల భర్తీలను చేపట్టాలని డిమాండ్‌ చేశారు. అనంతరం విద్యాశాఖమంత్రి సబితా ఇంద్రారెడ్డిని కలిసి వినతి పత్రం అందజేశారు. త్వరలో ఉపాధ్యాయుల భర్తీ ప్రక్రియ చేపడతామని మంత్రి హామీ ఇచ్చినట్లు వెల్లడించారు. కార్యక్రమంలో నాయకులు గుజ్జ కృష్ణ, నీలం వెంకటేశ్‌ తదితరులు పాల్గొన్నారు. 

సాక్షి, హైదరాబాద్‌: సర్కారు బడుల విద్యార్థుల్లో సామర్థ్యాలు పెంచే ‘తొలిమెట్టు’ అమలు కాగితాలకే పరిమితమైంది. కరోనా తీవ్రత నేపథ్యంలో వరుసగా రెండేళ్లు స్కూళ్ల మూత, ఆన్‌లైన్‌ బోధనలతో విద్యార్థుల సామర్థ్యాలు బాగా తగ్గాయి. ప్రైమరీ పాఠశాలల విద్యార్థులు బేసిక్స్‌ కూడా మరిచిపోవడంతో వారిని గాడిలో పెట్టేందుకు ప్రభుత్వం తొలిమెట్టు కార్యక్రమాన్ని ప్రారంభించింది. జూలై చివరి నుంచి ఆగస్టు మొదటి వారం వరకు  ప్రైమరీ స్కూల్‌ టీచర్లకు శిక్షణ ఇచ్చారు. సామర్థ్యాల పంపు ప్రక్రియ మాత్రం కనిపించడం లేదు.  షెడ్యూలు ఇలా..  విద్యార్థులకు మౌలిక భాష, గణితంలో సామర్థ్యం పెరిగేలా బోధించడం కోసం తొలిమెట్టులో ప్రత్యేక కార్యక్రమాన్ని రూపకల్పన చేశారు. ప్రాథమిక పాఠశాలల్లో పిల్లలకు బేస్‌ లైన్‌ టెస్ట్‌లు నిర్వహించి అభ్యసన స్థాయిలను గుర్తించాలి. అనంతరం విద్యార్థుల స్థాయికి తగ్గట్టు బోధనా ప్రణాళిక సిద్ధం చేసుకోవాలి. ఈ షెడ్యూలు ఇప్పటికే పూర్తి కావాల్సి ఉండగా.. కనీసం ప్రస్తావన కూడా లేకుండా పోయింది. నెలకోసారి పిల్లల ప్రగతిని నమోదు చేసి కాంప్లెక్స్‌ స్థాయిలో ప్రతి నెలా 26న టీచర్లతో, 28న మండలాలవారీగా, 30న జిల్లాలవారీగా సమీక్షలు జరగాలి. ఆచరణలో మాత్రం ఆ జాడ  కనిపించడం లేదు. టీచర్ల కొరతతోనే..  సర్కారు స్కూళ్లల్లో టీచర్ల కొరత కారణంగానే తొలిమెట్టు సక్రమంగా అమలు కావడం లేదు. కరోనాకు ముందు విద్యా వలంటీర్లతో కొంత సర్దుబాటు జరిగినా...ఆ తర్వాత వలంటీర్లను రెన్యూవల్‌ చేయలేదు. దీంతో బోధన కుంటుపడుతోంది. పలు సబ్జెకుల టీచర్‌ పోస్టులు ఖాళీగా ఉన్నాయి. కనీసం పర్యవేక్షణకు  ప్రధానోపాధ్యాయులు లేక  ఇన్‌చార్జిలతో కొనసాగుతున్నాయి. వాస్తవంగా ఏళ్లుగా టీచర్ల ఖాళీలు భర్తీ లేక బోధనకు ఆటంకం కలుగుతోంది. నాలుగేళ్లుగా బదిలీలు, ఏడేళ్లుగా పదోన్నతులు, 17 ఏళ్లుగా పర్యవేక్షణ అధికారుల నియామకాలు జరగడం లేదని ఉపాధ్యాయ సంఘాలు ఆరోపిస్తున్నాయి. టీచర్ల భర్తీ ప్రక్రియ పూర్తయ్యే దాకా బోధనకు ఆటంకం కలగకుండా వలంటీర్లను నియమించాలని డిమాండ్‌ వ్యక్తమవుతోంది.   (చదవండి: ఎన్‌ఐఏ విస్తృత తనిఖీలు)

సాక్షి, హైదరాబాద్‌: తెలంగాణ రాష్ట్ర ఉపాధ్యాయ అర్హత పరీక్ష(టీఎస్‌ టెట్‌)లో ఉత్తీర్ణులైన వేలాదిమంది టీచర్‌ పోస్టుల భర్తీ కోసం ఎదురుచూస్తున్నారు. ప్రభుత్వం ఎప్పుడు నోటిఫికేషన్‌ జారీ చేస్తుందంటూ ఆసక్తిగా వాకబు చేస్తున్నారు. 2016 నుంచి టెట్‌లో అర్హత సాధించిన అనేకమంది టీచర్‌ రిక్రూట్‌మెంట్‌ కోసం ప్రత్యేక శిక్షణ తీసుకుంటున్నారు. ప్రభుత్వం వరుసగా ఉద్యోగ నియామక నోటిఫికేషన్లు ఇస్తున్న నేపథ్యం, టెట్‌ విధానాల్లో మార్పులు తేవడం, భారీగా ఉపాధ్యాయ పోస్టుల ఖాళీలను ప్రభుత్వం ప్రకటించడంతో నిరుద్యోగుల్లో ఆశలు రేకెత్తాయి.   ఉద్యోగాలు మానేసి:చాలామంది బీఈడీ, డీఈడీ కోర్సులు పూర్తి చేసిన వెంటనే ప్రైవేటు స్కూళ్లల్లో టీచర్లుగా పనిచేస్తున్నారు. వీళ్లంతా గత జూన్‌లో జరిగిన టెట్‌ పరీక్షకు హాజరయ్యారు. గతానికి భిన్నం­గా ఈసారి 6 లక్షలమంది వరకూ టెట్‌ రాశా­రు. 1–5 తరగతులు బోధించేందుకు డీఎడ్‌ అర్హతతో టెట్‌ పేపర్‌–1 రాస్తారు. గతంలో ఈ పరీక్ష రాయ­డానికి బీఈడీ అభ్యర్థులు అర్హులుకారు. కానీ, ఈసారి టెట్‌లో బీఈడీ అభ్యర్థులు పేపర్‌–2తోపాటు పేపర్‌–1 రాసే వీలు కల్పించారు. ప్రాథమిక పాఠశాలల్లో దాదాపు 7 వేల పోస్టులు ఖాళీగా ఉండటంతో బీఈడీ అభ్యర్థులు కూడా పేపర్‌–1 రాసి పోటీపడుతున్నారు.   ఈ ఏడాది నియామకాలు ఉండేనా?  రాష్ట్రంలోని విద్యాసంస్థల్లో దాదాపు 19 వేల పోస్టులున్నట్టు ప్రభుత్వం లెక్కతేల్చింది. 12 వేల టీచర్‌ పోస్టులు ఖాళీగా ఉన్నాయని, వీటిని భర్తీ చేస్తామని తెలిపింది. అయితే, బదిలీలు, పదోన్నతులు కల్పిస్తే తప్ప వాస్తవ ఖాళీల లెక్క తెలియదని ఉపాధ్యాయ సంఘాలు అంటున్నాయి. ఈ ప్రక్రియ ఎప్పటికప్పుడు వాయిదా పడుతోంది. దీంతో కొత్త నియామకాలు చేపట్టే అవకాశం లభించడంలేదని ఉపాధ్యాయవర్గాలు అసంతృప్తి వ్యక్తం చేస్తున్నాయి. ఈ ఏడాది నుంచి ఇంగ్లిష్‌ మీడియం విద్యను ప్రవేశపెట్టడంతో పెద్దఎత్తున ఉపాధ్యాయ నియామకాలు చేపడతారని టెట్‌ అర్హత పొందినవారు ఆశించారు. ఈ నేపథ్యంలో వాస్తవ ఖాళీలు తెలియకుండా కొత్త ఉపాధ్యాయులను నియమిస్తారా? టెట్‌ అర్హులకు అవకాశాలు లభిస్తాయా.. అన్న సందేహాలు తలెత్తుతున్నాయి.  ఉద్యోగం మానేసి శిక్షణ ఈ ఏడాది టెట్‌లో అర్హత సాధించాను. ప్రైవేటు స్కూల్‌ టీచర్‌ ఉద్యోగం మానేసి ప్రభుత్వ టీచర్‌ నియామకం కోసం శిక్షణ తీసుకుంటున్నాను. కానీ, ఎప్పుడు నోటిఫికేషన్‌ వస్తుందో తెలియడం లేదు.  – ప్రవీణ్, టెట్‌ ఉత్తీర్ణుడు, హైదరాబాద్‌  కరోనాతో రోడ్డెక్కా..టెట్‌తో ఆశలు  బీఈడీ చేసిన తర్వాత ఓ ప్రైవేటు స్కూల్లో టీచ­ర్‌గా పనిచేస్తున్నా. కోవిడ్‌ మూలంగా రెండేళ్ల నుంచి సరిగా జీతాలు ఇవ్వడంలేదు. ఊళ్ళో పొలం పనులకు వెళ్తున్నా. కానీ, టెట్‌ రావడం, ఉపాధ్యాయ నియామకాలు చేపడతా­రనే ఆశ రేకెత్తడంతో కోచింగ్‌ తీసుకుంటున్నాను.   – ఆర్‌.జీవన్‌కుమార్, టెట్‌ అర్హుడు, వరంగల్‌  

సాక్షి, హైదరాబాద్‌: విద్యావ్యవస్థలో సమూల మార్పులు చేశామని, కేజీ టు పీజీ వరకు ఉచిత, నాణ్యమైన విద్య అందిస్తున్నామని విద్యాశాఖ మంత్రి సబితా ఇంద్రారెడ్డి తెలిపారు. శుక్రవారం అసెంబ్లీలో ప్రశ్నోత్తరాల సమయంలో ‘మన ఊరు మన బడి... మన బస్తీ మన బడి’ పథకంపై సభ్యుల ప్రశ్నలకు ఆమె సమాధానం ఇచ్చారు.  మంత్రి సబిత ఏమన్నారంటే.. ►మూడు దశల్లో స్కూళ్లను ఆధునీకరిస్తాం. రూ. 7,289.54 కోట్ల మొత్తం బడ్జెట్‌ ఖర్చుతో 26,065 పాఠశాలల్లో పనులు చేపడతాం. ►మొదటి దశలో రూ. 3,497.62 కోట్ల అంచనా బడ్జెట్‌తో బడులను బాగు చేస్తాం. మొదటి దశలోనే 9,123 స్కూళ్లను ఎంపిక చేశాం. మన ఊరు–మన బడి పథకంలో పూర్వ విద్యా ర్థులను, దాతలను భాగ స్వాములను చేస్తాం. ఇప్పటికే ఎమ్మెల్యే మర్రి జనార్దన్‌రెడ్డి ఆయన చది విన స్కూలుకు రూ.3.5 కోట్ల విరాళం ఇచ్చారు. ►ఎవరైనా రూ.2 లక్షలు ఖర్చు చేస్తే స్కూలు సభ్యుడిగా ఉంచుతాం. రూ.10 లక్షలు ఖర్చు చేస్తే వారి పేరు పెడతాం. ►ప్రాథమికపాఠశాలకు రూ.25 లక్షలు, ప్రాథమికోన్నత పాఠశాలకు రూ.50 లక్షలు, ఉన్నత పాఠశాలకు కోటి ఖర్చు చేస్తే దాతల పేర్లు పెడతాం. ఉపాధ్యాయులకు ఆంగ్లంలో శిక్షణ... టీచర్లకు 14 నుంచి ఆంగ్లభాషపై శిక్షణ ఇస్తామని సబిత తెలిపారు. విద్యాశాఖలో త్వరలోనే 21 వేల పోస్టులు భర్తీ చేస్తామన్నారు. రాష్ట్రంలో 973 గురు కులాలను ఏర్పాటు చేస్తే అడ్మిషన్లు కావాలని ఒత్తిళ్లు వస్తున్నాయని చెప్పారు. 

సాక్షి, అమరావతి: ఎయిడెడ్‌ టీచర్‌ పోస్టులను భర్తీ చేయబోనని ఉత్తర్వులు ఇచ్చిన ఘనుడు చంద్రబాబేనని రాష్ట్ర ప్రభుత్వ సలహాదారు (ప్రజా వ్యవహారాలు) సజ్జల రామకృష్ణారెడ్డి తెలిపారు.ఈరోజు అదే చంద్రబాబు ఆందోళనలు చేయడం విడ్డూరమని మండిపడ్డారు. ఉత్తుర్వులు ఇచ్చేటప్పుడు బాబుకు బుద్ధి ఏమైందని, ఆయన హయాంలో చాలా ఘోరాలు జరిగాయని అన్నారు. తాడేపల్లిలోని వైఎస్సార్‌సీపీ కేంద్ర కార్యాలయంలో గురువారం మౌలానా అబుల్‌ కలామ్‌ ఆజాద్‌ జయంతిని ఘనంగా నిర్వహించారు. సజ్జల మాట్లాడుతూ.. ఎయిడెడ్‌ విద్యా సంస్ధల్లో టీచర్లు సరిపడా లేనందువల్ల వాటిలో విద్యార్థుల సంఖ్య తగ్గిపోతోందని, యాజమాన్యాలు వాటిని నడపలేకపోతున్నాయని తెలిపారు. ఆ సంస్థలను, టీచర్లను స్వచ్ఛందంగా అప్పగిస్తే ప్రభుత్వం నడుపుతుందని, లేదా టీచర్లను సరెండర్‌ చేసి మీరే విద్యా సంస్థలను నడుపుకోవాలని ఓ విధానాన్ని తెచ్చినట్లు తెలిపారు. ఇందులో బలవంతం లేదు అని కూడా స్పష్టంగా చెప్పిందన్నారు. సీఎం వైఎస్‌ జగన్‌ చేపడుతున్న చర్యలతో రానున్న ఐదు, పదేళ్లల్లో మన రాష్ట్రం హైలీ ఎడ్యుకేటెడ్‌ రాష్ట్రంగా అవతరిస్తుందని చెప్పారు. ఫీజుల నియంత్రణకు, విద్యా వ్యవస్థలో సంస్కరణలకు ప్రభుత్వం ప్రయత్నిస్తోందని తెలిపారు. పేదల సంక్షేమం కోసం జరుగుతున్న మహా విద్యా యజ్ఞాన్ని భగ్నం చేసేందుకు టీడీపీ ప్రయత్నిస్తోందన్నారు. అనంతపురంలో టీడీపీ మాజీ ఎమ్మెల్యేకు చెందిన ఎయిడెడ్‌ విద్యా సంస్థలో వాళ్లు గొడవ చేస్తే చంద్రబాబు కొడుకు లోకేశ్‌ అక్కడకు వెళ్లి కారుకూతలు కూస్తున్నారని అన్నారు. పేద విద్యార్థులు చదువుకోవడం ఎలా అని లోకేశ్‌ అంటున్నాడని, ఫీజు రీయింబర్స్‌మెంట్, అమ్మ ఒడి ద్వారా ప్రభుత్వం విద్యార్థులకు ఫీజులు చెల్లిస్తోన్న విషయం గుర్తిస్తే మంచిదని చెప్పారు. చిన్న ఘటనను వారే సృష్టించి, ప్రజలను పక్కదారి పట్టిస్తున్నారన్నారు. వారు చెబుతున్న కాలేజీని సరెండర్‌ చేయాలని ఎవరు అడిగారని ప్రశ్నించారు. స్వచ్ఛందంగా వచ్చే వారి కాలేజీలనే ప్రభుత్వం తీసుకుంటుందని, వెనక్కి తీసుకుంటామన్నా తిరిగి ఇచ్చేస్తుందని తెలిపారు. పదవి పోయిన నిస్పృహతో లోకేశ్‌ పచ్చమూకను వెంటేసుకొని అబద్ధాలతో ప్రజలను రెచ్చగొడుతున్నారని ధ్వజమెత్తారు. టీడీపీ, పచ్చ మీడియా విష ప్రచారాన్ని అందరూ ప్రశ్నించాలని కోరారు. మౌలానా అబుల్‌ కలామ్‌ ఆజాద్‌ ఆశయాల కొనసాగింపులో భాగంగా సీఎం జగన్‌ విద్యకు అత్యధిక ప్రాధాన్యం ఇస్తున్నారని ఉప ముఖ్యమంత్రి  అంజాద్‌ బాషా చెప్పారు.  కార్యక్రమంలో ఎమ్మెల్సీ లేళ్ల అప్పిరెడ్డి, ఎమ్మెల్యే అఫీజ్‌ ఖాన్, పార్టీ మైనారిటీ సెల్‌ రాష్ట్ర అధ్యక్షుడు ఖాదర్‌ బాషా, ఉర్దూ అకాడమీ చైర్మన్‌ నదీమ్‌ అహ్మద్‌ పాల్గొన్నారు.   

నేషనల్‌ క్యాపిటల్‌ టెరిటరీ ఆఫ్‌ ఢిల్లీ(ఎన్‌సీటీ ఢిల్లీ)ప్రభుత్వానికి చెందిన ఢిల్లీ సబార్డినేట్‌ సర్వీసెస్‌ సెలక్షన్‌ బోర్డ్‌(డీఎస్‌ఎస్‌ఎస్‌బీ)..అర్హులైన స్త్రీ, పురుష అభ్యర్థుల నుంచి ట్రెయిన్డ్‌ గ్రాడ్యుయేట్‌ టీచర్‌ (టీజీటీ) పోస్టుల భర్తీకి దరఖాస్తులు కోరుతోంది.      మొత్తం పోస్టుల సంఖ్య: 5807 ► సబ్జెక్టులు: బెంగాలీ, ఇంగ్లిష్, ఉర్దూ, సంస్కృతం, పంజాబీ. ► అర్హత: మోడ్రన్‌ ఇండియన్‌ లాంగ్వేజస్‌(ఎంఐఎల్‌)లో ఏదో ఒక సబ్జెక్టులో బీఏ(ఆనర్స్‌), సంబంధిత సబ్జెక్టుల్లో బ్యాచిలర్స్‌ డిగ్రీ ఉత్తీర్ణులవ్వాలి. టీచింగ్‌లో డిగ్రీ/డిప్లొమా ఉత్తీర్ణులై ఉండాలి. హిందీలో మంచి నాలెడ్జ్‌ ఉండాలి. సీబీఎస్‌ఈ నుంచి సీటెట్‌లో అర్హత కలిగి ఉండాలి.       ► వయసు: 32ఏళ్లు మించకూడదు. ఎస్సీ/ఎస్టీలకు ఐదేళ్లు, ఓబీసీలకు మూడేళ్లు, పీడబ్ల్యూడీలకు పదేళ్లు గరిష్ట వయసులో సడలింపు ఉంటుంది. ► ఎంపిక విధానం: వన్‌ టైర్‌/టూ టైర్‌ రాతపరీక్ష ద్వారా ఎంపిక చేస్తారు. ► దరఖాస్తు విధానం: ఆన్‌లైన్‌ ద్వారా దరఖాస్తు చేసుకోవాలి. ► ఆన్‌లైన్‌ దరఖాస్తు ప్రారంభ తేది: 04.06.2021 ► ఆన్‌లైన్‌ దరఖాస్తులకు చివరి తేది: 03.07.2021 ► వెబ్‌సైట్‌: https://dsssb.delhi.gov.in

ముషీరాబాద్‌ (హైదరాబాద్‌): రాష్ట్రంలో విద్యారంగ సమస్యలు పరిష్కరించి, ఖాళీ టీచర్‌ పోస్టులను భర్తీ చేయాలని బీసీ సంక్షేమ సంఘం జాతీయ అధ్యక్షుడు ఆర్‌.కృష్ణయ్య డిమాండ్‌ చేశారు. ఆదివారం విద్యానగర్‌లోని రాష్ట్ర బీసీ భవన్‌లో తెలంగాణ బీసీ ఉపాధ్యాయ సంఘం రాష్ట్ర కార్యవర్గ సమావేశం జరిగింది. సంఘం వ్యవస్థాపకుడు సుతారపు వెంకట నారాయణ అధ్యక్షతన నిర్వహించిన ఈ సమావేశానికి ముఖ్యఅతిథిగా ఆర్‌.కృష్ణయ్య హాజరై మాట్లాడారు. విద్యారంగ సమగ్ర వికాసానికి ఉపాధ్యాయుల సహకారం చాలా అవసరమని పేర్కొన్నారు. బీసీ ఉద్యోగులకు ప్రమోషన్లలో రిజర్వేషన్లు పెట్టాలని, పాత పెన్షన్‌ విధానాన్ని అమలు చేయాలని డిమాండ్‌ చేశారు. ఖాళీ గా ఉన్న 40 వేల టీచర్ల పోస్టులను వెంటనే భర్తీ చేసి ప్రభుత్వ పాఠశాలలను పటిష్టం చేయాలన్నారు.   రాష్ట్ర నూతన కార్యవర్గం ఎన్నిక..  తెలంగాణ బీసీ ఉపాధ్యాయ సంఘం రాష్ట్ర అధ్యక్షుడిగా సుతారపు వెంకట నారాయణ, ఉపాధ్యక్షుడిగా పరంకుశం కుమారస్వామి, ప్రధాన కార్యదర్శిగా ఉప్పు మధుకర్, సం యుక్త కార్యదర్శిగా కె.శ్రీనివాస్, కోశాధికారిగా నరేందర్‌లు ఎన్నికయ్యారు.

సాక్షి, అమరావతి: ఏజెన్సీ రిజర్వేషన్ల వ్యవహారంపై సీఎం వైఎస్‌ జగన్‌మోహన్‌ రెడ్డి‌ దృష్టి సారించారు. తెలంగాణ, ఏపీ రాష్ట్రాల్లోని గిరిజన ప్రాంతంలో టీచర్స్‌ నియామకాల్లో 100 శాతం రిజర్వేషన్ల అమలు జీవో నెంబర్‌ 3ను సుప్రీం కోర్టు ఇటీవల కొట్టివేసిన నేపథ్యంలో ఈ అంశంపై పూర్తి స్థాయిలో చర్చించి తదుపరి కార్యాచరణ ప్రణాళిక తయారు చేయాలని సీఎం అధికారులను ఆదేశించారు. ఈ విషయంపై అడ్వకేట్‌ జనరల్‌ సుబ్రహ్మణ్య శ్రీరామ్‌తో సమీక్ష జరిపిన వైఎస్‌ జగన్‌ గిరిజనుల ప్రయోజనాలను కాపాడేందుకు చర్యలు తీసుకోవాలని కోరారు. సుప్రీంకోర్టు తీర్పు నేపథ్యంలో గిరిజన వర్గాల్లో ఆందోళన నెలకొని ఉంది. అయితే ఈ అంశాన్ని డిప్యూటీ సీఎం పుష్పశ్రీవాణి, గిరిజన ఎమ్మెల్యేలు సీఎం దృష్టికి తీసుకెళ్లారు. దీంతో తీర్పును క్షుణ్నంగా అధ్యయనం చేసి న్యాయపరంగా తీసుకోవాల్సిన చర్యలపై ఆలోచనలు చేయాలని సీఎం అధికారులకు సూచించారు. ఉమ్మడి రాష్ట్రంలో విడుదల చేసిన జీవో కనుక, తీర్పు ప్రభావం ఇరు రాష్ట్రాలపై ఉంటుందని, ఈ విషయంలో తెలంగాణ ప్రభుత్వాన్ని కూడా సమన్వయం చేసుకుంటూ ముందడుగు వేయాలని సీఎం వైఎస్‌ జగన్‌ ఆదేశించారు. చదవండి: విదేశాల నుంచి వ‌చ్చేవారి వివ‌రాలు న‌మోదు 'ఆయనను ఇక గొలుసులతో కట్టేయాల్సిందే' 

సాక్షి, అమరావతి: రాష్ట్రంలో టీచర్‌ పోస్టుల భర్తీకి సంబంధించి వచ్చే నెలలో నోటిఫికేషన్‌ విడుదల చేయడానికి పాఠశాల విద్యాశాఖ కసరత్తు ప్రారంభించింది. దీని కోసం నిరుద్యోగ టీచర్‌ అభ్యర్థులు ఎదురుచూస్తున్న నేపథ్యంలో త్వరితంగా నోటిఫికేషన్ల విడుదలపై ప్రభుత్వం దృష్టిసారించింది. ప్రాథమికంగా 12 వేల నుంచి 15 వేల వరకు ఖాళీలు ఉంటాయని అధికారులు అంచనా వేస్తున్నారు. వైఎస్సార్‌ కాంగ్రెస్‌ పార్టీ అధికారంలోకి రాగానే విద్యాశాఖలోని దాదాపు 18 వేల మందికి పదోన్నతులు కల్పించారు. వీరిలో 10 వేల మందికి పైగా పై స్థానాలకు వెళ్లడంతో కింది పోస్టులు ఖాళీ అయ్యాయి. పండిట్లు, పీఈటీల పోస్టులను అప్‌గ్రేడ్‌ చేసి ఆ పోస్టుల్లోకి కూడా పదోన్నతులు కల్పించారు. ప్రస్తుత డీఎస్సీలో ఈ ఖాళీలు కూడా చేరనున్నాయి. పోస్టుల వారీగా ఖాళీల సమగ్ర సమాచారాన్ని ఆయా జిల్లాల నుంచి రప్పించేందుకు అధికారులకు ఆదేశాలు పంపనున్నామని అధికారులు తెలిపారు. అలాగే, మున్సిపల్‌ స్కూళ్లకు సంబంధించిన వివరాలను కూడా ఆ శాఖ నుంచి తెప్పిస్తున్నారు. జనవరి మొదటి వారంలో టెట్‌..ఆఖర్లో డీఎస్సీ నోటిఫికేషన్‌ టీచర్‌ పోస్టుల భర్తీకి ముందుగా టీచర్‌ అర్హత పరీక్షను నిర్వహించాలని ఆలోచిస్తున్నారు. గతంలో టీచర్‌ అర్హత పరీక్ష (టెట్‌)ను, టీచర్‌ నియామక పరీక్ష (టీఆర్టీ)ని కలిపి టెట్‌ కమ్‌ టీఆర్టీగా నిర్వహించారు. అయితే, ఈసారి రెండింటినీ కలపకుండా వేర్వేరుగా నిర్వహించాలని విద్యాశాఖ భావిస్తోంది. జాతీయ విద్యాహక్కు చట్టం ప్రకారం.. టెట్‌ను ఏటా రెండుసార్లు నిర్వహించాలి. 2018లో టెట్‌ను ఒకసారి నిర్వహించారు. ఈ ఏడాదిలో ఎన్నికలు, కొత్త ప్రభుత్వం ఏర్పాటు తదితర కారణాలవల్ల దానిపై అధికారులు ఎలాంటి నిర్ణయం తీసుకోలేకపోయారు. ఈ నేపథ్యంలో.. ఏటా పోస్టుల భర్తీకి చర్యలు తీసుకోవాలని ప్రభుత్వం నుంచి స్పష్టమైన ఆదేశాలు రావడంతో టెట్, డీఎస్సీల నిర్వహణకు  అడుగులు వేస్తున్నారు. డీఎస్సీ కన్నా ముందుగా టెట్‌ నోటిఫికేషన్‌ను జనవరి మొదటి వారంలో ఆ తరువాత నెలాఖరున డీఎస్సీ నోటిఫికేషన్‌ విడుదలయ్యే అవకాశముందని పాఠశాల విద్యాశాఖ వర్గాలు వివరించాయి. ఆంగ్ల నైపుణ్యం తప్పనిసరి ఇదిలా ఉంటే.. రాష్ట్రంలోని ప్రభుత్వ పాఠశాలల్లో 1 నుంచి 6 వరకు వచ్చే ఏడాది నుంచి, ఆ తరువాతి ఏళ్లలో వరుసగా ఇతర తరగతుల్లో ఆంగ్ల మాధ్యమాన్ని ప్రవేశపెడుతున్నందున ఉపాధ్యాయ అభ్యర్థులకు ఆంగ్ల మాధ్యమంలో బోధనా నైపుణ్యాలు తప్పనిసరిగా ఉండేలా టెట్, డీఎస్సీలలో సంబంధిత అంశాలపై ప్రశ్నలు పొందుపర్చనున్నారు. టెట్‌ పేపర్‌–1, 2 రెండింటిలోనూ ఇంగ్లీషు ప్రావీణ్యంపై ప్రశ్నలున్నాయి. పేపర్‌–2ఏలో భాషాంశాలు, కమ్యూనికేషన్‌ ఇతర సమగ్ర నైపుణ్యాలు పరీక్షిస్తున్నారు. కాగా, డీఎస్సీ–2018లో కొన్ని ప్రత్యేక పోస్టులకు ఆంగ్ల నైపుణ్యాలపై ఒక పేపర్‌గా పెట్టారు. ఈసారి ఆంగ్ల మాధ్యమం తప్పనిసరి అవుతున్న నేపథ్యంలో ఎంపికయ్యే టీచర్లలో ఆంగ్ల నైపుణ్యాలను పరిశీలించేందుకు ప్రత్యేక పేపర్‌ పెట్టనున్నారు. అలాగే, టెట్‌లో ఇప్పుడు అడుగుతున్న అంశాలకు అదనంగా మరికొన్ని అంశాలను చేర్చనున్నారు. డీఎస్సీలో అన్ని కేటగిరీల పోస్టులకూ ప్రత్యేక పేపర్‌ ఉంటుందని విద్యాశాఖ వర్గాలు తెలిపాయి. అభ్యర్థుల ఎదురుచూపు గత ఏడాదిలో డీఎడ్, బీఎడ్‌ కోర్సు పూర్తిచేసిన ఒక బ్యాచ్‌ అభ్యర్థులతో పాటు తాజాగా ఈ కోర్సులు పూర్తయిన వారు కూడా టెట్‌ కోసం ఎదురుచూస్తున్నారు. గతంలో నిర్వహించిన టెట్‌లలో అర్హత సాధించలేని వేలాది మంది అభ్యర్థులు కూడా ఇప్పుడు టెట్‌ నోటిఫికేషన్‌పై దృష్టిసారించారు. డీఎడ్‌ అభ్యర్థులు రెండు బ్యాచ్‌లు కలిపి 80వేల మంది, బీఎడ్‌ అభ్యర్థులు 30వేల మందితో పాటు గతంలోని అభ్యర్థులూ వేలల్లోనే ఉన్నారు.

సాక్షి, రంగారెడ్డి జిల్లా: ‘‘కొండంత రాగం తీసి.. ’’ అనే చందంగా తయారైంది ఉపాధ్యాయ పోస్టుల భర్తీ వ్యవహారం. కోర్టు కేసులున్న దివ్యాంగుల కోటా మినహా దాదాపు అన్ని పోస్టుల్లో నియామకాలు చేపడతామని ఇటీవల సర్కారు పేర్కొంది. దీంతో సర్కారు బడులకు మంచి రోజులు రానున్నాయని అందరూ భావించారు. అయితే చివరి నిమిషంలో అన్ని పోస్టులు కాదు కొన్నింటినే భర్తీ చేయాలని జిల్లా అధికారులకు ఆదేశాలు అందాయి. ఫలితంగా ఎప్పటిలాగే ఈ విద్యాసంవత్సరం కూడా సర్కారు బడుల విద్యార్థులకు అరకొర బోధనే దిక్కుకానుంది. గుర్తించిన పోస్టుల్లో ఐదో వంతు మాత్రమే ప్రస్తుతం భర్తీ చేయాలని జిల్లా విద్యాశాఖకు పాఠశాల విద్యాశాఖ డైరెక్టరేట్‌ ఆదేశాలు జారీ చేసింది. కాగా ఒక్క ఎస్‌జీటీ పోస్టు కూడా భర్తీ చేయలేక పోతుండటం గమనార్హం. కనీసం స్కూల్‌ అసిస్టెంట్, లాంగ్వేజ్‌ పండిట్‌ పోస్టుల్లోనూ పూర్తి స్థాయిలో నియామకాలు లేకపోవడం ఆందోళన కలిగిస్తోంది.  250 పోస్టులే భర్తీ! ఉమ్మడి జిల్లా వ్యాప్తంగా 1,269 ఉపాధ్యాయ పోస్టుల భర్తీకి గతేడాది మొదట్లో టీచర్‌ ఎలిజిబిలిటీ టెస్ట్‌ (టెట్‌) నిర్వహించారు. ఇందులో 915 ఎస్‌జీటీ, 192 స్కూల్‌ అసిస్టెంట్, 146 లాంగ్వేజ్‌ పండిట్, 16 పీఈటీ పోస్టులు ఉన్నాయి. వీటిలో ఎస్‌జీటీ, పీఈటీ పోస్టుల భర్తీ విషయాన్ని సర్కారు పక్కన పెట్టింది. మొత్తం స్కూల్‌ అసిస్టెంట్‌ పోస్టుల్లో 151 పోస్టులకు సంబంధించే అభ్యర్థుల సర్టిఫికెట్ల వెరిఫికేషన్‌ చేసేందుకు షెడ్యూల్‌ విడుదల చేశారు. హిందీ సబ్జెక్టు పోస్టుల ప్రస్తావనే లేదు. ఇక లాంగ్వేజ్‌ పండిట్‌ పోస్టుల విషయంలోనూ ఇదే తరహాలో వ్యవహరించారు. కేవలం 99 తెలుగు పోస్టుల అభ్యర్థులనే వెరిఫికేషన్‌కు కబురు పెట్టారు. మొత్తం మీద 250 పోస్టులకు ఎంపికైన అభ్యర్థుల సర్టిఫికెట్లనే పరిశీలించనున్నారు.  నేడు సర్టిఫికెట్ల పరిశీలన... స్కూల్‌ అసిస్టెంట్, లాంగ్వేజ్‌ పండిట్‌ పోస్టులకు ఎంపికైన అభ్యర్థుల విద్యార్హత పత్రాలను ఈనెల 11న ఎల్బీనగర్‌లోని జిల్లా పరిషత్‌ ఉన్నత పాఠశాలలో పరిశీలించనున్నారు. ఉదయం 9.30 గంటల నుంచి ఈ ప్రక్రియ ప్రారంభం కానుంది. ఎంపికైన అభ్యర్థుల జాబితాను  వెబ్‌సైట్‌లో అందుబాటులో ఉంచారు. అన్ని ఒరిజినల్‌ ధ్రువపత్రాలు, గెజిటెడ్‌ అధికారి ధృవీకరించిన రెండు సెట్ల జిరాక్స్‌ ప్రతులు, నాలుగు పాస్‌పోర్ట్‌ సైజు ఫొటోలతో అభ్యర్థులు హాజరు కావాల్సి ఉంటుంది. ఎంపికైన అభ్యర్థులకు ఈనెల 13, 14 తేదీల్లో కౌన్సిలింగ్‌ నిర్వహించనున్నారు. ఖైరతాబాద్‌లోని జిల్లా పరిషత్‌ సమావేశ మందిరంలో ఉదయం 9.30 గంటలకు ఇది ప్రారంభం కానుంది.   సర్టిఫికెట్ల వెరిఫికేషన్‌ అయ్యే పోస్టులుస్కూల్‌ అసిస్టెంట్‌ గణితం: 29 ఫిజికల్‌ సైన్స్‌ : 5 బయోలాజికల్‌ సైన్స్‌ : 30 సోషల్‌ స్టడీస్‌ : 64 తెలుగు : 22 లాంగ్వేజ్‌ పండిట్‌ తెలుగు : 99

సాక్షి, మచిలీపట్నం : పాఠశాలల్లో ఖాళీగా ఉన్న ఉపాధ్యాయ పోస్టుల భర్తీకి ప్రభుత్వం గ్రీన్‌సిగ్నల్‌ ఇవ్వడంతో విద్యాశాఖాధికారులు ఆ మేరకు ఏర్పాట్లు చేశారు. జిల్లాలోని ప్రభుత్వ, జెడ్పీ, మున్సిపల్, గిరిజన సంక్షేమ విభాగాల్లో మొత్తం 222 పోస్టులు ఖాళీగా ఉన్నట్లుగా అధికారులు లెక్క తేల్చారు. కోర్టు కేసుల నేపథ్యంలో స్కూల్‌ అసిస్టెంట్‌ కేడర్‌ గల తెలుగు, హిందీ, సంస్కృతం, పీఈటీ పోస్టులు మొత్తం 43 ఖాళీలు ఉండగా, ప్రస్తుతానికి వీటిని భర్తీ చేయడం లేదు. మిగిలిన 179 పోస్టుల్లో అర్హులైన వారిని ఎంపిక చేసి, నియామక పత్రాలను అందజేసేందుకు విద్యాశాఖాధికారులు దృష్టి సారించారు. 2018 డీఎస్సీ ఫలితాల మేరకు అర్హులైన అభ్యర్థులను ఉపాధ్యాయులుగా నియమించనున్నారు. ఉపాధ్యాయ పోస్టులను దక్కించుకునేందుకు జిల్లాతో పాటు, ఇతర జిల్లాల నుంచి కూడా సుమారుగా 30 వేల మంది అభ్యర్థులు డీఎస్సీకి హాజరయ్యారు. వీరిలో సబ్జెక్టుల వారీగా అర్హులైన వారి మెరిట్‌ జాబితా ఇదివరకే సిద్ధమైంది. తాజాగా ప్రభుత్వం నుంచి నియామక ప్రక్రియ చేపట్టాలని ఆదేశాలు రావటంతో విద్యాశాఖాధికారులు డీఎస్సీ ఫైళ్లను బయటకు తీస్తున్నారు. ప్రభుత్వ ఆదేశాలతో ధ్రువీకరణ పత్రాల పరిశీలన మొదలు, పోస్టింగ్‌లు ఇచ్చేంత వరకు నిర్ధిష్టిమైన షెడ్యూల్‌ సైతం పాఠశాల విద్యాశాఖ కమిషనర్‌ విడుదల చేయడంతో జిల్లా విద్యాశాఖాధికారులు ఇదే పనిలో నిమగ్నమయ్యారు.  అంతా ఆన్‌లైన్‌లోనే.. రాష్ట్రంలో కొత్తగా ప్రభుత్వం ఏర్పాటైన తరువాత తొలిసారిగా జరుగుతున్న నియామకాలు కావడంతో పారదర్శకతకు పెద్దపీట వేస్తున్నారు. నియామకాల్లో ఎటువంటి అవకతవకలకు ఆస్కారం లేకుండా అంతా ఆన్‌లైన్‌ పద్ధతిలో నిర్వహించేందుకు ఏర్పాట్లు చేస్తున్నారు. ఈ నెల 20 నుంచి మొదలయ్యే ప్రక్రియ సెప్టెంబర్‌ 4 వరకు కొనసాగనుంది. పాఠశాల విద్యాశాఖ (సీఎస్‌సీ) వెబ్‌సైట్‌ ద్వారా ఎంపిక అభ్యర్థుల జాబితాను ఈ నెల 20న అందుబాటులో ఉంచనున్నారు. దీనిని జిల్లాల స్థాయి సెలక్షన్‌ కమిటీ (డీఎస్‌సీ) ఆమోదించి ఈ నెల 21న జాబితాను ప్రకటిస్తారు. ఇందులో ఎంపికైన అభ్యర్థులు ఈ నెల 22, 23 తేదీల్లో వారికి సంబంధించిన ఒరిజనల్‌ ధ్రువీకరణ పత్రాలను అప్‌లోడ్‌ చేయాల్సి ఉంటుంది. ఇలా పలు దఫాలుగా పరిశీలన అనంతరం ఆగస్టు 29న పోస్టుల కోసమని ఎంపికైన వారి తుదిజాబితా ప్రకటించనున్నారు. ఆగస్టు 30న వెబ్‌ అప్షన్‌ల అనంతరం ఎంపికైన వారికి పోస్టింగ్‌ ఆర్డర్‌లను సైతం ఆన్‌లైనే జారీ చేయనున్నారు.   ధ్రువీకరణ పత్రాల పరిశీలనకు ప్రత్యేక కమిటీ  డీఎస్సీ ఫలితాల ఆధారంగా ఇప్పటికే సబ్జెక్టుల వారీగా మెరిట్‌ అభ్యర్థుల జాబితాను విద్యాశాఖాధికారులు ఎంపిక చేశారు. అయితే అందుబాటులో ఉన్న ఖాళీల మేరకు మెరిట్, రోస్టర్, అభ్యర్థుల ప్రత్యేకతలను పరిగణనలోకి తీసుకొని మెరిట్‌ జాబితాలో టాప్‌లో నిలిచిన వారికి పోస్టింగ్‌లు ఇచ్చేందుకు వడపోత కార్యక్రమం చేపట్టాల్సి ఉంటుంది. ఈ దశలోనే అధికారులు పూర్తి స్థాయిలో దృష్టి సారించాలని పాఠశాల విద్యాశాఖ కమిషనర్‌ సంధ్యారాణి స్పష్టమైన ఆదేశాలు ఇచ్చారు. ఇదే విషయమై సోమవారం నిర్వహించిన వీడియో కాన్ఫరెన్స్‌లో రాష్ట్రంలోని అన్ని జిల్లాల డీఈవోలకు దిశానిర్దేశం చేశారు. అభ్యర్థులు పొందుపరిచిన ధ్రువీకరణ పత్రాలను విద్యా, రెవెన్యూ, గిరిజన సంక్షేమ, వైద్యశాఖలకు చెందిన అధికారులతో కూడిన కమిటీ సభ్యులు పరిశీలన జరిపి, వాటికి ఆమోదం తెలిపిన తరువాతనే తుది జాబితా ప్రకటించేలా జాగ్రత్తలు తీసుకోవాలని సూచించారు.   భాషా పండితుల నియామకాలకు బ్రేక్‌  న్యాయస్థానంలో వివాదంలో ఉన్న కొన్ని పోస్టుల భర్తీకి తాత్కాలికంగా బ్రేక్‌ పడింది. స్కూల్‌ అసిస్టెంట్‌ కేడర్‌లో గల తెలుగు (12), హిందీ (6), ఎల్‌పీ తెలుగు (4), ఎల్‌పీ హిందీ (4), ఎల్‌పీ సంస్కృతం (3), పీఈటీ (14) పోస్టులు మొత్తం 43 ఖాళీగా ఉండగా, వీటి నియామకాలను తాత్కాలికంగా నిలుపుదల చేశారు. న్యాయస్థానం ఆదేశాలకు అనుగుణంగా వీటిని భర్తీ చేసేలా, జాబితా సిద్ధం చేస్తున్నారు.  

సాక్షి, అమరావతి: ఆంధ్రప్రదేశ్‌ రాష్ట్రంలో గతేడాది నిర్వహించిన డీఎస్సీ–2018 నియామక ప్రక్రియకు ప్రభుత్వం ఏర్పాట్లు చేపట్టింది. ఈ నెల 20వ తేదీ నుంచి టీచర్‌ పోస్టులకు అర్హులైన వారి ఎంపికకు పాఠశాల విద్యా శాఖ తాత్కాలిక షెడ్యూల్‌ను విడుదల చేసింది. ఈ ప్రక్రియ సుదీర్ఘంగా సెప్టెంబర్‌ 4 వరకు కొనసాగనుంది. తెలుగు భాషా పండితులు, హిందీ భాషా పండితులు, స్కూల్‌ అసిస్టెంటు తెలుగు, స్కూల్‌ అసిస్టెంటు హిందీ, పీఈటీ పోస్టులు (మొత్తం అయిదు కేటగిరీలు) మినహాయించి తక్కిన అన్ని కేటగిరీల పోస్టులకూ అర్హులైన అభ్యర్థులను ఎంపిక చేయనున్నారు. రాష్ట్రంలో 7,902 పోస్టులతో డీఎస్సీ–2018 నోటిఫికేషన్‌ను విడుదల చేసిన సంగతి తెలిసిందే. ఈ పోస్టులకు అర్హతల నిర్ణయం, పరీక్షల నిర్వహణలో అనేక లోటుపాట్లు తలెత్తాయి. ఇప్పటికే న్యాయస్థానాల్లో పలు కేసులు కూడా దాఖలయ్యాయి. ఈ న్యాయ వివాదాల కారణంగానే అయిదు కేటగిరీల నియామకాలు మినహాయించి తక్కిన వాటికి షెడ్యూల్‌ ఇచ్చారు. వివాదాలు పరిష్కారమైన తరువాత మిగిలిన పోస్టులకూ నియామకాలు పూర్తిచేయనున్నారు. ఈ పోస్టులకు నియామకాల ప్రక్రియ మొత్తం తొలిసారిగా ఆన్‌లైన్లో చేపడుతుండడం విశేషం. అభ్యర్థులు పూర్తిగా కంప్యూటర్‌ ద్వారానే తమ ధ్రువపత్రాల పరిశీలన తదితర కార్యక్రమాలు పూర్తిచేసుకోవడం, నియామక పత్రాలు పొందేలా ఏర్పాట్లు చేపట్టారు. ప్రతి కేటగిరీలో అభ్యర్థుల జాబితాల ప్రకటన, ధ్రువపత్రాల అప్‌లోడ్, వాటి పరిశీలన కార్యక్రమాన్ని మూడు దఫాలుగా చేయనున్నారు. పోస్టులు ఖాళీగా ఉండిపోకుండా జాబితాలో అర్హులైన తదుపరి మెరిట్‌ అభ్యర్థులను ఎంపిక చేసేందుకు వీలుగా ఈ విధానాన్ని అనుసరిస్తున్నారు. ఆయా కేటగిరీల పోస్టులకు సంబంధించిన ఎంపిక ప్రక్రియ మొత్తాన్ని పాఠశాల విద్యా శాఖ కమిషనరేట్‌ (సీఎస్‌ఈ) ఆన్‌లైన్‌ పర్యవేక్షణలో కొనసాగనుంది. అంతిమంగా ఎంపికైన అభ్యర్థుల జాబితాలను పాఠశాల విద్యాశాఖ విడుదల చేస్తుంది. అనంతరం పాఠశాలల ఎంపికకు వీలుగా వెబ్‌ ఆప్షన్లకు అవకాశం కల్పిస్తారు. పోస్టింగ్‌ ఆర్డర్లను కూడా ఆన్‌లైన్లో విడుదల చేస్తారు. వాటిని అనుసరించి ఆయా జిల్లాల ఎంపిక కమిటీల మెంబర్‌ సెక్రటరీలు (నియామకాధికారులు) అభ్యర్థులను ఆయా పాఠశాలల్లో చేరేలా ఉత్తర్వులు ఇవ్వనున్నారు. ఎంపికైన అభ్యర్థి ఎవరైనా పోస్టింగ్‌ కోసం ప్రాంతాన్ని ఎంపిక చేసుకోలేని పక్షంలో అతనికి మెంబర్‌ సెక్రటరీనే కేటాయింపు చేస్తారు.

సాక్షి, హైదరాబాద్‌: రాష్ట్రంలో ఉపాధ్యాయ శిక్షణ పూర్తి చేసిన అభ్యర్థుల మూడో ఉపాధ్యాయ అర్హత పరీక్ష (టెట్‌) వ్యాలిడిటీ కూడా ముగిసిపోయింది. దీంతో ఇప్పటికిప్పుడు ఉపాధ్యాయ పోస్టుల భర్తీకి నోటిఫికేషన్‌ వస్తే దాదాపు 2.5 లక్షల మంది అభ్యర్థులకు దరఖాస్తు చేసుకునే అర్హత కూడా లేకుండా పోతుంది. నిబంధనల ప్రకారం ప్రతి 6 నెలలకోసారి టెట్‌ నిర్వహించాల్సి ఉన్నా.. రాష్ట్రంలో రెండేళ్లుగా ఆ ఊసే లేదు. టెట్‌ నిర్వహించేందుకు అనుమతి కోసం విద్యా శాఖ పంపిన ఫైలు ఇంకా ప్రభుత్వ పరిశీలనలోనే ఉంది. ఉమ్మడి రాష్ట్రంలో, తెలంగాణ వచ్చాక 6 టెట్‌లు నిర్వహించగా, ఇప్పటి వరకు మూడు టెట్‌ల వ్యాలిడిటీ ముగిసిపోయింది. 2011 జూన్‌ 1 మొదటి టెట్‌ నిర్వహించగా, 2012 జనవరి 8న రెండో టెట్, అదే ఏడాది జూన్‌ 1న మూడో టెట్‌ నిర్వహించారు. ప్రస్తుతం వాటి వ్యాలిడిటీ ముగిసిపోవడంతో అభ్యర్థులంతా టెట్‌ కోసం ఎదురుచూస్తున్నారు. నిబంధనల ప్రకారం ప్రభుత్వ పాఠశాలల్లో టీచర్లే కాదు.. ప్రైవేటు పాఠశాలల్లోనూ టీచర్లుగా పని చేయాలంటే టెట్‌లో అర్హత సాధించి ఉండాల్సిందే. ఈ నేపథ్యంలో టెట్‌ నిర్వహించకపోవడంతో అనేక మంది టెట్‌ అర్హత లేకుండా టీచర్లుగా పని చేయాల్సిన పరిస్థితి నెలకొంది.  2017 జూలై నుంచి లేని టెట్‌  రాష్ట్రంలో 2017 జూలై 23న చివరి టెట్‌ నిర్వహించారు. ఆ తర్వాత ఇప్పటివరకు టెట్‌ నిర్వహించలేదు. చివరగా నిర్వహించిన ఆ టెట్‌ పేపర్‌–1కు 98,848 మంది హాజరు కాగా, 56,708 మంది అర్హత సాధించారు. దాదాపు 40 వేల మంది ఫెయిల్‌ అయ్యారు. ఇక పేపర్‌–2 పరీక్ష 2,30,932 మంది హాజరు కాగా 45,045 మంది అర్హత సాధించారు. అంటే 1.90 లక్షల మంది ఫెయిల్‌ అయ్యారు. అయితే వారిలో అంతకుముందు టెట్‌లలో అర్హత సాధించిన వారు కొంత మంది ఉన్నా దాదాపు 2 లక్షల మంది టెట్‌ కోసం ఎదురుచూస్తున్నారు. ఇప్పటివరకు నిర్వహించిన ఆరు టెట్‌లలో దాదాపు 6 లక్షల మంది అర్హత సాధించగా, అందులో ఈ రెండు లక్షల మంది టెట్‌ వ్యాలిడిటీ ముగిసిపోయినట్లు నిరుద్యోగులు చెబుతున్నారు. వారితో పాటు 2017 జూలై తర్వాత రాష్ట్రంలో టెట్‌ నిర్వహించలేదు. ఇక అప్పటి నుంచి బీఎడ్, డీఎడ్‌ ఉత్తీర్ణులైన దాదాపు 60 వేల మంది అభ్యర్థులు టెట్‌ కోసం ఎదురుచూస్తున్నారు.  ఎన్‌సీటీఈ నిబంధనల మేరకు..  ఉపాధ్యాయ పోస్టులకు దరఖాస్తు చేసుకునే ప్రతి అభ్యర్థి టెట్‌లో అర్హత సాధించి ఉండాలని జాతీయ ఉపాధ్యాయ విద్యా మండలి (ఎన్‌సీటీఈ) 2010లోనే ఆదేశాలు జారీ చేసింది. అందుకు అనుగుణంగా మన రాష్ట్రంలోనూ ఏటా రెండుసార్లు (నవంబర్‌/డిసెంబర్, జూన్‌/జూలై) టెట్‌ నిర్వహించాలని రాష్ట్రం ప్రభుత్వం నిర్ణయించింది. అందులో అర్హత సాధించిన వారే ఉపాధ్యాయ పోస్టులకు దరఖాస్తు చేసుకునే వీలుంటుందని ఉత్తర్వులు జారీ చేసింది. టెట్‌ స్కోర్‌ వ్యాలిడిటీ ఏడేళ్లు ఉంటుందన్న నిబంధనను విధించింది. ఏడేళ్ల తర్వాత ఉపాధ్యాయ పోస్టులకు దరఖాస్తు చేసుకోవాలంటే మళ్లీ టెట్‌లో అర్హత సాధించాలని స్పష్టం చేసింది. ఆ నిబంధన ప్రకారం రాష్ట్రంలో మొదటి ఏడాది తప్ప ఏటా రెండు సార్లు టెట్‌ను నిర్వహించట్లేదు. 2011 నుంచి ఇప్పటివరకు ఆరు సార్లు టెట్‌ నిర్వహించింది. ఉమ్మడి రాష్ట్రంలో నాలుగుసార్లు, తెలంగాణ ఏర్పడ్డాక 2 సార్లే టెట్‌ నిర్వహించింది. ఇందులో 2011 జూలై 1న నిర్వహించిన టెట్‌ వ్యాలిడిటీ 2018 జూలై 1తో ముగిసింది. 2012 జనవరి 8న నిర్వహించిన రెండో టెట్‌ వ్యాలిడిటీ ఈ జనవరి 8తో ముగిసిపోయింది. అలాగే ఈనెల 1తో 2012 జూన్‌ 1న నిర్వహించిన మూడో టెట్‌ స్కోర్‌ వ్యాలిడిటీ కూడా ముగిసిపోయింది. 

హైదరాబాద్‌: పబ్లిక్‌ కమిషన్‌ ద్వారా సెలక్ట్‌ అయిన 8,792 మంది టీచర్లకు వారం రోజులలో పోస్టింగ్స్‌ ఇవ్వాలని బీసీ సంక్షేమ సంఘం నేత ఆర్‌.కృష్ణయ్య డిమాండ్‌ చేశారు. లేకపోతే మానవ హక్కుల కమిషన్‌కు ఫిర్యాదు చేస్తామని హెచ్చరించారు. శనివారం విద్యానగర్‌లోని బీసీ భవన్‌లో గుజ్జ కృష్ణ అధ్యక్షతన సెలక్టెడ్‌ టీచర్ల రాష్ట్ర స్థాయి సమావేశం జరిగింది. ఈ సమావేశానికి ముఖ్య అతిథిగా హాజరైన కృష్ణయ్య మాట్లాడుతూ.. సెలక్ట్‌ అయిన టీచర్లకు వెంటనే పోస్టింగ్‌లు ఇవ్వాలని డిమాండ్‌ చేశారు. దీనికి సంబంధించి జాతీయ ఎస్సీ కమిషన్, జాతీయ బీసీ కమిషన్‌లకు ఫిర్యాదు చేస్తామన్నారు. ప్రభుత్వం ఉద్దేశపూర్వకంగా జాప్యం చేస్తుందని విమర్శించారు. జాప్యం మూలంగా నెలకు రూ.100 కోట్లు బడ్జెట్‌ మిగుల్చుకోవాలని కుట్ర చేస్తోందని ఆరోపించారు. అనేక వివాదాల మధ్య 6 నెలల క్రితం సర్టిఫికెట్ల వెరిఫికేషన్‌ చేసి ఫైనల్‌ సెలక్టెడ్‌ టీచర్ల జాబితాను విద్యాశాఖ అధికారులకు పంపారని, గత 6 నెలలుగా సీఎం పేషీలో ఈ ఫైలు పెండింగ్‌లో ఉందన్నారు. సీఎం ఫైళ్లను చూడటం లేదని, అందువల్ల సెలక్ట్‌ అయిన వేలాదిమంది టీచర్లు నిరుద్యోగులుగా మారా రన్నారు. రాష్ట్ర ప్రభుత్వం టీచింగ్‌ స్టాఫ్‌ను నియమించకుండా విద్యను భ్రష్టు పట్టిస్తుందని ఆరోపించారు. ఇప్పుడు జరుగుతున్న ఇంటర్‌ గందరగోళానికి కారణం సరైన అధ్యాపకులు లేకపోవడమేనన్నారు. దాదాపు 70% జూని యర్‌ లెక్చరర్‌ పోస్టులు ఖాళీగా ఉన్నాయని, దీంతో విద్యార్హతలు లేని వారితో పేపర్‌ వ్యాల్యుయేషన్‌ చేయించారని ఆరోపించారు. టీచర్‌ ఉద్యోగాల భర్తీని పీఎస్సీ నుంచి బదిలీ చేసిన డీఎస్సీ ద్వారా భర్తీ చేయాలని విజ్ఞప్తి చేశారు. గతంలో మాదిరిగా టీచర్‌ ఉద్యోగాల భర్తీని జిల్లా సెలక్షన్‌ కమిటీల ద్వారా భర్తీ చేయాలని ఆర్‌.కృష్ణయ్య సూచించారు. ఈ సమావేశంలో ఎర్ర సత్యనారాయణ, దాసు సురేష్, జి.అంజి తదితరులు పాల్గొన్నారు.

సాక్షి, న్యూఢిల్లీ: తెలుగు రాష్ట్రాల్లోని ఉపాధ్యాయ పోస్టుల ఖాళీలను ఫిబ్రవరి నెలాఖరులోగా భర్తీ చేయాలని సుప్రీంకోర్టు ఆదేశించింది. తెలుగు రాష్ట్రాల్లో మౌలిక వసతుల కల్పన, సిబ్బంది నియామకంపై గతంలో జేకే రాజు అనే వ్యక్తి దాఖలు చేసిన పిటిషన్‌ను విచారిస్తూ మౌలిక వసతులు కల్పించాలని, టీచర్‌ పోస్టులు భర్తీ చేయాలని గతంలో సుప్రీంకోర్టు ఆదేశించింది. ఈ ఆదేశాలు అమలు చేయలేదంటూ ఆర్‌.వెంకటేశ్‌ అనే టీఆర్‌టీ అభ్యర్థి కోర్టు ధిక్కార పిటిషన్‌ దాఖలు చేశారు. ఈ పిటిషన్లను తాజాగా సోమవారం జస్టిస్‌ ఏకే సిక్రీ నేతృత్వంలోని ధర్మాసనం విచారించింది. పిటిషనర్‌ తరఫు న్యాయవాది కె.శ్రవణ్‌కుమార్‌ వాదనలు వినిపిస్తూ.. టీచర్‌ పోస్టుల భర్తీలో తెలుగు రాష్ట్రాలు నిర్లక్ష్యం వహిస్తున్నాయని నివేదించారు. సుప్రీంకోర్టు ఆదేశాలు అనుసరించి 2017 మార్చిలోగా భర్తీ చేయాల్సి ఉండగా ఇప్పటివరకు భర్తీ చేయలేదని పేర్కొన్నారు. ఏపీ ప్రభుత్వ న్యాయవాది జి.ప్రభాకర్‌ వాదిస్తూ.. ఏపీలో ఎస్జీటీ పోస్టులు 3,889, స్కూల్‌ అసిస్టెంట్‌ పోస్టులు 1,625 సహా మొత్తం 7,902 పోస్టుల భర్తీకి నోటిఫికేషన్‌ ఇచ్చామన్నారు. జనవరి నెలాఖరుకు సంబంధిత పరీక్షలు పూర్తవుతాయని, ఫిబ్రవరి నెలాఖరుకల్లా భర్తీ పూర్తవుతుందని వెల్లడించారు. తెలంగాణలో సంబంధిత ఉద్యోగ పరీక్షలు పూర్తయినా కోర్టుల్లో కేసులుండటంతో ఫలితాలు వెల్లడించలేదని తెలంగాణ ప్రభుత్వ న్యాయవాది వెంకటరెడ్డి నివేదించారు. ఇరుపక్షాల వాదనలు విన్న సుప్రీంకోర్టు.. ఫిబ్రవరి ఆఖరులోగా నియామకాలు పూర్తిచేయాలని తెలుగు రాష్ట్రాలను ఆదేశించింది. తదుపరి విచారణను మార్చి మొదటి వారంలో చేపడతామని ఉత్తర్వులు జారీచేసింది.

కర్నూలు శారదానగర్‌కు చెందిన వివాహిత విజయలక్ష్మి(26) గత మూడేళ్ల నుంచి డీఎస్సీ కోసం ఎదురుచూస్తోంది.టెట్‌లో ఉత్తీర్ణత సాధించిన ఆమె ఈసారి డీఎస్సీలో కచ్చితంగా జాబ్‌ సాధిస్తాననే ఆత్మవిశ్వాసంతో ఉంది. అయితే డీఎస్సీ వాయిదా పడిందని తెలియడంతో మనస్తాపానికి గురై బుధవారం ఇంట్లో ఆత్మహత్య చేసుకుంది. రాష్ట్రంలో డీఎస్సీని నమ్ముకొన్నవారి పరిస్థితికి ఈ సంఘటన ఒక నిదర్శనం. ఇలా రాష్ట్రంలో ఎంతో మంది అభ్యర్థుల జీవితాలతో ప్రభుత్వం చెలగాటమాడుతోంది. సాక్షి, అమరావతి: రాష్ట్రంలో డీఈడీ, బీఈడీ కోర్సులు పూర్తిచేసిన దాదాపు 7 లక్షల మంది అభ్యర్థులు గత మూడేళ్లుగా డీఎస్సీ నోటిఫికేషన్ల కోసం ఎదురుచూస్తున్నారు. ప్రభుత్వం ఇచ్చే ఉద్యోగ ప్రకటనల్లో అంతో ఇంతో ఎక్కువ ఉండేవి.. ఉపాధ్యాయ పోస్టులే. అందులోనూ పోస్టుల భర్తీ ఏటా ఉంటుందన్న ఆశతో ఏటా వేలాది మంది డీఈడీ, బీఈడీ కోర్సుల్లో చేరుతున్నారు. ఫీజులు భారమైనా అప్పోసప్పో చేసి కాలేజీల్లో చేరుతున్నారు. ఇందుకోసం దూరప్రాంతాలకు వెళ్లి హాస్టళ్లలో, రూముల్లో ఉంటూ భారీ అద్దెలు చెల్లిస్తున్నారు. ఇంత కష్టపడి కోర్సులు పూర్తిచేస్తున్న అభ్యర్థులు ప్రభుత్వం ఒక్క పోస్టూ భర్తీచేయకపోవడంతో తీవ్ర నిరాశానిస్పృహలకు గురవుతున్నారు.     30 వేల ఖాళీలున్నా..  రాష్ట్రంలో దాదాపు 30 వేల వరకు ఉపాధ్యాయ పోస్టులు ఖాళీగా ఉన్నా గత నాలుగేళ్లుగా ఒక్క నోటిఫికేషన్‌ కూడా జారీచేయలేదు. 2014 టెట్‌ కమ్‌ టీఆర్టీకి 4.20 లక్షల మంది హాజరయ్యారు. అప్పట్లో ప్రకటించిన పోస్టులు 10,313 మాత్రమే. అంటే.. ఆ పోస్టులు పొందిన వారు కాకుండా ఇంకా 4.10 లక్షల మంది నిరుద్యోగులుగానే మిగిలిపోయారు. ఈ నాలుగేళ్లలో డీఈడీ, బీఈడీ కోర్సులు పూర్తిచేసిన వారి సంఖ్య ఏటా 70 వేల వరకు ఉంటోంది. ఈ లెక్కన దాదాపు ఏడు లక్షల మంది డీఎస్సీ నోటిఫికేషన్‌ కోసం వేయికళ్లతో ఎదురుచూస్తున్నారు.     టెట్, డీఎస్సీల కోసం లక్షల్లో ఖర్చు  2014లో టెట్‌ కమ్‌ టీఆర్టీ నిర్వహించాక మళ్లీ ప్రభుత్వం పోస్టుల భర్తీపై దృష్టి పెట్టలేదు. ఈలోగా డీఈడీ, బీఈడీ పూర్తిచేసిన లక్షలాదిమంది అభ్యర్థులు, అంతకుముందు టెట్‌లో అర్హత సాధించినవారు డీఎస్సీ నోటిఫికేషన్‌ ఏ క్షణంలోనైనా వెలువడవచ్చని చేస్తున్న చిన్నచిన్న ఉద్యోగాలను, ఉపాధి పనులను పక్కనపెట్టి పరీక్షల కోసం కోచింగ్‌ కేంద్రాల్లోనే గడుపుతున్నారు. కొంతమంది తమ కుటుంబాలకు ఆ ఉద్యోగం ద్వారా వచ్చే వేతనమే ఆధారమైనా ప్రభుత్వ టీచర్‌ పోస్టు సాధిస్తే బతుకు సాఫీగా ఉంటుందని భావించి కోచింగ్‌ కోసం వాటిని వదిలేశారు. కుటుంబ పోషణకు, శిక్షణకు డబ్బులేకపోయినా అప్పులు చేసి మరీ శిక్షణ తీసుకున్నారు. అయినా ఇప్పటివరకు ఒక్క నోటిఫికేషన్‌ కూడా విడుదల కాలేదు. ప్రభుత్వం ఈ నాలుగేళ్ల కాలంలో రెండుసార్లు టెట్‌ను నిర్వహించింది. డీఎస్సీలో టెట్‌ మార్కులకు 20 శాతం వెయిటేజీ ఉండడంతో మెరిట్‌ జాబితాలో ముందుండవచ్చన్న ఆశతో మళ్లీ అందరూ వీటికి సన్నద్ధమవ్వాల్సి వచ్చింది. మళ్లీ అభ్యర్థులకు దరఖాస్తు ఫీజులు, పుస్తకాలు, కోచింగ్‌కు ఖర్చు తడిసిమోపిడైంది. డీఎస్సీ వేస్తామంటూ ప్రతిసారీ మంత్రి గంటా శ్రీనివాసరావు ప్రకటనలు చేస్తుండటంతో ఏ క్షణంలో అది వస్తుందో అని అభ్యర్థులు మళ్లీ శిక్షణ కోసం కోచింగ్‌ సెంటర్లలో చేరారు. నోటిఫికేషన్లు ఇవ్వకపోవడంతో కొన్ని నెలలు శిక్షణ పొంది మళ్లీ ఇళ్లకు చేరారు. మళ్లీ మంత్రి నుంచి ప్రకటనలు రావడంతో మళ్లీ కోచింగ్‌ సెంటర్లవైపు పరుగులు తీశారు. ఒక్కో దఫాకు రూ.50 వేల వరకు ఆయా కోచింగ్‌ సెంటర్లకు ఫీజుల కింద చెల్లించారు. డీఎస్సీ శిక్షణ కేంద్రాలు కృష్ణా జిల్లా అవనిగడ్డతోపాటు హైదరాబాద్, తదితర నగరాల్లో ఉన్నాయి. మూడు నెలల శిక్షణకు ఆయా కోచింగ్‌ సెంటర్లు ఒకొక్కరి నుంచి రూ.50 వేల నుంచి లక్ష వరకు వరకు వసూలు చేస్తున్నాయి. ఇది కాకుండా అదనంగా మెటీరియల్‌ కోసం మరో రూ.10 వేల వరకు ఖర్చు అవుతోంది. హాస్టల్‌లోనో, లేదంటే స్థానికంగా రూములు తీసుకొనో ఉండడానికి నెలకు కనీసంగా రూ.10 నుంచి రూ.15 వేల వరకు ఖర్చు అవుతోంది. మహిళలు అయితే మరిన్ని అవస్థలు ఎదుర్కొంటున్నారు. వివాహితలు పిల్లలను ఇళ్ల దగ్గర వదిలి రాలేక తమతో పాటే వారిని కోచింగ్‌ సెంటర్లున్న ప్రాంతాలకు తీసుకువెళ్లాల్సి వస్తోంది. తమకు తోడుగా ఇంట్లోని వారిని కూడా తీసుకొని వెళ్తూ అద్దె రూముల్లో ఉంటూ కోచింగ్‌ తీసుకుంటున్నారు. అవివాహితల పరిస్థితి కూడా ఇబ్బందిగానే ఉంటోంది. తోడుగా తోటి అభ్యర్థినులు లేకుంటే ఇంటిదగ్గర నుంచి కుటుంబ సభ్యులను తెచ్చుకుంటున్నారు. ఇలా అన్నిటికి కలిపి మూడు లేదా నాలుగు నెలలకు దాదాపు రూ.1.5 లక్షల నుంచి రూ.2 లక్షల వరకు ఖర్చవుతోంది.    పరీక్షల విధానం తెలీక అయోమయం  మరోపక్క ఈసారి డీఎస్సీని ఎలా నిర్వహిస్తారనే దానిపై ప్రభుత్వం నుంచి స్పష్టత లేదు. ఆన్‌లైన్‌లో ఉంటుందని ప్రచారం జరిగినా ఆన్‌లైన్‌లో అభ్యర్థులకు అనుభవం లేకపోవడంతో తాము నష్టపోతామని ఆందోళన చెందుతున్నారు. ముఖ్యంగా గ్రామీణ ప్రాంత అభ్యర్థులకు మరీ సంకటంగా మారుతుంది. ఇప్పటివరకు వీరంతా పుస్తకాల ఆధారంగా కోచింగ్‌లు తీసుకున్నారే తప్ప ఎవరూ కంప్యూటర్‌పై పరీక్షలకు శిక్షణ తీసుకోలేదు. మరోవైపు ఎస్‌జీటీ పోస్టులకు బీఈడీ అభ్యర్థులకు కూడా నేషనల్‌ కౌనిŠస్‌ల్‌ ఫర్‌ టీచర్‌ ఎడ్యుకేషన్‌ (ఎన్‌సీటీఈ) అర్హత కల్పించింది. దీంతో వీరికి టెట్‌ పేపర్‌–1ను పెట్టాల్సి ఉంది. ఎన్‌సీటీఈ ఉత్తర్వులు వచ్చి రెండునెలలైనా ప్రభుత్వం ఆ మేరకు చర్యలు చేపట్టలేదు. ఎన్‌సీటీఈ ఉత్తర్వుల ప్రకారం ఎస్జీటీ పోస్టులకు బీఈడీ అభ్యర్థులకు అర్హత కల్పిస్తూ మంగళవారం ప్రభుత్వం జీవో విడుదల చేసింది. టెట్‌ను వీరికి వేరేగా నిర్వహిస్తారా? లేక ఎస్జీటీ పోస్టుల వరకు టెట్‌ను, టీచర్‌ రిక్రూట్‌మెంట్‌ టెస్టును కలిపి నిర్వహిస్తారా? అనే దానిపై కూడా స్పష్టత లేదు. ఇలా డీఎస్సీ పోస్టుల ప్రక్రియ రాష్ట్రంలో అస్తవ్యస్తంగా మారింది.  ఏమి చేయాలో పాలుపోవడం లేదు  మాది శ్రీకాకుళం జిల్లా జిజివలస. నాకు పెళ్‌లైయి ఇద్దరు పిల్లలు. నా భార్య కూడా బీఈడీ పూర్తి చేసింది. మేమిద్దరం టెట్‌ పాసయ్యాం. రూ.10 వేలు చెల్లించి డీఎస్సీ కోచింగ్‌ తీసుకున్నా. తర్వాత మళ్లీ నోటిఫికేషన్‌ అని ప్రభుత్వం ప్రకటించడంతో విజయనగరంలో ప్రైవేటు కోచింగ్‌ సెంటర్‌లో రూ.13 వేలు వెచ్చించి శిక్షణ పొందాను. తాజాగా ఈ నెల 10న నోటిఫికేషన్‌ ఇస్తామని మంత్రి గంటా ప్రకటించడంతో మళ్లీ విశాఖలో డీఎస్సీ కోచింగ్‌కు నాలుగు రోజుల క్రితమే రూ.20 వేలు చెల్లించి శిక్షణకు చేరాను. మళ్లీ డీఎస్సీ నోటిఫికేషన్‌ వాయిదా వేస్తున్నట్టు ప్రకటించారు. ప్రతిసారి వేలకు వేలు చెల్లించి కోచింగ్‌లు తీసుకోవడంతో మా ఆర్ధిక పరిస్థితి క్షీణిస్తోంది. ఏమి చేయాలో పాలుపోవడంలేదు.   –సాదె కృష్ణారావు, ఎంఏ, బీఈడీ (10విఎస్‌సీ292బి–320046–సాదె కృష్ణారావు)   ఎన్నికల స్టంట్‌  ప్రభుత్వం డీఎస్సీ ప్రకటిస్తుందని ఆశపడి మా భార్యాభర్తలం అధిక వడ్డీకి అప్పులు చేసి మరీ కోచింగ్‌ తీసుకున్నాం. ఇప్పటి వరకూ ఇద్దరికీ కలిపి కోచింగ్‌కి రూ.2 లక్షలు, ఇంటి అద్దెలు, మెస్‌ ఛార్జీలు కలిపి సుమారు రూ.4 లక్షల వరకూ ఖర్చు అయింది. ఈ ప్రభుత్వ హయాంలో డీఎస్సీ చూస్తామన్న నమ్మకం కలుగడం లేదు. ఎన్నికల స్టంట్‌గా కనిపిస్తోంది.  –నేకూరి సతీష్, డీఎస్సీ అభ్యర్థి    ప్రభుత్వం తాత్సారం చేస్తోంది  డీఎస్సీ ప్రకటిస్తామన్న ప్రభుత్వం ఇప్పటి వరకూ అదిగో, ఇదిగో అంటూ తాత్సారం చేస్తూ వస్తోంది. ఇప్పుడు కూడా ఈరోజు, రేపు అంటూ చెబుతున్నారు తప్ప ప్రకటన మాత్రం వెలువడడం లేదు. ఒక వేళ డీఎస్సీ ప్రకటించినా ఎన్నికలలోపు పరీక్ష రాసినా ఉద్యోగాలు మాత్రం వచ్చే పరిస్థితి కనిపించడం లేదు.   –మేరుగు కిరణ్, డీఎస్సీ అభ్యర్థి  ఖర్చు భరించలేకున్నాం..  అవనిగడ్డలో గతేడాది కాలంగా కోచింగ్‌ తీసుకుంటున్నా. ప్రభుత్వం నోటిఫికేషన్‌ విడుదల చేయకపోవడంతో కోచింగ్‌ ఖర్చులు పెరిగిపోయాయి.. ఇంటికి వచ్చేయాలని నిర్ణయించుకున్నాను. కానీ పోటీలో ఎక్కడ వెనకపడిపోతామేమోనన్న భయంతో ఇంటికి వెళ్లలేక తీవ్ర ఇబ్బందులకు గురవుతున్నాను.  -ఎస్‌కే నాగూల్‌ మీరా, ఎస్‌జీటీ, గంపల గూడెం,కృష్ణా జిల్లా.  కోచింగ్‌కు వేల రూపాయల ఖర్చు  ఉద్యోగం సాధించాలనే ఆశతో సొంత ఊరుకు దూరంగా గుంటూరు జిల్లా చెరుకుపల్లి మండలం, గుళ్ళపల్లి వెళ్లి అక్కడ శిక్షణ పొందుతున్నా. ఎనిమిది నెలలుగా కోచింగ్‌ ఫీజు, హాస్టల్‌ వసతికి రూ.70 వేలు ఖర్చయింది. ప్రభుత్వం డీఎస్సీ నోటిఫికేషన్‌ను పదపదే వాయిదా వేస్తుండటంతో చాలా ఇబ్బందిగా ఉంది. కుటుంబానికి ఆర్థికంగా భారమైనప్పటికీ ఉద్యోగం వస్తుందనే ఆశతో అమ్మానాన్న ఫీజులు చెల్లించారు.   – పోతుల భ్రమరాంబ, గురజాల   ఎదురుచూసి అలసిపోయి..  డీఎస్సీ కోసం ఎదురు చూసి అలసిపోయా. ఎంతకూ డీఎస్సీ ప్రకటన రాకపోవడంతో ఎమ్మెస్సీ కూడా పూర్తి చేశా. అయినప్పటికీ ఆశ చావక నాలుగేళ్లున్నరేళ్లుగా ప్రిపరేషన్‌లోనే ఉన్నా. డీఎస్సీ నోటిఫికేషన్‌ రాకపోవడంతో కుటుంబ పోషణకు ఇబ్బందులు తలెత్తడంతో ట్యూషన్లు చెప్పుకుంటున్నా.   –దగ్గుమాటి శ్రీలత, కావలి   ఇప్పటికే లక్ష దాకా ఖర్చయింది   టెట్, డీఎస్సీ శిక్షణకు ఇప్పటికే ఒక లక్ష రూపాయిల దాకా ఖర్చయింది. మేము నలుగురు పిల్లలం. అయినా నాన్న డీఎస్సీ శిక్షణ ఇప్పించడానికి ఎంత ఖర్చైనా వెనకాడలేదు. వ్యవసాయ నేపథ్యం కలిగిన మధ్యతరగతి కుటుంబం అయినప్పటికీ శిక్షణకు పంపించారు.   – మమత, కొండపల్లి, కనగానిపల్లి మండలం, అనంతపురం జిల్లా    నెలకు రూ.3 వేల ఖర్చవుతోంది                             డీఎస్సీ కోసం ఆరు నెలలుగా కర్నూలులో అద్దె గదిలో ఉంటూ చదువుతున్నా. కోచింగ్‌ ఖర్చులు కాకుండా అద్దె, మెస్‌ చార్జీలతో కలిపి నెలకు రూ.3 వేలకు పైగా అవుతోంది. నోటిఫికేషన్‌ ఇస్తామని వాయిదా మీద వాయిదాలు వేస్తున్నారు. ఇలా వాయిదాలు వేస్తే ఆత్మస్థైర్యం కోల్పోయే అవకాశం ఉంది.     – నారాయణ, ఎస్‌జీటీ అభ్యర్థి, కర్నూలు జిల్లా  కాంట్రాక్టు ఉద్యోగాన్ని కూడా వదులుకుని....   నా పేరు శ్రీనివాసులు. మాది కడప. మా నాన్న 10 ఏళ్ల క్రితం అనారోగ్యంతో మృతి చెందారు. కుటుంబ భారం నామీదే ఉంది. నాకు వివాహమైంది. అమె కూడా ఓ ప్రైవేటు ఉద్యోగం చేస్తోంది. నేను రాయచోటి మున్సిపాలిటిలో కాంట్రాక్టు పద్ధతిన బిల్‌ కలెక్టర్‌గా పనిచేస్తూ ఉండేవాడిని. నెలకు రూ. 15 వేలు జీతం వచ్చేది. డీఎస్సీ కోసమని సెలవుపెట్టాను. దీంతో డిసెంబర్‌ నుంచి ఇప్పటి వరకు ఒకటినర్న లక్ష జీతం పోవడంతోపాటు.. డీఎస్సీ కోసం 10 వేలకు పైగా ఖర్చు అయింది. ప్రస్తుతం నా భార్యకు వచ్చే జీతంతో కుటుంబం నడిస్తోంది. – శ్రీనివాసులు, కడప.     డీఎస్సీపై ఎన్నో ఆశలు పెంచుకున్నాం. పోస్టులు పెంచకుంటే అన్యాయానికి గురవుతాం. ఉద్యోగాలు కూడా వదులుకుని కోచింగ్‌లు పెట్టుకున్న ఈ తరుణంలో పోస్టులు కుదిస్తే మా పరిస్థితి అగమ్యగోచరమవుతుంది.   – కేతా సత్యనారాయణ (కొండ), డీఎడ్‌ అభ్యర్ధి, రాయవరం, తూర్పుగోదావరి జిల్లా.     ఏమి చేయాలో పాలు పోవడం లేదు  డీఎడ్‌ శిక్షణ పొంది రెండేళ్లుగా డీఎస్సీ కోసం ఎదురుచూస్తున్నాను. అప్పు చేసి ఆర్నెళ్ల పాటు కోచింగ్‌ తీసుకున్నాను. నోటిఫికేషన్‌ పడకపోవడంతో తిరిగి ప్రైవేటు టీచర్‌గా పనిచేస్తున్నాను.    – అల్లాడ సాయికుమార్, డీఎడ్‌ అభ్యర్థి, సోమేశ్వరం, రాయవరం మండలం, తూర్పు గోదావరి జిల్లా.   పాఠాలు చెప్పాల్సింది పోయి.. పనులకు  నేను 2017లో టీటీసీ పూర్తి చేశాను. డీఎస్సీ రాసేందుకు శిక్షణ కోసం జిల్లా కేంద్రం ఒంగోలు వచ్చాను. కోచింగ్‌ ఫీజు, పుస్తకాలు, రూమ్‌ అద్దె, భోజనం కలుపుకుంటే దాదాపు లక్ష రూపాయల ఖర్చు అయింది. పాఠాలు చెప్పాల్సిన నేను ఊళ్లో పనులకు వెళ్లాల్సివస్తోంది.  – వడ్లమూడి అనిల్‌కుమార్, జె.పంగులూరు, ప్రకాశం జిల్లా  అన్యాయం చేస్తే ఊరుకోం   ప్రభుత్వం మొదట్లో ఇచ్చిన మాటప్రకారం ఉన్న ఖాళీలన్నీ భర్తీ చేయాల్సిందే. ఇచ్చిన మాటను నెరవేర్చకపోతే ఊరుకునేది లేదు. నిరుద్యోగులంతా ఏకమై రాష్ట్రవ్యాప్తంగా ఆందోళనలు చేపడుతాం. అప్పులు చేసి కోచింగ్‌ తీసుకుంటున్న మాకు ప్రభుత్వం అన్యాయం చేస్తే టీడీపీకి తగిన శాస్తి చెబుతాం.                  – వైభవి, చిత్తూరు    అప్పలు చేసి కోచింగ్‌లు తీసుకుంటున్నాం   డీఎస్సీ కోసం అప్పులు చేసి మరీ కోచింగ్‌లు తీసుకుంటున్నాం. డీఎస్సీ నోటిఫికేషన్‌పై ప్రభుత్వం ఆశలు రేపడంతో ఎంతో కష్టపడి చదివాం. ఇప్పుడు వాయిదా వేస్తున్నట్టు సమాచారం రావడంతో మా ఆశలన్నీ అడియాసలే అయ్యాయి. వేలాది రూపాయలు అప్పులు చేసి తీసుకున్న కోచింగ్‌లు వృథా అయిపోయాయి. ఆర్థికంగా నష్టపోయాం.  – పి.శివకుమార్, ఎన్‌ఎన్‌ కాలనీ, కొత్తూరు, శ్రీకాకుళం జిల్లా 

సాక్షి, అమరావతి : ఏపీ రాజధాని అమరావతిలో జరిగిన మంత్రివర్గ సమావేశం గురువారం సాయంత్రం ముగిసింది. సీఎం చంద్రబాబునాయుడు అధ్యక్షతన ఈ భేటీలో మంత్రివర్గం పలు అంశాలపై చర్చించింది. గతంలో ప్రకటించిన పదివేల టీచర్‌ పోస్టులు, కొత్తగా 20వేల ప్రభుత్వ ఉద్యోగాలు భర్తీ చేయాలని నిర్ణయించారు. నిరుద్యోగ భృతిపై అమలుపై మరోసారి నిర్ణయం తీసుకున్నారు. మావోయిస్టులపై మరో ఏడాది నిషేధం విధించాలని తీర్మానించారు. ఈ మంత్రివర్గ సమావేశంలో ఏపీ ఎలక్ట్రానిక్స్‌ బిల్లులో కొన్ని మార్పులు చేయాలని సూచించారు.

సాక్షి, అమరావతి: ఆంధ్రప్రదేశ్‌లో ప్రభుత్వ పాఠశాలల్లో ఉపాధ్యాయ పోస్టుల భర్తీ కోసం ఎదురు చూస్తున్న అభ్యర్థులకు చేదు వార్త. డీఎస్సీ నోటిఫికేషన్‌ విడుదల వాయిదా పడింది. ఈ విషయాన్ని మానవ వనరుల అభివృద్ధి శాఖ మంత్రి గంటా శ్రీనివాసరావు స్వయంగా ప్రకటించారు. 10వ తరగతి సప్లిమెంటరీ ఫలితాలను శుక్రవారం ఆయన విడుదల చేశారు. ఈ సందర్భంగా మాట్లాడుతూ.. డీఎస్సీ నోటిఫికేషన్ వాయిదా వేస్తున్నట్టు చెప్పారు. ‘ఆర్థిక శాఖ నుంచి అనుమతులు రానునందున ఈ నిర్ణయం తీసుకున్నామని తెలిపారు. ‘ఆర్థిక శాఖ కొన్ని కొర్రీలు పెట్టింది. మరిన్ని వివరాలు కావాలని అడిగింది. వాటికి సమాధానం ఇచ్చాం. త్వరలో అనుమతి రావొచ్చు. బీఎడ్‌ అభ్యర్థులకు ఎస్జీటీ పోస్టుల్లో కూడా ప్రాధాన్యం కల్పిస్తూ ఎన్‌సీటీఈ విడుదల చేసిన గెజిట్‌పై కూడా చర్చిస్తున్నాం. టెట్‌ కమ్‌ టీఆర్‌టీ నిర్వహించేందుకు అన్ని అవకాశాలను పరిశీలిస్తున్నామ’ని మంత్రి గంటా శ్రీనివాసరావు వివరించారు. భయపడినట్టుగానే.. ముందునుంచి అనుకుంటున్నట్టుగానే ఆంధ్రప్రదేశ్ డీఎస్సీ నోటిఫికేషన్‌ మరోసారి వాయిదా పడింది. జులై 6న 10,351 టీచర్‌ పోస్టులతో డీఎస్సీ నోటిఫికేషన్‌ విడుదల చేస్తామని అంతకుముందు మంత్రి గంటా శ్రీనివాసరావు ప్రకటించారు. టీచర్‌ పోస్టులు భర్తీ చేసేందుకుగాను పాఠశాల విద్యాశాఖ నుంచి పంపిన ప్రతిపాదనలకు ఆర్థికశాఖ ఆమోదముద్ర వేయకపోవడంతో నోటిఫికేషన్‌ వాయిదా వేయాల్సి వచ్చింది. అభ్యర్థుల ఆవేదన ప్రభుత్వ నిర్లక్ష్యం కారణంగానే డీఎస్సీ నోటిఫికేషన్‌ వాయిదా పడిందని అభ్యర్థులు మండిపడుతున్నారు. తమ జీవితాలతో పాలకులు ఆటలు ఆడుతున్నారని ఆవేదన వ్యక్తం చేస్తున్నారు. రూ.లక్షలు వెచ్చించి కోచింగ్‌ తీసుకుంటున్నామని, నోటిఫికేషన్‌ విడుదల చేయకుండా తమను ఇబ్బంది పెట్టడం భావ్యం కాదని వాపోతున్నారు. ప్రభుత్వం తక్షణమే స్పందించి డీఎస్సీ నోటిఫికేషన్‌ విడుదల చేయాలని డిమాండ్‌ చేస్తున్నారు.

హైదరాబాద్‌ : టీచర్ల బదిలీల షెడ్యూల్‌ ఖరారైంది. ఈ నెల 4,5 తేదీల్లో టీచర్ల ఖాళీల ప్రకటన వెలువడనుంది. జూన్‌ 5న ప్రభుత్వం, టీచర్ల నుంచి అభ్యంతరాలు స్వీకరించనుంది. జూన్‌ 6 నుంచి 10 వరకు దరఖాస్తు స్వీకరణ జరుగుతుంది. జూన్‌ 20 కల్లా టీచర్ల బదిలీల ప్రక్రియ పూర్తి అవుతుందని ప్రభుత్వం తెలిపింది. అలాగే ఆగస్టులో అంతర్‌ జిల్లా బదిలీలు ఉంటాయని పేర్కొంది.

సాక్షి, హైదరాబాద్‌ : రాష్ట్రంలో పాత పది జిల్లాల ప్రకారం ఉపాధ్యాయ పోస్టుల భర్తీకి కసరత్తు మొదలైంది. కొత్తగా ఏర్పాటు చేసిన 31 జిల్లాల వారీగా కాకుండా పాత పది జిల్లాల వారీగా పోస్టులను భర్తీ చేసేందుకు సోమవారం రాత్రే ప్రభుత్వం గ్రీన్‌ సిగ్నల్‌ ఇచ్చింది. ఈ మేరకు విద్యా శాఖ ప్రత్యేక ప్రధాన కార్యదర్శి రంజీవ్‌ ఆర్‌ ఆచార్య.. టీఎస్‌పీఎస్సీ కార్యదర్శికి లేఖ (లెటర్‌ నంబర్‌ 7126/ఎస్‌ఈ జనరల్‌1/ఎ12015, డేట్‌ 4–12–2017) రాశారు. అలాగే మెమో కూడా జారీ చేశారు. హైకోర్టు ఆదేశాల నేపథ్యంలో పాత 10 జిల్లాల ప్రకారమే పోస్టులను భర్తీ చేయాలని నిర్ణయించినట్లు అందులో పేర్కొన్నారు. అక్టోబర్‌ 21వ తేదీన జారీ చేసిన నోటిఫికేషన్‌కు సవరణ చేయాలని సూచించారు. అభ్యర్థులు ఈనెల 15వ తేదీ వరకు దరఖాస్తు చేసుకునేందుకు అనుమతి ఇచ్చినట్లు వెల్లడించారు. ఇప్పటివరకు దరఖాస్తు చేసుకోని వారు 15వ తేదీలోగా దరఖాస్తు చేసుకునేలా చర్యలు చేపట్టాలని సూచించారు. ఇప్పటికే దరఖాస్తు చేసిన వారు మళ్లీ దరఖాస్తు చేసుకోవాల్సిన అవసరం లేదని పేర్కొన్నారు. సెకండరీ గ్రేడ్‌ టీచర్‌ (ఎస్‌జీటీ) పోస్టుల భర్తీకి రాత పరీక్షలను 2018 ఫిబ్రవరిలో నిర్వహించాలని గతంలో నిర్ణయించిన విధంగానే ముందుకు సాగాలని తెలిపారు. పాఠశాల విద్యా శాఖ పాత పది జిల్లాల ప్రకారం పోస్టుల వివరాలను, జిల్లాల వారీగా, పోస్టుల వారీగా రోస్టర్‌ కమ్‌ రిజర్వేషన్‌ వివరాలను విద్యా శాఖ.. టీఎస్‌పీఎస్సీకి అందజేయాలని సూచించారు. అందుకు అనుగుణంగా పాఠశాల విద్యా శాఖ.. పోస్టుల వారీగా వివరాలతోపాటు రోస్టర్‌ కమ్‌ రిజర్వేషన్‌ వివరాలను సోమవారం రాత్రి టీఎస్‌పీఎస్సీకి అందజేసింది. దీంతో తదుపరి కార్యాచరణపై టీఎస్‌పీఎస్సీ కసరత్తు ప్రారంభించింది. విద్యా శాఖ అధికారులతోపాటు టీఎస్‌పీఎస్సీ అధికారులు పది జిల్లాల వారీగా పోస్టులు, రోస్టర్‌ కమ్‌ రిజర్వేషన్‌ వివరాలపై పరిశీలనను మంగళవారం ప్రారంభించారు. ప్రస్తుతం ఈ ప్రక్రియ టీఎస్‌పీఎస్సీ కార్యాలయంలో కొనసాగుతోంది. రెండు మూడు రోజుల్లో ఈ ప్రక్రియ పూర్తయ్యాక సవరణ నోటిఫికేషన్‌ను జారీ చేసే అవకాశం ఉంది. అపాయింటింగ్‌ అథారిటీపై సమాలోచనలు ఉపాధ్యాయ పోస్టులు జిల్లా కేడర్‌వి కావడంతో సంబంధిత జిల్లా అధికారి అయిన డీఈవోనే సాధారణంగా అపాయింటింగ్‌ అథారిటీగా వ్యవహరిస్తారు. 31 జిల్లాల ప్రకారం భర్తీ చేస్తే ఆ విధానమే అమలు చేయాలని ముందుగా నిర్ణయించారు. తాజాగా పాత జిల్లాల ప్రకారం పోస్టుల భర్తీకి ప్రభుత్వం చర్యలు చేపట్టిన నేపథ్యంలో భర్తీ అయ్యే టీచర్ల అపాయింటింగ్‌ అథారిటీ ఎవరనే దానిపై అధికారులు ఆలోచిస్తున్నారు. ఇందులో పెద్దగా ఆలోచించడానికి ఏమీ లేదని, పాత జిల్లాల ప్రకారం పోస్టులను భర్తీ చేస్తున్నందున పాత జిల్లాల డీఈవోలే అపాయింటింగ్‌ అథారిటీగా వ్యవహరిస్తారని న్యాయ శాఖ వర్గాలు పేర్కొంటున్నాయి. మరోవైపు ఈ విషయంలో విద్యా శాఖ జాగ్రత్తగా ముందుకు సాగుతోంది. ఇప్పుడే నియామకాలకు సంబంధించిన అంశంపై వివాదం ఎందుకన్న ధోరణితో ముందుకు వెళ్తోంది. పరీక్షలు పూర్తయి, నియామకాలు చేపట్టే నాటికి దానిపై ప్రభుత్వంతో సంప్రదింపులు జరిపి తుది నిర్ణయం ప్రకటించవచ్చని భావిస్తోంది. మార్పుల కోసం ఎడిట్‌ ఆప్షన్‌! ఇప్పటికే దరఖాస్తు చేసుకున్న అభ్యర్థులు కొత్త జిల్లాల ప్రకారం దరఖాస్తు చేసుకుని ఉన్నందున.. వారు పాత జిల్లాల ప్రకారం మార్పు చేసుకునేలా దరఖాస్తుల్లో ఎడిట్‌ ఆప్షన్‌ ఇవ్వాల్సి ఉంటుందని విద్యా శాఖ వర్గాలు భావిస్తున్నాయి. అయితే అభ్యర్థులు చేసుకున్న దరఖాస్తుల్లో నాలుగో తరగతి నుంచి పదో తరగతి వరకు చదివిన స్కూల్, ప్రాంతం, జిల్లా పేరు ఉంటుంది కనుక.. అవి ఏ జిల్లా పరిధిలోకి (పాత జిల్లాల్లో) వస్తే ఆ జిల్లాకు స్థానికునిగా పరిగణనలోకి తీసుకుంటే సరిపోతుందని కొందరు అధికారులు భావిస్తున్నారు. దీనిపైనా రెండు మూడు రోజుల్లో టీఎస్‌పీఎస్సీ నుంచి స్పష్టత రానుంది.

సాక్షి, న్యూఢిల్లీ: వచ్చే విద్యా సంవత్సరం లోపు ఉపాధ్యాయ పోస్టులను భర్తీ చేస్తామని సుప్రీంకోర్టుకు ఆంధ్రప్రదేశ్‌ ప్రభుత్వం తెలిపింది. ఏపీలో టీచర్ల పోస్టుల భర్తీపై శుక్రవారం సుప్రీంకోర్టులో విచారణ జరిగింది. ఉద్యోగాల భర్తీకి సంబంధించి ఇప్పటివరకు ఏపీ ప్రభుత్వం రెండుసార్లు అఫిడవిట్‌ దాఖలు చేసింది. 4,600 ఖాళీలు ఉన్నాయని ఒకసారి పేర్కొంది. పోస్టుల కంటే ఉపాధ్యాయులు ఎక్కువ మంది ఉన్నారని మరోసారి తెలిపింది. ఈ నేపథ్యంలో ఎన్ని ఖాళీలు ఉన్నాయో తెలుసుకునేందుకు గతంలో త్రిసభ్య కమిటీని సర్వోన్నత న్యాయస్థానం ఏర్పాటు చేసింది. మొత్తం 9,265 ఉపాధ్యాయ ఖాళీలు ఉన్నాయని కమిటీ తేల్చడంతో ఉద్యోగాలు భర్తీ చేస్తామని ఏపీ ప్రభుత్వం తాజాగా సుప్రీంకోర్టుకు తెలిపింది. దీంతో తదుపరి విచారణను జనవరి మూడో వారానికి న్యాయస్థానం వాయిదా వేసింది.

సాక్షి, హైదరాబాద్‌: హైకోర్టు తీర్పు ప్రకారమే పాత 10 జిల్లాలతో టీచర్‌ పోస్టులను భర్తీ చేయాలని, 8,792 నుంచి 40 వేల పోస్టులకు నోటిఫికేషన్‌ జారీ చేయాలని జాతీయ బీసీ సంక్షేమ సంఘం నేత, టీటీడీపీ ఎమ్మెల్యే ఆర్‌.కృష్ణయ్య డిమాండ్‌ చేశారు. 2014లో మంత్రి ఈటల రాజేందర్‌ అసెంబ్లీలో మాట్లాడుతూ 25,600 టీచర్‌ పోస్టుల ఖాళీలున్నాయని వెల్లడించారని, ఇప్పుడు తగ్గించి 8,972 పోస్టులకు నోటిఫికేషన్‌ జారీ చేయడం అన్యాయమన్నారు. గురువారం బీసీ భవన్‌లో జరిగిన సమావేశంలో ఆయన మాట్లాడుతూ.. టీచర్‌ పోస్టుల ఖాళీల విషయంలో ప్రభుత్వం తప్పుడు లెక్కలతో విద్యాశాఖకు అన్యాయం చేస్తోందని ఆరోపించారు. ఏటేటా రిటైర్మెంట్‌ పొందిన వారితో ఏర్పడ్డ ఖాళీలతో పోస్టులు పెరగాలి కానీ తగ్గటమేంటని ప్రశ్నించారు. రాష్ట్రంలోని నిరుద్యోగ యువత ఏకమై ఉద్యమాలు చేసి ప్రభుత్వం మెడలు వంచి ఉద్యోగాలు భర్తీ చేయించాలని పిలుపునిచ్చారు. ఈ సమావేశంలో బీసీ సంఘం నేతలు గుజ్జకృష్ణ, నందగోపాల్, వివిధ నిరుద్యోగ సంఘాల ప్రతినిధులు పాల్గొన్నారు.

సాక్షి, హైదరాబాద్‌ ఉపాధ్యాయ పోస్టులకు ఆన్‌లైన్‌ దరఖాస్తు గడువును డిసెంబర్‌ 15 వరకు పొడిగించినట్లు టీఎస్‌పీఎస్సీ ఒక ప్రకటనలో తెలిపింది. వివిధ కేటగిరీలకు చెందిన 8,792 పోస్టుల కోసం అభ్యర్థులు మరో 15 రోజుల పాటు దరఖాస్తు చేసుకోవచ్చని పేర్కొంది. వాస్తవానికి అక్టోబర్‌ 30న ప్రారంభమైన దరఖాస్తుల గడువు గురువారంతో ముగిసింది. అయితే 31 జిల్లాల ప్రకారం కాకుండా 10 జిల్లాల ప్రకారమే పోస్టులను భర్తీ చేయాలని హైకోర్టు ఆదేశించిన విషయం తెలిసిందే. అందుకు అనుగుణంగా 10 జిల్లాల ప్రకారం పోస్టుల భర్తీకి ఆమోదం తెలుపుతూ ప్రభుత్వం ఉత్తర్వులు జారీ చేయాల్సి ఉంది. మరోవైపు విద్యాశాఖ కూడా 31 జిల్లాల ప్రకారం ఇచ్చిన 8,792 పోస్టులను, వాటి రోస్టర్‌ పాయింట్లను 10 జిల్లాల ప్రకారం ఇవ్వాల్సి ఉంది. ఇందుకు కొంత సమయం పట్టనుంది. మరోవైపు 31 జిల్లాల వారీగా ఇచ్చిన నోటిఫికేషన్‌ కిందే అభ్యర్థులు దరఖాస్తు చేసుకుంటున్నారు. ఈ క్రమంలో దరఖాస్తుల గడువును అందుకు అనుగుణంగానే టీఎస్‌పీఎస్సీ పొడిగించింది. హైకోర్టు తీర్పు నేపథ్యంలో అభ్యర్థుల స్థానికతను పాత జిల్లాల ప్రకారమే చూడాల్సి ఉంది. అయితే ఇందుకు ఎడిట్‌ ఆప్షన్‌ను ఇవ్వాల్సి ఉంది. అందుకు ప్రభుత్వం నుంచి పది జిల్లాల ప్రకారం పోస్టుల భర్తీకి ఆమోదం, ఉత్తర్వులు వచ్చాకే పది జిల్లాల స్థానికతను ఎంచుకునేందుకు ఎడిట్‌ ఆప్షన్‌ ఇచ్చే అవకాశం ఉంది.

టెట్‌లో అర్హత సాధించిన బీఈడీ, డీఈడీ మహిళా అభ్యర్థులకు టీఆర్‌టీ రూపంలో అదృష్టం వేచిచూస్తోంది. టీచర్‌ పోస్టుల భర్తీకి రాష్ట్ర ప్రభుత్వం పచ్చ జెండా ఊపడం.. ఇందులో 33 శాతం రిజర్వేషన్‌ కల్పించడం మహిళలకు వరంగా మారింది. దీనికి తోడు జనరల్‌ కోటాలో వీరు పోటీ పడనుండడంతో వీరికి మరిన్ని సీట్లు పెరిగే ఆస్కారం ఉంది. జిల్లాలో మొత్తం 820 పోస్టులకు గాను సుమారు 270 పోస్టులు మహిళలకు రిజర్వు కానున్నాయి. ఉద్యోగంపై నమ్మకం ఏర్పడింది టీఆర్టీలో మహిళల కోటా ఎక్కువగా ఉండటంతో ఈ సారి ఉద్యోగం సాధిస్తాననే నమ్మకం ఏర్పడింది. ఇది ఎంతో సంతోషించదగ్గ విషయం. డీఎస్సీ కోసం ఎంతోకాలంగా ఎదురుచూస్తున్న మహిళలకు ఇది సదావకాశం. కోటాను సద్వినియోగం చేసుకుని విజయం సాధించాలి. – మాధవి, వికారాబాద్‌ సాక్షి, వికారాబాద్‌: ఉపాధ్యాయ శిక్షణ పొందిన మహిళా అభ్యర్థులు ఉద్యోగం పొందడానికి మంచి అవకాశం లభించింది. టీచర్‌ పోస్టుల భర్తీకిగాను సుప్రీంకోర్టు ఆదేశాలకనుగుణంగా తెలంగాణ రాష్ట్ర ప్రభుత్వం గ్రీన్‌ సిగ్నల్‌ ఇచ్చింది. గతంలో మాదిరిగా జిల్లా సెలక్షన్‌ కమిటీ (డీఎస్సీ) ఆధ్వర్యంలో కాకుండా పోస్టుల భర్తీని తెలంగాణ పబ్లిక్‌ సర్వీస్‌ కమిషన్‌కు అప్పగించింది. డీఎస్సీ బదులు టీఆర్‌టీ (టీచర్‌ రిక్రూట్‌మెంట్‌ టెస్ట్‌) పేరుతో పోటీ పరీక్ష నిర్వహించనున్నారు. ఇటీవల ప్రకటించిన విధంగా జిల్లాలో 820 పోస్టులు ఉన్నట్లు లెక్కతేల్చారు. వీటిలో 33 శాతం మంది మహిళా అభ్యర్థులకు రిజర్వేషన్‌ కల్పించారు. దీంతో సుమారు వీరికి 270 పోస్టులు ప్రత్యేకంగా దక్కనున్నాయి. తమకు కేటాయించిన పోస్టులతో పాటుగా జనరల్‌ కేటగిరీలోనూ మహిళలు ఉద్యోగాలు పొందే అవకాశాలు మెండుగా ఉన్నాయి. రోస్టర్‌ పాయింట్ల ఆధారంగా మహిళలకు ఎక్కువ శాతం పోస్టులను కేటాయించారు. దీంతో జిల్లాలో ఎక్కువ మంది పంతులమ్మలు దర్శనమివ్వనున్నారు. మహిళలు చదువుకుంటే భవిష్యత్‌లో పుష్కలమైన అవకాశాలు ఉన్నాయనడానికి ఈ ఖాళీలే నిదర్శనమని విద్యావంతులు అభిప్రాయపడుతున్నారు. టెట్‌లో మహిళల ఉత్తీర్ణతే అధికం.. టెట్‌ (టీచర్స్‌ ఎలిజిబిలిటీ టెస్ట్‌)లో అర్హత సాధించిన వారిలో పురుషులకంటే మహిళలే అధికంగా ఉన్నారు. జిల్లాలో టెట్‌లో అర్హత సాధించిన అభ్యర్థులు సుమారుగా 3,500 వరకు ఉండవచ్చని అంచనా. గత ఆగస్టులో నిర్వహించిన టెట్‌లో అన్ని విభాగాల్లో కలిపి 2,468 మంది అర్హత సాధించారు. పేపర్‌ – 1లో 1,683 మంది అభ్యర్థులు పాస్‌కాగా, పేపర్‌– 2లో సోషల్‌ స్టడీస్‌లో 490 మంది అభ్యర్థులు, గణితం మరియు సైన్స్‌ విభాగాల్లో 295 మంది విద్యార్థులు ఉత్తీర్ణత సాధించారు. దీంతో టెట్‌లో అర్హత సాధించిన అభ్యర్థుల్లో పురుషులకంటే మహిళలే అధికంగా ఉన్నారు. ఉపాధ్యాయ నియామక పరీక్షల్లో కూడా రిజర్వేషన్, జనరల్‌ కేటగిరీల్లో కలిపి పురుషులకంటే ఎక్కువ మంది మహిళలే ఉద్యోగాలను కైవసం చేసుకునే అవకాశముంది.  మంచి అవకాశం.. ఐదేళ్ల తర్వాత చేపడుతున్న ఉపాధ్యాయ పోస్టుల నియామకాల్లో మహిళలకు మంచి అవకాశాలున్నాయి. ఎస్‌జీటీ తెలుగు మీడియం పోస్టులు 528 ఉండగా, వాటిలో 346 జనరల్‌ కేటగిరీకి కేటాయించారు. వీటిలో 182 పోస్టులు మహిళలకు రిజర్వుచేశారు. ఎస్‌ఏ (స్కూల్‌ అసిస్టెంట్‌) పోస్టులు జిల్లాలో 135 ఉండగా, వీటిలో జనరల్‌ కేటగిరీకి 63 పోస్టులను రిజర్వు చేశారు. మహిళలకు 72 పోస్టులను కేటాయించారు. దీంతో ఎస్‌ఏ పోస్టుల్లో జనరల్‌ పోస్టులకంటే మహిళలకే 9 పోస్టులను అధికంగా రిజర్వ్‌ చేశారు. భాషా పండితుల పోస్టుల విషయానికొస్తే తెలుగు పండిత్‌ విభాగానికి సంబంధించి 54 ఖాళీలు ఉండగా, వీటిలో 32 జనరల్‌ కేటగిరీకి కేటాయించగా, మహిళలకు 24 పోస్టులను రిజర్వు చేశారు. ఉర్దూ మీడియంలో 30 పోస్టులు ఉండగా, వీటిలో 14 పోస్టులను మహిళలకు కేటాయించారు. ఆంగ్ల మాధ్యమంలో 35 పోస్టులు ఉండగా, జనరల్‌ కేటగిరీకి 19 పోస్టులు, మహిళలకు 16 ఖాళీలను రిజర్వు చేశారు. హిందీ పండిత్‌ ఖాళీలు జిల్లాలో 29 ఉండగా, వీటిలో జనరల్‌ కేటగిరీకి 32 పోస్టులు, మహిళలకు 22 పోస్టులను కేటాయించారు. పీఈటీ పోస్టులు జిల్లాలో మొత్తం 6 ఉండగా, జనరల్‌ కేటగిరీకిలో 2 పోస్టులు, మహిళలకు 4 పోస్టులను రిజర్వు చేశారు. పీఈటీలలో పురుషుల కంటే రెండు పోస్టులు మహిళలకే ఎక్కువగా కేటాయించడం విశేషం.

సాక్షి, హైదరాబాద్‌: గురుకులాల్లో ప్రస్తుతం భర్తీ చేసే ఉపాధ్యాయ పోస్టులే కాకుండా మరో ఎనిమిది వేల పోస్టుల భర్తీకి వచ్చే ఏడాది నోటిఫికేషన్‌ ఇస్తామని ఉప ముఖ్యమంత్రి కడియం శ్రీహరి తెలిపారు. శాసనసభలో గురువారం ప్రశ్నోత్తరాలలో విద్యా శాఖపై ఆయన వివరణ ఇస్తూ.. రాష్ట్రంలో మొత్తం 1,22,955 ఉపాధ్యాయ పోస్టులు ఉండగా వాటిలో 1,09,256 పోస్టుల్లో ఉపాధ్యాయులు పనిచేస్తున్నారని, 13,699 పోస్టులు ఖాళీగా ఉన్నాయని వెల్లడించారు. పదోన్నతితో భర్తీ చేసే పోస్టులను మినహాయించి 8,792 పోస్టులను భర్తీ చేసేందుకు నోటిఫికేషన్‌ ఇచ్చామన్నారు. ప్రభుత్వం ఇచ్చిన నోటిఫికేషన్‌కు హైకోర్టు ఆమోదం తెలిపిందన్నారు. ఈ నోటిఫికేషన్‌ను ఎందుకు ఆపలేకపోయామని కాంగ్రెస్‌ మధన పడుతోందన్నారు. ప్రభుత్వం కొత్తగా 544 గురుకులాలు ప్రారంభించిందని, పాఠశాలల్లో అధిక ఫీజుల నియంత్రణ కోసం ప్రొఫెసర్‌ తిరుపతిరావు అధ్యక్షతన కమిటీ వేశామన్నారు. ఈ నెలాఖరులో కమిటీ ఇచ్చే నివేదికను బట్టి ప్రభుత్వం చర్యలు తీసుకుంటుందని తెలియజేశారు.   బయ్యారంలో పరిశ్రమపై చిత్తశుద్ధితో ఉన్నాం: కేటీఆర్‌   బయ్యారంలో ఉక్కు పరిశ్రమను ఏర్పాటు చేసేందుకు అన్ని రకాలుగా చర్యలు తీసుకుంటున్నామని  మంత్రి కేటీఆర్‌ తెలిపారు.  ‘ఆంధ్రప్రదేశ్‌ రాష్ట్ర పునర్విభజన చట్టం ప్రకారం బయ్యారంలో ఉక్కు పరిశ్రమ ఏర్పాటు చేయాల్సి ఉంది. ఉక్కు పరిశ్రమ ఏర్పాటుకు అదే ప్రాంతంలో ఖనిజ నిల్వలు ఉండాలనే నిబంధన ఏమీ లేదు. విశాఖపట్టణం సమీపంలో ఎక్కడా ఇనుప ఖనిజం లేదు. అయినా అప్పటి పరిస్థితుల్లో అక్కడ ఏర్పాటు చేశారు.  2018 మార్చిలోపు నివేదిక వస్తుంది. దీన్ని సభ ముందు పెడతాం. బయ్యారంలో భారత ప్రభుత్వరంగ సంస్థ సెయిల్‌ ఆధ్వర్యంలోనే ఉక్కు పరిశ్రమ ఏర్పాటు చేస్తుందన్నారు.

సాక్షి, హైదరాబాద్‌: ఉపాధ్యాయ నియామకాలకు సంబంధించి రాష్ట్ర ప్రభుత్వం ఇటీవల జారీ చేసిన రూల్స్‌ను.. అలాగే 8,700లకు పైగా ఉపాధ్యాయ పోస్టుల భర్తీ నిమిత్తం జారీ చేసిన పలు నోటిఫికేషన్లను సవాలు చేస్తూ దాఖలైన పిటిషన్‌ను ఉమ్మడి హైకోర్టు గురువారం కొట్టేసింది. అధికరణ 371డీ, రాష్ట్రపతి ఉత్తర్వులకు విరుద్ధంగా ప్రభుత్వం ఉపాధ్యాయుల నియామక రూల్స్‌ను జారీ చేసిందన్న పిటిషనర్ల వాదనను హైకోర్టు తోసిపుచ్చింది. ఉపాధ్యాయ పోస్టులు జిల్లా క్యాడర్‌ పోస్టులని, వాటికి రాష్ట్రపతి ఉత్తర్వులు వర్తించవన్న అడ్వొకేట్‌ జనరల్‌ (ఏజీ) దేశాయ్‌ ప్రకాశ్‌రెడ్డి వాదనలను పరిగణనలోకి తీసుకుంది. పిటిషనర్ల వాదనలతో ఏకీభవించడం లేదంటూ వారి పిటిషన్‌ను కొట్టివేస్తూ న్యాయమూర్తి జస్టిస్‌ ఎ.రామలింగేశ్వరరావు ఉత్తర్వులు జారీ చేశారు. ఉపాధ్యాయ పోస్టుల భర్తీకి సంబంధించి ప్రభుత్వం గత నెలలో జారీ చేసిన రూల్స్, నోటిఫికేషన్లను రాజ్యాంగ విరుద్ధంగా ప్రకటించి వాటిని రద్దు చేయాలని కోరుతూ వివిధ జిల్లాలకు చెందిన కె.బాలకృష్ణ, కె.భాను, ఆర్‌.రాంమోహన్‌రెడ్డిలు పిటిషన్‌ దాఖలు చేశారు. దీనిపై హైకోర్టు విచారణ చేపట్టగా.. పిటిషనర్ల తరఫున న్యాయవాది సరసాని సత్యంరెడ్డి వాదనలు వినిపించారు. రాష్ట్రపతి ఉత్తర్వుల ప్రకారం పది జిల్లాలను పరిగణనలోకి తీసుకుని ఒక్కో జిల్లాను ఓ యూనిట్‌గా నియామకాలు చేపట్టాల్సి ఉండగా, ప్రభుత్వం అందుకు విరుద్ధంగా వ్యవహరిస్తోందని వాదించారు. 31 జిల్లాలను యూనిట్‌గా తీసుకోనున్నట్లు ఆ రూల్స్‌లో పేర్కొన్నారని, ఇది రాజ్యాంగ విరుద్ధమన్నారు. 31 జిల్లాల ఏర్పాటునకు రాష్ట్రపతి ఆమోదం లేదని.. కేవలం 10 జిల్లాలకే గుర్తింపు ఉందని వివరించారు. ఈ ఉత్తర్వులకు విరుద్ధంగా రూల్స్‌ను తయారు చేసే అధికారం ప్రభుత్వానికి లేదని కోర్టు దృష్టికి తీసుకొచ్చారు. కొత్త జిల్లాల ప్రకారం పోస్టులను భర్తీ చేస్తుండటం వల్ల కొన్ని జిల్లాలకు అసలు పోస్టుల భర్తీయే లేదన్నారు. రంగారెడ్డి, నిర్మల్, వరంగల్‌ అర్బన్, వరంగల్‌ రూరల్, జనగాం, సూర్యాపేట, యాదాద్రి భువనగిరి, నల్లగొండ తదితర జిల్లాల్లో పోస్టుల భర్తీ లేకుండా పోయిందని, దీంతో పలువురు అభ్యర్థులకు తీరని నష్టం కలుగుతోందని సరసాని వాదించారు.   అభ్యర్థులు ఏ విధంగా నష్టపోతారు? ఈ సమయంలో న్యాయమూర్తి జోక్యం చేసుకుంటూ.. జిల్లాల వారీగా పోస్టులను భర్తీ చేస్తుంటే అభ్యర్థులు ఏ విధంగా నష్టపోతారని ప్రశ్నించారు. 31 జిల్లాల ఆధారంగా ఒక్కో జిల్లాను యూనిట్‌గా పేర్కొంటూ నియామకాలు చేయకూడదని ఏ చట్టంలో ఉందో చూపాలన్నారు. అనంతరం ఏజీ వాదనలు వినిపిస్తూ.. ఉపాధ్యాయ పోస్టులు కేవలం జిల్లా క్యాడర్‌ పోస్టులని.. వాటికి రాష్ట్రపతి ఉత్తర్వులు ఏ మాత్రం వర్తించవన్నారు. ఈ వాదనలను పరిగణనలోకి తీసుకున్న న్యాయమూర్తి పిటిషన్‌ను కొట్టేస్తూ ఉత్తర్వులిచ్చారు.  

హైదరాబాద్‌: రాష్ట్రంలో ఖాళీగా ఉన్న మొత్తం 40 వేల టీచర్‌ పోస్టులకు గాను మొక్కుబడిగా 8,792 ఖాళీలు మాత్రమే భర్తీ చేసి ప్రభుత్వం చేతులు దులుపుకోవాలని చూస్తోందని టీడీపీ ఎమ్మెల్యే, బీసీ సంఘం నేత ఆర్‌.కృష్ణయ్య విమర్శించారు. ఆదివారం విద్యానగర్‌లోని బీసీ భవన్‌లో తెలంగాణ నిరుద్యోగ జేఏసీ చైర్మన్‌ నీల వెంకటేశ్, బీసీ సంఘం జాతీయ ఉపాధ్యక్షుడు గుజ్జ కృష్ణల అధ్యక్షతన నిరుద్యోగ అభ్యర్థుల సమావేశం జరిగింది. ఈ సమావేశానికి ముఖ్యఅతిథిగా హాజరైన ఆర్‌.కృష్ణయ్య మాట్లాడుతూ.. టీచర్‌ పోస్టుల ఖాళీల విషయంలో ప్రభుత్వం తప్పుడు లెక్కలు చూపిస్తోందని విమర్శించారు. 2014 జూన్‌లో ఆర్థిక శాఖ మంత్రి ఈటల రాజేందర్‌ అసెంబ్లీలో మాట్లాడుతూ టీచర్‌ పోస్టులు 25,600 ఖాళీలు ఉన్నాయన్నారని ఆయన గుర్తుచేశారు. గత మూడున్నరేళ్ల కాలంలో రిటైర్‌ అయిన వారితో కలిపి మరో 15 వేల ఖాళీలు ఏర్పడ్డాయని తెలిపారు. ఖాళీలు లెక్కించడంలో విద్యార్థి–ఉపాధ్యాయ నిష్పత్తిని ప్రాతిపదికగా తీసుకోవద్దని, 2012 నుంచి రిటైర్‌మెంట్‌వల్ల ఏర్పడ్డ ఖాళీలను ప్రాతిపదికగా తీసుకొవాలని కోరారు. ప్రభుత్వ పాఠశాలల్లో 40 వేల టీచర్‌ పోస్టులు, ఎయిడెడ్‌ పాఠశాలల్లో 4,500 టీచర్‌ పోస్టులు, ఆదర్శ పాఠశాలల్లో 2 వేలు, కసుర్బా పాఠశాలల్లో 1,200, కంప్యూటర్‌ టీచర్‌ పోస్టులు 4 వేలు, పీఈటీ పోస్టులు 3 వేలు, క్రాఫ్ట్, డ్రాయింగ్‌ పోస్టులు 2 వేలు, లైబ్రేరియన్‌ పోస్టులు 3 వేలు, జూనియర్‌ అసిస్టెంట్‌ 4 వేల పోస్టులు ఖాళీగా ఉన్నాయని తెలిపారు. పరీక్షలు ఫిబ్రవరిలో కాకుండా జనవరి లేదా డిసెంబర్‌లో పెట్టాలని అన్నారు. ఒక వైపు 4,600 ప్రభుత్వ పాఠశాలలు మూతపడుతుంటే టీచర్‌ పోస్టులు భర్తీ చేయడానికి 9 నెలల కాలపరిమితి తీసుకోవడం సరికాదని సూచించారు. ఈ సమావేశంలో బీసీ సంఘాల నాయకులు భూపేశ్‌ సాగర్, మహేందర్‌ గౌడ్, పగిల్ల సతీష్, జి.క్రిష్ణ యాదవ్, అనంతయ్య, యాదవ శ్రీనివాస్‌గౌడ్, రావుల రాజు తదితరులు పాల్గొన్నారు.

సాక్షి, హైదరాబాద్‌: కొత్త జిల్లాల వారీగా భర్తీ చేయనున్న టీచర్‌ పోస్టులు దాదాపు ఖరారయ్యాయి. డీఈవోలు 31 జిల్లాల వారీగా పోస్టుల లెక్కల్ని తేల్చారు. బ్యాక్‌లాగ్‌ పోస్టులు కలుపుకొని మొత్తం 10 వేలకు పైగా ఖాళీలు ఉన్నట్లు తెలిసింది. ఇందులో 8,792 రెగ్యులర్‌ పోస్టులను భర్తీ చేయనుండగా, మిగతావి బ్యాక్‌లాగ్‌ పోస్టులని అధికారులు చెబుతున్నారు. డీఈవోలు తాజాగా విద్యాశాఖకు ఈ వివరాలను అందజేసినట్లు సమాచారం. వచ్చే ఏడాది వరకు రిటైర్మెంట్ల ద్వారా ఏర్పడే 2 వేలకు పైగా ఖాళీలను కూడా భర్తీ చేసే ఆలోచనలో విద్యాశాఖ ఉన్నట్లు తెలిసింది. అయితే వాటిని ఇప్పటికిప్పుడు భర్తీ చేసే అవకాశం కనిపించడం లేదు. అందుకు ఆర్థిక శాఖ నుంచి ఆమోదం లభించాల్సి ఉంది. టీచర్‌ రిక్రూట్‌మెంట్‌ టెస్టు(టీఆర్‌టీ) నిర్వహించే నాటికి సప్లిమెంటరీ నోటిఫికేషన్‌ ద్వారా వాటిని భర్తీ చేసే అవకాశం ఉన్నట్టు విద్యాశాఖ వర్గాలు పేర్కొంటున్నాయి. జిల్లాల వారీగా స్కూల్‌ అసిస్టెంట్, సెకండరీ గ్రేడ్‌ టీచర్‌ పండిట్‌ పోస్టులు కలిపి వీటిని లెక్క వేసినట్లు తెలిసింది. అయితే విద్యాశాఖ ఉన్నతాధికారులు మాత్రం ఈ పోస్టుల వివరాలపై అధికారికంగా స్పష్టత ఇవ్వడం లేదు. జిల్లాల నుంచి సేకరించిన సమాచారం ప్రకారం పోస్టుల వివరాలివీ.. ఆదిలాబాద్‌–293, నిర్మల్‌–226, మంచిర్యాల–169, కుమరం భీమ్‌–1,018, నిజమాబాద్‌–156, కామారెడ్డి–380, జగిత్యాల–253, పెద్దపల్లి–54, కరీంనగర్‌–71, సిరిసిల్ల–108, వరంగల్‌ అర్బన్‌–143, వరంగల్‌ రూరల్‌–123, జనగామ–168, మహబూబాబాద్‌–135, జయశంకర్‌ భూపాలపల్లి–380, ఖమ్మం–57, కొత్తగూడెం–100, నల్లగొండ–408, సూర్యాపేట–300, యాదాద్రి–339, రంగారెడ్డి–600, వికారాబాద్‌– 826, మేడ్చల్‌–200, మెదక్‌–297, సిద్దిపేట–155, సంగారెడ్డి–1,105, మహబూబ్‌నగర్‌–725, నాగర్‌ కర్నూల్‌–436, గద్వాల–387, వనపర్తి–154, హైదరాబాద్‌–200  

సాక్షి, హైదరాబాద్‌ రాష్ట్రంలో ఉపాధ్యాయ నియామకాలకు ప్రభుత్వం గ్రీన్‌సిగ్నల్‌ ఇచ్చింది. టీఎస్‌పీఎస్సీ ద్వారా పోస్టుల భర్తీకి అనుమతిస్తూ.. మంగళవారం నియామక నిబంధనలను జారీ చేసింది. ఈ మేరకు ‘టీచర్‌ రిక్రూట్‌మెంట్‌ రూల్స్‌–2017 (జీవో 25)’పేరిట విద్యా శాఖ ప్రత్యేక ప్రధాన కార్యదర్శి రంజీవ్‌ ఆర్‌ ఆచార్య ఉత్తర్వులు వెలువరించారు. దీంతో పది పదిహేను రోజుల్లో 8,792 ఉపాధ్యాయ పోస్టుల భర్తీకి నోటిఫికేషన్‌ జారీ అయ్యే అవకాశముంది. మరోవైపు ప్రభుత్వ ఉత్తర్వులు జారీ అయిన వెంటనే టీఎస్‌పీఎస్సీ సమావేశమై పోస్టుల భర్తీపై చర్చించినట్లు తెలిసింది. మొత్తంగా ఉమ్మడి రాష్టంలో (2012లో) నియామకాలు చేపట్టిన ఐదేళ్ల తరువాత ఇప్పుడు టీచర్‌ పోస్టులు భర్తీ కానున్నాయి. నోటిఫికేషన్‌పై కసరత్తు మొదలు.. విద్యాశాఖ ఇప్పటికే కొత్త, పాత జిల్లాల ప్రకారం పోస్టులు, రోస్టర్‌ కమ్‌ రిజర్వేషన్‌ వివరాలను టీఎస్‌పీఎస్సీకి పంపించినట్లు తెలిసింది. వాటిపై టీఎస్‌పీఎస్సీ అధికారులు ఒకటి రెండు రోజుల్లో విద్యాశాఖ అధికారులతో చర్చించి.. అవసరమైన వివరణలు తీసుకోనున్నారు. అనంతరం నోటిఫికేషన్‌ జారీకి సంబంధించిన ప్రక్రియ చేపట్టనున్నారు. ఇక ఉపాధ్యాయ పోస్టుల భర్తీ పరీక్షా విధానాన్ని రాష్ట్ర ప్రభుత్వం ఇంకా ఖరారు చేయాల్సి ఉంది. అభ్యర్థుల వడపోత కోసం స్క్రీనింగ్‌ టెస్టు నిర్వహిస్తారా? లేదా ఒకే పరీక్ష నిర్వహించి మెరిట్‌ ప్రకారం ఖరారు చేస్తారా? అన్న చర్చ జరుగుతోంది. దీనిపై టీఎస్‌పీఎస్సీ ఒకటీ రెండు రోజుల్లో నిర్ణయం తీసుకునే అవకాశముంది. ఇక ఉపాధ్యాయ అర్హత పరీక్ష (టెట్‌) స్కోర్‌కు 20 శాతం వెయిటేజీ, టీఎస్‌పీఎస్సీ నిర్వహించే రాత పరీక్షకు 80 శాతం వెయిటేజీ ఉంటుంది. ఎస్‌పీఎస్సీ రాత పరీక్ష నిర్వహించి మెరిట్‌ జాబితాను ఇస్తే 31 జిల్లాల్లో జిల్లా యూనిట్‌గా పోస్టింగ్‌లు ఇస్తారు. పోస్టులు పెరుగుతాయా? ప్రస్తుత లెక్క ప్రకారం 8,792 పోస్టులను భర్తీ చేయాలని ప్రభుత్వం ఇప్పటికే నిర్ణయించింది. సుప్రీంకోర్టుకూ ఈ విషయాన్ని తెలియజేసింది. అయితే ప్రస్తుతం 31 జిల్లాల ప్రాతిపదికన పోస్టులను భర్తీ చేయనున్న నేపథ్యంలో.. కొన్ని పట్టణ జిల్లాల్లో పోస్టులు లేని పరిస్థితి తలెత్తింది. ఈ నేపథ్యంలో ఆ జిల్లాల్లో పోస్టులను ఇస్తారా? అన్నది తేలాల్సి ఉంది. వాస్తవానికి విద్యాశాఖ 2018 వరకు ఏర్పడే ఖాళీల వివరాలను కూడా సేకరించింది. పట్టణ జిల్లాల్లో పోస్టులు లేకుండా నోటిఫికేషన్‌ ఇస్తే ఆయా ప్రాంతాల నుంచి వ్యతిరేకత వ్యక్తమవుతుందని ప్రభుత్వం భావిస్తే.. అక్కడ 2018 వరకు ఏర్పడే ఖాళీలను కూడా నోటిఫై చేయవచ్చని భావిస్తున్నారు. అదే జరిగి మొత్తంగా భర్తీ చేసే పోస్టుల సంఖ్య పెరగనుంది. నియామక నిబంధనల్లోని ప్రధానాంశాలివీ.. – ‘తెలంగాణ రాష్ట్ర ఉపాధ్యాయ పోస్టుల ప్రత్యక్ష నియామక నిబంధనలు–2017’ప్రభుత్వ, జిల్లా పరిషత్, మండల పరిషత్‌ పాఠశాలల్లోని అన్ని రకాల ఉపాధ్యాయ పోస్టులకు వర్తిస్తాయి. – జిల్లా విద్యాశాఖాధికారే నియామకపు అధికారి. జాతీయ ఉపాధ్యాయ శిక్షణ మండలి (ఎన్‌సీటీఈ) నిబంధనల ప్రకారం విద్యార్హతలు వర్తిసాయి. – టీఎస్‌పీఎస్సీ ద్వారా ఎంపిక ప్రక్రియ, రాత పరీక్ష నిర్వహణ. – టీఎస్‌ టెట్, సెంట్రల్‌ టెట్‌ ఉత్తీర్ణత తప్పనిసరి. (2.06.2014 కంటే ముందు ఏíపీ టెట్‌ ఉత్తీర్ణులైన వారూ అర్హులే). స్కూల్‌ అసిస్టెంట్, తత్సమాన పోస్టులకు టెట్‌ పేపర్‌–2, సెకండరీ గ్రేడ్‌ టీచర్‌ పోస్టులకు టెట్‌ పేపర్‌–1 అర్హత తప్పనిసరి. – ఉపాధ్యాయ నియామకాల్లో రాతపరీక్షకు 80 శాతం వెయిటేజీ, టెట్‌ స్కోర్‌కు 20 శాతం వెయిటేజీ ఉంటుంది. – వ్యాయామ ఉపాధ్యాయులకు టెట్‌ నుంచి మినహాయింపు. రాత పరీక్ష 100 శాతం మార్కులకు ఉంటుంది. ఉంటాయి. – స్కూల్‌ అసిస్టెంట్, తత్సమాన పోస్టులకు సంబంధిత సబ్జెక్టులో 50 శాతం మార్కులతో డిగ్రీ లేదా పీజీ మరియు సంబంధిత మెథడాలజీతో బీఎడ్‌ ఉత్తీర్ణులైన వారు అర్హులు. బీసీ, ఎస్సీ, ఎస్టీ, వికలాంగులకు 45 శాతం మార్కులు ఉంటే చాలు. – సెకండరీ గ్రేడ్‌ టీచర్‌ (ఎస్జీటీ) పోస్టుల కోసం ఇంటర్మీడియట్‌లో జనరల్‌ అభ్యర్థులకు కనీసం 50 శాతం మార్కులు, బీసీ, ఎస్సీ, ఎస్టీ, వికలాంగులకు 45 శాతం మార్కులు ఉండాలి. అలాగే రెండేళ్ల డిప్లొమా ఇన్‌ ఎలిమెంటరీ ఎడ్యుకేషన్‌ (డీఎడ్‌) లేదా నాలుగేళ్ల ఎలిమెంటరీ ఎడ్యుకేషన్‌ బ్యాచిలర్‌ డిగ్రీ ఉండాలి. – 2007 సంవత్సరం నాటికి రెండేళ్ల డీఎడ్‌లో చేరిన జనరల్‌ అభ్యర్థులకు ఇంటర్‌లో 45 శాతం మార్కులు సరిపోతాయి. బీసీ, ఎస్సీ, ఎస్టీ, వికలాంగులకు 40 శాతం ఉన్నా చాలు. – ఏదైనా మాధ్యమం (మీడియం)లో బోధించేందుకు.. భాషేతర సబ్జెక్టుల ఉపాధ్యాయ అభ్యర్థులు టెన్త్‌ లేదా ఇంటర్‌ లేదా డిగ్రీలో సంబంధిత భాషా మాధ్యమంలో చదివి ఉండాలి. లేదా టెన్త్‌లో మొదటి భాషగాను, ఇంటర్‌/ డిగ్రీలో ద్వితీయ భాషగాను చదివి ఉండాలి. – ఏ మీడియంలో పోస్టు కోసం దరఖాస్తు చేసుకుంటే.. రాత పరీక్ష (టీఆర్‌టీ) ప్రశ్నపత్రం ఆ మీడియంలోనే ఉంటుంది. – భాషా పండిట్‌ పోస్టులకు సంబంధిత భాష డిగ్రీలో జనరల్‌ అభ్యర్థులు 50 శాతం మార్కులతో.. బీసీ, ఎస్సీ, ఎస్టీ, వికలాంగులు 45 శాతం మార్కులు సాధించి ఉండాలి. లేదా పీజీ అర్హతతోపాటు సంబంధిత మెథాడాలజీతో బీఎడ్, లేదా పండిట్‌ శిక్షణ పొంది ఉండాలి. – వ్యాయామ ఉపాధ్యాయ పోస్టులకు 50 శాతం మార్కులతో ఇంటర్‌తోపాటు వ్యాయామ విద్యలో డిప్లొమా చేసి ఉండాలి. లేదా డిగ్రీ, బీపీఈడీ చేసి ఉండాలి. – 2016 అక్టోబర్‌ 10న ఏర్పడిన కొత్త రెవెన్యూ జిల్లాల ప్రాతిపదిపక ఉపాధ్యాయ ఖాళీలను నిర్ణయించి పాఠశాల విద్యా డైరెక్టర్‌ సూచించిన మేరకు టీఎస్‌పీఎస్సీ నోటిఫికేషన్‌ జారీ చేస్తుంది. – జీవో–3 ప్రకారం (10.01.2000) ఏజెన్సీ ప్రాంతాల్లో ఉపాధ్యాయ పోస్టులకు స్థానిక గిరిజన అభ్యర్థులు మాత్రమే అర్హులు. మైదాన ప్రాంత పాఠశాలల్లో నియామకాలకు కూడా ఏజెన్సీ గిరిజనులు అర్హులు. – రాష్ట్ర ప్రభుత్వ సాధారణ సర్వీసు నిబంధనల ప్రకారం గరిష్ట వయసును నోటిఫికేషన్‌లో ప్రకటిస్తారు. – రాష్ట్రపతి ఉత్తర్వుల ప్రకారం స్థానిక అభ్యర్థుల రిజర్వేషన్లు వర్తిస్తాయి. 80 శాతం స్థానిక. 20 శాతం ఓపెన్‌ కేటగిరీ ఉంటుంది. – ఉపాధ్యాయ నియమాకాలకు సంబంధించి 2009 జనవరి 23న విడుదల చేసిన జీవోలు 11, 12లలోని విద్యార్హతలను ఈ జీవో ద్వారా సవరించారు. మరింత స్పష్టత అవసరం ఉపాధ్యాయ నియామకాల నిబంధనల్లో మరింత స్పష్టత అవసరమని ఉపాధ్యాయ సంఘాల నేతలు, అభ్యర్థులు పేర్కొంటున్నారు. మంగళవారం ప్రభుత్వం వెలువరించిన ఉత్తర్వులను పరిశీలించిన అనంతరం పలు అంశాలపై వారు అభిప్రాయం వ్యక్తం చేశారు. పలు కేటగిరీల పోస్టులకు సంబంధించిన అర్హతలకు సంబంధించి స్పష్టమైన వివరణలు అవసరమని యూటీఎఫ్‌ ప్రధాన కార్యదర్శి చావ రవి పేర్కొన్నారు. స్పష్టత కోరుతున్న అంశాలివే.. – ఫిజికల్‌ ఎడ్యుకేషన్‌ టీచర్‌ (పీఈటీ) పోస్టుల అర్హతల్లో.. ఇంటర్‌ 50 శాతం మార్కులతో ఉత్తీర్ణులై, డిప్లొమా ఇన్‌ ఫిజికల్‌ ఎడ్యుకేషన్‌ (డీపీఈడీ) పూర్తి చేసి ఉండాలని పేర్కొన్నారు. ఇందులో ఎస్సీ, ఎస్టీ, బీసీ అభ్యర్థులకు మినహాయింపు వివరాలు చెప్పలేదు. ఇక అదే పోస్టులకు డిగ్రీతోపాటు బ్యాచిలర్‌ ఆఫ్‌ ఫిజికల్‌ ఎడ్యుకేషన్‌ (బీపీఈడీ) పూర్తి చేసిన వారు అర్హులని పేర్కొన్నారు. కానీ డిగ్రీలో కనీస మార్కుల వివరాలను పేర్కొనలేదు. – ఎన్‌సీటీఈ నిబంధనల ప్రకారం.. స్కూల్‌ అసిస్టెంట్‌ పోస్టులకు జనరల్‌ అభ్యర్థులు డిగ్రీ 50 శాతం మార్కులతో ఉత్తీర్ణులై, బీఎడ్‌ పూర్తి చేసి ఉండాలని, టెట్‌ పేపర్‌–2 అర్హత సాధించి ఉండాలని పేర్కొన్నారు. అయితే ఎన్‌సీటీఈ ఉత్తర్వులు వచ్చిన 2010 సంవత్సరానికి ముందే డిగ్రీ పూర్తి చేసిన జనరల్‌ అభ్యర్థులకు పరిగణనలోకి తీసుకునే మార్కులను పేర్కొనలేదు. – ఎస్జీటీ పోస్టులకు అర్హతల్లో.. జనరల్‌ అభ్యర్థులు 2009కు ముందు ఇంటర్‌ పూర్తి చేసి ఉంటే 45 శాతం మార్కులతో ఉత్తీర్ణులైనా చాలనే స్పష్టత ఇచ్చారు. కానీ స్కూల్‌ అసిస్టెంట్‌ పోస్టులకు డిగ్రీ మార్కుల విషయంలో ఇవ్వలేదు. – గిరిజన సంక్షేమ పాఠశాలల నియామక ప్రక్రియ అంశాలను ఈ ఉత్తర్వుల్లో పేర్కొనలేదు. వాటికి వేరుగా నిబంధనలు ఇస్తారా? స్పష్టత ఇవ్వాల్సి ఉంది. – భాషా సబ్జెక్టు పోస్టులను పండిట్‌ కోర్సులు చేసిన వారికే ఇవ్వాలని ఇప్పటికే వివాదం కొనసాగుతోంది. కానీ ఏదేని సబ్జెక్టులో పీజీ చేసిన వారు బీఎడ్‌లో ఆ సబ్జెక్టు మెథాడాలజీ చేసి ఉంటే భాషా పండిట్‌ పోస్టుకు అర్హులని నిబంధనల్లో పేర్కొన్నారు. ఇది కొత్త సమస్యకు దారితీసే అవకాశముందని ఉపాధ్యాయ సంఘాలు పేర్కొంటున్నాయి.   భర్తీ చేసే టీచర్‌ పోస్టుల వివరాలు.. కేటగిరీ                    తెలుగు/ఇతర మీడియం    ఉర్దూ మీడియం స్కూల్‌ అసిస్టెంట్‌              1,754                       196 లాంగ్వేజ్‌ పండిట్‌                 985                         26 పీఈటీ                              374                         42 ఎస్జీటీ                            4,779                       636 మొత్తం                           7,892                      900

సాక్షి, హైదరాబాద్‌: ఎన్నాళ్లుగానో ఉపాధ్యాయ పోస్టుల కోసం ఎదురుచూస్తున్న అభ్యర్థులకు తీపికబురు. త్వరలోనే ప్రభుత్వ టీచర్‌ పోస్టుల భర్తీ దిశగా తెలంగాణ ప్రభుత్వం కీలక ముందడుగు వేసింది. డీఎస్సీ పోస్టుల భర్తీకి అవసరమైన నిబంధనలను సర్కారు మంగళవారం విడుదల చేసింది. ఉపాధ్యాయ పోస్టుల భర్తీలో టెట్‌కు 20శాతం వెయిటేజ్‌ను ప్రకటించింది. డీఎస్సీ పరీక్షను తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) నిర్వహించనున్నట్టు స్పష్టం చేసింది. కొత్త టీచర్లను నియమించే అధికారాన్ని డీఈవోలకు కట్టబెట్టింది. అంతేకాకుండా డీఎస్సీ నియామకాలకు సంబంధించి పీటముడిగా భావించిన.. జిల్లాల పునర్విభజన అంశానికి సైతం ప్రభుత్వం తెరదించింది. కొత్త జిల్లాల ప్రకారమే డీఎస్సీ నియామకాలు చేపట్టనున్నట్టు తెలిపింది.


 హైదరాబాద్‌: ట్రెయిన్‌డ్‌  గ్రాడ్యుయేట్‌ టీచర్‌(టీజీటీ), పోస్టు గ్రాడ్యుయేట్‌ టీచర్‌(పీజీటీ), ఫిజికల్‌ డైరెక్టర్‌ (పీడీ) పోస్టులకు సంబందించిన మెయిన్స్‌ పరీక్షలకు అర్హత సాధించిన అభ్యర్థుల జాబితాను టీఎస్‌పీఎస్సీ బుధవారం ప్రకటించింది. మొత్తం 36,095 మంది అభ్యర్థులు మెయిన్స్‌కు అర్హత సాధించినట్లు తెలిపింది. ఈ మేరకు పత్రికా ప్రకటన విడుదల చేసింది. అభ్యర్థుల ఎంపిక 1:15 రేషియోలో జరిగినట్లు చెప్పింది. పూర్తి వివరాలకు టీఎస్‌పీఎస్సీ వెబ్‌సైట్‌ www.tspsc.gov.in లో చూడవచ్చు.
 
 పోస్టుల వివరాలు..
 పీజీటీ-513 పొస్టులు,  టీజీటీ- 2340, పీడీ- 6 పోస్టులకు మెయిన్స్‌ పరీక్ష ద్వారా ఎంపిక చేయనున్నారు. వివిధ కేటగిరీల్లో మొత్తం 7330 ఖాళీలకు నోటిఫికేషన్‌ విడుదల చేయగా దివ్యాంగులు‌, ఎక్స్‌ సర్వీస్‌ మెన్‌, బీసీ( మహిళ) ఎజన్సీ(మహిళ)ల కేటగిరిల నుంచి దరఖాస్తులు రాలేదని అధికారులు పేర్కొన్నారు.


 హన్మకొండ: ప్రసవించిన మూడురోజులకే ఓ మహిళ గురుకుల టీచర్‌ పోస్టుల రాత పరీక్షకు హాజరయ్యింది. మహబూబాబాద్‌ జిల్లా కంబాలపల్లికి చెందిన మల్లికంటి వరలక్ష్మి గురుకుల టీచర్‌ పోస్టుల రాత పరీక్షకు ప్రిపేర్‌ అయింది. పరీక్షకు మూడు రోజుల ముందే వరంగల్‌ అర్బన్‌ జిల్లా హన్మకొండలోని మెటర్నిటీ ఆస్పత్రిలో ప్రసవించింది.
 
 ప్రసవించి మూడు రోజులే అయినా పరీక్ష రాయాలనే పట్టుదలతో అంబులెన్స్‌లో హన్మకొండలోని ఆర్ట్స్‌ అండ్‌ సైన్స్‌ కళాశాల పరీక్ష కేంద్రానికి వెళ్లింది. వరలక్ష్మికి ప్రత్యేకంగా సీటు కేటాయించగా పరీక్ష రాసింది. 


 7,306 పోస్టులు.. 18 నుంచి ఆన్‌లైన్‌ దరఖాస్తులు
 సాక్షి, హైదరాబాద్‌: గురుకుల ఉపాధ్యా యులు, ఇతర పోస్టుల భర్తీకి తొమ్మిది కొత్త నోటిఫికేషన్లు (రీ నోటిఫికేషన్స్‌) గురువారం జారీ అయ్యాయి. సీఎం కేసీఆర్‌ ఆదేశాల మేరకు జాతీయ ఉపాధ్యాయ విద్యా మండలి (ఎన్‌సీటీఈ) మార్గదర్శకాలకు అనుగుణంగా రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) మొత్తంగా 7,306 పోస్టులతో ఈ నోటిఫికేషన్లను జారీ చేసింది. అభ్యర్థులు ఈనెల 18వ తేదీ నుంచి ఆన్‌లైన్‌లో దరఖాస్తు చేసుకోవచ్చని.. పూర్తి వివరాలను త్వరలో వెబ్‌సైట్‌లో అందుబాటులో ఉంచుతామని తెలిపింది.
 
 గతంలో ఇచ్చిన నోటిఫికేషన్‌లో పోస్టు గ్రాడ్యుయేట్‌ టీచర్‌ (పీజీటీ) పోస్టులకు బీఎడ్‌తోపాటు పీజీలో 60 శాతం మార్కులు, ట్రైన్డ్‌ గ్రాడ్యుయేట్‌ టీచర్‌ (టీజీటీ) పోస్టులకు బీఎడ్‌తోపాటు డిగ్రీలో 60 శాతం మార్కులు ఉండాలన్న నిబంధనపై తీవ్ర వ్యతిరేకత వ్యక్తమైన విషయం తెలిసిందే. దాంతో ఈ విషయంలో సీఎం కేసీఆర్‌ జోక్యం చేసుకుని మార్పులు చేయాలని ఆదేశించారు. ఈ మేరకు ఎన్‌సీటీఈ మార్గదర్శకాలకు అనుగుణంగా సంక్షేమ శాఖలు రూపొందించిన నిబంధనలతో తాజా నోటిఫికేషన్లు జారీ అయ్యాయి.
 
 తాజా నిబంధనలు ఇలా..
 తాజా నోటిఫికేషన్‌ ప్రకారం.. ఉపాధ్యాయ పోస్టులకు ఎస్సీ, ఎస్టీ, బీసీ, వికలాంగ అభ్యర్థులు బీఎడ్‌తోపాటు పీజీ, డిగ్రీలో 45 శాతం మార్కులు సాధించి ఉంటే చాలు. ఇతరులు బీఎడ్‌తో పాటు 50 శాతం మార్కులు సాధించి ఉండాలి. ఎక్స్‌ సర్వీస్‌మెన్‌కు రిజర్వేషన్‌ ఉంటుంది. ఇక డీఎడ్‌–డిగ్రీ పూర్తి చేసిన వారికి టీజీటీ పోస్టుల్లో అవకాశం కల్పించనున్నట్లు తెలిసింది. బీకాం వారికి, పబ్లిక్‌ అడ్మినిస్ట్రేషన్‌ చేసిన వారికి కూడా పోస్టుల్లో అర్హత కల్పించినట్లు సమాచారం. టీజీటీ పోస్టులకు అభ్యర్థులు బీఎడ్‌తో పాటు టెట్‌లోనూ అర్హత సాధించి ఉండాలి. అర్హతలకు సంబంధించిన పూర్తి వివరాలు పూర్తిస్థాయి నోటిఫికేషన్‌ వచ్చాకే వెల్లడికానున్నాయి.


 ⇔ జూన్‌ నుంచి ప్రతి ప్రభుత్వ బడిలో టాయిలెట్లు
 ⇔బాలబాలికలకు వేర్వేరుగా కనీసం ఒక్కోటి ఏర్పాటు
 ⇔కచ్చితంగా నీటి వసతి, విద్యుత్‌ సౌకర్యం
 ⇔స్కూళ్లలో మౌలిక వసతుల కోసం రూ. 2,682 కోట్లు
 ⇔5,600 బడుల్లో డిజిటల్‌ తరగతులు
 ⇔కొత్తగా 5,400 స్కూళ్లలో ఇంగ్లిష్‌ మీడియం
 ⇔బడులు తెరిచేలోపే పాఠ్యపుస్తకాలు, యూనిఫారాలు
 ⇔ఇంటర్‌ విద్యార్థులకూ మధ్యాహ్న భోజనం
 ⇔‘కార్పొరేట్‌’కు కళ్లెం వేసేందుకు ఆన్‌లైన్‌ ప్రవేశాలు చేపడుతున్నట్లు శాసనసభలో వెల్లడి  
 
 సాక్షి, హైదరాబాద్‌
 రాష్ట్రంలోని ప్రభుత్వ పాఠశాలలు, గురుకులాల్లో ఈ ఏడాదే 16,392 ఉపాధ్యాయ పోస్టులను భర్తీ చేయనున్నట్లు ఉప ముఖ్యమంత్రి కడియం శ్రీహరి శాసనసభలో ప్రకటించారు. అందులో సాధారణ పాఠశాలలకు సంబంధించి 8,792 పోస్టులు, గురుకులాలకు సంబంధించి 7,600 పోస్టులు ఉన్నాయని తెలిపారు. వీటి భర్తీ కోసం నోటిఫికేషన్‌ జారీ చేయాల్సిందిగా ఇప్పటికే రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ)ను ఆదేశించినట్లు చెప్పారు.
 ప్రభుత్వ పాఠశాలలను బలోపేతం చేసేదిశలో కీలక చర్యలు తీసుకుంటున్నట్లు వెల్లడించారు. గురువారం అసెంబ్లీ ప్రశ్నోత్తరాల్లో కాంగ్రెస్‌ సభ్యులు వంశీచంద్‌రెడ్డి, సంపత్‌కుమార్‌ ప్రశ్నలకు సమాధానంగాను, విద్యా శాఖ పద్దుపై మాట్లాడిన సమయంలోనూ కడియం ఈ వివరాలను వెల్లడించారు. ఇటీవలే 8 వేల ఉపాధ్యాయ పోస్టుల భర్తీకి నోటిఫికేషన్‌ ఇచ్చామని.. కానీ అర్హతల విషయంలో అభ్యర్థుల విన్నపం మేరకు దానిని నిలిపివేశామని చెప్పారు.
 
 మౌలిక సౌకర్యాల కల్పనకు ప్రాధాన్యం
 ప్రభుత్వ పాఠశాలల్లో సరిపడా టీచర్లుండరని, పాఠాలు సరిగా చెప్పరని, తగిన వసతులు ఉండవనే ఉద్దేశంతో పేదలు కూడా ప్రైవేటు బడులవైపే మొగ్గుచూపుతున్నారని.. ఈ దుస్థితిని మార్చేందుకు ప్రభుత్వం సిద్ధమైందని కడియం తెలిపారు. అందులో భాగంగా జూన్‌ 15 నుంచే ప్రతి ప్రభుత్వ పాఠశాలలో బాల, బాలికలకు వేర్వేరుగా.. కనీసం ఒక్కోటి చొప్పున టాయిలెట్లు అందుబాటులోకి తెస్తామని, వాటిలో తప్పనిసరిగా నీటి వసతి, నిర్వహణ సౌకర్యం కల్పిస్తామని ప్రకటించారు. విద్యుత్, నీళ్లు, మరుగుదొడ్లు, ఫర్నీచర్‌ తదితర మౌలిక వసతుల కల్పనకు వీలుగా ఈసారి బడ్జెట్‌లో రూ.2,682 కోట్లు కేటాయించినట్టు తెలిపారు. తొలుత అన్ని ఉన్నత పాఠశాలల్లో విద్యుత్‌ సౌకర్యం కల్పిస్తామన్నారు. ఇక జూన్‌ 15 నుంచి 5,600 ఉన్నత పాఠశాలల్లో డిజిటల్‌ క్లాస్‌ రూమ్‌లను ప్రారంభిస్తున్నట్టు తెలిపారు. ఇతర రాష్ట్రాలతో పోలిస్తే తెలంగాణలో 3వ తరగతి స్థాయిలో ప్రమాణాలు పెరిగాయన్నారు.
 
 వెంటనే పాఠ్యపుస్తకాలు, యూనిఫారాలు
 పాఠశాలలు ప్రారంభమయ్యేనాటికల్లా పాఠ్యపుస్తాకాలు, యూనిఫారాల సరఫరా చేయాలని నిర్ణయించామని కడియం వెల్లడించారు. మార్చి 21 నాటికే పాఠ్యపుస్తకాలు పంపామని, జూన్‌ 15 కల్లా యూనిఫారాలు సరఫరా అవుతాయని చెప్పారు. మరోవైపు ఇప్పటికే 5,400 ప్రభుత్వ పాఠశాలల్లో ఆంగ్ల మాధ్యమాన్ని ప్రారంభించగా... ఈ సంవత్సరం మరో 5 వేల పాఠశాలల్లో ప్రారంభిస్తామని తెలిపారు. వాటిల్లో వచ్చే ఫలితాల ఆధారంగా అన్ని పాఠశాలలకు ఇంగ్లిషు మీడియాన్ని విస్తరిస్తామని ప్రకటించారు. ఇక ప్రభుత్వ స్కూళ్లలో గతంలో బోగస్‌ ఎన్‌రోల్‌మెంట్‌ ఉండేదని.. దాన్ని అరికట్టేందుకు ఆధార్‌తో అనుసంధానించామని తెలిపారు. ఏటా ప్రభుత్వ పాఠశాలల్లో కనీసం లక్ష చొప్పున విద్యార్థుల సంఖ్య తగ్గేదని, ప్రభుత్వం తీసుకున్న చర్యల వల్ల దాన్ని 50 వేలకు తగ్గించామని ప్రకటించారు. బడిబాట మొదటి విడత కార్యక్రమాన్ని ఏప్రిల్‌లో, రెండో విడతను జూన్‌లో నిర్వహించాలని నిర్ణయించామన్నారు. 2017–18 నుంచి అంగన్‌వాడీ కేంద్రాలను ప్రాథమిక స్కూళ్ల పరిధిలోకి తెచ్చి ప్లేస్కూళ్లుగా తయారుచేస్తామన్నారు.
 
 ఇంటర్‌ విద్యార్థులకూ భోజనం
 ఈ ఏడాది నుంచే ఇంటర్‌ విద్యార్థులకు కూడా మధ్యాహ్నం భోజన పథకాన్ని అమలు చేసే యోచనలో ఉన్నామని కడియం తెలిపారు. వారికి ఉచితంగా పాఠ్య పుస్తకాలు అందిస్తున్నామని చెప్పారు. ఈ సంవత్సరం నుంచే ఇంటర్‌లో ఆన్‌లైన్‌ అడ్మిషన్లు మొదలుపెడతామని.. దాంతో కార్పొరేట్‌ కళాశాలల దూకుడుకు కళ్లెం పడుతుందని పేర్కొన్నారు. కాంట్రాక్టు అధ్యాపకులను రెగ్యులరైజ్‌ చేసే చర్యలు ప్రారంభించగా.. కొందరు కోర్టుకెళ్లటంతో బ్రేక్‌ పడిందని చెప్పారు. ఆ కేసు వేసినవారు కాంగ్రెస్‌కు అనుబంధంగా ఉన్నట్టు తెలిసిందని, వారు కేసు వెనక్కు తీసుకునేలా చూడాలని పీసీసీ అధ్యక్షుడు ఉత్తమ్‌కుమార్‌రెడ్డిని కడియం కోరారు. అయితే కేసు వేసినవారికి కాంగ్రెస్‌తో సంబంధం లేదని ఉత్తమ్‌ ఈ సందర్భంగా వివరణ ఇచ్చారు.
 
 కేంద్ర నిధులు వచ్చేలా చూడాలి
 డిగ్రీ కళాశాలల్లో ఇప్పటికే ఆన్‌లైన్‌ ప్రవేశాలు ప్రారంభించామని, స్కిల్‌ డెవలప్‌మెంట్‌ సెంటర్లు మొదలుపెట్టామని కడియం తెలిపారు. ప్రతి నియోజకవర్గానికి ఒక మహిళా డిగ్రీ కళాశాల ఏర్పాటుకు సీఎం నిర్ణయించారన్నారు. ఉస్మానియా వర్సిటీ దేశంలో వందేళ్ల ఉత్సవాన్ని జరుపుకొంటున్న ఏడో విశ్వవిద్యాలయమని, ఇందుకు కేంద్రం నిధులు విడుదల చేసేలా బీజేపీ సభ్యులు ప్రయత్నించాలని కోరారు. కస్తూర్బా విద్యాలయాలు మంజూరయ్యేలా ప్రయత్నించాలని విజ్ఞప్తి చేశారు. పాఠశాలల అభివృద్ధి కోసం ఎమ్మెల్యేలు సీడీఎఫ్‌ నుంచి నిధులు కేటాయిస్తే దానికి రాష్ట్ర ప్రభుత్వం మ్యాచింగ్‌ నిధులు కేటాయిస్తుందన్నారు.


 హైదరాబాద్‌: ఈ ఏడాది 17 వేల ఉపాధ్యాయ పోస్టులను భర్తీ చేస్తామని ఉప ముఖ్యమంత్రి కడియం శ్రీహరి వెల్లడించారు. అందుకోసం నోటిఫికేషన్‌ జారీచేయాల్సిందిగా తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ)కి విజ్ఞప్తి చేసినట్లు ఆయన స్పష్టంచేశారు. గురువారం అసెంబ్లీ ప్రశ్నోత్తరాల సమయంలో కాంగ్రెస్‌ సభ్యులు వంశీచంద్‌రెడ్డి, సంపత్‌కుమార్‌ అడిగిన ప్రశ్నకు సమాధానంగా ఆయన ఈ విషయం తెలిపారు. ఇటీవల కొత్తగా 8 వేల ఉపధ్యాయ పోస్టులకు నోటిఫికేషన్‌ ఇచ్చామని, అయితే అర్హతకు సంబంధించిన విషయంలో అభ్యర్థుల విన్నపం మేరకు వాటిని నిలుపుదల చేశామన్నారు. ప్రాథమిక విద్యపై ప్రభుత్వం దృష్టిసారించనున్నట్లు కడియం తెలిపారు.
 
 2017–18 నుంచి అంగన్‌వాడీ కేంద్రాలను కూడా ప్రాథమిక పాఠశాలల స్థాయికి తీసుకురావాలని భావిస్తున్నామని, ఆయా కేంద్రాలను ప్లే స్కూళ్లుగా తయారుచేస్తామని పేర్కొన్నారు. బాలికల కోసం 300 గురుకుల పాఠశాలలు కేటాయించామన్నారు. అందులో 30 ఎస్సీ బాలికల కోసం కేటాయించామన్నారు. ప్రతీ నియోజకవర్గానికి ఒక మహిళా డిగ్రీ కళాశాల ఏర్పాటుచేయాలని సీఎం నిర్ణయించారని చెప్పారు.


 అఫిడవిట్‌ దాఖలు చేయాలని ఏపీ, తెలంగాణకు ఆదేశం  
 సాక్షి, న్యూఢిల్లీ: ఆంధ్రప్రదేశ్, తెలంగాణ రాష్ట్రాల్లో వేల సంఖ్యలో పోస్టులు ఖాళీగా ఉన్నాయన్న అంశంపై ఇరు రాష్ట్రాల ప్రధాన కార్యదర్శులు అఫిడవిట్‌ దాఖలు చేయాలని సుప్రీం కోర్టు నోటీసులు జారీచేసింది. రెండు రాష్ట్రాల్లోని ప్రభుత్వ పాఠశాలల్లో సిబ్బంది కొరత, మౌలిక వసతుల లేమిపై దాఖలైన పిటిషన్‌ను జస్టిస్‌ దీపక్‌ మిశ్రా నేతృత్వంలోని ధర్మాసనం గురువారం విచారించింది. ఆర్టికల్‌ 371–డి కారణంగా ఉపాధ్యాయ పోస్టుల భర్తీలో జాప్యం జరుగుతోందని తెలంగాణ ప్రభుత్వం తరఫు న్యాయవాది వివరించగా.. విద్య ప్రాథమిక హక్కు అని, ప్రభుత్వ పాఠశాలల విషయంలో నిర్లక్ష్యం తగదని ధర్మాసనం వ్యాఖ్యానించింది. ఉపాధ్యాయుల నియామకంపై తెలంగాణ ప్రభుత్వం దాఖలు చేసిన అఫిడవిట్‌పై అసంతృప్తి వ్యక్తంచేసింది.
 
 పాఠశాలలంటే భవనాలు ఉంటే సరిపోదని, నాణ్యమైన విద్య అందించాలని సూచించింది. విద్యాహక్కు చట్టాలను సక్రమంగా అమలుచేయాల్సిన బాధ్యత రాష్ట్ర ప్రభుత్వాలదేనని స్పష్టం చేసింది. టీచర్ల నియామకంపై మూడు వారాల్లోగా సమాధానం ఇవ్వాలని రెండు రాష్ట్రాలను ఆదేశించింది. ఆంధ్రప్రదేశ్‌లోని ప్రభుత్వ పాఠశాలల మరుగుదొడ్లలో నీటి వసతిలేమిపై ధర్మాసనం ప్రశ్నించింది. అన్ని పాఠశాలల్లో నీటి వసతి ఉన్న జిల్లా పేరు చెబితే తనిఖీలు చేయిస్తామని ధర్మాసనం పేర్కొంది. మరుగుదొడ్డి వసతి లేకపోవడం కారణంగా కూడా విద్యార్థినుల హాజరు శాతం తక్కువగా ఉండడం, డ్రాప్‌ అవుట్స్‌ పెరగడం చోటుచేసుకుంటోందని వ్యాఖ్యానించింది. దీనికి ఆంధ్రప్రదేశ్‌ తరఫు న్యాయవాది సమాధానమిస్తూ విజయనగరం జిల్లాలో పరిశీలన చేయవచ్చని కోర్టుకు విన్నవించారు. ఆ జిల్లాలో పరిశీలన చేసి నివేదిక సమర్పించాలని మౌలిక వసతుల లేమిని అధ్యయనం చేస్తున్న గుప్తా కమిటీని ధర్మాసనం ఆదేశించింది. తదుపరి విచారణను మార్చి 23కి వాయిదా వేసింది.


 సాక్షి, హైదరాబాద్‌: గురుకులాల్లో ఉపాధ్యాయ పోస్టుల భర్తీలో నిరుద్యోగులకు నష్టం కలిగించే నిబంధనలను వెంటనే వెనక్కి తీసుకోవాలని సీపీఎం కోరింది. ఈ పోస్టుల భర్తీకి సంబంధించి టీఎస్‌పీఎస్సీ విధించిన నిబంధనల వల్ల రాష్ట్రంలోని లక్షలాది మంది నిరుద్యోగులకు నష్టం వాటిల్లుతుందని పేర్కొంది. ఇంగ్లిష్‌ మీడియంలోనే ప్రవేశ పరీక్ష నిర్వహిస్తామనే నిబంధనలు హేతుబద్ధంగా లేవని ఆ పార్టీ కార్యదర్శి వర్గ సభ్యుడు జి.నాగయ్య తెలిపారు. వీటి వల్ల గ్రామీణ ప్రాంత నిరుద్యోగులకు నష్టం జరుగుతుందన్నారు.


 ఏడువేలకుపైగా పోస్టుల భర్తీ
 
 హైదరాబాద్‌: ఎప్పుడెప్పుడా అని ఎదురుచూస్తున్న నిరుద్యోగ అభ్యర్థులకు తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) తీపి కబురు అందించింది. గురుకుల పాఠశాలల్లో ఏడువేలకుపైగా ఉద్యోగాల భర్తీకి సోమవారం నోటిఫికేషన్‌ జారీచేసింది. ఇందుకోసం ఈ నెల 10 నుంచి వచ్చేనెల 4వ తేదీ వరకు ఆన్‌లైన్‌లో దరఖాస్తులు స్వీకరించనుంది. మొత్తం 7,306 పోస్టులను ఈ నోటిఫికేషన్‌ ద్వారా టీఎస్‌పీఎస్సీ భర్తీ చేయనుంది. గురుకుల నోటిఫికేషన్‌ గురించి గత కొన్నాళ్లుగా తెలంగాణ ప్రభుత్వం ఊరిస్తున్న సంగతి తెలిసిందే.
 
 ఈ నోటిఫికేషన్‌లో పొందుపరచాల్సిన నిబంధనలపై టీఎస్‌పీఎస్సీ, సంక్షేమశాఖలు ఇప్పటికే కసరత్తు చేసినట్టు సమాచారం. విద్యార్హతల విషయంలో ఇప్పటికే ఓ నిర్ణయానికి వచ్చినట్లు తెలిసింది. గురుకులాలు ఇంగ్లిషు మీడియం పాఠశాలలు అయినందున ఆంగ్ల మాధ్యమంలోనే చదివి ఉండాలన్న నిబంధన ఉంటుందా అనే ఆందోళన అనేక మంది అభ్యర్థుల్లో నెలకొన్న నేపథ్యంలో మీడియం విషయంలో ఆంక్షల్లేకుండా సర్కారు చర్యలు చేపడుతున్నట్లు తెలిసింది. ఇంటర్మీడియెట్‌ డిగ్రీ, పీజీ, బీఎడ్‌ వంటి కోర్సులను ఇంగ్లిష్‌ మీడియంలో చదివినా, తెలుగు మీడియంలో చదివినా పరీక్ష రాసేందుకు అవకాశం ఇచ్చేలా ఏర్పాట్లు చేస్తున్నట్లు సమాచారం.
 (చదవండి: మీడియం ఏదైనా అర్హులే!)
  


 వచ్చే నెలాఖరు లేదా మార్చి మొదటి వారంలో నోటిఫికేషన్‌
 సాక్షి, హైదరాబాద్‌: ప్రభుత్వ పాఠశాలల్లో ఖాళీగా ఉన్న దాదాపు 12 వేల ఉపాధ్యాయ పోస్టుల భర్తీకి ప్రభుత్వం కసరత్తు ప్రారంభిం చింది. వచ్చే నెలాఖరులో లేదా మార్చి మొదటి వారంలో పోస్టుల భర్తీకి టీఎస్‌పీఎస్సీ ద్వారా నోటిఫికేషన్‌ జారీ చేయడానికి ప్రభుత్వం ఏర్పాట్లు చేస్తున్నట్లు సమాచారం. ఇప్పటికే పాఠశాలల్లో పోస్టుల భర్తీ బాధ్యతలను టీఎస్‌పీఎస్సీకి అప్పగిస్తూ ప్రభుత్వం ఉత్తర్వులు జారీ చేసిన సంగతి తెలిసిందే. ప్రస్తుతం గురుకుల పాఠశాలల్లో టీచర్‌ పోస్టుల భర్తీపై టీఎస్‌పీఎస్సీ కసరత్తు చేస్తోంది.
 మరోవైపు ప్రభుత్వ పాఠశాలల్లో ఖాళీగా ఉన్న పోస్టులను వచ్చే జూన్‌లో పాఠశాలలు తెరిచే నాటికి భర్తీ చేస్తామని ఉప ముఖ్యమంత్రి కడియం శ్రీహరి పలుమార్లు ప్రకటించారు. ఈ నేపథ్యంలో వచ్చే నెలాఖరులో లేదా మార్చిలో నోటిఫికేషన్‌ జారీ చేసే అవకాశం ఉంది. ఇదే విషయాన్ని ఉప ముఖ్యమంత్రి కడియం శ్రీహరి ఓ చానల్‌కు ఇచ్చిన ఇంటర్వూ్యలో వెల్లడించారు. ప్రస్తుతం ఉపాధ్యాయ పోస్టుల భర్తీలో టెట్‌ను పరిగణనలోకి తీసుకోవాలా? వద్దా? అన్న విషయంలో ప్రభుత్వం పలు రకాలుగా ఆలోచనలు చేస్తోంది.
 పక్కనున్న ఆంధ్రప్రదేశ్‌లోనూ టెట్‌ అవసరం లేదన్న నిర్ణయానికి వచ్చిన అక్కడి ప్రభుత్వం 2014లోనే టెట్‌ లేకుండా ఉపాధ్యాయ పోస్టులను భర్తీ చేసింది. ఈ నేపథ్యంలో మన రాష్ట్రంలోనూ టెట్‌ లేకుండానే ఉపాధ్యాయ పోస్టులను భర్తీ చేసే ఆలోచనల్లో ఉన్నట్లు తెలిసింది. టెట్‌పై స్పష్టత రాగానే పాఠశాలల్లో ఖాళీగా ఉన్న పోస్టుల భర్తీపైనా కసరత్తు ప్రారంభించే అవకాశం ఉంది.


 - దేశంలో ప్రభుత్వ విద్యావ్యవస్థ దుస్థితి
 విద్యావ్యవస్థపై పాలకుల నిర్లక్ష్యం వీడడం లేదు. అసలే అరకొర వసతులతో సతమతమవుతున్న ప్రభుత్వ పాఠశాలల్లో ఉపాధ్యాయుల కొరత తీవ్రంగా వేధిస్తోంది. దేశ వ్యాప్తంగా ప్రభుత్వ బడుల్లో సుమారు  పది లక్షల ఉపాధ్యాయ పోస్టులు ఖాళీగా ఉన్నాయని స్వయంగా కేంద్ర మానవ వనరుల మంత్రిత్వ శాఖ లోక్‌సభకు ఇటీవల వెల్లడించింది. 
 
 సాక్షి, హైదరాబాద్‌: దేశవ్యాప్తంగా ప్రభుత్వ ప్రాథమిక పాఠశాలల్లో 18 శాతం ఉపాధ్యాయ పోస్టులు ఖాళీగా ఉన్నాయి. అదే ప్రభుత్వ సెకండరీ స్కూళ్లలో 15 శాతం పోస్టులు ఖాళీగా ఉన్నాయి. స్వయంగా కేంద్ర మానవ వనరుల అభివృద్ధి మంత్రిత్వ శాఖ లోక్‌సభకు సమర్పించిన అధికారిక గణాంకాలివి. దేశవ్యాప్తంగా అన్ని ప్రభుత్వ పాఠశాలల్లో సుమారు 10 లక్షల ఉపాధ్యాయ పోస్టులు ఖాళీగా ఉన్నట్లు మానవ వనరుల శాఖ తెలిపింది. మరో మాటలో చెప్పాలంటే ప్రతి ఆరు ఉపాధ్యాయ పోస్టుల్లో ఒకటి ఖాళీగా ఉంది.
 
 దేశంలో పలు రాష్ట్రాల్లో అన్ని ఉపాధ్యాయ పోస్టులు భర్తీ చేయగా, కొన్ని రాష్ట్రాల్లో సగానికి పైగా పోస్టులు ఖాళీగా ఉన్నాయి. అక్షరాస్యత రేటు తక్కువగా ఉన్న రాష్ట్రాల్లో ఉపాధ్యాయ ఖాళీలు అధికంగా ఉన్నాయి. 2015–16 ఎడ్యుకేషన్‌ డేటా ప్రకారం  దేశంలో 260 మిలియన్ల పాఠశాల విద్యార్థుల్లో 55 శాతం మంది ప్రభుత్వ పాఠశాలల్లోనే విద్యనభ్యసిస్తున్నారు.
 
 జార్ఖండ్‌లో అత్యధికం...
 దేశవ్యాప్తంగా అన్ని ప్రభుత్వ పాఠశాలల్లో సుమారు 60 లక్షల ఉపాధ్యాయ పోస్టులు ఉన్నాయి. వీటిల్లో ప్రాథమిక పాఠశాలల్లో 9 లక్షలకు పైగా, సెకండరీ స్కూళ్లలో లక్షకు పైగా ఉపాధ్యాయ పోస్టులు ఖాళీగా ఉన్నాయి. అత్యధికంగా జార్ఖండ్‌ రాష్ట్రంలోని సెకండరీ స్కూళ్లలో 70 శాతం పోస్టులు(ప్రాథమిక పాఠశాలల్లో 38%) ఖాళీగా ఉన్నాయి. ఉత్తరప్రదేశ్‌లోని సెకండరీ స్కూళ్లలో సగానికి పైగా పోస్టులు ఖాళీగా ఉన్నాయి. అదే గుజరాత్, బిహార్‌ రాష్ట్రాల్లో మూడొంతుల పోస్టులు ఖాళీగా ఉన్నాయి. నియామకాలపై పాలకులకు చిత్తశుద్ధి కొరవడడం, రెగ్యులర్‌గా ఖాళీలు భర్తీ చేయకపోవడం, ఆయా సబ్జెక్టులకు సంబంధించి నిపుణులైన ఉపాధ్యాయుల కొరత, విద్యార్థులు తక్కువగా ఉన్న చిన్న పాఠశాలలు వంటివి ప్రస్తుత పరిస్థితికి పలు కారణాలు.
 
 తెలుగు రాష్ట్రాల్లో...
 కేంద్ర మానవ వనరుల అభివృద్ధి మంత్రిత్వ శాఖ పార్లమెంటుకు సమర్పించిన వివరాల ప్రకారం ఆంధ్రప్రదేశ్‌లో ప్రాథమిక పాఠశాలల్లో  మొత్తం 1,47,139 పోస్టులు ఉండగా, 19,468 పోస్టులు ఖాళీగా ఉన్నాయి. సెకండరీ స్కూళ్లలో మొత్తం 61,793 ఉపాధ్యాయ పోస్టులు ఉండగా, 5,056 పోస్టులు భర్తీ చేయాల్సి ఉంది. రాష్ట్రీయ మాధ్యమిక శిక్షా అభియాన్‌ (ఆర్‌ఎమ్‌ఎస్‌ఏ) కింద ఆమోదం తెలిపిన 860 స్పెషల్‌ ఎడ్యుకేటర్స్‌ పోస్టులకు సంబంధించి ఏ ఒక్కటీ భర్తీ కాలేదు.
 
 తెలంగాణలో...
 తెలంగాణలోని ప్రాథమిక పాఠశాలల్లో మొత్తం 97,507 ఉపాధ్యాయ పోస్టులు ఉండగా, 13,049 పోస్టులు ఖాళీగా ఉన్నాయి. ఇక సెకండరీ స్కూళ్లలో 43,746 పోస్టులు ఉండగా, 3,144 పోస్టులు భర్తీ చేయాల్సి ఉంది.
 
 ఏకైక రాష్ట్రం సిక్కిం..
 గోవా, ఒడిశా, సిక్కిం రాష్ట్రాల్లో ప్రాథమిక పాఠశాలల్లో ఖాళీలన్నవే లేవు. అసోం, హిమాచల్‌ ప్రదేశ్, మహారాష్ట్రల్లోని సెకండరీ స్కూళ్లలో వరుసగా 3.9%, 3.9%, 2% చొప్పున ఖాళీలున్నాయి. దేశంలో ప్రాథమిక, సెకండరీ స్కూళ్లలో అన్ని పోస్టులు భర్తీ చేసిన ఏకైక రాష్ట్రం సిక్కిం మాత్రమే!


 - ఏపీలో 19,468.. తెలంగాణలో 13,049 ఖాళీలు
 లోక్‌సభలో కేంద్ర మంత్రి ప్రకాశ్ జవదేకర్
 
 సాక్షి, న్యూఢిల్లీ: ఏపీ, తెలంగాణలోని పాఠశాలల్లో మౌలికవసతుల కొరతతో పాటు బోధన సిబ్బంది పోస్టుల ఖాళీలు భారీగా ఉన్నాయని కేంద్రప్రభుత్వం వెల్లడించింది. ఎంపీలు కొత్తపల్లి గీత, కొండా విశ్వేశ్వర్ రెడ్డి, నంది ఎల్లయ్య అడిగిన వేర్వేరు ప్రశ్నలకు కేంద్ర మంత్రి ప్రకాశ్ జవదేకర్ సోమవారం లోక్‌సభలో సమాధానం ఇచ్చారు.
 
 2016, మార్చి 31 నాటికి ఏపీలో 19,468 టీచర్ పోస్టులు, తెలంగాణలో 13,049 టీచర్ పోస్టులు ఖాళీగా ఉన్నాయని తెలిపారు. అలాగే 9, 10 తరగతులకు సంబంధించి ప్రభుత్వ సెకండరీ పాఠశాలల్లో ఏపీలో 5,056, తెలంగాణలో 3,144 టీచర్ పోస్టులు ఖాళీగా ఉన్నట్టు చెప్పారు.


 గ్రూప్-2 తర్వాత జారీకి టీఎస్‌పీఎస్సీ కసరత్తు
 సాక్షి, హైదరాబాద్: రాష్ట్రంలో వివిధ సంక్షేమ శాఖల పరిధిలోని గురుకులాల్లో ఖాళీగా ఉన్న ఉపాధ్యాయ పోస్టులు, కొత్త గురుకులాల్లో మంజూరు చేసిన దాదాపు 6 వేల పోస్టుల భర్తీకి ఒకేసారి నోటిఫికేషన్ జారీ చేసేందుకు టీఎస్‌పీఎస్సీ కసరత్తు చేస్తోంది. వచ్చే నెలలో నిర్వహించనున్న గ్రూప్-2 రాత పరీక్ష తర్వాతే నోటిఫికేషన్ జారీ చేసే అవకాశం ఉంది. మరోవైపు బాలికల కోసం ఏర్పాటు చేసిన గురుకులాల్లో మహిళలతోనే పోస్టులను భర్తీ చే సేలా టీఎస్‌పీఎస్సీ ఏర్పాట్లు చేస్తోంది.  
  


 ⇒ హేతుబద్ధీకరణ తరువాత టీచర్ల నియామకాలు - కడియం
 హైదరాబాద్: రాష్ట్రంలో కొత్త జిల్లాల ఏర్పాటు పూర్తయిన నేపథ్యంలో టీచర్ల హేతుబద్దీకరణపై దృష్టి సారించాలని ఉప ముఖ్యమంత్రి కడియం శ్రీహరి సూచించారు. ఈ ప్రక్రియను సాధ్యమైనంత త్వరగా పూర్తి చేయాలని, ఎన్ని పాఠశాలలు అవసరం, ఉపాధ్యాయ పోస్టులు ఎన్ని కావాలన్న అంశాలపై స్పష్టత వస్తుందన్నారు. మొత్తానికి వచ్చే జూన్‌లో స్కూళ్లు తెరిచేనాటికి పాఠశాలల్లో టీచర్లు ఉండేలా నియామకాలు పూర్తి చేస్తామని చెప్పారు. 10 వేలకు పైగా పోస్టులకు కేబినెట్ గతంలోనే ఆమోదం తెలిపినా కొత్త జిల్లాల ఏర్పాటు నేపథ్యంలో నియామకాలు ఆపామన్నారు. పాఠశాలలు, వాటిలో విద్యార్థులు, ఉపాధ్యాయుల సంఖ్య ప్రకారం హేతుబద్దీకరణకు సంబంధించిన అన్ని ప్రణాళికలను 15 రోజుల్లోగా సిద్ధం చేసుకొని తమకు పంపించాలని విద్యాశాఖ ప్రత్యేక ప్రధాన కార్యదర్శి రంజీవ్ ఆర్ ఆచార్య డీఈవోలకు సూచించారు.
 
 కొత్త జిలాల్లో నియమితులైన డీఈవోలు, అసిస్టెంట్ డెరైక్టర్లు, ఆర్జేడీలకు మూడు రోజుల పాటు నిర్వహించతలపెట్టిన అవగాహన కార్యక్రమాలను ఆదివారం హైదరాబాద్‌లో కడియం శ్రీహరి ప్రారంభించారు. ప్రభుత్వ, జిల్లాపరిషత్తు పాఠశాలలల్లో టీచర్ల నియామకాల్లో వెయిటేజీ ఉంటుందన్నారు. ఈ విద్యా సంవత్సరం ప్రారంభించిన 250 గురుకులాలు, వచ్చే విద్యా సంవత్సరంలో ప్రారంభించనున్న మరో 119 బీసీ, 90 మైనారిటీ గురుకులాల్లో మొత్తంగా 12వేల వరకు పోస్టుల్లో నిరుద్యోగులకు ఉద్యోగ అవకాశాలు లభిస్తాయన్నారు. ఎక్కడెక్కడ టీచర్లు అవసరమో డెరైక్టరేట్‌కు రాస్తే 24 గంటల్లో విద్యా వలంటీర్ల నియామకాలకు అనుమతిస్తామన్నారు.
 
 పాఠశాల్లో మౌలిక సదుపాయాల కల్పనకు రూ. కోటి చొప్పున ఇచ్చేందుకు 40 మంది ఎమ్మెల్యేలు ముందుకువచ్చారని, మిగితా వారికి లేఖలు రాస్తామన్నారు. 100 శాతం సిలబస్ పూర్తి చేసేలా చర్యలు చేపట్టాలన్నారు. ప్రైవేటు స్కూళ్లకు నోటీసులు ఇవ్వడం.. వారు కలిసి కవర్లు ఇవ్వగానే అన్ని బాగున్నాయని సర్టిఫై చేయడం వంటివి మానుకోవాలన్నారు. ఏకీకృత సర్వీసు రూల్స్ అంశం కొలిక్కి వచ్చిన వెంటనే రెగ్యులర్ డిప్యుటీఈవో, ఎంఈవో, డైట్ లెక్చరర్ పోస్టులను భర్తీ చేస్తామన్నారు. ఇతర జిల్లాలకు వెళ్లిన టీచర్లకు అప్షన్ ఇస్తామని, ఈ విద్యా సంవత్సరంలో 5 వేల ఇంగ్లిషు మీడియం స్కూళ్లు ప్రారంభించామని, వచ్చే ఏడాది మరో 5 వేల స్కూళ్లు ప్రారంభిస్తామన్నారు.


 • విద్యాశాఖ టీచర్లే కాదు.. గురుకుల టీచర్ల భర్తీ ఆలస్యమే
 • గ్రూపు-2 తరువాత భర్తీకి చర్యలు చేపట్టే అవకాశం
 • తేలని హేతుబద్ధీకరణ, టెట్ వెయిటేజీ..
 • విద్యాశాఖలో 11 వేల వరకు ఖాళీలు
 సాక్షి, హైదరాబాద్: రాష్ట్రంలో ఉపాధ్యాయ పోస్టుల భర్తీ మరికొన్నాళ్లు ఆలస్యం అయ్యే అవకాశం ఉంది. విద్యాశాఖ పరిధిలోని పాఠశాలల్లో ఖాళీగా ఉన్న దాదాపు 11 వేల టీచర్ పోస్టులే కాదు.. వివిధ గురుకుల సొసైటీల పరిధిలోని పాఠశాలల్లో ఖాళీగా ఉన్న, కొత్తగా సృష్టించిన దాదాపు 5 వేల టీచర్ల భర్తీకి కూడా మరికొంత సమయం పట్టనుంది. వాస్తవానికి గురుకుల టీచర్ల భర్తీకి  జూలైలోనే నోటిఫికేషన్ వస్తుందని భావించినా అది జరగలేదు.
 పోస్టులకు సంబంధించి ప్రభుత్వం నుంచి కొన్ని అనుమతులు ఇంకా రావాల్సి ఉండటం, ఉపాధ్యాయ అర్హత పరీక్ష (టెట్) విషయంలో స్పష్టత రావాల్సి ఉండటం, మరోవైపు వచ్చే నెలలో గ్రూపు-2 నిర్వహణకు సంబంధించిన పనుల్లో టీఎస్‌పీఎస్సీ బిజీగా ఉన్న నేపథ్యంలో గురుకుల టీచర్ పోస్టుల భర్తీ ప్రక్రియకు ఇంకొన్నాళ్లు సమయం పట్టనుంది. వీటికి సంబంధించి వచ్చే నెలాఖరుకు స్పష్టత వస్తే డిసెంబర్ నాటికి పోస్టుల భర్తీకి టీఎస్‌పీఎస్సీ చర్యలు చేపట్టే అవకాశం ఉంది.
 హేతుబద్ధీకరణ చిక్కు..: రాష్ట్రంలోని ప్రభుత్వ, జిల్లా పరిషత్ పాఠశాలల్లో ఖాళీగా ఉన్న ఉపాధ్యాయ పోస్టుల భర్తీ విషయంలో ప్రభుత్వం ఇంకా నిర్ణయమే తీసుకోలే దు. పాఠశాలలు, టీచర్ల హేతుబద్ధీకరణ తరువాతే వాస్తవ అవసరాల మేరకు భర్తీపై నిర్ణయం తీసుకోవాలని సర్కారు భావిస్తోంది. అందుకే 9,500 పైగా ఖాళీల్లో విద్యా వలంటీర్లను నియమించి బోధన కొనసాగిస్తోంది.
 మరోవైపు కొత్త జిల్లాల ఏర్పాటు నేపథ్యంలో అధికారులంతా అదే పనుల్లో బిజీ అయ్యారు. దీంతో హేతుబ ద్ధీకరణపై పెద్దగా దృష్టిసారించలేని పరిస్థితి నెలకొంది. వీలైతే సంక్రాంతి నాటికి లేదా వేసవి సెలవుల్లో హేతుబద్ధీకరణ చేపట్టే అవకాశం ఉంది. సంక్రాంతి సెలవుల్లో కనుక హేతుబద్ధీకరణ పూర్తయితే అప్పుడే టీచర ్ల భర్తీకి చర్యలు చేపట్టే వీలుంది. లేదంటే వేసవి సెలవుల తరువాతే ప్రభుత్వ స్కూళ్లలో టీచర్ల భర్తీకి చర్యలు చేపట్టే అవకాశం ఉంది.
 గురుకులాల్లో ఇదీ పరిస్థితి.. : రాష్ట్రంలోని గురుకుల పాఠశాలలు, జూనియర్, డి గ్రీ కాలేజీల్లో పోస్టుల భర్తీపై గతంలోనే ప్రభుత్వం దృష్టి సారించింది. అయితే అందులో అన్నింటికి సంబంధించిన అనుమతులు ఇంకా వెలువడలేదు. ఆరు నెలల కిందటే 2,444 పోస్టుల భర్తీకి ఆర్థిక శాఖ ఓకే చెప్పింది. ఆ తరువాత మరో 1,794 పోస్టుల భర్తీకి ఆమోదం తెలిపింది. ఆ తరువాత మరిన్ని పోస్టులకు ప్రభుత్వం ఆమోదం తెలిపింది. వాటికి సంబంధించిన ఉత్తర్వులు ఇంకా వెలువడాల్సి ఉంది. మరోవైపు సంబంధిత శాఖల నుంచి ఇండెంట్లు రావాల్సి ఉంది.
  అర్హత పరీక్షగానే టెట్?: ఇప్పటివరకు ఉపాధ్యాయ అర్హత పరీక్ష స్కోర్‌కు (టెట్) ఉపాధ్యాయ నియామకాల్లో 20 శాతం వెయిటేజీ ఉంది. కానీ ఇటీవల గురుకులాల్లో భర్తీ చేసే ట్రైన్డ్ గ్రాడ్యుయేట్ టీచర్ పోస్టుల పరీక్ష విధానంలో టెట్ అంశాన్ని ఎక్కడా ప్రస్తావించలేదు. దీంతో టీజీటీ పోస్టులకు టెట్ అవసరమా? లేదా? అన్న సందేహం నెలకొంది. అయితే టెట్‌ను కేవలం అర్హత పరీక్షగానే చూడాలని ప్రభుత్వం భావిస్తున్నట్లు తెలిసింది. టెట్ స్కోర్‌కు వెయిటేజీని తొలగించే అంశాన్ని పరిశీలిస్తున్నట్లు సమాచారం.
 విద్యాశాఖ మాత్రం టెట్‌లో అర్హత సాధించిన వారిని మాత్రమే రాత పరీక్షకు అనుమతించాలని పేర్కొంటోంది. జాతీయ ఉపాధ్యాయ విద్యా మండలి నిబంధనలను కచ్చితంగా అమలు చేయాల్సిందేనని, వెయిటేజీ ఇస్తారా? లేదా? అన్నది సంబంధిత యాజమాన్యాల ఇష్టమని, టెట్ మాత్రం తప్పనిసరిగా ఉండాల్సిందేనని పేర్కొంటోంది. ఈ నేపథ్యంలో దీనిపై కూడా ప్రభుత్వం నుంచి స్పష్టత రావాల్సి ఉంది.


 భర్తీ కోసం ప్రభుత్వానికి విద్యా శాఖ లేఖ
 సాక్షి, హైదరాబాద్: రాష్ట్రంలో విద్యా శాఖ పరిధిలోని గురుకుల విద్యాలయాల్లో 302 లెక్చరర్, టీచర్ల ఖాళీలున్నాయి. ఆయా పోస్టులను డెరైక్ట్ రిక్రూట్‌మెంట్ కోటా కింద భర్తీకి అనుమతివ్వాలని ప్రభుత్వానికి లేఖ రాసింది. రాష్ట్రంలోని 47 గురుకుల విద్యాలయాల్లో 802 మంజూరైన టీచర్ పోస్టులుండగా, అందులో 492 పోస్టులు ఖాళీగా ఉన్నాయి.  ఇందులో 179 పోస్టుల్లో సీఆర్‌టీలు పని చేస్తున్నారు. డెరైక్ట్ రిక్రూట్‌మెంట్ కోటాలో 302 ఖాళీలున్నట్లు విద్యాశాఖ లెక్కలు తేల్చింది.
  
  కేటగిరీల వారీగా ఖాళీల వివరాలు..
  కేటగిరీ    మంజూరైనవి    ఖాళీలు    భర్తీ చేయాల్సినవి
  జూనియర్ లెక్చరర్    66    10    6
  పీజీటీ    361    149    136
  టీజీటీ    247    224    74
  పీఈటీ    41    32    22
  ఆర్ట్/క్రాఫ్ట్/మ్యూజిక్    46    43    32
  స్టాఫ్ నర్స్    41    34    32
  మొత్తం    802    492    302
  


 న్యూఢిల్లీ: దేశవ్యాప్తంగా ప్రభుత్వ పాఠశాలల్లో ఖాళీగా ఉన్న ఐదు లక్షల ప్రాథమిక ఉపాధ్యాయుల పోస్టులను వెంటనే భర్తీ చేయాలని కోరుతూ కేంద్రం అన్ని రాష్ట్రాలకూ లేఖలు రాయనుంది. కేవలం ఒక ఉపాధ్యాయుడితో నడుస్తున్న పాఠశాలలు దేశంలో నేడు లక్ష ఉన్నాయి. ‘టీచర్ల స్థానాలు ఖాళీగా ఉండడం అనేది తీవ్ర సమస్య. ఉపాధ్యాయులను నియమించాల్సిన బాధ్యత రాష్ట్రాలది కాబట్టి వారే వీలైనంత త్వరగా టీచర్ల ఉద్యోగాలు భర్తీ చేయాలని కోరుతున్నాం’ అని కేంద్ర మానవ వనరుల అభివృద్ధి శాఖ మంత్రి ప్రకాష్ జవదేకర్ అన్నారు.
 
 సరైన మౌలిక సదుపాయాలు, మానవ వనరులు లేకుండా విద్యలో నాణ్యతను తీసుకురావడం కుదరదు కాబట్టి కేంద్రం ఈ సమస్యను పరిష్కరించేందుకు కృషి చేస్తోందని అధికారులు తెలిపారు. దేశవ్యాప్తంగా 33.08 లక్షల ప్రాథమిక స్థాయి టీచర్ల ఉద్యోగాలు మంజూరైతే ప్రస్తుతం 5.56 లక్షల స్థానాలు ఖాళీగా ఉన్నాయని మంత్రిత్వ శాఖ గతంలో పార్లమెంటులో తెలిపింది.


 * భవిష్యత్తులో డీఎస్సీలు కష్టమే
 * మరోవైపు 10 లక్షలకు చేరనున్న బీఎడ్, డీఎడ్‌ల సంఖ్య
 * 2030 నాటికి పరిస్థితులపై సక్సెషన్ ప్రణాళిక రూపొందించిన విద్యాశాఖ
 
 సాక్షి, హైదరాబాద్: రాష్ట్రంలో వచ్చే 15 ఏళ్లలో ఉపాధ్యాయ పోస్టులు, బీఈడీ, డీఎడ్ అభ్యర్థుల నిష్పత్తిలో భారీ వ్యత్యాసం ఏర్పడనుంది. లక్షలాది మంది అభ్యర్థులకు ఉద్యోగాలు లభించే పరిస్థితి లేదు. విద్యాశాఖలో రిటైర్‌మెంట్ ద్వారా 44,842 పోస్టులు మాత్రమే ఖాళీ కానున్నాయి. అంటే 2030 నాటికి వాటిని మాత్రమే భర్తీ చేసే అవకాశమున్నట్లు పాఠశాల విద్యాశాఖ నివేదిక రూపొందించింది.
 
 మరోవైపు రాష్ట్రంలోని బ్యాచిలర్ ఆఫ్ ఎడ్యుకేషన్(బీఎడ్), డిప్లొమా ఇన్ ఎలిమెంటరీ ఎడ్యుకేషన్(డీఎడ్) అభ్యర్థుల సంఖ్య మాత్రం 10 లక్షలకు చేరనుందని పేర్కొంది. సక్సెషన్ రిపోర్టు పేరుతో 2030 నాటికి రాష్ట్రంలో బీఎడ్, డీఎడ్ అభ్యర్థుల సంఖ్య, ఉపాధ్యాయ ఖాళీల సంఖ్యను అంచనా వేసింది. రాష్ట్రంలోని ప్రభుత్వ పాఠశాలల్లో 1.24 ల క్షల మంది, ప్రైవేటు పాఠశాలల్లో 1.10 లక్షల మంది ఉపాధ్యాయులు పనిచేస్తున్నారు. ప్రభుత్వ పాఠశాలల్లోని 44,842 మంది ఉపాధ్యాయులు 2030 నాటికి పదవీ విరమణ పొందనున్నారు. వారిలో బీఎడ్ అర్హతతో ఉద్యోగాలు పొందిన స్కూల్ అసిస్టెంట్లు దాదాపు 23 వేల మంది, మరో 21,482 మంది డీఎడ్ అర్హత కలిగిన సెకండరీ గ్రేడ్ టీచర్లు ఉండే అవకాశముంది.
 
 అయితే, పదవీ విరమణ పొందే స్కూల్ అసిస్టెంట్లలో 30 శాతం మందిని రిక్రూట్‌మెంట్ ద్వారా భర్తీ చేస్తారు. మిగతా 70 శాతం స్కూల్ అసిస్టెంట్ పోస్టులను సెకండరీ గ్రేడ్ టీచర్లతో పదోన్నతుల ద్వారా భర్తీ చేయాల్సి ఉంటుంది. ఈ లెక్కన వచ్చే 15 ఏళ్లలో రాష్ట్రంలో ఉపాధ్యాయ పోస్టుల భర్తీ రెండు, మూడుసార్లకు మించి చేపట్టే అవకాశం కనిపించడం లేదు.  
  
 10 లక్షలకు చేరనున్న అర్హులు
 రాష్ట్రంలో టెట్ పేపరు-1 లో అర్హత సాధించినవారు లక్షన్నర మంది ఉండగా, పేపరు-2లో అర్హత సాధిం చినవారు 2.5లక్షల మంది ఉన్నారు. టెట్ రాసేం దుకు సిద్ధంగా మరో 2 లక్షల మంది ఉన్నారు. అంటే  ఉపాధ్యాయ పోస్టుల కోసం ఎదురు చూస్తున్నవారు 5లక్షల వరకు ఉన్నారు. ఇక రాష్ట్రంలోని డీఎడ్, బీఎడ్ కాలేజీల నుంచి ఏటా 40 వేల మంది బయటకు వస్తున్నారు. 2030 నాటికి ఈ సంఖ్య 10 లక్షలు దాట నుంది. ప్రస్తుతం ప్రభుత్వ, ప్రైవేటు పాఠశాలల్లో 61 లక్షల మంది విద్యార్థులుండగా, జనాభా నియంత్రణ నేపథ్యంలో 2030 నాటికి ఆ సంఖ్యలో మార్పు లక్ష లోపే ఉండే అవకాశముంది. ఈ పరిస్థితుల్లో కొత్త పోస్టుల సృష్టి పెద్దగా ఉండే అవకాశం లేదు.


 ► భర్తీకి సీఎం కేసీఆర్ ఆమోదం
 ► ఇప్పటికే 2,444 పోస్టుల భర్తీకి టీఎస్‌పీఎస్‌సీ చర్యలు
 ► వీలైతే అన్నింటికీ కలిపి నెలాఖరులో నోటిఫికేషన్!
 ► నోటిఫికేషన్‌తోపాటే సిలబస్, పరీక్ష నిబంధనలు
  
 సాక్షి, హైదరాబాద్
 రాష్ట్రంలో వివిధ గురుకుల సొసైటీల పరిధిలోని పాఠశాలల్లో దాదాపు 4,500 పోస్టుల భర్తీకి ప్రభుత్వం సిద్ధమైంది. ఇప్పటికే 2,444 పోస్టుల భర్తీకి ఓకే చెప్పగా రాష్ట్రంలో కొత్తగా మంజూరు చేసిన 224 గురుకుల  పాఠశాలలు, 30 డిగ్రీ కాలేజీలకు 2 వేల పోస్టులు మంజూరు చేసేందుకు సీఎం గ్రీన్‌సిగ్నల్ ఇచ్చినట్లు తెలిసింది. ఈ పోస్టుల భర్తీకి సంబంధించిన ఫైలుపై ముఖ్యమంత్రి కె.చంద్రశేఖర్‌రావు సంతకం చేసినట్లు తెలిసింది. 224 గురుకుల పాఠశాలల్లో 103 ఎస్సీ గురుకులాలు, 71 మైనారిటీ గురుకులాలు, 50 ఎస్టీ గురుకులాలు ఉన్నాయి. ఇవి కాకుండా మరో 50 బీసీ గురుకులాల మంజూరు ప్రతిపాదన ప్రభుత్వ పరిశీలనలో ఉంది.
  
  ఈ నేపథ్యంలో పోస్టుల భర్తీకి ఈ నెలాఖరులో నోటిఫికేషన్ జారీ చేసేందుకు టీఎస్‌పీఎస్సీ కసరత్తు చేస్తోంది. పాఠశాలల్లో ట్రైన్డ్ గ్రాడ్యుయేట్ టీచర్ (టీజీటీ), పోస్టు గ్రాడ్యుయేట్ టీచర్  (పీజీటీ), ప్రిన్సిపాల్ పోస్టులు, కాలేజీల్లో జూనియర్ లెక్చరర్, డిగ్రీ లెక్చరర్ పోస్టుల భర్తీకి అవసరమైన పరీక్ష విధానాన్ని ప్రభుత్వం ఇప్పటికే ప్రకటించింది. దీంతో ఆయా పోస్టులకు సంబంధించి గురుకుల సొసైటీల నుంచి ఇండెంట్లు, రూల్ ఆఫ్ రిజర్వేషన్లు, రోస్టర్ వివరాలను తీసుకొని నోటిఫికేషన్ జారీ చేయాలని టీఎస్‌పీఎస్సీ భావిస్తోంది. ఈ ప్రక్రియకు మరో 15 రోజుల సమయం పట్టనుంది. మరోవైపు నియామక నిబంధనలు, సిలబస్ రూపకల్పన వంటి అంశాలపై దృష్టి సారించింది. ఈ ప్రక్రియ మొత్తాన్ని ఈ నెలాఖరుకల్లా పూర్తి చేసి నోటిఫికేషన్ జారీకి అవసరమైన చర్యలు చేపట్టాలని టీఎస్‌పీఎస్సీ అధికారులను చైర్మన్ ప్రొఫెసర్ ఘంటా చక్రపాణి ఆదేశించినట్లు తెలిసింది.
  
  ఈ నెలాఖరులో నోటిఫికేషన్ ఇచ్చే నాటికి సీఎం గ్రీన్ సిగ్నల్ ఇచ్చిన మరో 2 వేల పోస్టుల వివరాలు అందితే వాటిని కూడా కలిపి మొత్తంగా దాదాపు 4,500 పోస్టుల భర్తీకి టీఎస్‌పీఎస్‌సీ నోటిఫికేషన్ ఇచ్చే అవకాశం ఉంది. ఒకవేళ ఆ వివరాలు అందడం ఆలస్యమైతే తొలుత 2,444 పోస్టుల భర్తీకి నోటిఫికేషన్ జారీ చేసి ఆ తరువాత 2 వేల పోస్టులు వచ్చాక వాటిని అదే నోటిఫికేషన్ పరిధిలోకి తేవాలని భావిస్తోంది. మరోవైపు కేటగిరీలవారీగా పోస్టులకు నిర్వహించే పరీక్ష సిలబస్‌ను ముందుగా ప్రకటించాలని భావిస్తోంది. వీలుకాకపోతే నోటిఫికేషన్‌తోపాటు జారీ చేసే అవకాశం ఉంది.
  
  అర్హత పరీక్షగానే టెట్?
  ఇప్పటిరవకు ఉపాధ్యాయ అర్హత పరీక్ష (టెట్) స్కోర్‌కు ఉపాధ్యాయ నియామకాల్లో 20 శాతం వెయిటేజీ ఉంది. కానీ ప్రభుత్వం ప్రకటించిన ఇటీవల గురుకులాల్లో భర్తీ చేసే ట్రైన్డ్ గ్రాడ్యుయేట్ టీచర్ (టీజీటీ) పోస్టుల పరీక్ష విధానంలో టెట్ అంశాన్ని ప్రస్తావించలేదు. దీంతో టీజీటీ పోస్టులకు టెట్ అవసరమా లేదా అనే సందేహం నెలకొంది. అయితే టెట్‌ను కేవలం అర్హత పరీక్షగానే చూడాలని ప్రభుత్వం భావిస్తున్నట్లు తెలిసింది. టెట్ స్కోర్‌కు వెయిటేజీని తొలగించే అంశాన్ని పరిశీలిస్తున్నట్లు సమాచారం. మరోవైపు టె ట్ వెయిటేజీ అంశంపై ఒకట్రెండు రోజుల్లో స్పష్టత వచ్చే అవకాశం ఉంది. ఈ నెల 5న జరిగే టీఎస్‌పీఎస్సీ కమిషన్ సమావేశంలో దీనిపై చర్చించి నిర్ణయానికి వచ్చే అవకాశం ఉంది.


 ►కొత్త జిల్లాలు, పాత డీఎస్సీల వివాదాలతో జాప్యం
 ►అందుకే విద్యా వలంటీర్ల నియామకం
 ►పెరగనున్న విద్యా వలంటీర్ పోస్టులు
 ►9,335కి బదులు 11,428 పోస్టుల భర్తీ!
 ►మార్గదర్శకాలపై దృష్టిపెట్టిన విద్యాశాఖ
  
 సాక్షి, హైదరాబాద్: రాష్ట్రంలోని ప్రభుత్వ పాఠశాలల్లో ఖాళీగా ఉన్న 11,428 ఉపాధ్యాయ పోస్టుల భర్తీని ఇప్పట్లో చేపట్టే పరిస్థితి కనిపించడం లేదు. కొత్త జిల్లాల ఏర్పాటు, పాత డీఎస్సీల వివాదాలే ఇందుకు కారణంగా అధికారులు పేర్కొంటున్నారు. వాటికి సంబంధించిన సమస్యలు, వివాదాలను పరిష్కరించకుండా ముందుకు సాగడం కష్టమని చెబుతున్నారు. కొత్త జిల్లాల అంశాన్ని పక్కనబెట్టినా 1998 డీఎస్సీ నుంచి 2012 డీఎస్సీ వరకు ఆయా డీఎస్సీల్లో నష్టపోయిన అభ్యర్థులకు న్యాయం చేసే వ్యవహారం తేల్చకుండా కొత్త నియామకాలు చేపట్టే అవకాశం లేదంటున్నారు.
  
 ఒకవేళ బాధిత అభ్యర్థులను కాదని ముందుకు సాగితే వారంతా ఆందోళనకు దిగే అవకాశం ఉందన్న భావన అధికారుల్లో నెలకొంది. పైగా ఒక్కో డీఎస్సీలో ఒక్కో రకమైన సమస్యలతో అభ్యర్థులు నష్టపోయిన వారూ ఉన్నందున, వారందరికీ ఇప్పటికిప్పుడు న్యాయం చేయడం సాధ్యం కాదని అధికారులు భావిస్తున్నారు. ముఖ్యంగా 1998 డీఎస్సీలో నష్టపోయిన వారికి న్యాయం చేస్తామని సీఎం కేసీఆర్ ఏడాదిన్నర కిందట స్వయంగా వరంగల్‌లో అభ్యర్థులకు హామీ ఇవ్వడం, ఆ తరువాత అన్ని డీఎస్సీల్లో నష్టపోయిన వారికి న్యాయం చేసే అంశాన్ని తేల్చాలని అధికారులను ఆదేశించడం తెలిసిందే. ఈ నేపథ్యంలో వారి అంశాన్ని తేల్చకుండా టీచర్ల నియామకాల్లో ముందుకు సాగడం సాధ్యం కాదన్న భావనకు అధికారులు వచ్చినట్లు సమాచారం.
  
 వలంటీర్లతోనే సరి...: పాత డీఎస్సీల వ్యవహారం, జిల్లాల పునర్విభజన అంశాలతోపాటు పాఠశాలలు, టీచర్ల హేతుబద్ధీకరణను ప్రభుత్వం ప్రస్తుతం చేపట్టాల్సి ఉంది. ఇప్పటికే 1,604 పాఠశాలల్లో ఒక్క టీచర్ కూడా లేరని విద్యాశాఖ ఇటీవల బడిబాట సందర్భంగా తేల్చింది. అయితే కిలోమీటరు పరిధిలోని ప్రాథమిక పాఠశాలల విలీనం, ప్రాథమికోన్నత పాఠశాలలను ఉన్నత పాఠశాలల్లో విలీనం చేయడం వంటి అంశాలను తేల్చాల్సి ఉంది. ఇందుకోసం హేతుబద్ధీకరణ చేపట్టాలని విద్యాశాఖ భావిస్తోంది.
  
  ఈ నెల 30 వరకు వచ్చే విద్యార్థుల వివరాలను తీసుకొని జూలై మొదటి వారంలో హేతుబద్ధీకరణ మార్గదర్శకాలను రూపొందించాలనుకుంటోంది. ఈ పరిస్థితుల్లో హేతుబ ద్ధీకరణ తరువాత స్పష్టంగా ఎంత మంది ఉపాధ్యాయులు అవసరమన్నది తేలుతుందని ఓ ఉన్నతాధికారి పేర్కొన్నారు. ఇవన్నీ పూర్తి కావాలంటే నెలల తరబడి సమయం పడుతుందని, అందుకే ముందుగా విద్యా వలంటీర్లను నియమించాలని నిర్ణయించామన్నారు. ఇందుకోసం సోమవారం నిర్ణయించిన 9,335 వలంటీర్ల నియామకాలకు బదులుగా 11,428 క్లియర్ వెకెన్సీలలో వలంటీర్ల నియామకాలు చేపట్టేందుకు మార్గదర్శకాల రూపకల్పనపై విద్యాశాఖ కసరత్తు చేస్తోంది.
  
  ఇవీ జిల్లాల వారీగా నియమించే విద్యా వలంటీర్లు
  జిల్లా               వలంటీర్లు
  ఆదిలాబాద్        1,582
  నిజామాబాద్        790
  కరీంనగర్        915
  వరంగల్        690
  ఖమ్మం            895
  నల్లగొండ        817
  మహబూబ్‌నగర్    2,023
  రంగారెడ్డి        1,670
  హైదరాబాద్        539
  మెదక్            1,507
  మొత్తం            11,428


 జిల్లాలో పెరుగుతున్న నిరుద్యోగ ఉపాధ్యాయులు
 శిక్షణ పొందినా  దక్కని ఉద్యోగం
 రేషనలైజేషన్‌తో మరింత ముప్పు
 ఏటా భర్తీకాని టీచర్ పోస్టులు
 చిరుద్యోగులుగా మిగిలిపోతున్న అభ్యర్థులు
  
 భావితరాలకు విద్యాబుద్ధులు నేర్పేది ఉపాధ్యాయులే. అందుకే ఆచార్యదేవో భవ ! అన్నారు పెద్దలు. అటువంటి ఉన్నతమైన వృత్తిపై ఉన్న మక్కువతో జిల్లాలో వేలాది మంది  ఉపాధ్యాయ శిక్షణ పూర్తి చేశారు. అంతకు ముందు ఇతర కోర్సుల్లో అవకాశం వచ్చినా కాదనుకున్నారు. చివరకు స్థిరపడాలనుకున్న రంగంలో ఉద్యోగం లభించక కుటుంబ పోషణకోసం ప్రయివేటు సంస్థల్లో చిరుద్యోగులుగా మారుతున్నారు.  జిల్లాలో ఉపాధ్యాయ శిక్షణ ముగించుకుని ఏటా ఆరువేల మంది బయటికొచ్చి ఉపాధి వేటలో విసిగివేసారిపోతున్నారు.
  
 చిత్తూరు:  ఉపాధ్యాయ శిక్షణ ముగించుకుని ఎన్నో ఆశలతో వ్యవస్థలోకి వచ్చే వారికి చదువుకు తగ్గ ఉద్యోగం దొరకడం లేదు. దీంతో వారు నిరాశకు గురవుతున్నారు. మారుమూల మండలాలు గ్రామాల్లోని ప్రైవేటు పాఠశాలల్లో ఉద్యోగం దొరికినా ఆ యాజమాన్యం ఇచ్చే చాలీచాలని జీతానికి అంగీకరించి వెళ్తున్నారు. ఇళ్లు గడవడం కోసం కొంతమంది సెక్యూరిటీ గార్డులు, వారి కుల వృత్తుల్లో ఉపాధి వెతుక్కుంటున్నారు. మరికొంత మంది వ్యసాయం చేసుకుంటున్నారు. ఇదిలానే కొనసాగితే రాబోయే కాలంలో  ఉపాధ్యాయ వృత్తిని ఎంచుకునే వారు ఉండరని ఉపాధ్యాయ సంఘాల ప్రతినిధులు వ్యాఖ్యానిస్తున్నారు.
  
 కొంప ముంచుతున్న ప్రభుత్వ నిర్ణయం...
 ప్రభుత్వం అనాలోచిత నిర్ణయాలు ఉపాధ్యాయ నిరుద్యోగులకు శాపమవుతున్నాయి. టీటీసీ శిక్షణ తీసుకున్న వారు మాత్రమే సెకండరీ గ్రేడ్ టీచర్ పోస్టులకు అర్హులని నిబంధన విధించడంతో ఇబ్బందులు మొదలయ్యాయి. బీఈడీ శిక్షణ తీసుకున్న వారందరూ ఎక్కువ శాతం నిరుద్యోగులుగా మిగులుతున్నారు. టీటీసీ పూర్తి చేసుకున్న వారు ప్రతి సంవత్సరం 2500 మంది. గత 13 సంవత్సరాల్లో సెకండరీ గ్రేడ్ టీచర్ పోస్టులు ప్రభుత్వం భర్తీ చేసింది 3200 ఉద్యోగాలు మాత్రమే. ఈ 13 సంవత్సరాల్లో 32500 మంది శిక్షణ ముగించుకొని ఉద్యోగ వేటకు వచ్చారు. ప్రస్తుతం జిల్లాలో ఉన్న డీఎడ్ కాలేజీలు 51. ఈ కాలేజీల్లో సీట్లు సుమారుగా 7 వేలు. ఈ సీట్లలో కేవలం 4500 మంది మాత్రమే ఉపాధ్యాయ శిక్షణ తీసుకుంటున్నారు. 2500 సీట్లు ఖాళీగా మిగులుతున్నాయి.
  
 రేషనలైజేషన్‌తో...
 ప్రభుత్వం రేషనలైజేషన్ విధానం అమలు చేస్తే ఉపాధ్యాయ నిరుద్యోగులు మరింత పెరిగే అవకాశం ఉంది. ఉన్న స్కూళ్లను మూసివేస్తుండటంతో కొత్త నోటిఫికేషన్లు విడుదల చేసేందుకు ప్రభుత్వం విముఖత చూపే అవకాశం ఉంది. దీంతో ఉపాధ్యాయ శిక్షణ తీసుకున్నా ఇతర మార్గాలు వెతుక్కోవాల్సి వస్తోంది.
  
 తమిళనాడు విధానమే మేలు..
 టీచర్ ఉద్యోగాల అమలులో తమిళనాడు విధానం మేలని ఉపాధ్యాయ సంఘాలు అంటున్నాయి. కళాశాలలన్నీ ప్రభుత్వ నియంత్రణలోనే ఉంటే శిక్షణ బాగుంటుంది. తమిళనాడులో ఉపాధ్యాయ ఉద్యోగాలన్నీ ఎంప్లాయ్‌మెంట్ ఎక్ఛేంజ్ ద్వారా భర్తీ చేస్తారు. సీనియార్టీ ఉన్న వారికి ఉద్యోగం తప్పనిసరిగా వస్తుంది. ఉపాధ్యాయ నిరుద్యోగి కూడా కచ్చితంగా ఉద్యోగం వస్తుందని ధీమాతో ఉంటాడని ఉపాధ్యాయ సంఘాలు పేర్కొన్నాయి.
  
 కొరియర్‌బాయ్‌గా పని చేస్తున్నా
 డీఈడీ పూర్తి చేసి మూడేళ్లయింది. ఈ మూడేళ్లలో కేవలం ఒకసారి టీచర్ నోటిఫికేషన్ విడుదల చేసింది. ప్రైవేటు ఉపాధ్యాయుడిగా పని చేద్దామంటే రూ.5 వేల జీతం కూడా ఇవ్వరు. పూట గడవడం కష్టం. కొరియర్‌బాయ్‌గా పని చేస్తున్నా. రేషనలైజేషన్ అమలు చేస్తే టీచర్ ఉద్యోగం ఇక దొరకదు. అనవసరంగా డీఎడ్ చేశాను అనిపిస్తోంది.  -మహేశ్, చిత్తూరు.
  
 సీనియార్టీ విధానం అమలు చేయాలి
 పరీక్ష విధానం తీసేసి ఉపాధ్యాయుల్ని ఎంపిక చేసే ప్రక్రియలో సీనియార్టీ ప్రకారం ఉద్యోగాలిస్తే మేలు. నిరుద్యోగులకు ఎప్పుడు ఉద్యోగం వ స్తుందో ఒక అంచనా ఉంటుం ది. టీచర్ ఉద్యోగం అవసరం అయిన వారు ఎదురు చూస్తారు. అవసరం లేని వారు ఇంకో ఉపాధి మార్గం ఎంచుకుంటారు. ఉపాధ్యాయ పోస్టులు ఎప్పటికప్పుడు భర్తీ చేయాలి.  -వీ. రెడ్డిశేఖర్‌రెడ్డి, రాష్ట్ర అసోసియేట్ అధ్యక్షుడు, వైఎస్సార్ టీఎఫ్
  
  


 కాచిగూడ: డీఎస్సీ ద్వారానే ఉపాధ్యాయ పోస్టులను భర్తీ చేయాలని ఎమ్మెల్యే జి.కిషన్‌రెడ్డి ప్రభుత్వాన్ని డిమాండ్ చేశారు. బర్కత్‌పురలోని బిఆర్‌కేఆర్ హైస్కూల్‌లో శుక్రవారం జరిగిన అంబర్‌పేట నియోజకవర్గం పాఠశాల ప్రధానోపాధ్యాయుల సమావేశంలో ఆయన మాట్లాడుతూ... ఉపాధ్యాయ పోస్టులను టీపీఎస్‌సీ ద్వారా భర్తీ చేస్తే హైదరాబాద్‌కు తీవ్ర అన్యాయం జరిగే అవకాశం ఉందన్నారు. ప్రభుత్వ పాఠశాలల్లో మౌలిక వసతులను కల్పించి ఉత్తమ ఫలితాలు తీసుకువచ్చే విధంగా కృషి చేయాలని కోరారు.
 టీఆర్‌ఎస్ ప్రభుత్వం అధికారంలోకి వచ్చి రెండు సంవత్సరాలు గడుస్తున్నా పాఠశాలల్లో మౌలిక వసతులు కల్పించడంలో పూర్తిగా విఫలమైందని, సీఎం కేసీఆర్ మాటలకే పరిమితమయ్యారని విమర్శించారు. 2016 సంవత్సరంలో పదో తరగతిలో అంబర్‌పేట నియోజకవర్గం పరిధిలో 80 శాతం ఉత్తీర్ణత నమోదైందని, వచ్చే విద్యా సంవత్సరంలో 100 శాతం ఉత్తీర్ణత సాధించే దిశగా కృషి చేస్తామని తెలిపారు. ఈ కార్యక్రమంలో డిప్యూటీ డీఈఓ సురేష్ కుమార్ ఇతర అధికారులు పాల్గొన్నారు.


 టీఎస్‌పీఎస్సీ ద్వారా భర్తీకి సర్కారు ఆదేశం
  
 సాక్షి, హైదరాబాద్: రాష్ట్రంలోని వివిధ గురుకుల  విద్యాలయాల్లో ఖాళీగా ఉన్న 2,444 టీచర్ పోస్టులను భర్తీ చేయాలని ప్రభుత్వం నిర్ణయించింది. రాష్ట్ర పబ్లిక్ సర్వీస్ కమిషన్ (టీఎస్‌పీఎస్సీ) ద్వారా ఈ పోస్టులను భర్తీ చేయనుంది. ఈ మేరకు అవసరమైన చర్యలు చేపట్టాలంటూ బుధవారం టీఎస్‌పీఎస్సీని ఆదేశించింది. సాంఘిక సంక్షేమ గురుకులాల్లోని 758 ఉపాధ్యాయ పోస్టులు, బీసీ సంక్షేమ శాఖ పరిధిలోని  గురుకులాల్లోని 307, రాష్ట్ర ప్రభుత్వ గురుకులాల్లోని 313, గిరిజన గురుకులాల్లోని 436, మైనారిటీ గురుకులాల్లోని 630 పోస్టులను భర్తీ చేయనుంది.
 
 టీచర్ పోస్టుల భర్తీ టీఎస్‌పీఎస్సీకే!
 ఇప్పటివరకు విద్యాశాఖ నేతృత్వంలో, గురుకులాల సొసైటీల ఆధ్వర్యంలో వాటి పరిధిలోని ఉపాధ్యాయ పోస్టులను భర్తీ చేశారు. కానీ ఇకపై అన్ని విభాగాల్లోని ఉపాధ్యాయ పోస్టులను టీఎస్‌పీఎస్సీ ద్వారానే భర్తీ చేసే అవకాశం ఉంది. ఈ అంశంపై ఇప్పటికే సీఎం స్థాయిలో చర్చ జరిగింది. ప్రభుత్వ పాఠశాలల్లోని ఖాళీల భర్తీని విద్యాశాఖ ఆధ్వర్యంలో జిల్లా ఎంపిక కమిటీల (డీఎస్సీ) ద్వారా చేపట్టడంతో... జిల్లాల్లో కలెక్టర్లు, విద్యాశాఖ అధికారులు నోటిఫికేషన్ జారీ నుంచి భర్తీ చేసేదాకా ఆ ప్రక్రియపైనే పనిచేయాల్సి వస్తోంది. దాంతో ఇతర విద్యా సంబంధ కార్యక్రమాలు నిలిచిపోతున్నాయి.
 దాంతోపాటు జిల్లా విద్యాశాఖ కార్యాలయాల్లో ఆరు నెలల పాటు పాలన స్తంభించిపోతోంది. అకడమిక్ కార్యక్రమాలను పట్టించుకునేవారు లేకుండా పోతున్నారు. ఈ నేపథ్యంలో ప్రభుత్వం టీచర్ పోస్టుల భర్తీని టీఎస్‌పీఎస్సీకి అప్పగించాలని యోచిస్తోంది. ఇక ప్రభుత్వ పాఠశాలల్లోని దాదాపు 12 వేల పోస్టుల భర్తీకి సంబంధించిన ఫైలు ప్రస్తుతం ముఖ్యమంత్రి వద్ద ఉంది. ఆ పోస్టుల భర్తీకి త్వరలోనే గ్రీన్‌సిగ్నల్ రానుంది. వాటి భర్తీని కూడా టీఎస్‌పీఎస్సీకే అప్పగించే అవకాశం ఉంది.


 పాఠశాలలు..
 మొత్తం పాఠశాలలు : 2899
 ప్రాథమిక పాఠశాలలు  : 1972
 ప్రాథమికోన్నత. : 423
 ఉన్నత పాఠశాలలు  : 504
 మొత్తం విద్యార్థులు  : 3.12 లక్షలు
  
 పోస్టుల వివరాలు
 స్కూల్ అసిస్టెంట్లు  : 155
 ఎస్‌జీటీలు : 941
 లాంగ్వేజ్ పండిట్  : 148
 (తెలుగు: 68, హిందీ: 48, ఉర్దూ: 03, పీఈటీ: 29)
 మొత్తం    : 1244
  
 త్వరలో డీఎస్సీ!
 * నోటిఫికేషన్ కోసం ఎదురుచూపు
 * పోటీకి సిద్ధమవుతున్న అభ్యర్థులు
 * జిల్లాలో ఖాళీ టీచర్ పోస్టులు 1244
 * విద్యాశాఖ డెరైక్టరేట్‌కు అందిన ఖాళీల వివరాలు
  
 జోగిపేట: నిరుద్యోగులకు తీపి కబురు.. తెలంగాణ రాష్ట్రం ఏర్పడిన తర్వాత మొదటిసారిగా ఖాళీగా ఉన్న ఉపాధ్యాయ పోస్టుల భర్తీపై ప్రభుత్వం దృష్టి సారించింది. డిసెంబర్ నెలాఖరు లేదా జనవరిలో డీఎస్సీ నోటిఫికేషన్ జారీ చేసే అవకాశం కనిపిస్తున్న నేపథ్యంలో ఎన్నో ఏళ్లుగా ఎదురు చూస్తున్న జిల్లా నిరుద్యోగుల్లో ఆశలు చిగురిస్తున్నాయి.
 
 జిల్లా విద్యాశాఖ అధికారులు ఇప్పటికే పాఠశాల విద్యాశాఖ డెరైక్టర్‌కు ఖాళీలకు సంబంధించిన వివరాలు అందజేశారు. ఇప్పటికే అవసరమైన స్కూళ్లలో 1104 విద్యా వలంటీర్లను నియమించారు. ఉపాధ్యాయుల కొరత కారణంగా విద్యా వ్యవస్థ కుంటుపడుతోంది.
  
 వేల సంఖ్యలో నిరుద్యోగులు
 చివరిసారిగా 2012లో డీఎస్సీని ప్రభుత్వం నిర్వహించింది. మూడేళ్ల విరామం తర్వాత తెలంగాణ రాష్ట్రంలో తొలిసారిగా ఉపాధ్యాయ పోస్టులు భర్తీ కానున్నాయి. ఎస్‌జీటీ పోస్టులకు బీఈడీ అభ్యర్థులు అనర్హులు కావడంతో జిల్లాలో డీఈడీ కళాశాలల సంఖ్య కూడా బాగా పెరిగింది. ఈ మూడేళ్లలో డీఈడీ, బీఈడీ పూర్తి చేసిన అభ్యర్థులు వేల సంఖ్యలో ఉన్నారు. వీరితో పాటు గతంలోనే కో ర్సులు పూర్తి చేసి ఉద్యోగాలు రాక వెయిటింగ్ జాబితాలోఉన్ననిరుద్యోగులుపోటీలో ఉన్నారు.
  
 అప్‌గ్రేడ్‌తో పోస్టులు పెరిగే చాన్స్..
 ఈ ఏడాది జూలైలో విద్యాశాఖ చేపట్టిన ఉపాధ్యాయ పోస్టుల హేతుబద్ధీకరణలో విద్యార్థుల సంఖ్యకు అనుగుణంగా పాఠశాలల్లో పోస్టులను సర్దుబాటు చేశారు. పాఠశాలల్లో చాలాచోట్ల విద్యార్థుల సంఖ్య పడిపోవడంతో పోస్టులు మిగిలిపోయినట్లు సమాచారం. ఉన్నత పాఠశాలల్లో బయోసైన్స్, హిందీ, సాంఘిక శాస్త్రం, భౌతిక శాస్త్రం సబ్జెక్టులకు సీట్ల కొరత ఉంది.
 
 అప్‌గ్రేడ్ చేసిన స్కూల్ అసిస్టెంట్ పోస్టులను డీఎస్సీ ద్వారా భర్తీ చేసే అవకాశం ఉందని అధికారులు అంటున్నారు. అంతే కాకుండా సగం శాతం వరకు ఉన్నత పాఠశాలల్లో పీడీ పోస్టులు ఖాళీగా ఉన్నాయి. ఎస్‌జీటీ పోస్టులను అప్‌గ్రేడ్ చేసి పీడీ పోస్టులకు మార్చుకునే వీలుందని అధికారులు అంటున్నారు. డీఎస్సీలో స్కూల్ అసిస్టెంట్ పోస్టులు పెరిగి పాఠశాలల్లో సబ్జెక్టు టీచర్ల కొరత తగ్గుతుందని భావిస్తున్నారు.
  
 సంతోషకరం
 ఇన్నేళ్ల తర్వాత డీఎస్సీ నోటిఫికేషన్ విడుదల చేసేందుకు ప్రభుత్వం కసరత్తు చేయడం సంతోషకరం. అయితే పోస్టుల సంఖ్యను పెంచాలి. టెట్, డీఎస్సీని వేర్వేరుగా నిర్వహిస్తామని ప్రభుత్వం ప్రకటించింది. జాప్యం లేకుండా నోటిఫికేషన్ విడుదల చేయాలి.
 - రాజు, డీఎస్సీ అభ్యర్థి
  
 సిలబస్‌పై స్పష్టత ఇవ్వాలి
 డీఎస్సీ నోటిఫికేషన్ విడుదల చేస్తామని ప్రకటించడం సంతోషకరం. అయితే ఇప్పటి వరకు సిలబస్‌పై స్పష్టత ఇవ్వలేదు. ఏం చదువుకోవాలనేది తెలియని పరిస్థితి. గ్రూప్స్ సిలబస్ ప్రకటించినట్లుగా డీఎస్సీకి సంబంధించి కూడా సిలబస్ ప్రకటించాలి.
 - కవిత, డీఎస్సీ అభ్యర్థి


 సాక్షి, హైదరాబాద్: రాష్ట్రంలో కొత్తగా ఉద్యోగాలివ్వడం మాట అటుంచి ఉన్న పోస్టులకూ ప్రభుత్వం ఎసరు పెడుతోంది. ఉపాధ్యాయ నియామక పరీక్ష(డీఎస్సీ) ఫలితాలు విడుదలై నెలలు దాటుతున్నా నియామకాలు చేపట్టని ప్రభుత్వం.. అంతకుముందే రేషనలైజేషన్ పేరిట ఏడువేలకుపైగా సెకండరీగ్రేడ్ టీచర్(ఎస్జీటీ) పోస్టులకు కోత పెట్టబోతోంది. జిల్లాల విద్యాశాఖ అధికారులు ఇప్పటికే దీనిపై కసరత్తు పూర్తిచేశారు.
  
 రేషనలైజేషన్‌లో భాగంగా..
 పాఠశాలల రేషనలైజేషన్లో భాగంగా కిలోమీటర్ పరిధిలో 30 మందికన్నా తక్కువమంది ఉన్న ప్రాథమిక పాఠశాలల్ని ఇతర పాఠశాలల్లో విలీనం చేస్తున్నారు. అలా దాదాపు 3,500కుపైగా పాఠశాలల్ని ఇతర పాఠశాలల్లో విలీనం చేయాలని భావించారు. రాజకీయ నేతలనుంచి అభ్యంతరాలొచ్చిన నేపథ్యంలో ఎస్సీ, ఎస్టీ కాలనీలు, రైల్వేట్రాక్‌లు, వాగులు, నదులు దాటి వెళ్లాల్సినచోట మినహాయిస్తున్నారు. అయినప్పటికీ మూతపడే స్కూళ్ల సంఖ్య 2 వేలకుపైగానే. ఫలితంగా పలు విలీన స్కూళ్లల్లోని టీచర్ పోస్టులు మిగులు పోస్టులుగా మారుతున్నాయి.
 
 ఆ మేరకు ప్రతి జిల్లాలో వందలాది ఎస్జీటీపోస్టులు అదనంగా ఉన్నట్లు తేల్చారు. ఉదాహరణకు రాష్ట్రంలో అతిచిన్న జిల్లా అయిన విజయనగరం జిల్లాలో 441 ఎస్జీటీ పోస్టులు మిగులు ఉన్నట్లుగా చూపించారు. సీఎం చంద్రబాబునాయుడు సొంత జిల్లా అయిన చిత్తూరులో 877 పోస్టులు, కృష్ణా జిల్లాలో 720 పోస్టులు, కర్నూలులో 234.. ఇలా ప్రతి జిల్లాలో సగటున 500 వరకు ఎస్జీటీ పోస్టులు అదనంగా ఉన్నట్లు లెక్కగట్టారు. ఈ పోస్టులన్నిటికీ కోతపెడుతున్నారు. ఇలా రాష్ట్రవ్యాప్తంగా 7వేలకుపైగా టీచర్‌పోస్టులు రద్దు కానున్నాయి.
  
 కోత పెరిగే చాన్స్..
 ఏడు వేల టీచర్ పోస్టుల లెక్క కేవలం పంచాయతీరాజ్ పరిధిలోని మండల పరిషత్ ప్రాథమిక పాఠశాలలు, ప్రాథమికోన్నత పాఠశాలల్లోని ప్రైమరీ తరగతుల వరకు మాత్ర మే.మున్ముందు జెడ్పీ ఉన్నత పాఠశాలల్లోని పోస్టుల్నీ రేషనలైజేషన్ చేస్తే కోత పెరగనుంది. మున్సిపల్, ప్రభుత్వ ఎయిడెడ్, విభాగాల స్కూళ్లూ కలిపితే ఒక్క విద్యాశాఖలోనే 10 వేలకుపైగా పోస్టులు మిగులు జాబితాలో చేరిపోనున్నాయి.
  
 ఉపాధ్యాయ సంఘాల  ఆందోళన..
 తాజా వ్యవహారంపై ఉపాధ్యాయ సంఘాలు ఆందోళన చెందుతున్నాయి. మిగులు పోస్టుల్లో ఉన్న టీచర్లను ఇతర శాఖల్లోకి మళ్లించే ప్రమాదముందని భయపడుతున్నాయి. పంచాయతీరాజ్‌శాఖ పరిధి స్కూళ్లలోని అదనపు టీచర్లను పంచాయతీ కార్యదర్శులుగా నియమించే యోచనుందని, దీనిపై నివేదిక సమర్పించాలని ఆ శాఖ మంత్రి అయ్యన్నపాత్రుడు అధికారుల్ని ఆదేశించడం గమనార్హం. ఈ పరిణామాలు అందరిలో కలకలం రేపుతున్నాయి.


 గురుపూజోత్సవంలో ముఖ్యమంత్రి చంద్రబాబు
  
  సాక్షి, విశాఖపట్నం : ‘‘విద్యాభివృద్ధి బాధ్యత ప్రభుత్వానిది మాత్రమే కాదు.. రాష్ట్రంలో విద్యాసంస్థల ఏర్పాటుకు ముందుకు రావాలని దాతలను కోరుతున్నా. వారితోపాటు ఎమ్మెల్యేలు, ఎంపీలు ఒక్కో రూ.కోటి చొప్పున ఇస్తే కనీసం రూ.వంద కోట్లవుతుంది. ఆ సొమ్ముతో విశ్వవిద్యాలయాలను అభివృద్ధికి చేయొచ్చు. దయచేసి సహకరించండి‘’ అని ముఖ్యమంత్రి చంద్రబాబు పిలుపునిచ్చారు. విశాఖపట్నంలోని ఆంధ్ర విశ్వవిద్యాలయంలో శనివారం రాష్ట్రస్థాయి గురుపూజోత్సవంలో ఆయన ప్రసంగించారు. విదేశాల్లో విశ్వవిద్యాలయాలకు కార్పొరేట్ సామాజిక బాధ్యత(సీఎస్‌ఆర్) కింద రూ.కోట్ల నిధులు వస్తున్నాయని చెప్పారు. మన రాష్ట్రంలోనూ ఆ తరహా దాతలు ముందుకు రావాలని కోరారు. ఏపీని నాలెడ్జ్ హబ్‌గా మారుస్తానని ప్రకటించారు.
 
  టీచర్ పోస్టులు భర్తీ చేస్తాం
  వచ్చే ఏడాది ఆరంభానికల్లా టీచర్ పోస్టులన్నీ భర్తీ చేస్తామని, అన్ని పాఠశాలల్లో వసతులు కల్పిస్తామని సీఎం తెలిపారు. సంక్షేమ హాస్టళ్ల సంఖ్యను తగ్గించి, రెసిడెన్షియల్ స్కూళ్లను పెంచుతామన్నారు. ఈ సందర్భంగా స్కిల్ డెవలప్‌మెంట్ కోసం టాటా ఇనిస్టిట్యూట్ ఆఫ్ సోషల్ సెన్సైస్ సంస్థతో అవగాహన ఒప్పందం కుదుర్చుకున్నారు. ఏపీఎంహెచ్‌ఆర్‌డీ వెబ్‌సైట్‌ను సీఎం ప్రారంభించారు.
 
  ఉత్తమ ఉపాధ్యాయులకు పురస్కారాలు
  గురు పూజోత్సవం సందర్భంగా రాష్ట్రంలోని వివిధ పాఠశాలలు, కళాశాలలు, విశ్వవిద్యాలయాలకు చెందిన 158 మంది గురువులకు సీఎం పురస్కారాలను ఇచ్చి సత్కరించారు.
 
  షార్ట్ సర్క్యూట్‌తో సభలో పొగలు
  గురుపూజోత్సవ సభలో విద్యుత్ షార్ట్ సర్క్యూట్ జరిగి పొగలు వ్యాపించాయి. విద్యుత్ సిబ్బంది అప్రమత్తం కావడంతో ఘోర ప్రమాదం తప్పింది. సిబ్బంది వచ్చి విద్యుత్ సరఫరాను నిలిపివేశారు. ప్రమాదం లేదని, ఎవరూ ఆందోళన చెందవద్దని వేదికపై నుంచి అధికారులు మైక్‌లో ప్రకటించారు.


 ♦ ఉపాధ్యాయ ఖాళీల భర్తీకి సర్కారు నిర్ణయం
 ♦ 10 వేల వరకు పోస్టులు ఉండే అవకాశం!
 ♦ వచ్చే విద్యా సంవత్సరంలో కొత్త టీచర్లు
 ♦ అప్పటివరకు విద్యా వలంటీర్లతో బోధన
 ♦ వచ్చేనెల 10 నాటికి 7,983 మంది వీవీల నియామకం
 ♦ రూ. 8 వేల వేతనంతో మండలం యూనిట్‌గా భర్తీ
 ♦ రెండు, మూడు రోజుల్లో ఉత్తర్వులు
  
 హైదరాబాద్: రాష్ట్రవ్యాప్తంగా ఉన్న ఉపాధ్యాయ అభ్యర్థులకు శుభవార్త. వచ్చే ఏడాది ప్రారంభంలోనే ప్రభుత్వ పాఠశాలల్లో ఉపాధ్యాయ పోస్టులను భర్తీచేయాలని రాష్ట్ర ప్రభుత్వం నిర్ణయించింది. ఈ మేరకు జనవరి లేదా ఫిబ్రవరి నెలల్లో డీఎస్సీ నోటిఫికేషన్‌ను జారీ చేయనుంది. వచ్చే విద్యా సంవత్సరం ప్రారంభం నాటికి ప్రక్రియను పూర్తిచేసి పాఠశాలల్లో కొత్త టీచర్లను నియమించనుంది. దాదాపు 10 వేల ఉపాధ్యాయ పోస్టులు ఉండే అవకాశం ఉన్నట్లు అంచనా. అయితే ఇప్పటికిప్పుడు నోటిఫికేషన్ జారీ చేసినా.. ప్రక్రియ పూర్తయ్యేందుకు ఐదారు నెలల సమయం  పడుతుంది. అంటే ప్రస్తుత విద్యా సంవత్సరం దాదాపు పూర్తయి, వేసవి సెలవుల సమయం వస్తుంది. ఈ నేపథ్యంలో డిసెంబర్ నెలాఖరు లేదా జనవరిలో నోటిఫికేషన్ జారీచేస్తే మే నెలాఖరుకల్లా నియామకాల ప్రక్రియను పూర్తి చేయవచ్చని ప్రభుత్వం భావిస్తోంది. తద్వారా వచ్చే ఏడాది జూన్ 12న స్కూళ్లు ప్రారంభించే నాటికి కొత్త టీచర్లను పాఠశాలలకు పంపించాలన్న యోచనలో ఉంది.
 
 వారంలో విద్యా వలంటీర్లు..
 ఉపాధ్యాయ ఖాళీల భర్తీకి సమయం పట్టే అవకాశం ఉన్నందున టీచర్లు లేని స్కూళ్లలో వెంటనే విద్యా వలంటీర్లను నియమించనున్నారు. ప్రస్తుతమున్న 7,983 ఖాళీల్లో సెప్టెంబర్ 10వ తేదీ నాటికి ఈ నియామకాలను పూర్తిచేయాలని లక్ష్యంగా పెట్టుకున్నారు. విద్యా వలంటీర్లకు నెలకు రూ.8 వేల చొప్పున గౌరవ వేతనం చెల్లించే అవకాశముంది. ఎస్జీటీ ఖాళీల్లో నియమించే వారికి ఇంటర్‌తోపాటు డిప్లొమా ఇన్ ఎలిమెంటరీ ఎడ్యుకేషన్ (డీఎడ్) విద్యార్హత ఉండాలి. స్కూల్ అసిస్టెంట్ స్థానంలో నియమితులయ్యే వారికి డిగ్రీతోపాటు బ్యాచిలర్ ఆఫ్ ఎడ్యుకేషన్ (బీఎడ్) అర్హత ఉండాలి. మండలం యూనిట్‌గా జిల్లా యంత్రాంగం నేతృత్వంలో స్కూల్ మేనేజ్‌మెంట్ కమిటీలు ఈ నియామకాలను చేపడతాయి.
 
 ఆ మండలానికి చెందిన వారినే విద్యా వలంటీర్లుగా నియమిస్తారు. వయోపరిమితి తదితర వివరాలు మార్గదర్శకాల్లో ఉంటాయి. ఆన్‌లైన్‌లో దరఖాస్తులు స్వీకరిస్తారు. టెన్త్, ఇంటర్, డీఎడ్/బీఎడ్‌లో అభ్యర్థులు సాధించిన మార్కులకు వెయిటేజీ ఇచ్చి మెరిట్‌ను రూపొందించి నియామకాలు చేపడతారు. దీంతోపాటు రోస్టర్, రిజర్వేషన్లను పాటిస్తారు. ఈ మేరకు మార్గదర్శకాలు రెండు మూడు రోజుల్లో జారీ కానున్నాయని పాఠశాల విద్యా డెరైక్టర్ చిరంజీవులు వెల్లడించారు.
 
 ఖాళీలపై స్పష్టత వచ్చినందునే..
 ‘‘ఉపాధ్యాయ ఖాళీలపై ప్రస్తుతం స్పష్టత వచ్చింది. గతంలో ఆ స్పష్టత లేనందునే కొత్త నోటిఫికేషన్‌పై దృష్టి పెట్టలేదు. ఇప్పుడు కూడా వెంటనే నియామకాలు చేపట్టడం సాధ్యం కాదు. నోటిఫికేషన్ ఇచ్చినా ఐదారు నెలల సమయం పడుతుంది. మొత్తానికి కొత్త విద్యా సంవత్సరం ప్రారంభం నాటికి కొత్త టీచర్లను నియమిస్తాం. డీఎస్సీ నోటిఫికేషన్ జారీ ఎప్పుడన్నది త్వరలో నిర్ణయిస్తాం..’’
  - డిప్యూటీ సీఎం కడియం శ్రీహరి.
 
 జిల్లాల వారీగా నియామకం కానున్న విద్యా వలంటీర్లు
 - మహబూబ్‌నగర్    1,646
 - రంగారెడ్డి    1,408
 - ఆదిలాబాద్    1,244
 - మెదక్    1,104
 - ఖమ్మం    674
 - నిజమాబాద్    480
 - హైదరాబాద్    414
 - నల్లగొండ    362
 - కరీంనగర్    337
 - వరంగల్    314.


 ⇒ 500 మంది విద్యార్థులకు ఒక్క టీచరా?
 ⇒ రాష్ట్రంలో సర్కారీ స్కూళ్లలో పరిస్థితిపై హైకోర్టు ఘాటు వ్యాఖ్య
 ⇒ రాష్ట్రంలో ఎన్ని స్కూళ్లు ఉన్నాయి.. ఒక్కో తరగతిలో విద్యార్థులెందరు?
 ⇒ ఉపాధ్యాయులు ఎంత మంది.. ఖాళీలు ఎన్ని ఉన్నాయి?
 ⇒ ఈ వివరాలన్నీ మా ముందుంచండి
 ⇒ ఆ ఏడు పాఠశాలల టీచర్ల హాజరు పట్టీలను కూడా..
 ⇒ మీ బిడ్డలను ప్రభుత్వ పాఠశాలల్లో చేర్పిస్తారా..?
 ⇒ మీరేమో అన్ని సౌకర్యాలుండే కాన్వెంట్లలో చేరుస్తారు
 
 ⇒ గ్రామీణ విద్యార్థులను మాత్రం పట్టించుకోరా?
 ⇒ పాఠశాల విద్య కమిషనర్‌ను నిలదీసిన ధర్మాసనం
 సాక్షి, హైదరాబాద్: రాష్ట్రవ్యాప్తంగా ఎన్ని ప్రభుత్వ పాఠశాలున్నాయి.. వాటిలో ఒక్కో తరగతిలో ఎంత మంది విద్యార్థులున్నారు.. ఒక్కో స్కూల్లో ఎందరు ఉపాధ్యాయులున్నారు.. టీచర్ పోస్టులు ఎన్ని ఖాళీగా ఉన్నాయి. ఈ వివరాలన్నింటినీ మా ముందు ఉంచండి’’ అని హైకోర్టు తెలంగాణ ప్రభుత్వాన్ని ఆదేశించింది. హైకోర్టుకు లేఖలు రాసిన ఏడు పాఠశాలల్లో పనిచేస్తున్న ఉపాధ్యాయుల హాజరు పట్టీలను (అటెండెన్స్ రిజిస్టర్) కూడా తమ ముందుంచాలని స్పష్టం చేసింది.
 
 తదుపరి విచారణను ఈనెల 31కి వాయిదా వేసింది. ఈ మేరకు తాత్కాలిక ప్రధాన న్యాయమూర్తి జస్టిస్ దిలీప్ బి.బొసాలే, జస్టిస్ ఎస్.వి.భట్‌లతో కూడిన ధర్మాసనం గురువారం ఉత్తర్వులు జారీ చేసింది. 526 మంది విద్యార్థులకు కేవలం ఒక్క టీచర్ మాత్రమే ఉన్నారంటే.. ఇది సిగ్గుపడాల్సిన విషయమని ధర్మాసనం ఘాటుగా వ్యాఖ్యానించింది. వందల మంది విద్యార్థులకు టీచర్ లేకపోవడం, ఉన్నా ఒక్కరే ఉండటం చూస్తుంటే ఈ విషయంలో ప్రభుత్వం సక్రమంగా పనిచేస్తున్నట్లు కనిపించడం లేదని పేర్కొంది.
 
 తమ పాఠశాలల్లో తగినంత మంది ఉపాధ్యాయులు లేరని, దీంతో తాము సరైన విద్య పొందలేకపోతున్నామంటూ మహబూబ్‌నగర్ జిల్లా, బొయ్యలగూడెం, మాచర్ల, కేశవరం, చింతలకుంట, మిట్టదొడ్డి, యల్లందొడ్డి, చాగదొన, అరిగిగడ్డ గ్రామాలకు చెందిన విద్యార్థులు, తల్లిదండ్రులు తాత్కాలిక ప్రధాన న్యాయమూర్తికి దాదాపు 1,700కు పైగా లేఖలు రాశారు. ఈ లేఖలను పరిశీలించిన ఆయన వీటిని ప్రజా ప్రయోజన వ్యాజ్యంగా మలచాలని హైకోర్టు రిజిస్ట్రీని ఆదేశించారు. దీంతో రిజిస్ట్రీ ఆ లేఖలను పిల్‌గా మలిచి విచారణ నిమిత్తం ధర్మాసనం ముందుంచింది.
 
 గతవారం ఈ వ్యాజ్యాన్ని విచారించిన ధర్మాసనం... ఈ మొత్తం వ్యవహారానికి సంబంధించి పూర్తి వివరాలను తమ ముందుంచాలని ఆదేశిస్తూ విచారణను ఈనెల 20కి వాయిదా వేసిన సంగతి తెలిసిందే. తాజాగా ధర్మాసనం ఈ వ్యాజ్యాన్ని మరోసారి విచారించింది.
  
 లేఖలోని అంశాలు వాస్తవమే..
 తెలంగాణ ప్రభుత్వ ప్రత్యేక న్యాయవాది (ఏఎస్‌జీ) ఎ.సంజీవ్‌కుమార్ వాదనలు వినిపిస్తూ... విద్యార్థులు హైకోర్టుకు రాసిన లేఖల్లో పేర్కొన్న అంశాలు ఇంచుమించూ వాస్తవమేనని తెలిపారు. అయితే టీచర్ గణాంకాల విషయంలో కొద్దిగా తేడాలు ఉన్నాయన్నారు. ఈ సందర్భంగా 300 మంది విద్యార్థులకు కేవలం ఒక్క టీచరే ఉండటాన్ని ధర్మాసనం ప్రశ్నించింది. ‘‘ఇలాంటి విషయంలోనే అలహాబాద్ హైకోర్టు ఏం తీర్పు ఇచ్చిందో తెలుసా..? రాష్ట్రంలోని ప్రభుత్వాధికారుల పిల్లలందరూ తప్పనిసరిగా తమ పిల్లలను ప్రభుత్వ పాఠశాలల్లోనే చదివించాలని.
 
 ఇప్పుడు మా నుంచి కూడా అలాంటి ఉత్తర్వులు పొందేందుకు మీరు సిద్ధంగా ఉన్నారా? పాఠశాలల్లో ఉపాధ్యాయుల కొరతకు బాధ్యులైన అధికారుల పిల్లలను ప్రభుత్వ పాఠశాలల్లోనే చదివించాలని ఆదేశిస్తాం. మాకు లేఖలు రాసిన ఏడు పాఠశాలల విద్యార్థుల వ్యవహారం సముద్రంలో నీటి చుక్క వంటిది. ఇంతకంటే దారుణమైన పరిస్థితుల మధ్య గ్రామీణ విద్యార్థులు విద్య అభ్యసిస్తున్నారని మాకు అర్థమైంది’’ అని బెంచ్ వ్యాఖ్యానించింది. ఆ ఏడు పాఠశాలల్లో తగినంత మంది ఉపాధ్యాయులు లేకపోవడానికి కారణమైన వారిని గుర్తించారా..? వారిపై ఏం చర్యలు తీసుకున్నారని ప్రశ్నించింది.
 
 ఈ పాఠశాలలకు మరోచోట నుంచి ఉపాధ్యాయులను పంపామని స్పెషల్ జీపీ చెప్పగా.. ‘‘మళ్లీ మీరు సమస్యను జఠిలం చేస్తున్నారు. ఉపాధ్యాయులను ఒకచోట నుంచి మరో చోటకు పంపితే.. వారు ఎక్కడ్నుంచి వచ్చారో అక్కడి విద్యార్థులకు నష్టమే కదా? ఇది సమస్యకు ఎంతమాత్రం పరిష్కారం కాదు. మేం అడ్వొకేట్ జనరల్ (ఏజీ)ని కొన్ని విషయాలు అడిగి తెలుసుకోవాలని అనుకుంటున్నాం. మధ్యాహ్నం 2.15 గంటలకు ఆయన్ను రమ్మని చెప్పండి’’ అని ధర్మాసనం పేర్కొంది.
  
 మీ బిడ్డలను ప్రభుత్వ స్కూల్లో చదివిస్తారా..?
 మధ్యాహ్నం 2.30 గంటలకు విచారణ ప్రారంభం కాగానే రాష్ట్ర అడ్వొకేట్ జనరల్ కె.రామకృష్ణారెడ్డి వాదలను వినిపిస్తూ.. హైకోర్టుకు లేఖ రాసిన పాఠశాలల్లో ఉన్న విద్యార్థులు, ఉపాధ్యాయుల గణాంకాలను ధర్మాసనం ముందుంచారు. వీటిని పరిశీలించిన ధర్మాసనం, విద్యార్థులు రాసిన వివరాలకూ, ప్రభుత్వం సమర్పిస్తున్న వివరాలకూ తేడాలున్నాయని, ప్రభుత్వ గణాంకాలపై తమకు అనుమానం ఉందని పేర్కొంది.
 
 ఈ ఏడు పాఠశాలల్లో పనిచేస్తున్న ఉపాధ్యాయుల హాజరు పట్టీలను చూడాలని భావిస్తున్నామని, వాటిని తమ ముందుంచాలని, అందుకు ఎంత సమయం కావాలని ప్రశ్నించింది. ఈ సమయంలో కోర్టులోనే ఉన్న పాఠశాల విద్యా శాఖ కమిషనర్‌ను పిలిచిన ఏజీ.. కోర్టు కోరిన వివరాలను అందించేందుకు ఎంత సమయం పడుతుందని అడిగారు. ఆయన కమిషనర్ అని తెలుసుకున్న ధర్మాసనం.. ఆయన తన పిల్లలను ప్రభుత్వ పాఠశాలలో చేర్చేందుకు సిద్ధంగా ఉన్నారా..? తెలుసుకుని చెప్పాలంది.
 
 ‘‘మీరు మాత్రం మీ పిలల్లను అన్ని సౌకర్యాలుండే కాన్వెంట్లలో చేరుస్తారు. గ్రామీణ ప్రాంతాల్లో పాఠశాలలకు వెళ్లే విద్యార్థుల గురించి, వారి పాఠశాలల గురించి ఏ మాత్రం పట్టదు. అక్కడ టీచర్లు ఉన్నారా..? లేరా.? అన్నది కూడా ఆలోచించరు. ఒక సీనియర్ అధికారిని సస్పెండ్ చేస్తే తప్ప.. వ్యవహారాలు చక్కబడేలా కనిపించడం లేదు. ఇది మా కోసం చెప్పడం లేదు. కష్టాలు పడుతూ గ్రామీణ ప్రాంతాల్లో విద్యను అభ్యసిస్తున్న విద్యార్థుల కోసం చెబుతున్నాం.
 
 500 మంది విద్యార్థులకు ముగ్గురు టీచర్లు ఎలా సరిపోతారని ప్రభుత్వం భావిస్తోంది. విద్యార్థి, ఉపాధ్యాయుల నిష్పత్తి విషయంలో ప్రస్తుతం ఉన్న నిబంధనలు ఏమిటి? రాష్ట్ర వ్యాప్తంగా ఉన్న పాఠశాలలు ఎన్ని? వాటిలో విద్యార్థులెందరు? ఎందరు ఉపాధ్యాయులున్నారు? ఖాళీలు ఎన్ని ఉన్నాయి.. తదితర వివరాలను మా ముందుంచండి’’ అని ధర్మాసనం అడ్వొకేట్ జనరల్‌ను ఆదేశిస్తూ విచారణను వాయిదా వేసింది.


 జిల్లాలో ఖాళీగా ఉన్న ఉపాధ్యాయ పోస్టులు 1147
  అత్యధికంగా ఉన్నత పాఠశాలల్లో స్కూల్ అసిస్టెంట్ల కొరత సోషల్, బయోసైన్స్, ఫిజికల్ సైన్స్ సబ్జెక్టులకు టీచర్లు కరువు అకడమిక్ ఇన్‌స్ట్రక్టర్లు లేదా.. పోస్టుల అప్‌గ్రేడ్ ద్వారా భర్తీ డెరైక్టరేట్‌కు ప్రతిపాదనలు పంపిన జిల్లా విద్యాశాఖ
  
  నల్లగొండ : ఉన్నత పాఠశాలల్లో విద్యాబోధన ఆగమ్యగోచరంగా మారింది. విద్యాసంవత్సరం ఆరంభ మైన మూడు నెలల కాలంలో ఇప్పటికే 20 శాతం సిలబస్ పూర్తికావాల్సి ఉంది. కానీ బదిలీలు, పదోన్నతుల కారణాలతో జూలైలో బోధించాల్సిన సిలబస్ ఇంకా పూర్తికాలేదు. ఈ నెలాఖరులోగా ఆగస్టు సిలబస్ కూడా పూర్తిచేసి రెండో యూనిట్ పరీక్షలకు సిద్ధం కావాలి. కానీ బదిలీల కౌన్సెలింగ్ తర్వాత ఉన్నత పాఠశాలల్లో  సబ్జెక్టులకు ఉపాధ్యాయులు లేకుండా పోయా రు.
  
  ప్రస్తుతం అమలవుతున్న విద్యావిధానాల ప్రకారం విద్యార్థులు చదువులో వెనకబడకుండా..వారిలో ప్రమాణాలు మెరుగపర్చేవిధంగా సమగ్ర మూల్యాం కనం నిర్వహించాలి. కానీ పాఠశాలల్లో ఉపాధ్యాయుల కొరత కారణంగా సమగ్ర మూల్యాంకనానికి ఆటంకాలు ఎదురవుతున్నాయి. అక్టోబర్‌లో జరిగే ఎస్-1 పరీక్షల నాటికి విద్యార్థులకు అన్ని సబ్జెక్టుల్లో బోధన జరగాల్సి ఉన్నప్పటికి సాంఘిక శాస్త్రం, జీవశాస్త్రం, భౌతిక శాస్త్రం సబ్జెక్టులకు ఉపాధ్యాయులు లేకపోవడంతో ఆ పాఠ్యాంశాలను బోధించేవారే లేకుండా పోయారు.
  
  పరిస్థితి ఇదీ...
  బదిలీలు, పదోన్నతుల తర్వాత జిల్లాలో వివిధ కేటగిరీల్లో ఖాళీగా ఉన్న పోస్టులను విద్యాశాఖ గుర్తించింది. స్కూల్ అసిస్టెంట్ కేటగిరీలో జిల్లాకు 4,511 పోస్టులు మంజూరయ్యాయి. దీంట్లో ప్రస్తుతం 4,252 మంది ఉపాధ్యాయులు ప నిచేస్తున్నారు. రేషనలైజేషన్ ప్రకారం విద్యార్థులకు సంఖ్యకు అనుగుణంగా 4,811 పోస్టులను సర్దుబాటు చేశారు. ఇంగ్లిష్, గణితంలో విద్యార్థుల సంఖ్యకు మించి పోస్టుల మిగలడంతో వాటిని డీఈఓ పూల్‌లో ఉంచారు. ఇదే పద్ధతిలో మిగిలిన కేటగిరీల్లో కూడా పోస్టులు సర్దుబాటు చేయగా ఇంకా 1147 పోస్టులు కొరత ఉన్నట్లు విద్యాశాఖ లెక్కతేల్చింది. వీటిల్లో అత్యధికంగా స్కూల్ అసిస్టెంట్ల పోస్టులు  507 కాగా...వ్యాయామ ఉపాధ్యాయులు, లాంగ్వేజి పండిట్లు పోస్టులు 551 ఖాళీలు ఉన్నాయి.
  
  జిల్లాలో బదిలీల తర్వాత ఏర్పడిన పోస్టుల ఖాళీల వివరాలు
  
  గెజిటెడ్ ప్రధానోపాధ్యాయులు=    5
  స్కూల్ అసిస్టెంట్లు=    507
  లాంగ్వేజి పండిట్లు=    316
  పీఈటీ=    235
  ఎస్‌జీటీ=    20
  ఎల్‌ఎఫ్‌ఎల్‌హెచ్‌ఎం=    64
  


 మైల్వార్ పాఠశాల ఎదుట ఆందోళన
 హెచ్‌ఎంను నిర్బంధించిన గ్రామస్తులు
 ఉపాధ్యాయుల కోసం రోడ్డెక్కిన విద్యార్థులు
  
  తాండూరు రూరల్ : మండలంలోని మైల్వార్ పాఠశాలలో గురువారం తీవ్ర ఉద్రిక్తత చోటుచేసుకుంది. ఉపాధ్యాయ పోస్టులు ఖాళీగా ఉండటం, ఉన్న టీచర్లు సమయపాలన పాటించకపోవడంపై విద్యార్థులు, వారి తల్లిదండ్రులు భగ్గుమన్నారు. విధులను నిర్లక్షం చేస్తున్నారంటూ ప్రధానోపాధ్యాయుడిని గదిలో నిర్బంధించారు. మైల్వార్‌లోని మూడు పాఠశాలల్లో 387 మంది విద్యార్థులు న్నారు. ఉపాధ్యాయులు మాత్రం ముగ్గురే ఉన్నారు. దీంతో వారం రోజులుగా విద్యార్థుల తల్లిదండ్రులు, స్థానిక నాయకులు పాఠశాలకు వెళ్లి ఉపాధ్యాయులను నియమించాలని కోరుతున్నారు.
 
 హెచ్‌ఎం నుంచి సరైన సమాధానం రాకపోవడంతో ఎస్‌ఎంసీ కమిటీ ఆధ్వర్యంలో గ్రామస్తులు ఆందోళన చేశారు. పాఠశాలలోని విద్యార్థులను బయటికి పిలిచి రహదారిపై బైఠాయించారు. విద్యార్థులు, యువజన సంఘం సభ్యులు ధర్నా చేశారు. పాఠశాలలో 16 మంది వరకు ఉపాధ్యాయులు ఉండాల్సి ఉండగా కేవలం ముగ్గురే ఉన్నారని అలాంటప్పుడు విద్యార్థులకు గుణాత్మక విద్య ఎలా అందుతుందని ప్రధానోపాధ్యాయుడు రాజ్‌పాల్‌సింగ్‌ను ప్రశ్నించారు.
 
 పాఠశాల ఎదుట గొడవ జరుగుతున్న విషయం తెలుసుకొన్న సర్పంచ్ చంద్రశేఖర్, ఉప సర్పంచ్ హన్మంత్‌రెడ్డిలతోపాటు కాంగ్రెస్ మండల మాజీ అధ్యక్షుడు సికిందర్‌ఖాన్, టీఆర్‌ఎస్ మాజీ అధ్యక్షుడు బిచ్చిరెడ్డిలు పాఠశాలకు చేరుకొని ప్రధానోపాధ్యాయుడితో మాట్లాడారు. ఇప్పటికే బాలుర ప్రాథమిక పాఠశాలలో ఉపాధ్యాయుడు లేకపోవడంతో మూతపడిందని, బాలికల ప్రాథమిక పాఠశాలలో ఒకే ఉపాధ్యాయురాలు ఉన్నారని ఆగ్రహం వ్యక్తం చేశారు.
 
 విద్యార్థులకు టీసీలైనా ఇవ్వండి.. లేదంటే టీచర్లనైనా నియమించండంటూ పట్టుబట్టారు. సరైన సమాధానం చెప్పడంలేదంటూ గ్రామస్తులు హెచ్‌ఎం రాజ్‌పాల్‌సింగ్‌ను గదిలో నిర్బంధించారు. ఒక దశలో హెచ్‌ఎంపై గ్రామస్తులు దాడికి దిగే ప్రయత్నం చేశారు. బషీరాబాద్ పోలీసులు ఘటనాస్థలానికి చేరుకుని గ్రామస్తులకు నచ్చచెప్పడంతో పరిస్థితి సద్దుమణిగింది. కార్యక్రమంలో ఎస్‌ఎంసీ కమిటీ చైర్మన్ భవిత, వైస్‌చైర్మన్ బాల్‌రాం, వివేకానంద యువజన సంఘం సభ్యులు చంద్రశేఖర్, హరీష్, మహిపాల్, శ్రీకాంత్, హన్మంతు పాల్గొన్నారు.


 ♦ 25 వేల ఉద్యోగాల్లో ఉపాధ్యాయ పోస్టులు లేనట్టే...
 ♦ క్రమబద్ధీకరణ తరువాతే లెక్చరర్ ఖాళీల భర్తీ
 ♦ గత డీఎస్సీ బాధితుల కోసం న్యాయసలహా తీసుకోనున్న ప్రభుత్వం
 సాక్షి, హైదరాబాద్ : ప్రభుత్వం త్వరలో ప్రకటించి, నోటిఫికేషన్లు జారీచేయనున్న పోస్టుల్లో ఉపాధ్యాయ పోస్టులు లేనట్టే తెలుస్తోంది. ఉపాధ్యాయుల రేషనలైజేషన్ పూర్తయిన వెంటనే ఖాళీలపై స్పష్టత వచ్చే అవకాశం ఉన్నప్పటికీ ఇప్పటికిప్పుడు డీఎస్సీ ప్రకటించే పరిస్థితి కన్పించడం లేదు.
 
 త్వరలో నోటిఫికేషన్లు జారీచేసే 25 వేల పోస్టుల్లో ఉపాధ్యాయపోస్టుల భర్తీ ఉండకపోవచ్చని ప్రభుత్వం కూడా ఇదే ఆలోచనతో ఉందని తెలుస్తోంది. ఉపముఖ్యమంత్రి కడియం శ్రీహరి ఇదే విషయాన్ని చెప్పారు. వాస్తవంగా ప్రస్తుతం రాష్ట్రంలో 17 వేల ఉపాధ్యాయ ఖాళీలు ఉన్నాయి. రేషనలైజేషన్ ద్వారా నాలుగైదు వేల పోస్టులు సర్దుబాటు అయ్యే అవకాశం ఉంది. తక్కువ మంది విద్యార్థులున్న స్కూళ్లలో అకడమిక్ ఇన్‌స్ట్రక్టర్లను నియమిస్తే మిగిలిన వాటిల్లోనూ చాలా వరకు పోస్టులు తగ్గిపోనున్నాయి.
 
 ఈ నేపథ్యంలో అన్నింటిపై స్పష్టత వచ్చాకే డీఎస్సీ విషయాన్ని ఆలోచిద్దామని ప్రభుత్వం భావిస్తున్నట్టు సమాచారం. ఇక సీఎం కేసీఆర్ ఇచ్చిన హామీ మేరకు గత డీఎస్సీల్లో నష్టపోయిన వారికి న్యాయం ఎలా చేయాలన్న విషయం పరిశీలిస్తున్నారు. 1998 నుంచి మొదలుకొని 2012 డీఎస్సీలలో అభ్యర్థులకు సంబంధించి కోర్టులో పలు కేసులు పెండింగ్‌లో ఉన్నాయి. అన్ని డీఎస్సీల్లో కలిపి దాదాపు 2 వేల మందికి ఉద్యోగాలు ఇవ్వాల్సి వస్తోంది. ఈ పరిస్థితులు అన్నింటిపై న్యాయశాఖ అభిప్రాయాలను తీసుకొని ముందుకు సాగాలని ప్రభుత్వం యోచిస్తోంది.
  
 కాంట్రాక్ట్ లెక్చరర్ల క్రమబద్ధ్దీకరణ...
 జూనియర్, డిగ్రీ, పాలిటెక్నిక్ కాలేజీల్లో 4 వేల మందికిపైగా కాంట్రాక్టు లెక్చరర్లు పని చేస్తున్నారు. ప్రభుత్వం కాంట్రాక్టు ఉద్యోగులను క్రమబద్ధీకరిస్తామని హామీ ఇచ్చిన  నేపథ్యంలో ఎంతమంది కాంట్రాక్టు లెక్చరర్లు క్రమబద్ధీరణ పరిధిలోకి వస్తారన్నది ఇప్పుడు చర్చనీయాంశంగా మారింది. 5 ఏళ్ల సర్వీసు ఉండి, రూల్ ఆఫ్ రిజర్వేషన్ , రోస్టర్ ప్రకారం నియమితులైన వారినే క్రమబద్ధీకరించాలని ప్రభుత్వం క్రమబద్ధీకరణ నిబంధనలను పొందుపరిచినట్లు సమాచారం.
 
 దాని ప్రకారం కాంట్రాక్టు లెక్చరర్లలో చాలా మందికి అవకాశం రావడం కష్టమేనని డిగ్రీ కాలేజీ వర్గాలు పేర్కొంటున్నాయి. జూనియర్, డిగ్రీ, పాలిటెక్నిక్ కాలేజీల్లో నియమితులైన అనేక మంది లెక్చరర్లు రోస్టర్, రూల్ ఆఫ్ రిజర్వేషన్ ప్రకారం నియమితులు కాలేదని చెబుతున్నాయి. ఈ నేపథ్యంలో చాలా తక్కువ మందికే రెగ్యులరైజేషన్ అవకాశం లభిస్తుందని పేర్కొంటున్నాయి. వీరి క్రమబద్ధీకరణ తరువాతే లెక్చరర్ పోస్టుల ఖాళీల భర్తీపై ప్రభుత్వం దృష్టిపెట్టనుంది.


 
 లెక్కలు తేల్చిన విద్యాశాఖ
 
  హేతుబద్ధీకరణ చేస్తే పోస్టులు మిగిలేది కష్టమే
 
  వేసవి సెలవుల్లో ఉపాధ్యాయుల హేతుబద్ధీకరణ!
 
  కేజీ టు పీజీలో మాత్రం ఎక్కువ పోస్టులు?
 
 సాక్షి, హైదరాబాద్: రాష్ట్రంలోని ప్రాథమిక, ప్రాథమికోన్నత పాఠశాలల్లో 14,232 ఉపాధ్యాయ పోస్టులు ఖాళీగా ఉన్నట్లు పాఠశాల విద్యాశాఖ తేల్చింది. 2014, ఆగస్టు 31 నాటికి విద్యాశాఖ సేకరించిన లెక్కల ప్రకారం (డైస్ డేటా) ఈ ఖాళీలు ఉన్నట్లు పేర్కొంది. అయితే ఖాళీల భర్తీ ఎంతమేరకు అవసరం అన్న కోణం లో ఆలోచనలు జరుగుతున్నాయి. ప్రస్తుతం వివిధ జిల్లాల్లో ఉపాధ్యాయులు ఉన్న పాఠశాలల్లో విద్యార్థులు లేరు.. విద్యార్థులు ఉన్న చోట ఉపాధ్యాయులు లేరు. దీంతో వేసవి సెలవుల్లో (ఏప్రిల్, మే నెలల్లో) ఉపాధ్యాయుల హేతుబద్ధీకరణ (రేషనలైజేషన్) చేపట్టే అంశంపై విద్యాశాఖ ఆలోచనలు చేస్తోంది.
 
 గత ఏడాది దసరా సెలవుల్లోనే ఈ ప్రక్రియ చేపట్టాలని భావించినా ఉపాధ్యాయ సంఘాలు అభ్యంతరం వ్యక్తం చేశాయి. వేసవి సెలవుల్లో హేతుబద్ధీకరణ చేపడతే అభ్యంతరం లేదని చెప్పాయి. దీంతో ఏప్రిల్, మే నెలల్లో రేషనలైజేషన్ చేసే అంశంపై విద్యాశాఖ దృష్టి సారించింది. అది పూర్తయితే టీచర్ పోస్టుల భర్తీ అవసరం ఉండకపోవచ్చన్న భావన నెలకొంది. అయితే ఉన్నత పాఠశాలల్లో మాత్రం కొంతమేరకు సబ్జెక్టు టీచర్ల నియామకాలు అవసరమని అధికారులు పేర్కొంటున్నారు. మొత్తానికి పోస్టుల భర్తీ అవసరమా? లేదా? అవసరమైతే ఎన్నింటిని భర్తీ చేయాలన్నది రేషనలైజేషన్ తరువాతే తేలనుంది.
  
 వెలువడాల్సిన సవరణ ఉత్తర్వులు..
 
 ఉపాధ్యాయుల హేతుబద్ధీకరణపై సవరణ ఉత్తర్వులు వెలువ డాల్సి ఉంది. 2014 సెప్టెంబర్‌లో జారీ చేసిన హేతుబద్ధీకరణ ఉత్తర్వుల ప్రకారం.. ప్రాథమిక  పాఠశాలల్లో 19 మంది కంటే తక్కువ మంది విద్యార్థులుంటే.. వారిని కిలోమీటర్ దూరంలోని మరో స్కూల్లో చేరుస్తారు. ఇక ప్రాథమికోన్నత, ఉన్నత పాఠశాలల్లో 75 మంది కంటే తక్కువ మంది పిల్లలు ఉంటే వారిని 3 కిలోమీటర్ల పరిధిలోని స్కూళ్లలో చేర్చాలి. దీంతో నిర్ణీత సంఖ్యకంటే తక్కువ మంది విద్యార్థులున్న స్కూళ్లు రద్దు కానుండటంతో ఉపాధ్యాయ సంఘాలు ఆందోళన వ్యక్తం చేశాయి. స్కూళ్ల మూసివేత తగదని పేర్కొనడంతో ప్రభుత్వం స్కూళ్లను మూసివేయబోమని అప్పట్లో హామీ ఇచ్చింది. సవరణ ఉత్తర్వులు జారీ చేస్తామని కూడా వెల్లడించింది.
  
 కేజీ టు పీజీలో ఉద్యోగాలపైనే ఆశలు
 
 ప్రస్తుత పాఠశాలల్లో హేతుబద్ధీకరణ చేపడితే కొత్తగా ఉపాధ్యాయ పోస్టుల భర్తీ పరిమితంగానే ఉండే అవకాశం ఉంది. ఈ నేపథ్యంలో ప్రభుత్వం మండలానికి ఒకటి చొప్పున ఏర్పాటు చేయాలనుకుంటున్న కేజీ టు పీజీ క్యాంపస్‌లలో ఎక్కువ సంఖ్యలో ఉద్యోగాలు వచ్చే అవకాశం ఉంది. ప్రాథమిక అంచనా ప్రకారం.. ఒక్కో స్కూల్లో వెయ్యి మంది విద్యార్థులకు బోధించేందుకు 34 పోస్టులు అవసరం. అదే 3-4 వేల మంది విద్యార్థులకు ప్రవేశాలు కల్పిస్తే ఒక్కో క్యాంపస్‌లో కనీసం 100 మంది టీచర్లు అవసరం అవుతారు. ఈ లెక్కన 445 మండలాల్లో 50 వేల వరకు ఉపాధ్యాయ పోస్టులు అవసరం. అయితే ప్రస్తుతమున్న ఉపాధ్యాయులకు శిక్షణ ఇవ్వడం ద్వారా కొంత సర్దుబాటు చేసి ఆ తరువాత అవసరం మేరకు పోస్టులను భర్తీ చేసే అవకాశం ఉంది.


  సాక్షి ప్రతినిధి, నిజామాబాద్:డీఎస్‌సీ ద్వారా ఉపాధ్యాయుల నియామకానికి తెర పడినట్లే. ఇక నుం చి విద్యా శాఖ ద్వారా కాకుండా తెలంగాణ స్టేట్ పబ్లిక్ సర్వీస్ కమిషన్ ద్వా రా టీచర్ పోస్టులను భర్తీ చేయాలని ప్రభుత్వం నిర్ణయించినట్టు తెలిసింది. ఈ మేరకు టీఎస్‌పీఎస్‌సీ అధికారులు మూడు రోజులుగా విద్యా శాఖ నుంచి జిల్లాలవారీగా ఖాళీల వివరాలను సే కరిస్తున్నారు. దీనికి సంబంధించి ఇప్పటికే విధివిధానాలను ఖరారు చేసిన ప్రభుత్వం ఉపాధ్యాయ ఖాళీల భర్తీకి త్వరలోనే ఉత్తర్వులు వెలువరించే అవకాశం ఉందని సమాచారం. ఈ క్రమం లో జిల్లాలో ఖాళీగా ఉన్న 1,344 ఉపాధ్యాయ పోస్టులు త్వరలో టీఎస్‌పీఎస్‌సీ ద్వారానే భ ర్తీ కానున్నాయి.
  
  ప్రస్తుతం ఇదీ పరిస్థితి
  జిల్లాలో 1,573 ప్రాథమిక పాఠశాలలు, 975 ప్రాథమికోన్నత పాఠశాలలు, 465 ఉన్నత పాఠశాలలు ఉన్నాయి. రెండున్నర లక్షల మంది విద్యార్థులు విద్యనభ్యసిస్తున్నా రు. 10 వేల మంది టీచర్లు విద్యాబోధన చేపడుతున్నారు. 1,344 టీచర్ పోస్టులు ఖాళీగా ఉన్నాయి. వీటి భర్తీకి సంబంధించి రెండు సంవత్సరాలుగా సందిగ్ధత నెలకొంది. గత ఏడాది జనవరి 29న ప్రభుత్వం డీఎస్‌సీ పోస్టులకు సంబంధించి ఖాళీల వివరాలను వెల్లడించింది. అనంతరం గత డిసెంబర్ వరకు మళ్లీ పోస్టులను పునఃప రిశీలించింది. దీనికి సంబంధించి జిల్లా అధికారులు పాఠశాల విద్యా శాఖకు నివేదిక కూడా సమర్పించారు. తెలంగాణ రాష్ట్రం ఏర్పడినందున 2014   లోనే డీఎస్‌సీ ఉంటుందని ప్రతి ఒక్కరూ భావిం చారు. గత ఏడాది మార్చిలో టెట్‌ను కూడా నిర్వహించారు. ప్రత్యేక రాష్ట్రం ఏర్పాటు, విద్యారంగంలో వివిధ సంస్కరణలు రావడంతో పోస్టుల భర్తీ ఆలస్యమవుతూ వస్తోంది. ఇటీవలే తెలంగాణ పబ్లిక్ సర్వీస్ కమిషన్ ఏర్పాటు, చైర్మన్‌గా బాధ్యతలు చేపట్టిన ఘంటా చక్రపాణి పోస్టుల భర్తీ మే నెలలో జరుగవ చ్చని ప్రకటించారు. ముఖ్యమైన పోస్టులను పబ్లిక్ సర్వీస్ కమిషన్ ద్వారానే భర్తీ చేయాలని నిర్ణయించామని చెప్పిన విషయం విదితమే. ఈ నేపథ్యంలో జిల్లాలో గతంలో నిర్వహించిన డీఎస్‌సీ రోస్టర్ పాయింట్ విధానం లేదా మెరిట్ విధానం ద్వారా టీఎస్‌పీఎస్‌సీ నుంచి టీచర్ పోస్టుల నియామకాలు చేపట్టే అవకాశం ఉన్నట్లు సమాచారం.
  
  త్వరలోనే
  తెలంగాణ పబ్లిక్ సర్వీస్ కమిషన్ ద్వారా త్వరలోనే ఉపాధ్యాయ ఖాళీల భర్తీకి నోటిఫికేషన్ వెలువడనుండటం సర్వత్రా చర్చనీయాంశంగా మారింది. జిల్లాలవారీగా ఖాళీల వివరాలను సేకరించే ప్రక్రియను పీఎస్‌సీ అధికారులు వేగవంతం చేసినందున, ఉత్తర్వులు ఈ నెలాఖరులో వచ్చే అవకాశముందని అధికారులు భావిస్తున్నారు. కొత్త విధానంపై అభ్యర్థుల నుంచి భిన్నాభిప్రాయాలు వ్యక్తమవుతున్నాయి
  


 జిల్లాలో టీచర్ల సర్దుబాటు ప్రక్రియ గందరగోళంగా మారింది. సర్దుబాటులో రేషనలైజేషన్ జీఓలు అమలు చేయాలని ప్రభుత్వం ఆదేశించడంతో ఉపాధ్యాయులు ఆందోళన చెందుతున్నారు. దీని వల్ల జిల్లాలో భారీగా టీచర్ పోస్టులు రద్దయ్యే పరిస్థితి ఏర్పడుతుందని వారు ఆవేదన వ్యక్తం చేస్తున్నారు. ఎన్ని మిగులు పోస్టులున్నాయి, వాటిని ఎలా సర్దుబాటు చేస్తారన్న విషయంపై విద్యాశాఖ స్పష్టత ఇవ్వకపోవ డంతో అయోమయ పరిస్థితులు నెలకొన్నాయి.
  
  విజయనగరం అర్బన్ : పాఠశాలల్లో ఉపాధ్యాయుల కొరత తీర్చడానికి ప్రభుత్వం చేపడుతున్న సర్దుబాటు ప్రక్రియ జిల్లాలో గందరగోళంగా మా రింది. ఈ ప్రక్రియకు రేషనలైజేషన్ (హేతుబద్ధీకరణ) జీఓలను జోడించడంతో ఉపాధ్యాయులు ఆందోళన చెందుతున్నారు. ఉపాధ్యాయుల కొరత లేకుండా తాత్కాలిక పద్ధతిపై సర్దుబాటు చేయడానికి ప్రభుత్వం నిర్ణయించింది. ఇందులో భాగంగా పాఠశాలల్లో ఉపాధ్యాయుల మిగులు, కొరతను గుర్తించడానికి గతంలో జారీ చేసిన రేషనలైజేషన్ (జీఓ 55, జీఓ 61) జీఓలను అమలు చేస్తోంది.
  
   విద్యార్థులు, ఉపాధ్యాయుల నిష్పత్తి ఆధారంగా కాకుండా రేషనలైజేషన్ జీఓల ప్రకారం ఉపాధ్యాయుల సర్దుబాటు చేపడితే జిల్లాలో బదిలీలు కోరే ఉపాధ్యాయులకు స్థానాలు దొరికే పరిస్థితి ఉండదు.   పదోన్నతుల వల్ల ఖాళీ అయిన స్థానాలను తప్పనిసరిగా డీఎస్సీ నియామకాల ద్వారా భ ర్తీ చేయాలి, అంతవరకూ ఈ పోస్టులను ఖాళీగానే ఉం చాలి.
    విద్యార్థులు లేని కారణంగా ఉపాధ్యాయ పోస్టులను రద్దు చేయాల్సి ఉంటుంది.
  
    ఉపాధ్యాయ పోస్టుల  సంఖ్య భారీగా తగ్గే పరిస్థితి ఏర్పడుతుంది. అదే సర్దుబాటు ప్రక్రియ ద్వారా అయితే ఈ నిబంధనలు పాటించాల్సిన అవసరం లేదు. డీఎస్సీ పోస్టులను భర్తీ చేసే వరకు ఆయా స్థానాలలో సర్దుబాటు ఉపాధ్యాయులుంటారు. కానీ పాఠశాలల్లో ఉపాధ్యాయుల మిగులు, కొరత వంటి వివరాలు సేకరించినప్పుడు రేషనలైజేషన్ విధానాన్నే పాటించాలని ఉన్నత విద్యాశాఖ అధికారులు ఆదేశించారు. ఆ మేరకే ఎంఈఓలు నివేదికలు కూడా ఇచ్చినట్లు తెలుస్తోంది. దీన్ని ఉపాధ్యాయ సంఘాలు   వ్యతి రేకిస్తున్నాయి. మిగులు ఉపాధ్యాయులను ఏవిధంగా సర్దుబాటు చేస్తారో స్పష్టత ఇవ్వకుండా విద్యాశాఖ గోప్యంగా ఉంచుతోంది.  దీనివల్ల సర్దు   బాబు ప్రక్రియ ముందడుగు వేస్తుందా లేదా అన్న అనుమానాలు నెలకొన్నాయి. ఈ ప్రక్రియ కౌన్సెలింగ్ ద్వారా నిర్వహిస్తారా..? లేదా సీనియార్టీ జాబితా ఆధారంగా అవసరమైన చోటకు తాత్కాలికంగా నియామకాలు జరుగుతాయా అనే అంశంపై ఉపాధ్యాయుల్లో చర్చ జరుగుతోంది. ఉపాధ్యాయులను రేషనలైజేషన్‌లో సర్దుబాబు చేసేందుకు సీనియార్టీ జాబితాలను తయారు చేయాల్సి ఉంది. జిల్లాలో ఇంతవరకు ఆ ప్రక్రియ పూర్తి కాలేదు.  
  
   విద్యాహక్కు చట్టానికి పొంతనలేని  జీఓ నంబర్ 55
  విద్యాహక్కు చట్టం ప్రకారం 19 మంది విద్యార్థులకు ఒక టీచర్, 35 మంది విద్యార్థులుంటే ఇద్దరు టీచర్లు ఉండాలన్నది నిబంధన. ఉన్నత పాఠశాలలో ఆరో తరగతి నుంచి 40 మందికి ఒక సెక్షన్ చొప్పున ఒక టీచర్‌ను ఇవ్వాలన్న నిబంధన కూడా ఉంది. 40 మంది కంటే అధికంగా పిల్లలు ఉంటే     మరో సెక్షన్‌ను మంజూరు చేసి మరో టీచర్‌ను ఇవ్వాల్సిన అవసరం ఉంది. ఇందుకు విరుద్ధంగా 2011 ఏప్రిల్‌లో ప్రభుత్వం జీఓ 55ను విడుదల చేసింది. ఈ జీఓ ప్రకారం ఉన్నత పాఠశాలలో ఆయా తరగతుల విద్యార్థుల సంఖ్యను కాకుండా పాఠశాలలో మొత్తం ఉన్న విద్యార్థుల సంఖ్యను ఆధారంగా చేసుకుని ఉపాధ్యాయులను కేటాయించాలనే నిబంధన విధిం చింది. విద్యాహక్కు చట్టానికి, జీఓ న ంబర్ 55కు పొంతన లేకపోవడంతో ప్రస్తుతం సర్దుబాటు ప్రక్రియ సందిగ్ధంలో పడింది. జిల్లాలో నాలుగేళ్ల క్రితం రేషనలైజేషన్ ప్రక్రియతో బదిలీలు జరిగాయి. విద్యాహక్కు చట్టానికి పొంతనలేని రేషన లైజేషన్ జీఓలు అమలు చేయడం వల్ల అప్పటిలో 150 పోస్టుల వరకు రద్దయ్యాయి. ఇప్పుడూ అలాగే చేస్తే మరిన్ని పోస్టులు రద్దయ్యే ప్రమాదం ఉందని ఉపాధ్యా య వర్గాలు ఆందోళన పడుతున్నాయి.  
 
  


  సాక్షి, హైదరాబాద్: ఉపాధ్యాయ నియామకాల్లో ఓపెన్ కోటా పోస్టుల భర్తీని ఏపీలోని 13 జిల్లాలకే పరిమితం చేయాలని ఆ రాష్ట్ర ప్రభుత్వం విద్యాశాఖాధికారులకు స్పష్టం చేసింది. ఆర్టికల్ 371డి ప్రకారం టీచర్ పోస్టుల్లో ఓపెన్ కోటాలో ఇతర రాష్ట్రాల వారికి అవకాశం ఉండదని వివరించింది. దీంతో తెలంగాణ రాష్ట్రంలోని అభ్యర్థులకు ఏపీలోని ఉపాధ్యాయ నియామకాల్లో అవకాశం లేనట్లేనని స్పష్టమైంది. టీచర్ పోస్టుల భర్తీకోసం నిర్వహిస్తున్న టెర్ట్‌లోని 20 శాతం ఓపెన్ కోటా పోస్టులను మెరిట్ ప్రాతిపదికన ఇతర రాష్ట్రాల వారికి అవకాశమివ్వాలా? లేక ఏపీలోని 13 జిల్లాల వారితోనే వాటిని భర్తీ చేయాలా? అనే సందిగ్ధం అధికారుల్లో నెలకొన్న సంగతి తెలి సిందే. దీనిపై స్పష్టతనివ్వాలని మంగళవారం రాత్రి రాష్ట్ర ప్రభుత్వ ప్రధాన కార్యదర్శి ఐ.వై.ఆర్.కృష్ణారావుతో విద్యాశాఖ కార్యదర్శి అధర్‌సిన్హా, పాఠశాల విద్యాశాఖ కమిషనర్ ఉషారాణి భేటీ అయ్యారు. ఏపీలోని 13 జిల్లాల వారితోనే పోస్టులు భర్తీచేయాలని సీఎస్ వారికి స్పష్టంచేశారు. 371డి నిబంధనల ప్రకారం ఏపీలో 13 జిల్లాల్లో ఒక జిల్లాకు తక్కిన 12 జిల్లాలు నాన్‌లోకల్ అవుతాయని చెప్పారు. ఒక జిల్లాలోని టీచర్ పోస్టుల్లో 80 శాతం అక్కడివారిని నియమించి, తక్కిన 20 శాతం పోస్టులను మెరిట్‌లో ఉన్న ఇతర జిల్లాలవారికి ఇవ్వాలని సూచించారు.
  
  ఫీజుల చెల్లింపు ఏపీ ఆన్‌లైన్  వరకే...
  టీచర్ పోస్టులకు దరఖాస్తు చేసేవారు నిర్ణీత ఫీజును ఏపీ ఆన్‌లైన్ కేంద్రాల్లో, లేదా ఈ-సేవా కేంద్రాల్లో చెల్లించేలా నోటిఫికేషన్‌లో అధికారులు పేర్కొన్నారు. అయితే ఈ-సేవా కేంద్రాల్లో చెల్లించిన వివిధ రుసుముల మొత్తాలు సకాలంలో ఆయా శాఖలకు అందడం లేదన్న అభిప్రాయం కొన్ని శాఖల వారి నుంచి విద్యాశాఖకు అందింది. దీంతో ఫీజుల చెల్లింపును ఏపీ ఆన్‌లైన్ వరకే పరి మితం చేయాలని పాఠశాల విద్యాశాఖ డైరక్టరేట్ అధికారులు భావిస్తున్నారు. అయితే దీనిపై తుది నిర్ణయం తీసుకోలేదు.


 ఒంగోలు వన్‌టౌన్: జిల్లాలో మొత్తం 688 ఉపాధ్యాయ పోస్టులను భర్తీ చేసేందుకు ప్రభుత్వం నోటిఫికేషన్‌ను జారీ చేసింది. ఈ పోస్టుల భర్తీకి గతంలో ఎన్నడూ లేని విధంగా టెట్, డీఎస్సీలకు ఉమ్మడిగా రాత పరీక్షను నిర్వహిస్తున్నారు. ఉపాధ్యాయ అర్హతా పరీక్ష (టెట్), ఉపాధ్యాయ నియామక పరీక్ష (టిఆర్‌టి)ల ఉమ్మడి పరీక్షకు బుధవారం నుంచి అభ్యర్థులు దరఖాస్తులు సమర్పించుకోవచ్చు. జిల్లాలో మొత్తం 839 టీచర్ పోస్టులు ఖాళీగా ఉండగా ప్రభుత్వం కేవలం 688 టీచర్ పోస్టులను భర్తీ చేసేందుకు మాత్రమే నోటిఫికేషన్ జారీ చేసింది. మొత్తం ఖాళీల్లో 151 పోస్టులకు ప్రభుత్వం కోత విధించింది.
 
 స్కూలు అసిస్టెంట్లు, భాషా పండితులు, సెకండరీ గ్రేడు టీచర్లు, వ్యాయామోపాధ్యాయ పోస్టులను నోటిఫికేషన్‌లో ప్రకటించారు. స్కూలు అసిస్టెంట్ ఫిజికల్ సైన్స్, ఇంగ్లిష్ , ఫిజికల్ ఎడ్యుకేషన్, తెలుగు గ్రేడ్-2 భాషా పండితులు ఒక్క పోస్టు కూడా ఈ డీఎస్సీలో ప్రకటించలేదు. ఈ పోస్టుల కోసం అర్హులైన అభ్యర్థులు ఈ నెల 3వ తేదీ నుంచి 2015 జనవరి 17వ తేదీ వరకు దరఖాస్తులు సమర్పించవచ్చు. అభ్యర్థులు తమ దరఖాస్తులను ఠీఠీఠీ.ఛీట్ఛ్చఞ.జౌఠి.జీ వెబ్‌సైట్ నుంచి డౌన్‌లోడ్ చేసుకొని అభ్యర్థులు తమ వివరాలన్నింటినీ ఆ దరఖాస్తులో అప్‌లోడ్ చేయాలి.
 
 వివరాలను అప్‌లోడ్ చేసిన అనంతరం దరఖాస్తు ప్రింటవుట్ కాపీ తీసుకొని దానికి అభ్యర్థుల విద్యార్హతలు, స్టడీ సర్టిఫికేట్లు, కులధ్రువీకరణ పత్రాలు, ఇతర అర్హతా పత్రాలను స్వయంగా సంతకాలు చేసి ప్రింటవుట్ కాపీని జతపరిచి జిల్లా విద్యాశాఖాధికారి కార్యాలయంలో సమర్పించాలి. ఈ వివరాలన్నీ జిల్లా విద్యాశాఖాధికారి కార్యాలయం ధ్రువీకరిస్తేనే ఆ విద్యార్థుల హాల్‌టికెట్లు జనరేట్ అవుతాయి. అభ్యర్థులు దరఖాస్తును ఆన్‌లైన్‌లో సమర్పించిన తర్వాత తప్పనిసరిగా ఆ ప్రింటవుట్‌ను డీఈఓ కార్యాలయంలోనే అందజేయాలి. దరఖాస్తులను ఆన్‌లైన్‌లో సమర్పించకుండా నేరుగా డీఈఓ కార్యాలయాల్లో స్వీకరించరు. ఈ విషయాన్ని అభ్యర్థులు గమనించాలి.
 
 మేలో రాత పరీక్షలు
 
 ఉపాధ్యాయుల నియామకానికి సంబంధించి నిర్వహిస్తున్న టెట్, టి.ఆర్.టి. ఉమ్మడి రాతపరీక్షను 2015 మేలో నిర్వహించనున్నారు. సెకండరీ గ్రేడ్ టీచర్ పోస్టులకు దరఖాస్తులు చేసుకున్న అభ్యర్థులకు 2015 మే 9న, భాషా పండితులు, ఫిజికల్ ఎడ్యుకేషనల్ టీచర్లకు మే 10న, స్కూలు అసిస్టెంట్లు (లాంగ్వేజెస్ అండ్ నాన్ లాంగ్వేజెస్) మే 11న రాతపరీక్షలు నిర్వహిస్తున్నారు. ఈ రాత పరీక్షకు సంబంధించిన సిలబస్, మార్గదర్శకాలు, జిల్లాలవారీగా ఉపాధ్యాయ పోస్టుల ఖాళీల వివరాలను వెబ్‌సైట్‌లో ఉంచారు. అభ్యర్థులు వెబ్‌సైట్ నుంచి ఈ వివరాలను తెలుసుకోవచ్చు.
 
 భారీగా దరఖాస్తులు
 
 టి.ఆర్.టి, టెట్ ఉమ్మడి పరీక్షకు జిల్లా నుంచి భారీ సంఖ్యలో అభ్యర్థులు దరఖాస్తులు చేయనున్నారు. రాష్ట్రంలో మరే ఇతర జిల్లాల్లో లేని విధంగా డీఈడీ, బీఈడీ కళాశాలలున్నాయి. జిల్లాలో మొత్తం 45 బీఈడీ కళాశాలలు, 64 డీఈడీ కళాశాలలున్నాయి. జిల్లాలో ప్రతి సంవత్సరం సుమారు 10 వేల మంది అభ్యర్థులు బీఈడీ, డీఈడీ సర్టిఫికేట్లతో కళాశాల నుంచి బయటకు వస్తున్నారు. డీఎస్సీపై ఆశతో విద్యార్థులందరూ వివిధ కోచింగ్ సెంటర్లలో శిక్షణ పొందుతున్నారు. జిల్లాలోని ప్రభుత్వ, జిల్లా పరిషత్, మండల పరిషత్ పాఠశాలల్లోని ఖాళీల వివరాలు, డీఎస్సీకి ప్రకటించిన పోస్టులు, కుదించిన పోస్టుల వివరాలు ఈ దిగువ ఇస్తున్నాం.


 సాక్షి, చిత్తూరు: ముఖ్యమంత్రి సొంత జిల్లా చిత్తూరులో  రాష్ట్రంలోనే అత్యధికంగా 1606  ఉపాధ్యాయ పోస్టులను ప్రభుత్వం భర్తీ చేయనుండడంతో ఇతర జిల్లాలకు చెందిన బీఈడీ, డీఈడీ అభ్యర్థుల చూపు ఈ జిల్లా పై పడింది. నాన్‌లోకల్ వారికి 20శాతం రిజర్వేషన్ ఉం డడంతో బయట జిల్లాల అభ్యర్థులు చిత్తూరు జిల్లాలో డీఎస్సీ రాసేందుకు మొగ్గు చూపుతున్నారు.
 
 ముఖ్యంగా తక్కువ పోస్టులు ఉన్న వైఎస్సార్, విజయనగరం, కృష్ణాతోపాటు పలు  జిల్లాలకు చెందిన  అభ్యర్థులు  చిత్తూరులో డీఎస్సీ రాసేందుకు సన్నద్ధమవుతున్నట్లు సమాచారం. అధికారం చేపట్టిన ఆరు నెలల తరువాత ఎట్టకేలకు ప్రభుత్వం ఖాళీగా ఉన్న ఉపాధ్యాయ పోస్టులను భర్తీ చేసేందుకు సిద్ధమైంది. ఈ నెల 19న మంత్రి గంటాశ్రీనివాసరావు డీఎస్సీ నిర్వహణపై ప్రకటన చేయగా, 20న అధికారికంగా నోటిఫికేషన్ వెలువరించారు.   
 
 రాష్ట్రంలో 13 జిల్లాలతో పోలిస్తే చిత్తూరులోనే అత్యధికంగా 1606 ఉపాధ్యాయ పోస్టులు భర్తీ చేయనున్నారు. చిత్తూరు తరువాత అనంతపురం, తూర్పుగోదావరి, విశాఖపట్నం జిల్లాల్లో మాత్రమే వెయ్యి పైచిలుకు ఉపాధ్యాయ పోస్టులున్నాయి. రాష్ట్రంలోనే వైఎస్సార్ జిల్లాలో అతి తక్కువ పోస్టులు(356) మాత్రమే భర్తీ చేయనున్నట్లు నోటిఫికేషన్‌లో చూపారు. ఆ తరువాత వరుస క్రమంలో  విజయనగరం జిల్లాలో 362, కృష్ణాలో 379, శ్రీపొట్టి శ్రీరాములు నెల్లూరు 416, పశ్చిమ గోదావరి 601, శ్రీకాకుళం 719, కర్నూలు731 పోస్టులను మాత్రమే భర్తీ చేస్తున్నారు. అన్ని జిల్లాల్లోనూ  వేలసంఖ్యలోనే ఉపాధ్యాయ పోస్టులు  ఖాళీగా ఉన్నాయి.
 
 ప్రభుత్వం మాత్రం రేషనలైజేషన్ పేరుతో పోస్టులు కుదించి మొక్కుబడిగా ఖాళీలను భర్తీ చేసేందుకు సిద్ధంకావడంపై  విమర్శలు వెల్లువెత్తుతున్నాయి. రెండేళ్లుగా డీఎస్సీ లేకపోవడంతో  ఒక్కో జిల్లాలో 20 వేల నుంచి 40 వేలమంది వరకూ బీఈడీ,డీఈడీ అభ్యర్థులు ఉన్నారు. చాలా జిల్లాల్లో నామమాత్రంగా మాత్రమే ఉపాధ్యాయ నియామకాలు జరుగుతుండడంతో పోటీ పెరిగింది. దీంతో అధికంగా ఖాళీలు ఉన్న  జిల్లాలకు అర్హులైన అభ్యర్థులు తరలిపోనున్నారు.
 
 చిత్తూరుకు తరలనున్న అభ్యర్థులు:
 వైఎస్సార్, విజయనగరం,  కృష్ణా, శ్రీపొట్టి శ్రీరాములు నె ల్లూరు, కర్నూలు, శ్రీకాకుళం జిల్లాల్లో తక్కువ పోస్టులు ఉండడంతో ఆ జిల్లాలకు చెందిన వారు చిత్తూరులో డీఎస్సీ రా సేందుకు ఎగబడుతున్నారు. చిత్తూరు జిల్లాలో స్కూల్ అసిస్టెంట్ పోస్టులు 221 ఉండగా, సెకెండరీ గ్రేడ్‌కు సంబంధించి 1,194 పోస్టులున్నాయి. లాంగ్వేజ్ పండిట్స్ 182 ఉండగా, పీఈటీలకు సంబంధించి 9 పోస్టులు ఉన్నాయి. మొత్తం జిల్లాలో 1,606 ఉపాధ్యాయ పోస్టులు ఖాళీగా ఉన్నాయి.
 
 స్కూల్ అసిస్టెంట్లకు సంబంధించి బీఈడీ అభ్యర్థులు మాత్రమే అర్హులని ప్రభుత్వం ఇప్పటికే ప్రకటించింది. ఇక సెకండరీ గ్రేడ్‌కు సంబంధించి డీఈడీ అభ్యర్థులు మాత్రమే అర్హులు.  చిత్తూరు జిల్లాలో 30 బీఈడీ కళాశాలలు, 48 డీఈడీ కళాశాలలు ఉన్నాయి. వీటి పరిధిలో ఏడాదికి 15వేలకు పైచిలుకు విద్యార్థులు ఉత్తీర్ణులవుతున్నారు. రెండు సంవత్సరాలుగా డీఎస్సీ జరగకపోవడంతో ప్రస్తుతం జిల్లా వ్యాప్తంగా 35 వేల నుంచి 40వేల మంది అర్హులైన అభ్యర్థులు ఉన్నట్లు సమాచారం. ఇక ఇతర జిల్లాల అభ్యర్థులు సరేసరి.


 నెల్లూరు (విద్య) : టెట్, టీచర్ రిక్రూట్‌మెంట్ టెస్ట్ ద్వారా జిల్లాలో 416 టీచర్ పోస్టులు భర్తీ కానున్నాయి. ఈ సారి ప్రత్యేకంగా మున్సిపాల్టీల్లో ఖాళీగా ఉన్న పోస్ట్‌లను భర్తీచేసేందుకు జీఓ విడుదల చేశారు. దీంతో 78 పోస్టులు అధికంగా భర్తీ కానున్నాయి. మొత్తం 494 పోస్ట్‌లు భర్తీకానున్నాయి. మున్సిపాల్టీకి కేటాయించిన పోస్టుల్లో 78 స్కూల్ అసిస్టెంట్స్ 4, ఎస్జీటీలు 42, తెలుగు పండిట్‌లు 18, వ్యాయామ ఉపాధ్యాయులు, తదితరులు 14 పోస్ట్‌లు ఉన్నాయి.
 
 జిల్లాలో జెడ్‌పి, ప్రభుత్వ పాఠశాలల్లో మొత్తం 416 పోస్టుల్లో ఎస్జీటీ తెలుగు 289, ఉర్దూ 18,  భాషా పండితులు తెలుగు 35, ఉర్దూ 4, సంస్కృతం 2, హిందీ 1,  పీఈటీలు 10, స్కూల్ అసిస్టెంట్స్ పిఎస్ 3, బయోలాజికల్ సైన్స్ 8, సోషల్ స్టడీస్ 29, ఇంగ్లీష్ 6, తెలుగు 8, హిందీ 3 పోస్ట్‌లకు అభ్యర్థులు అర్హత పరీక్షలను రాయనున్నారు. పోస్ట్‌లు తక్కువగా ఉండటం, అభ్యర్థులు ఎక్కువగా ఉండటంతో పోటీ తీవ్రంగా ఉండబోతోంది. ఎట్టకేలకు ఉపాధ్యాయ ఉద్యోగాల భర్తీకి ప్రభుత్వం జెండా ఊపడంతో అభ్యర్థుల్లో నూతన ఉత్సాహం కనబడుతోంది.


 * తాజాగా టెట్ కమ్ టీచర్ రిక్రూట్‌మెంట్ టెస్ట్
 * మోగిన డీఎస్సీ గంట
 * బీఈడీ అభ్యర్థులకు నిరాశ
 * జిల్లాలో తీవ్రమైన పోటీ
 నెల్లూరు(విద్య): ఎన్నికలకు ముందు ఉపాధ్యాయ పోస్టులను భర్తీ చేస్తామని పదేపదే వాగ్దానం చేసిన టీడీపీ అధికారంలోకి వచ్చిన తర్వాత ఉపాధ్యాయ అర్హత పరీక్షలను వాయిదావేస్తూ వచ్చింది. ఊరించి.. చివరకు బుధవారం పేరుమార్చి టెట్ కమ్ టీచర్ రిక్రూట్‌మెంట్ టెస్ట్‌గా విధి విధానాలను ప్రకటించింది. ఎట్టకేలకు ఉపాధ్యాయుల అర్హత పరీక్షకు మంత్రి గంటా మోగించారు. ఎస్జీటీ పోస్టులకు బీఈడీ అభ్యర్థులు అనర్హులని ప్రభుత్వం ప్రకటించింది. కేంద్రప్రభుత్వం ఒప్పుకోలేదని ఎస్జీటీలకు డీఈడీ అభ్యర్థులే అర్హులని స్పష్టం చేసింది.
 
 గతంలో ఏపీ టెట్ పరీక్ష రాసి అర్హత సాధించిన అభ్యర్థులు సైతం మళ్లీ పరీక్ష రాయాలని నిబంధన విధించింది. 2015 మే తొమ్మిదిన ఎస్జీటీ, 10న ఎల్‌పీ, పీఈటీ, 11న స్కూల్ అసిస్టెంట్లకు టెట్ కమ్ టీచర్ రిక్రూట్‌మెంట్ టెస్ట్ అర్హత పరీక్షలు నిర్వహించనున్నారు. దీర్ఘకాలికంగా ఎదురుచూసిన అభ్యర్థుల్లో నోటిఫికేషన్ వెలువడుతోందన్న ఆనందం కంటే నిరాశే ఎక్కువైంది. ఎస్జీటీ పోస్టులకు బీఈడీ చేసిన వారికి కూడా అర్హత కల్పిస్తామని నాన్చుతూ వచ్చిన ప్రభుత్వం చివరకు చేతులెత్తేయడం వారి పాలిట శాపంగా మారింది. వయో పరిమితిని 40ఏళ్లకు పెంచారు. 2012లో డీఎస్సీని నిర్వహించారు. ఏపీ టెట్‌లో అర్హత సాధించి మళ్లీ పరీక్ష రాయాల్సిన పరిస్థితి మరికొంతమందికి నెలకొంది.
 
 ఉమ్మడి పరీక్షల్లో వచ్చిన మార్కులు, గతంలో జరిగిన టెట్‌మార్కులకు సంబంధించి  ఏ  పరీక్షల్లో ఎక్కువ మార్కులు వస్తే అందుకు అనుగుణంగా 20 శాతం వెయిటేజీని ఇస్తామని నిర్ణయించారు. దీంతో అభ్యర్థులు కొత్తగా కుస్తీ పట్టాల్సి వస్తోంది. బీఈడీ అభ్యర్థుల సిలబస్ విసృ్తతంగా ఉన్నట్లు విశ్లేషకులు అంచనా వేస్తున్నారు. టెట్, డీఎస్సీ సిలబస్ కలిపి ఒకే పరీక్షలో రాయాల్సి రావడం ఇందుకు నిదర్శనం. రెండేళ్ల నుంచి సిలబస్‌పై ఉన్న సందేహాలపై పూర్తిస్పష్టత రావాల్సి ఉంది.
  
 పోస్టుల్లోనూ నిరాశే
 జిల్లాలో 416 పోస్టులు భర్తీచేయాల్సి ఉంది. ఎస్జీటీలు 307, స్కూల్ అసిస్టెంట్లు 57, లాంగ్వేజ్ పండితులు 42, పీఈటీలు 10 పోస్టులు ఉన్నాయి. 416 పోస్టులకు వేల సంఖ్యలో అభ్యర్థులు పోటీపడనున్నారు. దీంతో కోచింగ్ సెంటర్లలో విపరీతమైన పోటీ నెలకొననుంది.
  
 బట్టీ విధానం పనికిరాదు
 ఉమ్మడి పరీక్షా విధానంలో బట్టీ విధానం పనికిరాదు. ప్రతి అంశాన్నీ క్షుణ్ణంగా, విశ్లేషణాత్మకంగా చదవాలి. చైల్డ్ డెవలప్‌మెంట్ అంట్ పెడగాని మెథడాలజీలతో పాటు ప్రతి అంశంపై ప్రత్యేక శ్రద్ధ, ప్రణాళిక అవసరం.       కనకరాజు, సబ్జెక్ట్ ఎక్స్‌పర్ట్  
  
 పరిపూర్ణ అవగాహన అవసరం
 ప్రతి సబ్జెక్ట్‌పై అవగాహన అవసరం. అకాడమీ పుస్తకాలు చదవడం ముఖ్యం. పోటీ తీవ్రతకు భయపడకుండా ప్రణాళికతో చదవాలి.      వెంకటేశ్వర్లు, సబ్జెక్ట్ ఎక్స్‌పర్ట్
  
 సంతోషంగా ఉంది..
 ఇప్పటికైనా టీచర్ అర్హత పరీక్షకు నోటిఫికేషన్ వెలువడటం సంతోషంగా ఉంది. ఎస్జీటీ పోస్టులకు ఆరోగ్యకరమైన పోటీ ఉంది. కష్టపడి చదివితే ఉద్యోగం సాధించవచ్చు. సిలబస్‌పై స్పష్టత రావాల్సి ఉంది. డీఎడ్ అభ్యర్థులకు మాత్రమే ఎస్జీటీ పోస్ట్‌లను కేటాయించడం హర్షణీయం.                 పుష్పలత  
  
 ఆనందం లేకుండా పోయింది
 నోటిఫికేషన్ ఇచ్చారన్న ఆనందం లేదు. ఇన్ని సంవత్సరాలు ఎదురుచూశాం. గతంలో టెట్‌లో అత్యధిక మార్కులు సాధించాను. మళ్లీ ఇప్పుడు రాయాల్సి వస్తోంది. అన్ని సబ్జెక్ట్‌లను మళ్లీ చదవాలంటే కష్ట సాధ్యం. ఈ ఏడాదికి మామూలు విధానాన్నే అమలు చేసుంటే బావుండేది. మొత్తంమీద మరో విద్యా సంవత్సరం కోల్పోయాం.
  -మహేశ్వర్


 డీఎస్సీ కోసం ఎదురుచూస్తున్న నిరుద్యోగులకు సంకాంత్రి తర్వాత నోటిఫికేషన్ విడుదల చేయొచ్చన్న విద్యాశాఖ మంత్రి ప్రకటన ఆశలు రేపింది. ఇప్పటికే పలువురు అభ్యర్థులు పరీక్షలకు సన్నద్ధమవుతున్నారు.  
  
  నల్లగొండ అర్బన్ : ‘‘రేషనలైజేషన్ పూర్తి చేసి సంక్రాంతి తర్వాత డీఎస్పీ నోటిఫికేషన్ విడుదల చేస్తాం. వచ్చే విద్యాసంవత్సరం నాటికి భర్తీ ప్రక్రియ పూర్తిచేస్తాం’’
  
  - విద్యాశాఖ మంత్రి జగదీష్‌రెడ్డి
  రేషనలైజేషన్ తర్వాత టీచర్ పోస్టులు ఖాళీగా ఉంటే తప్ప భర్తీ ప్రక్రియ ప్రశ్నార్థకం కాగలదనే విశ్లేషణలతో డీలాపడ్డ నిరుద్యోగులకు విద్యాశాఖమంత్రి ప్రకటనతో ఒకింత ఆశలను పదిలం చేసింది. ప్రభుత్వ ఉపాధ్యాయులుగా కెరీర్ ప్రారంభించడానికి వీలు కల్పించే డిస్ట్రిక్ట్ సెలక్షన్ కమిటీ (డీఎస్సీ) నోటిఫికేషన్ కోసం జిల్లాలో ఉద్యోగార్థులు ఎంతోకాలంగా నిరీక్షిస్తున్నారు. 2012 ఆగస్టులో జరిగిన డీఎస్సీ తర్వాత రెండున్నరేళ్లుగా అదిగో, ఇదిగో నోటిఫికేషన్ విడుదల అంటూ దోబూచులాడటం తప్ప ప్రభుత్వం నుంచి స్పష్టత కొరవడింది.  సంక్రాంతి తర్వాత నోటిఫికేషన్ వెలువడవచ్చునని సమాచారంతో ఆశలు చిగురించాయి. ఇప్పటికే పలువురు అభ్యర్థులు పరీక్షలకు సన్నద్ధమవుతున్నారు. కోచింగ్ సెంటర్లు సైతం కొత్త బ్యాచ్‌లను ప్రారంభించాయి. మినీ సివిల్స్‌గా భావించే డీఎస్సీ పరీక్షకు వేలల్లో పోటీ ఉండే అవకాశం ఉంది.
  
  జిల్లాలో 1,530 పోస్టులు ఖాళీ...
  జిల్లా విద్యాశాఖ వారి వద్ద ఉన్న గణాంకాల ప్రకారం 2014 అక్టోబర్ 25వ తేదీ వరకు జిల్లాలో 1,530 పోస్టులు ఖాళీగా ఉన్నాయి. ఇవి కాకుండా పదోన్నతుల ద్వారా భర్తీ చేసే ఖాళీలు కూడా ఉన్నాయి. అయితే వచ్చే 2015 జూన్ వరకు ఏర్పడే ఖాళీలను కూడా కలిపి నోటిఫికేషన్ విడుదల చేస్తామని విద్యాశాఖ మంత్రి జగదీష్‌రెడ్డి ప్రకటించడాన్ని బట్టి ఖాళీల సంఖ్య పెరగనుంది. ప్రస్తుతం ఉన్న ఖాళీలు ఎస్జీటీ-1193, లాంగ్వేజ్ పండిట్లు హిందీ-35, ఉర్దూ-02, పీఈటీ - 34 ఉన్నాయి.
  
  స్కూల్ అసిస్టెంట్లు 305 పోస్టులు ఖాళీ ...
  స్కూల్ అసిస్టెంట్లు 305 ఖాళీలుండగా 70 శాతం నేరుగా (213 పోస్టులు), 30 శాతం (92 పోస్టులు) పదోన్నతిపై భర్తీ చేయనున్నారు. బయోసైన్స్ - 30, ఇంగ్లీష్ - 14, హిందీ - 13, తెలుగు - 22, మ్యాథ్స్ - 31, ఫిజికల్ సైన్స్ -12, సోషల్ -91 ఖాళీలను డీఎస్సీ ద్వారా భర్తీ చేయవచ్చు. ఇవి కాకుండా క్రాఫ్ట్‌ఇన్‌స్ట్రక్టర్లు - 53, మ్యూజిక్ - 03, డ్రాయింగ్ మాస్టర్లు - 21 ఖాళీలున్నా వాటిని భర్తీ చేసే అవకాశాలు ఉండకపోవచ్చునని భావిస్తున్నారు.
  
  ‘టెట్’పై రాని స్పష్టత...
   ఈసారి టెట్, డీఎస్సీలకు కలిపే పరీక్ష నిర్వహిస్తారా...? లేదా అన్న అంశంపై స్పష్టత రావాల్సి ఉంది. 2012 డీఎస్సీలో 80 మార్కులకు రాత పరీక్ష, 20 మార్కులను ‘టెట్’ మెరిట్ ఆధారంగా భర్తీ చేశారు. టీచర్ ఎలిజబులిటీ టెస్ట్ (టెట్) నిర్వహణపై వివిధ వర్గాల నుంచి వ్యతిరేకత వ్యక్తమవుతున్న క్రమంలో నేరుగా 100 మార్కులకు డీఎస్సీ నిర్వహించవచ్చునని భావిస్తున్నారు.
  


 సాక్షి, రంగారెడ్డిజిల్లా: విద్యార్థులు ఉన్నత శిఖరాలు అధిరోహించడంలో ఉపాధ్యాయల పాత్ర ఎంతో కీలక మని, ఉత్తమ విద్యాబోధన ద్వారానే విద్యార్థులు మంచి పౌరులుగా ఎదుగుతారని రవాణా శాఖ మంత్రి పట్నం మహేందర్‌రెడ్డి అన్నారు. ఉపాధ్యాయ దినోత్సవాన్ని పురస్కరించుకుని జిల్లాలో ఉత్తమ సేవలందించిన ఉపాధ్యాయులను శుక్రవారం కొత్తపేట బీజేఆర్ భవన్‌లో పురస్కారాలతో సత్కరించారు.
 
 కార్యక్రమానికి ముఖ్య అతిథిగా హాజరైన మంత్రి మాట్లాడుతూ.. గురువు లేనిదే ఎవ్వరూ రాణించలేరన్నారు. ఇప్పుడున్న ఎంతోమంది ప్రజా ప్రతినిధులు, అధికారులు ఎలాంటి సౌకర్యాలు లేని ప్రభుత్వ పాఠశాలల్లో చదువుకుని ఉపాధ్యాయుల సూచనలతో పైకి వచ్చినవారేనన్నారు. తెలంగాణ రాష్ట్ర ఏర్పాటులో ఉపాధ్యాయుల పాత్ర కీలకమని, బంగారు తెలంగాణ నిర్మాణంలోనూ వారు పాలుపంచుకోవాలన్నారు. ముఖ్యమంత్రి కేసీఆర్ మేనిఫెస్టోలో ప్రకటించినట్లు కేజీ నుంచి పీజీ వరకు ఉచిత నిర్భంధ విద్యను అమలు చేస్తామని స్పష్టం చేశారు.
 
  ప్రభుత్వ పాఠశాలల్లో ఉపాధ్యాయుల కొరత ఉందని, త్వరలో ఆ పోస్టులను భర్తీ చేస్తామని చెప్పారు. జెడ్పీ చైర్‌పర్సన్ సునీతారెడ్డి మాట్లాడుతూ.. సర్వేపల్లి రాధాకృష్ణన్‌ను అందరూ ఆదర్శంగా తీసుకుని ముందుకు వెళ్లాలని సూచించారు. విద్యార్థులను తీర్చిదిద్దడంలో ఉపాధ్యాయుల పాత్ర మరువలేనిదన్నారు. భువనగిరి ఎంపీ వూర నర్సయ్యగౌడ్ మాట్లాడుతూ.. గురువులు వెన్నంటి ప్రోత్సహిస్తే సాధించలేనిది ఏదీ ఉండదన్నారు. కలెక్టర్ శ్రీధర్ మాట్లాడుతూ.. ఉపాధ్యాయ వృత్తి ఎంతో ఉన్నతమైందని పేర్కొన్నారు.
 
 ప్రభుత్వ పాఠశాలలో చదివి తాను ఈ స్థాయిలో ఉన్నానంటే అది ఉపాధ్యాయుల కృషి ఫలితమేనన్నారు. డీఈఓ రమేశ్ తాను సొంతంగా రాసుకున్న ‘ప్రణామం గురువా.. ప్రణామం, పెడదారిన పడుతున్న మా పట్ల వారధిగా మారి..’ అన్న పాటను పాడి ఆకట్టుకున్నారు. అనంతరం విద్యారంగంలో ఉత్తమ సేవలందించిన 85 మంది ఉపాధ్యాయులను ఘనంగా సత్కరించి, పురస్కారాలు అందచేశారు. విద్యార్థులు ప్రదర్శించిన సాంస్కృతిక కార్యక్రమాలు అలరించాయి. కార్యక్రమంలో మహేశ్వరం, వికారాబాద్ ఎమ్మెల్యేలు తీగల కృష్ణారెడ్డి, సంజీవరావు, ఎమ్మెల్సీలు కాటేపల్లి జనార్ధన్‌రెడ్డి, పట్నం నరేందర్‌రెడ్డి, ఆర్‌వీఎం పీడీ కిషన్‌రావ్ తదితరులు పాల్గొన్నారు.


  సాక్షి, హైదరాబాద్: మోడల్ స్కూళ్లలో నిలిచిపోయిన పీజీటీ, టీజీటీ పోస్టుల భర్తీకి కౌన్సెలింగ్ ను ఈ నెలాఖరులో నిర్వహించేందుకు పాఠశాల విద్యా శాఖ ఏర్పాట్లు చేస్తోంది. భర్తీ ప్రక్రియ సర్టిఫికెట్ల వెరిఫికేషన్, వెబ్ కౌన్సెలింగ్ షెడ్యూల్‌ను  25 లేదా 26 తేదీల్లో జారీ చేయనున్నారు. ఏడాదిగా పెండింగ్‌లో ఉన్న ఈ పోస్టుల భర్తీకి ప్రభుత్వం గ్రీన్‌సిగ్నల్ ఇచ్చిందని మోడల్ స్కూ ల్స్ ఎక్స్‌అఫీషియో పీడీ జగదీశ్వర్ తెలిపారు. ఈ పోస్టుల భర్తీలో తెలుగు మీడియం అభ్యర్థులను అనుమతించని కారణంగా న్యాయ వివాదం ఏర్పడి ఆలస్యమైన సంగతి తెలిసిందే. దీంతో 1000 పీజీటీ,  600 వరకు టీజీటీ పోస్టుల భర్తీ ఆగిపోయింది.
  


 మహబూబ్‌నగర్ విద్యావిభాగం : తెలంగాణలో ఖాళీగా ఉన్న ఉపాధ్యాయ పోస్టులను వెంటనే భర్తీ చేయాలని తెలంగాణ ప్రధానోపాధ్యాయుల సంఘం రాష్ట్ర అధ్యక్షుడు మోహన్‌రెడ్డి డిమాండ్‌చేశారు. శుక్రవారం జిల్లా కేంద్రంలోని ఆర్‌అండ్‌బీ అతిథి గృహంలో సంఘం జిల్లా కార్యవర్గ సమావేశానికి ముఖ్య అతిథిగా హాజరైన ఆయన ఈ మేరకు మాట్లాడారు. సర్విస్ రూల్స్‌ను రూపొందించి అర్హతగల ఉపాధ్యాయులకు జెల్, డైట్‌లెక్చరర్, డిప్యూటీఇఓలుగా పదోన్నతి కల్పించాలని అన్నారు.
  
 ఆర్‌ఎంఎస్‌ఏ నిధుల ద్వారా పాఠశాలలకు వసతులు కల్పించాలని, నెలవారి పదోన్నతులను అడహక్ పద్ధతిలో నిర్వహించాలని డిమాండ్ చేశారు. అన్ని పాఠశాలల్లో కంప్యూటర్ విద్యను అమలు చేయాలని, ప్రతి పాఠశాలలో స్వీపర్, అటెండర్, జూనియర్ అసిస్టెంట్ పోస్టుల నియామకం వెంటనే చేయించాలన్నారు. ప్రతి నియోజక వర్గానికి ఒక డిప్యూటీ డీఈఓ పోస్టులను కేటాయించాలని కోరారు. సమావేశంలో జిల్లా అధ్యక్షుడు సింహయ్య, వాహిద్, హేమచంద్ర, ప్రకాశ్, బాల్‌రాం, దశరథనాయక్, యాదయ్య తదితరులు పాల్గొన్నారు.


 డీఈఓ రాజేశ్వర్‌రావు
  జగదేవ్‌పూర్: జిల్లాలో 1,300 ఉపాధ్యాయుల పోస్టులు ఖాళీగా ఉన్నాయని, త్వరలోనే వీటిని భర్తీ చేసేందుకు చర్యలు చేపడుతున్నట్లు జిల్లా విద్యాధికారి రాజేశ్వర్‌రావు పేర్కొన్నారు. గురువారం ఆయన, మండలంలోని చేబర్తి, ఎర్రవల్లి గ్రామాల్లోని ప్రభుత్వ పాఠశాలలను ఆకస్మిక తనిఖీ చేశారు. ఈ సందర్భంగా ఆయన మాట్లాడుతూ, జిల్లాలో ప్రభుత్వ పాఠశాలల్లో చాలా చోట్ల ఉపాధ్యాయుల పోస్టులు ఖాళీగా  ఉన్నాయని, ఈ అంశాన్ని ప్రభుత్వ దృష్టికి తీసుకువెళ్లామన్నారు.
  
  అంతేకాకుండా జిల్లాలోని పలు పాఠశాలల్లో వంట గదులు, తాగునీటి సమస్య, ఉపాధ్యాయుల కొరతపై సీఎం కేసీఆర్ దృష్టికి తీసుకువెళ్లామన్నారు. ప్రస్తుతం 53 పాఠశాలల్లో తెలుగు పండితులు, 57 పాఠశాలలో ఉర్దూ టీచర్ల పోస్టులు ఖాళీలు ఉన్నాయన్నారు. ప్రస్తుతం ఉపాధ్యాయుల కొరత ఉన్న పాఠశాలల్లో డిప్యుటేషన్ పద్ధతిపై టీచర్లను సర్దుబాటు చేస్తున్నామన్నారు.
  
  జిల్లాలోని 26 ఆదర్శ పాఠశాలల్లో నెలకొన్న సమస్యలను వారం రోజుల్లో పరిష్కరిస్తానని తెలిపారు. అనంతరం మండలంలోని వివిధ పాఠశాలల్లో నెలకొన్న సమస్యలను ఎంఈఓ సుగుణాకర్‌రావును అడిగి తెలుసుకున్నారు. ఈ సందర్భంగా చేబర్తి వాసులు తమ గ్రామంలో మోడల్ స్కూల్ ఏర్పాటు చేయాలని డీఈఓను కోరారు. డీఈఓ వెంట ప్రధానోపాధ్యాయులు జ్యోతి, జయసింహారెడ్డి, ఉపాధ్యాయులు సురేందర్‌రెడ్డి, యాదగిరి, స్వాతి, కుమార్, ఎస్‌ఎంసీ చైర్మన్ బాలచంద్రం, ఎర్రవల్లి సర్పంచ్ భాగ్య ఉన్నారు.
  


  సాక్షి, కర్నూలు : డీఎస్సీ ద్వారా ఉపాధ్యాయ పోస్టులు భర్తీ చేస్తామని తాజాగా ప్రభుత్వం ప్రకటించడంతో నిరుద్యోగుల్లో ఆశలు రేకెత్తుతున్నాయి. ఉపాధ్యాయ నియామక ప్రకటన సెప్టెంబరు, అక్టోబరు మధ్యలో జారీ చేయనున్నట్లు, ఇకపై ప్రతి ఏటా డీఎస్సీ నిర్వహించాలని భావిస్తున్నట్లు రాష్ట్ర మానవ వనరుల అభివృద్ధి శాఖ మంత్రి గంటా శ్రీనివాసరావు బుధవారం ప్రకటించారు. 2008, 2012లలో డీఎస్సీ నిర్వహణ అనంతరం రెండేళ్ల తర్వాత ప్రకటన వెలువడడంతో ఆశావహుల్లో ఉత్కంఠ నెలకొంది.
 
  డీఎస్సీ ద్వారా జిల్లాలో ఖాళీగా ఉన్న 587 పోస్టులు భర్తీ అయ్యే అవకాశం ఉంది. జిల్లాలో స్కూల్ అసిస్టెంట్లు 90, సెంకడరీ గ్రేడ్ టీచర్ల పోస్టులు 401, భాషా పండితలు 84, పీఈటీలు 12 పోస్టలు ఖాళీగా ఉన్నాయి. ఈ ఖాళీలు నింపడంతో బ్యాక్‌లాగ్, ఎస్సీ, ఎస్టీ, ఓసీ, బీసీ కేటగిరీల వారీగా ప్రాధాన్యం ఇవ్వనున్నారు. ఇప్పటికే పలువురు యువకులు డీఈటీ, బీఈడీ కోర్సులు పూర్తిచేసి డీఎస్సీ రాత పరీక్ష కోసం ఎదురుచూస్తున్నారు. త్వరలో డీఎస్సీ ప్రకటన వెలువడనున్నట్లు ప్రకటించడంతో వారంతా కసరత్తు మొదలెట్టారు.
 
  ఖాళీలు నిండితే సజావుగా పాఠాలు..
  విద్యా హక్కు చట్టం ప్రకారం రెగ్యులర్ ఉపాధ్యాయులే ఉండాలన్న నిబంధనతో గత ఏడాది పాఠశాలల్లో విద్యావలంటీర్లను నియమించలేదు. దీంతో అటు రెగ్యులర్ ఉపాధ్యాయులు, ఇటు విద్యావలంటీర్లు లేకుండా విద్యా సంవత్సరం ముగిసింది. ఈ విద్యా సంవత్సరం ప్రారంభం నాటికి ఉపాధ్యాయులను నియమించాల్సి ఉండగా నేటివరకూ ఆ చర్యలే కానరాలేదు. బదిలీలు, పదోన్నతులు, పదవీవిరమణ తదితర కారణాలతో జిల్లాలోని పలు ప్రాథమిక పాఠశాలలు ఏకోపాధ్యాయ పాఠశాలలుగా కొనసాగుతున్నాయి.
 
 అంతేకాకుండా పలు సబ్జెక్టులను బోధించేందుకు కూడా ఉపాధ్యాయులు కొరత వెంటాడుతోంది. జిల్లాలో 4,021 పాఠశాలు ఉంటే వీటి పరిధిలో 23,866 మంది ఉపాధ్యాయులు ఉన్నట్లు యంత్రాంగం చెబుతోంది. కొన్ని చోట్ల ఉపాధ్యాయులు, విద్యార్థుల శాతానికి పొంతన కుదరడం లేదు. రేషనలైజేషన్ ద్వారా ఈ పరిస్థితి చక్కదిద్దేందుకు విద్యాశాఖ చర్యలు తీసుకుంటోంది. డీఎస్సీ ద్వారా ఖాళీల భర్తీ జరిగితే చదువులు సవ్యంగా సాగే అవకాశం లేదు.
  
  ప్రకటన కోసం ఎదురుచూపులు..
  గత ఏడాది నవంబరు 9, 10, 11 తేదీల్లో డీఎస్సీని నిర్వహించనున్నట్లు విద్యాశాఖ జులైలో ప్రకటించింది. వివిధ కారణాలతో దానిని వాయిదా వేసింది. దీంతో డీఎస్సీ కోసం కోచింగ్ కేంద్రాల్లో చేరిన నిరుద్యోగులు నిరుత్సాహపడ్డారు. కానీ టెట్ పరీక్ష రాసి ప్రణాళికగా డీఎస్సీ కోసం ఎదురుచూస్తున్నారు. మళ్లీ ఆశలు చిరుగించేలా ప్రభుత్వం డీఎస్సీ నోటిఫికేషన్‌ను విడుదల చేయాలని నిర్ణయించింది.


 
 భర్తీకాని 2013 నాటి పోస్టులు
 
  పెరగనున్న పోస్టుల సంఖ్య  
 
  ఎస్‌జీటీలుగా బీఎడ్‌లకు అవకాశమిస్తారా?
 
 హనుమాన్‌జంక్షన్ : రెండేళ్లుగా ఉపాధ్యాయ ఉద్యోగార్థులను ఎంతగానో ఊరిస్తున్న డీఎస్సీ నిర్వహణకు ప్రభుత్వం ఎట్టకేలకు గ్రీన్‌సిగ్నల్ ఇచ్చింది.  సెప్టెంబర్, అక్టోబర్ మాసాల్లో డీఎస్సీ నోటిఫికేషన్ జారీ చేసి రాష్ట్ర వ్యాప్తంగా దాదాపుగా 10,500 పోస్టులు భర్తీ చేయనున్నట్లు తెలపటంతో జిల్లాలోని బీఈడీ, డీఈడీ పూర్తి చేసిన విద్యార్థుల్లో కొత్త ఆశలను చిగురింపజేసింది.
 
 జిల్లాలోని ప్రభుత్వ పాఠశాలల్లో సుమారు 2 వేలకు పైబడి ఉపాధ్యాయ పోస్టులు ఖాళీగా ఉన్నాయని ఉపాధ్యాయ సంఘాల నేతలు చెబుతున్నారు. ఇప్పటికే డీఎస్సీ-2013 నోటిఫికేషన్ ద్వారా 845 టీచర్ పోస్టులను భర్తీ చేసేందుకు గత ప్రభుత్వ హాయంలో నోటిఫికేషన్ జారీ అయింది. ఆ తర్వాత సమైక్య ఉద్యమం ఉధృతం కావడం, రాష్ట్ర విభజన జరగడంతో డీఎస్సీ-2013 నిర్వహణ నిలిచిపోయింది. ఐతే డీఎస్సీ -2013 నోటిఫికేషన్‌లో ప్రకటించిన ప్రకారమే పోస్టుల సంఖ్య ఉంటుందా ? లేదా తాజా నోటిఫికేషన్‌లో పోస్టులు పెరుగుతాయా? అనేది అభ్యర్థుల్లో ఆత్రుత  కలిగిస్తుంది.
  
 పెరిగిన ఖాళీలు....
  
 జిల్లాలోని మండల పరిషత్ ప్రాథమిక, ప్రాథమికోన్నత పాఠశాలలు, జడ్పీ హైస్కూళ్లలో ఈ విద్యా సంవత్సరం ఆరంభం నాటికి ఉపాధ్యాయ పోస్టుల ఖాళీల సంఖ్య దాదాపు 2 వేలకు పైబడి ఉన్నట్లు తెలుస్తోంది. గడచిన రెండేళ్లుగా డీఎస్సీ ప్రకటన లేకపోవడం, దాదాపు 500 మంది ఉపాధ్యాయులు ఉద్యోగ విరమణ చేయటంతో ఖాళీల సంఖ్య పెరిగిందని ఉపాధ్యాయ సంఘాల నేతలు చెబుతున్నారు.
 
 అంతేకాక ఎనిమిదో తరగతికి అప్‌గ్రేడ్ చేసిన ప్రాథమిక్నోత పాఠశాలల్లో స్కూల్ అసిస్టెంట్ పోస్టులను కొత్తగా మంజూరు చేయాల్సి ఉందని, దీనిపై ప్రభుత్వం తీసుకునే నిర్ణయం ఆధారంగా పోస్టుల సంఖ్య ఉంటుందని చెబుతున్నారు. అప్‌గ్రేడ్ ప్రాధమిక్నోత పాఠశాలలకు స్కూల్ అసిస్టెంట్ టీచర్ల పోస్టులను అదనంగా మంజూరు చేస్తే జిల్లాలో కొత్తగా దాదాపు 500 స్కూల్ అసిస్టెంట్ పోస్టులు పెరుగుతాయని అంచానా వేస్తున్నారు. ఖాళీ పోస్టుల్లో సుమారు 80 శాతం వరకు డీఎస్సీ-2014 ద్వారా భర్తీ చేయవచ్చని విద్యాశాఖ అధికారులు భావిస్తున్నారు.
 
 బీఈడీ విద్యార్థులకు ఎస్‌జీటీ అవకాశమిస్తారా?
  
 బీఈడీ విద్యార్థులకు  సెంకడ్ గ్రేడ్ టీచర్ (ఎస్‌జీటీ) పోస్టులకు దరఖాస్తు చేసుకునే అవకాశం కల్పిస్తామని టీడీపీ ఎన్నికల తరుణంలో హామీ ఇచ్చింది. దీంతో డీఎస్సీ-2014 నోటిఫికేషన్‌లో డీఈడీ విద్యార్థులతో పాటుగా ఎస్‌జీటీ పోస్టులకు బీఈడీ విద్యార్థులకూ అవకాశం ఇస్తారని ఎంతో ఆశతో ఉన్నారు. విద్యాహక్కు చట్టం ప్రకారం ప్రాథమిక విద్య బోధించేందుకు కనీసం రెండేళ్ల కాలపరిమితి ఉన్న ఉపాధ్యాయ శిక్షణ పూర్తి చేసిన వాళ్లే అర్హులనే నిబంధన ఉండటంతో సెంకడ్ గ్రేడ్ టీచర్ పోస్టుల్లో బీఈడీ విద్యార్థులకు ఎలా అవకాశం కల్పిస్తారని మరో పక్క డీఈడీ విద్యార్థులు వాదిస్తున్నారు. ప్రభుత్వం ఏ నిర్ణయం తీసుకుంటుందోననే అందోళన బీఈడీ విద్యార్థుల్లో వ్యక్తమవుతోంది.
  


 - జిల్లాలో 1,328 ఉపాధ్యాయ పోస్టులు ఖాళీ
 - ఏకోపాధ్యాయులతో నడుస్తున్న 314 బడులు
 - అసలు గురువులకే నోచుకోని 22 స్కూళ్లు
 - తాత్కాలిక సర్దుబాట్లతో కాలక్షేపం
  రాయవరం : రేపు సమాజ స్వరూపస్వభావాలను నిర్దేశించేది నేటి విద్యార్థులేనని ఎందరో మహనీయులు ఉద్బోధించినా;  పాఠశాలల్లో విద్యార్థుల సంఖ్యకు అనుగుణంగా ఉపాధ్యాయుల సంఖ్య ఉండాలని   విద్యాహక్కు చట్టం ఘోషించినా అవసరమైనంతమంది ఉపాధ్యాయులు లేకుండానే  ప్రభుత్వ పాఠశాలలు నడిచిపోతున్నాయి.  రేపటి తరానికి రూపుదిద్దే శిల్ప శాలల వంటి పాఠశాలల్లో గురువులే శిల్పులన్న స్పృహా, అందుకు అనుగుణమైన కార్యాచరణా లేని పాలకులు.. ఉపాధ్యాయ పోస్టుల్లో ఖాళీల భర్తీని తక్షణావసరంగా భావించడం లేదు. అదేదో.. ఎన్నాళ్లైనా, ఎన్నేళ్లైనా తాత్సారం చేయగల చిన్న విషయమన్న వైఖరినే అవలంబిస్తున్నారు. అదిగో.. ఆ అలసత్వానికి కొనసాగింపుగానే ఈ విద్యా సంవత్సరం కూడా ఉపాధ్యాయుల కొరతతోనే ప్రారంభమవుతోంది. ఇక నాణ్యమైన బోధన ఎలా సాధ్యమో, పాఠశాలలు జ్ఞాన సోపానాలుగా ఎలా రూపుదిద్దుకుంటాయో పాలకులే చెప్పాలి.
  
 జిల్లాలో గతేడాది కూడా ఉపాధ్యాయ పోస్టులు ఖాళీగా ఉన్నా విద్యా హక్కు చట్టం ప్రకారం రెగ్యులర్ ఉపాధ్యాయులే ఉండాలన్న నిబంధన సాకుతో ప్రభుత్వం విద్యా వలంటీర్లను నియమించలేదు. దాంతో అటు రెగ్యులర్ ఉపాధ్యాయులు లేకుండా, ఇటు విద్యా వలంటీర్లను నియమించకుండానే విద్యా సంవత్సరం ముగిసి పోయింది. ఈ విద్యా సంవత్సరం ప్రారంభం నాటికి ఉపాధ్యాయులను నియమించాల్సి ఉండగా నేటి వరకూ ఆ చర్యలే లేవు. జిల్లాలో 194 స్కూల్ అసిస్టెంట్, 947 సెకండరీ గ్రేడ్, 174 భాషా పండిట్, 13 వ్యాయామోపాధ్యాయ పోస్టులు ఖాళీగా ఉన్నట్టు అంచనా.
  
 తాత్కాలిక సర్దుబాట్లతోనే కాలక్షేపం
  బదిలీలు, పదోన్నతులు, రిటైర్మెంట్ తదితర కారణాలతో జిల్లాలోని 314 ప్రాథమిక పాఠశాలలు ఏకోపాధ్యాయ పాఠశాలలుగా కొనసాగుతున్నాయి. అలాంటి పాఠశాలలో పనిచేసే ఉపాధ్యాయులు ఐదు తరగతుల బాలలకూ, అన్ని సబ్జెక్టులూ బోధించాలి. వారు సెలవులు పెట్టాలంటే వేరే పాఠశాలల ఉపాధ్యాయులు వచ్చి బోధన చేయక తప్పదు. ఏకోపాధ్యాయ పాఠశాలల్లో నాణ్యమైన విద్య ఎలా సాధ్యమని విద్యావేత్తలు, ఉపాధ్యాయ సంఘాల నేతలు ప్రశ్నిస్తున్నారు. కాగా జిల్లాలో అసలు ఉపాధ్యాయులే లేని పాఠశాలలు 22 ఉన్నాయి.
 
 గతేడాది వేరే పాఠశాలల నుంచి తాత్కాలికంగా ఉపాధ్యాయులను నియమించి మమ అనిపించారు. ఈ ఏడాది కూడా ఆ పాఠశాలల కు ప్రత్యామ్నాయ మార్గాలే శరణ్యం. రాయవరం మండలం పసలపూడి మండల పరిషత్ ప్రాథమిక పాఠశాలలో రెండు పోస్టులూ ఖాళీగా ఉండగా చొల్లంగిపేట పాఠశాల నుంచి తాత్కాలిక డిప్యుటేషన్‌పై మరో ఉపాధ్యాయుడిని నియమించారు. ఇక్కడున్న 49 మంది విద్యార్థులకు ఆ ఉపాధ్యాయుడే బోధన చేయాల్సి వస్తోంది. గతేడాది ఉన్నత పాఠశాలల్లో సబ్జెక్టు టీచర్ల కొరత ఏర్పడగా..విద్యాబోధనకు ఆటంకం ఏర్పడకుండా కొన్ని చోట్ల అదనంగా ఉన్న ఉపాధ్యాయులను అవసరమైన చోట సర్దుబాటు చేశారు. పదో తరగతి బోధనకు ఆటంకం లేకుండా జిల్లా విద్యాశాఖాధికారి డివిజన్ స్థాయిలో ఉపాధ్యాయ పోస్టులను సర్దుబాటు చేశారు.
  
 ప్రత్యామ్నాయ మార్గాలు చూడాలి..
  జిల్లాలో ఉపాధ్యాయుల కొరత తీర్చడానికి ప్రభుత్వం ప్రత్యామ్నాయ మార్గాలపై దృష్టి సారించాల్సి ఉంది. ఉపాధ్యాయ పోస్టుల ఎంపికకు డీఎస్సీ నిర్వహణ ప్రభుత్వ నిర్ణయంపైనే ఆధారపడి ఉంటుంది. గత రెండేళ్లుగా డీఎస్సీ నిర్వహించకుండా కాంగ్రెస్ ప్రభుత్వం తాత్సారం చేసింది. ఇప్పుడు బాధ్యతలు చేపట్టిన సర్కారు నిర్ణయం తీసుకుని డీఎస్సీ ద్వారా పోస్టుల భర్తీ చేపట్టాలంటే కనీసం నాలుగైదు నెలలు పడుతుంది. ఈ లోగా బోధన కుంటుబడకుండా విద్యా వలంటీర్లను నియమిస్తే సమస్యకు కొంతమేరకు పరిష్కారం లభిస్తుంది. కాగా జిల్లాలో పాఠశాలల పర్యవేక్షణ చేయాల్సిన ఉప విద్యాశాఖాధికారుల పోస్టులూ ఖాళీగా ఉన్నాయి.
 
 రెగ్యులర్ డీవైఈఓలు ఖాళీ పోస్టుల్లో అదనపు బాధ్యతలు నిర్వహించాల్సి వస్తోంది. కాగా జిల్లాలో ఉన్న 58 మండలాలకు యు.కొత్తపల్లి, కాట్రేనికోన, ఆలమూరు, ఆత్రేయపురం, శంఖవరం మినహా మిగిలిన మండలాలకు రెగ్యులర్ ఎంఈఓలు లేరు. ఆ మండలాల్లో సీనియర్ స్కూల్ అసిస్టెంట్లు, సీనియర్ ప్రధానోపాధ్యాయులు ఎంఈఓలుగా ఇన్‌చార్జ్ బాధ్యతలు నిర్వహించాల్సి వస్తోంది. దాంతో వారు బోధన విధులకు న్యాయం చేయలేక పోతున్నారు.


 కరప, న్యూస్‌లైన్ : జిల్లాలో ఈ ఏడాది కూడా ఉత్తమ విద్యా ప్రమాణాలు నెలకొల్పేందుకు కార్యాచరణ ప్రణాళిక రూపొందించినట్టు డీఈఓ కేవీ శ్రీనివాసులురెడ్డి తెలిపారు. శనివారం ఆయన కరపలో పర్యటించి, స్థానిక మండల ప్రజా పరిషత్ కార్యాలయంలో విలేకరులతో మాట్లాడారు. పాఠ ్య పుస్తకాల కొరత లేదని, ఒకటి నుంచి పదో తరగతి వరకు 30 లక్షల పాఠ్య పుస్తకాలు అవసరమని, అన్నింటినీ ఆయా పాఠశాలలకు చేరవేసినట్టు చెప్పారు. ఏడు నుంచి పదో తరగతి వరకు ఏప్రిల్ 27 కల్లా అందజేశామన్నారు. మిగిలిన తరగతులకు పాఠశాలలు తెరిచిన వెంటనే పంపిణీ చేస్తామని వివరించారు.
 
 జిల్లావ్యాప్తంగా సుమారు వెయ్యి ఉపాధ్యాయ పోస్టులు ఖాళీలుండగా, వాటిని భర్తీ చేసేందుకు డీఎస్సీకి ప్రతిపాదనలు పంపామని తెలిపారు. విద్యార్థులకు ఉచిత యూనిఫారం కోసం పాఠశాలలు తెరచిన మూడు రోజుల్లో హెచ్‌ఎంలు ఇచ్చిన నివేదికలను ఆప్కోకు పంపుతామన్నారు. ఈ ఏడాది 9, 10 తరగతులకు మారిన సిలబస్, పరీక్షా విధానాలకు అనుగుణంగా విద్యాబోధన చేసేందుకు చర్యలు తీసుకుంటున్నామని చెప్పారు. ప్రతి సబ్జెక్టుకు 100 మార్కుల్లో 80 మార్కులు పరీక్ష విధానం, 20 మార్కులు ఇంటర్నల్స్ ఉంటాయన్నారు. పరీక్షా విధానంలో 28, ఇంటర్నల్స్‌కు ఏడు మార్కు పాస్ మార్కులుగా నిర్ణయించార ని, ఈ ఏడాది నుంచి హిందీకి 35 పాస్ మార్కులు రావాలన్నారు.
 
 ఈ నెల 20 నుంచి 25 వరకు మారిన సిలబస్, పరీక్షా విధానంపై ఉపాధ్యాయులకు ఒకరోజు పునశ్చరణ తరగతుల నిర్వహణకు చర్యలు తీసుకుంటున్నామన్నారు. ఇందుకు 120 మంది రీసోర్స్‌పర్సన్లను ఎంపిక చేసి, శిక్షణ ఇచ్చామన్నారు. ప్రభుత్వ పాఠశాలల్లోని హైస్కూల్ విద్యార్థినుల్లో ఆత్మస్థైర్యం నెలకొల్పేందుకు కరాటే, యోగాలో శిక్షణ ఇవ్వనున్నట్టు ఎంఈఓ తెలిపారు. ఈ విద్యా సంవత్సరంలో 80 హైస్కూళ్లను ఎంపిక చేశామన్నారు. ఆయన వెంట ఎంపీడీఓ అన్నెపు ఆంజనేయులు, ఎంఈఓ ఎంవీవీ సుబ్బారావు ఉన్నారు.


 
 మంత్రి కిమ్మెన రత్నాకర్
 
   ‘పీయూసీ’లోని ఖాళీలూ భర్తీ  
 
  పాఠశాలల మౌలిక సదుపాయాలకు నిధులు
 
  ప్రతి మాధ్యమిక పాఠశాలకూ హెచ్‌ఎం
 
  బ్లాక్‌మార్కెట్‌లో పాఠ్యపుస్తకాలపై దర్యాప్తునకు ఆదేశించాం
 
  త్వరలో విద్యార్థులకు సైకిళ్ల పంపిణీ
 
 సాక్షి, బెంగళూరు : రాష్ట్ర ప్రభుత్వం ఇకపై ఏటా ఉపాధ్యాయ పోస్టులు భర్తీ చేస్తుందని రాష్ట్ర ప్రాథమిక, మాధ్యమిక విద్యాశాఖ మంత్రి కిమ్మెన రత్నాకర్ తెలిపారు. రాష్ట్ర విద్యాశాఖలో ఏడాది కాలంలో జరిగిన అభివృద్ధి గురించి బెంగళూరులోని సర్వశిక్ష అభియాన్ ప్రధాన కార్యాలయంలో మీడియాకు బుధవారం వివరించారు. ఏడాదికి నాలుగు నుంచి ఐదు వేల ఉపాధ్యాయ పోస్టుల భర్తీకి అనుమతించాల్సిందిగా ముఖ్యమంత్రి సిద్ధరామయ్య ఆర్థిక శాఖకు ఇటీవలే ఆదేశించారన్నారు.
 
 దీని వల్ల రాష్ట్రంలో ప్రాథమిక, మాధ్యమిక పాఠశాలలతో పాటు పీయూసీ కళాశాలల్లో ఖాళీగా ఉన్న ఉపాధ్యాయ పోస్టులను వచ్చే ఐదేళ్లలోపు భర్తీ చేస్తామని మంత్రి ఆశాభావం వ్యక్తం చేశారు. రాష్ట్రంలో పాఠశాలల మౌలిక సదుపాయాల కల్పన కోసం అవసరమున్న ప్రతి నియోజకవర్గానికీ రూ.40 లక్షలు కేటాయించనున్నామన్నారు. ఇవి బడ్జెట్‌లో పేర్కొన్న నిధులకు అదనమని పేర్కొన్నారు. ప్రస్తుతం 60 మంది పిల్లలు ఉన్న మాధ్యమిక పాఠశాలకు మాత్రమే ప్రధానోపాధ్యాయుడు ఉంటున్నారన్నారు.
 
 దీని వల్ల హెడ్‌మాస్టర్ లేని పాఠశాలల్లో నాణ్యతా ప్రమాణాలు తక్కువగా ఉన్న ట్టు తమ దృష్టికి వచ్చిందన్నారు. అందువల్ల విద్యార్థుల సంఖ్యతో సంబంధం లే కుండా ప్రతి మాధ్యమిక పాఠశాలకు ఒక ప్రధానోపాధ్యాయుడు ఉండేలా నిబంధనలు రూపొందించనున్నామన్నారు. ప్రా థమిక దశలో మాతృభాషలోనే తప్పక విద్యాబోధన జరగాల్సిన పనిలేదని సుప్రీం కోర్టు పేర్కొనడం కన్నడకే కాక ఆ యా ప్రాంతీయ భాషల అభివృద్ధికీ గొడ్డలిపెట్టువంటిదని అభిప్రాయపడ్డారు.
 
 ఈ విషయమై ఇప్పటికే ముఖ్యమంత్రి సిద్ధరామయ్య అన్ని రాష్ట్రాల ముఖ్యమంత్రులకు లేఖలు రాశార ని, అందరి అభిప్రాయాలను పరిగణనలోకి తీసుకుని ఈ విషయంపై త్వరలో స్పష్టమైన నిర్ణయం తీసుకుంటామని అన్నారు. పీయూసీ పాఠ్యపుస్తకాల బ్లాక్‌మార్కెట్ వ్యవహారంపై ఇప్పటికే సమగ్ర దర్యాప్తునకు ఆదేశించామని, నివేదిక వచ్చిన తర్వాత చర్యలు తీసుకుంటామని వివరించారు.
 
 కాగా, విద్యాశాఖలో చేపట్టిన పలు సంస్కరణలవల్లే ఈ ఏడాది పాఠశాలల ప్రారంభ సమయానికి పాఠ్యపుస్తకాలు విద్యార్థులకు ఇవ్వడానికి వీలవుతోందన్నారు. న్యాయసంబంధ ఇబ్బందుల వల్లే సైకిళ్లను విద్యార్థులకు ప్రస్తుతానికి అందించలేకపోతున్నామని, త్వరలో వాటిని కూడా విద్యార్థులకు పంపిణీ చేస్తామని మంత్రి తెలిపారు.
  


 యూనివర్సిటీ క్యాంపస్, న్యూస్‌లైన్: ఎస్వీయూ అధికారులు ఎట్టకేలకు అనుకున్నది సాధించారు. అధ్యాపక పోస్టుల భర్తీకి నోటిఫికేషన్ ఇవ్వడానికి సిద్ధమయ్యారు. శుక్రవారం జరిగిన సమావేశంలో పోస్టుల భర్తీకి పాలకమండలి అనుమతి లభించింది. ఇక నోటిఫికేషన్ విడుదల కావడమే ఆలస్యం. నోటిఫికేషన్ కూడా వారంలోపే రానుంది.
 
 ఎస్వీయూ పాలకమండలి సమావేశం శుక్రవారం హైదరాబాద్‌లో జరిగింది. వీసీ రాజేంద్ర అధ్యక్షతన జరిగిన సమావేశంలో 268 పోస్టుల భర్తీకి పాలకమండలి అనుమతి ఇచ్చింది. ఇందులో 110 అసిస్టెంట్‌ప్రొఫెసర్లు, 93 అసోసియేట్ ప్రొఫెసర్లు, 65 ప్రొఫెసర్ పోస్టులు ఉన్నాయి.
 
  ఏడేళ్ల తర్వాత
  ఎస్వీయూలో చివరిసారిగా 2007లో 120 అధ్యాపక పోస్టులు భర్తీ చేశారు. అనంతరం  పోస్టుల భర్తీ జరగలేదు. ఈ ఏడు సంవత్సరాల కాలంలో పలువురు ఉద్యోగ విరమణ చేశారు. దీంతో చాలా విభాగాల్లో ఖాళీలు ఏర్పడ్డాయి. దీంతో 2012 జూన్ 30న వీసీగా బాధ్యతలు చేపట్టిన రాజేంద్ర తాను బాధ్యతలు తీసుకున్న రోజు నుంచే పోస్టుల భర్తీపై దృష్టిసారించారు.
 
 ముందుగా వివిధ విభాగాల్లో ఖాళీలను గుర్తించి రాష్ట్ర ప్రభుత్వ అనుమతి తీసుకున్నారు. 2013 జూలై  30న ఎస్వీయూలో 268 పోస్టుల భర్తీకి రాష్ర్ట ఆర్థికశాఖ అనుమతి ఇచ్చింది. దీంతో పోస్టుల భర్తీకి అవసరమైన ప్రక్రియను చేపట్టారు. అధికారులు రోస్టర్ సిద్ధం చేయడం, వాటి అనుమతులు తీసుకుంటూ వచ్చారు. ఈ వ్యవహారం వెనుక ముఖ్యనేత సోదరుని అనుగ్రహం, ఆశీస్సులు ఉండడంతో ప్రక్రియలు చకచకా జరిగిపోయాయి.
 
  పాలకమండలి సమావేశం ముందురోజు కూడా  ఎస్వీయూ అధికారులు ముఖ్యనేత సోదరుని ఆశీస్సులు తీసుకుని వచ్చినట్లు సమాచారం. ఈ నేపధ్యంలో శుక్రవారం నిర్వహించిన పాలకమండలి సమావేశం పోస్టుల భర్తీకి పాలకమండలి అనుమతించింది. దీంతో నోటిఫికేషన్ విడుదలకు కావాల్సిన అడ్డంకి తొలగింది. నోటిఫికేషన్‌ను సాధ్యమైనంత త్వరగా ఇవ్వాలని అధికారులు సంకల్పంతో వున్నారు.
 
  ఆశలపల్లకిలో అభ్యర్థులు
  ఎస్వీయూలో అధ్యాపకుల పోస్టుల భర్తీకి  ఏడేళ్ళ తర్వాత నోటిఫికేషన్ విడుదల కానుండడంతో ఆశావహులు ఆశలపల్లకిలో విహరిస్తున్నారు. ఇప్పటికే అమాత్యుల ద్వారా  పోస్టును దక్కించుకునే ప్రయత్నాలు మొదలు పెట్టారు. ఇందుకోసం రాజకీయ, సామాజిక, ఆర్థికపరమైన అస్త్రాలను కూడా సిద్ధం చేసుకునే పనిలో పడ్డారు.
 
  పీలేరుకు పీజీ కళాశాల
  ఎస్వీయూనివర్సిటీ పీజీ కళాశాలను పీలేరులో ఏర్పా టు చేయడానికి పాలకమండలి అనుమతించింది. ఐదు విభాగాలతో వచ్చే విద్యాసంవత్సరం నుంచి ప్రారంభించనున్నారు. ఇందుకోసం 25 కోట్ల రూపాయల బడ్జెట్ కూడా ప్రభుత్వం కేటాయించింది. పాలకమండలి సమావేశంలో తీసుకున్న ఇతర నిర్ణయాలు ఇలా వున్నాయి.
 
  - వర్శిటీకి అవసరమైన పరికరాలు కొనుగోలు చేయడానికి  అనుమతి ఇచ్చే ‘సెంట్రల్ పర్చేజింగ్ కమిటీ’కి సంబంధించిన విధి విధానాలను సరళీకృతం చేయడానికి పాలకమండలి అనుమతి ఇచ్చింది.
  - ఫిజిక్స్ విభాగంలోని  ఎంసెట్ రాడార్ కేంద్రం, డీఎస్‌టీ పర్స్ ప్రోగ్రామ్‌లకు పరికరాల కొనుగోలుకు పాలకమండలి అనుమతించింది.
 
  - కాంపిటేటివ్  పరీక్షలకు సిద్ధమవుతున్న విద్యార్థుల కోసం కాంపిటేటివ్ సెల్ ఏర్పాటు  చేయడానికి అవసరమైన భవన నిర్మాణానికి పాలకమండలి ఆమోదం తెలిపింది.
 
  - మహిళా హాస్టల్‌లోని  హాస్టల్ భవనంపై  రెండో అంతస్తు నిర్మాణానికి, కొన్ని విభాగాల్లో అకడమిక్ భవనాల విస్తరణ పనులకు పాలకమండలి అనుమతించింది.
 
  -ఫిజికల్ సైన్స్, లైఫ్‌సెన్సైస్ బ్లాకులలో రీవైరింగ్‌కు పాలకమండలి ఆమోదం తెలిపింది.
 
  - శ్రీనివాస ఆడిటోరియంలో కుర్చీలను బాగు చేయించుకోవడానికి పాలకమండలి అనుమతించింది.
 
  - మలేషియా యూనివర్సిటీతో విద్యా, పరిశోధనల్లో  ఉమ్మడి సహకారం కోసం ఒప్పందం కుదుర్చుకోవడానికి పాలకమండలి అనుమతి ఇచ్చింది.
 
  -ఫైనాన్స్,అకౌంట్స్ శాఖలను పునర్‌వ్యవస్థీకరించడానికి అనుమతి తెలిపింది.
 
      ఈపాలకమండలి సమావేశంలో  రిజిస్ట్రార్ కె.సత్యవేలురెడ్డి, రెక్టార్ సుకుమార్ తదితరులు పాల్గొన్నారు.


 ముంబై: ఠాణే జిల్లాలోని గిరిజన ప్రాంతాల్లో 2010 నుంచి ఖాళీగా ఉన్న 829 టీచర్లు, హెడ్‌మాస్టర్ల పోస్టులను వెంటనే భర్తీ చేయాలని బాంబే హైకోర్టు రాష్ట్ర ప్రభుత్వాన్ని ఆదేశించింది. జిల్లాలోని గిరిజన ప్రాంతాల్లో ప్రాథమిక పాఠశాలలు టీచర్లు లేఖ నిరుపయోగంగా ఉన్నాయని ఆరోపిస్తూ సామాజిక కార్యకర్తలు నితిన్ బోర్డే, రాందాస్ మోతెలు దాఖలు చేసిన ప్రజాప్రయోజన వ్యాజ్యంపై స్పందించిన హైకోర్టు ప్రధాన న్యాయమూర్తి మోహిత్ షా ఈ ఆదేశాలను జారీ చేశారు.
 గత సంవత్సరం మేలో రాష్ట్ర ప్రభుత్వం 700 మంది టీచర్లను గిరిజన ప్రాంతాల్లోని ప్రాథమిక పాఠశాలలకు బదిలీ చేసింది. అయితే వారిలో చాలా మంది సదరు బాధ్యతలు స్వీకరించేందుకు నిరాకరించారు. రాష్ట్ర ప్రభుత్వ నిర్ణయాన్ని సవాలు చేస్తూ సమ్మెకు కూడా దిగారు. చివరకు కోర్టు జోక్యంతో బదిలీ ఉత్తర్వులను ఆమోదించారు. అయినప్పటికీ రాష్ట్రంలో ఇంకా 829 పోస్టులు ఖాళీగా ఉన్నాయని, వాటిలో 198 హెడ్‌మాస్టర్లవికాగా 182 మంది ప్రాథమిక పాఠశాలల్లోని ఉపాధ్యాయులవి. దీంతో వెంటనే వెయ్యి పోస్టులకు  ఫిబ్రవరి 15 నాటికి నోటిఫికేషన్ విడుదల చేయాలని, జూన్ 30 నాటికి భర్తీ ప్రక్రియను పూర్తి చేయాలని ఆదేశించింది.


 ఏలూరు సిటీ, న్యూస్‌లైన్ :
  ఉపాధ్యాయ ఉద్యోగాల కోసం ఎదురుచూస్తున్న నిరుద్యోగుల ఆశలపై రాష్ట్ర విభజన ప్రకటన నీళ్లు చల్లింది. ఈ ఏడాది డీఎస్సీ-13 నిర్వహిస్తామని విద్యాశాఖ మంత్రి కొన్ని నెలల క్రితం చేసిన ప్రకటన బీఈడీ, డీఎడ్ పూర్తి చేసిన అభ్యర్థుల్లో ఆశలు చిగురింపజేసింది. జిల్లాలో 609 టీచర్ పోస్టులు భర్తీ అయ్యే అవకాశం ఉండటంతో వేలాదిమంది అభ్యర్థులు వ్యయప్రయాసలకోర్చి డీఎస్సీ కోసం ప్రత్యేక శిక్షణ తీసుకుని కళ్ళు కాయలు కాసేలా ఎదురు చూస్తున్నారు. కానీ ఆ దిశగా ప్రభుత్వం చర్యలు తీసుకుంటున్న దాఖలాలు కన్పించటంలేదు. కనీసం టీచర్ ఎలిజిబిలిటీ టెస్ట్(టెట్) నిర్వహించినా అభ్యర్థులు శాంతిస్తారనుకుంటే దానికీ అతీగతి లేకుండా పోతోంది.
   రాష్ట్ర  విభజన అనివార్యమయ్యేట్టయితే నాన్‌లోకల్ కేటగిరీ పోస్టుల భర్తీలో తెలంగాణ జిల్లాల్లోని సీమాంధ్ర అభ్యర్థులు ఎక్కడ పోస్టులు కొట్టుకుపోతారో అనే భయంతోనే డీఎస్సీ-13 నిర్వహణను జాప్యం చేస్తున్నారనే వాదనా ఉంది. అసలు నిర్వహిస్తారో? లేదో? అనే సందేహాలు వ్యక్తమవుతున్నాయి. ఇప్పటికే జిల్లాకు చెందిన సుమారు 22 వేల మంది అభ్యర్థులు టెట్‌కు దరఖాస్తు చేసుకున్నారు. టెట్‌లో సాధించిన మార్కులు డీఎస్సీలో పోస్టు సాధించటానికీ ఉపయోగపడటంతో దీనిలోను మంచిమార్కులు సాధించాలని అభ్యర్థులు కసరత్తు చేస్తున్నారు. పది నెలల నుంచి డీఎస్సీ కోసం ప్రత్యేక శిక్షణ తీసుకుంటూ అభ్యర్థులు రూ.25వేల నుంచి 60వేల వరకు ఖర్చు చేశారు. అయినా డీఎస్సీ నోటిఫికేషన్ రాకపోవటంతో వారు డీలాపడిపోతున్నారు.
  
  జిల్లాలో ఖాళీ పోస్టులు ఇవే
  జిల్లాలోని ప్రభుత్వ పాఠశాలల్లో 818 ఉపాధ్యాయ పోస్టులు ఖాళీగా ఉన్నాయి. వీటిలో 609 పోస్టులను మాత్రమే డీఎస్సీ-13లో భర్తీ చేస్తారని గతంలో వెలువడిన ప్రకటనవల్ల తెలుస్తోంది. ఈ పోస్టుల్లో స్కూల్ అసిస్టెంట్ 152 , సెకండరీ గ్రేడ్ తెలుగు 558, ఉర్దూ 4 పోస్టులు, లాంగ్వేజ్ పండిట్ 93, పీఈటీ 11 పోస్టులు ఉన్నాయి.
  
  స్కూల్ అసిస్టెంట్ కేటగిరీలో  గణితం  40, ఫిజికల్ సైన్స్ 13, బయోలాజికల్ సైన్స్ 18, ఇంగ్లిష్ 20, సోషల్ స్టడీస్ 35, తెలుగు 14, హిందీ 5, సంస్కృతం 3, ఉర్దూ 1, ఫిజికల్ డెరైక్టర్‌పోస్టులు 3 ఉన్నాయి.
  
  లాంగ్వేజ్ పండిట్ పోస్టుల్లో... తెలుగు భాషా పండిట్స్ 42, హిందీ పండిట్స్ 45, సం స్కృతం 5, ఉర్దూ 1 పోస్టు ఖాళీగా ఉన్నాయి.
  
  ఎక్కువ పోస్టులు ఉండే సెకండరీ గ్రేడ్ టీచర్లకు డీఎడ్ అభ్యర్థులు మాత్రమే అర్హులు కావటంతో పోటీ తక్కువగానే ఉంటుంది. స్కూల్ అసిస్టెంట్ కేటగిరీలో మాత్రం పోటీ భారీగా ఉంటుంది. సెకండరీ గ్రేడ్ పోస్టులను డీఎడ్ అభ్యర్థులతోనే భర్తీ చేయాలనే నిబంధన బీఎడ్ అభ్యర్థులకు ఆశనిపాతంగా పరిణమించింది.