gay culture

గే డేటింగ్‌ యాప్‌ ద్వారా ఓ వ్యక్తిని ప్రలోభపెట్టి నగదు దోచుకున్న సంఘటనలో ఐదుగురు నిందితులను అరెస్ట్‌ చేసినట్లు రూరల్‌ పోలీసులు తెలిపారు. బుధవారం విడుదల చేసిన పత్రికా ప్రకటనలో నరసాపురం డీఎస్పీ ఎం. సుధాకరరావు వివరాలు వెల్లడించారు. మండలంలోని అరట్లకట్ట గ్రామం సమీపంలో ఐదుగురు సభ్యులు ముఠాగా ఏర్పడ్డారు. వీరిలో ఒకరు ఈ నెల 14వ తేదీ రాత్రి గే డేటింగ్‌ యాప్‌ ద్వారా బాధితుడిని నిర్మానుష్య ప్రాంతానికి రప్పించారు. అక్కడ కాపుకాచిన మరో నలుగురు వ్యక్తులతో కలిసి బాధితుడిని కత్తితో బెదిరించి, పర్సులోని రూ. 3 వేలు నగదుతో పాటు సెల్‌ఫోన్, రెండు ఏటీఎం కార్డులను లాక్కున్నారు. పాస్‌వర్డ్స్‌ చెప్పకపోవడంతో చంపుతామని బెదిరించి బలవంతంగా పిన్‌ నెంబర్లు రాబట్టారు. ఇద్దరు నిందితులు ఫోన్, ఏటీఎం కార్డులతో బయటకు వెళ్లి నగదు డ్రా చేస్తుండగా, మిగతా ముగ్గురు బాధితుడిని సుమారు మూడు గంటల పాటు నిర్బంధించారు. రాత్రి 11 గంటల సమయంలో ఫోన్, కార్డులు బాధితుడికి ఇచ్చి నిందితులు పరారయ్యారు. పరిశీలించగా ఏటీఎం ద్వారా రూ. 22,495 బదిలీ అయినట్లు తేలింది. మొత్తం రూ. 25,495 బాధితుడి నుంచి దోచుకున్నట్లు గుర్తించారు. బాధితుడు ఈ నెల 21న ఇచ్చిన ఫిర్యాదు మేరకు పోలీసులు కేసు నమోదు చేసి ప్రత్యేక బృందాలతో దర్యాప్తు చేపట్టారు. సీసీటీవీ పుటేజీల ఆధారంగా బుధవారం పెనుమంట్ర మండలం నెలమూరు గ్రామంలో మంగం అఖిల్, ఒరుగంటి మోహన్‌తేజవర్మ, పీతల భీమ కార్తీక్, పితాని సతీష్‌ గుత్తుల సురేంద్రలను అదుపులోకి తీసుకున్నారు. వారి నుంచి రూ. 20 వేల నగదు, ఒక కత్తి, రెండు మోటార్‌ సైకిళ్లు స్వా«దీనం చేసుకున్నారు. ఈ సమావేశంలో రూరల్‌ సీఐ గుత్తుల శ్రీనివాస్, ఎస్సై సురేంద్ర, ఐడీ పార్టీ పోలీసులు పాల్గొన్నారు. -ఏలూరు జిల్లా చదవండి: నీ పిల్లకు మరో యువకుడితో పెళ్లి.. జైలు నుంచి తప్పించుకో!


 విశాఖపట్నం: సోషల్‌ మీడియా నేరాల్లో కొత్తకోణం వెలుగుచూసింది. నకిలీ ఫేస్‌బుక్‌ ఖాతాలా ద్వారా పరిచయమైన కొందరితో స్వలింగ సంపర్కం చేసి డబ్బుగుంజుతున్న వైనం వెలుగులోకి వచ్చింది.  వివరాల్లోకి వెళ్తే నకిలీ ఫేస్‌బుక్‌​ఖాతాల ద్వారా ‘గే’’ గ్రూపులో పరిచయమైన ఐదుగురు యువకులు నగరానికే చెందిన మరో యువకుడితో స్వలింగ సంపర్కం చేశారు. ఆ తంతంగాన్ని చిత్రీకరించి అతని వద్ద నుంచి పెద్ద మొత్తంలో డబ్బులు డిమాండ్‌ చేశారు. రూ. 2 లక్షలు ఇవ్వాలని లేకుంటే.. వీడియోను సామాజిక మాద్యమాల్లో అప్‌లోడ్‌ చేస్తామని బ్లాక్‌మెయిల్‌ చేయడం మొదలు పెట్టారు.
 
 దీంతో కంగారు పడ్డ బాధితుడు పోలీసులను ఆశ్రయించాడు. రంగంలోకి దిగిన పోలీసులు ఆదివారం ప్రధాన నిందితుడు ముక్కాల ఆదిత్యతో పాటు మరో నలుగురిని అరెస్ట్‌ చేశారు. వారి వద్ద నుంచి రూ. 1.36 లక్షలు నగదు స్వాధీనం చేసుకున్నారు. విశాఖ కేంద్రంగా నడుస్తున్న ‘గే’ గ్రూపులో 2,335 మంది సభ్యులుగా ఉన్నట్లు పోలీసులు గుర్తించారు. సామాజిక మాద్యమాల ద్వారా లైంగిక వేదింపులు ఎదుర్కొంటున్న వాళ్లు పోలీసులకు ఫిర్యాదు చేయాలని వారి వివరాలు గోప్యంగా ఉంచుతామని నగర పోలీస్‌ కమిషనర్‌ నాగేంద్రకుమార్‌ తెలిపారు.


 దేశంలో గే సంస్కృతిని నిర్మూలించాల్సిన అవసరం ఉందని, అందుకు ఎల్‌జీబీటీక్యూ (లెస్బియన్, గే, బెసైక్సువల్, ట్రాన్స్‌జెండర్, కీర్) కమ్యూనిటీకి మరణశిక్ష విధించాలని డిమాండ్ చేస్తూ మదురైలో వెలసిన పోస్టర్లు ఆ కమ్యూనిటీకి చెందినవారి గుండెల్లో రైళ్లు పరుగెత్తిస్తున్నాయి. ఆర్లాండ్లోని ఓ నైట్ క్లబ్‌లో ఓ ఉన్మాది 49 మందిని ఊచకోత కోసిన మర్నాడే ఈ పోస్టర్లు వెలిశాయి. అసహజ శృంగారాన్ని ఆచరించేవారు, ప్రోత్సహించేవారు 'సాంస్కృతిక టెర్రరిస్టులు' అని, వారికి మరణ శిక్ష విధించేందుకు వీలుగా ఇండియన్ పీనల్ కోడ్‌లోని 377వ సెక్షన్ సవరించాలని ఇండియన్ నేషనల్ లీగ్ అనే ముస్లిం పార్టీ డిమాండ్ చేసింది.
 
 ఐపీసీలోని 377వ సెక్షన్ బ్రిటిష్ కాలం నుంచి అమల్లో ఉంది. ఈ చట్టాన్ని 1860లో తీసుకొచ్చారు. ఈ చట్ట ప్రకారం మగ, ఆడ లేదా జంతువులతో ఎవరైనా అసహజ లైంగిక కార్యకలాపాలకు పాల్పడితే వారికి పదేళ్లవరకు జైలుశిక్ష లేదా యావజ్జీవ శిక్ష విధించవచ్చు, జరిమానా కూడా విధించవచ్చు. బ్రిటిష్ కాలం నాటి ఈ చట్టాన్ని పూర్తిగా రద్దుచేయాలని భారతదేశంలోని గే ఉద్యమకారులు ఎప్పటి నుంచో డిమాండ్ చేస్తున్నారు. ఈ చట్టాన్ని భారత ప్రభుత్వం ఎవరిపైనా ప్రయోగించకపోయినా చట్టం కారణంగా తమపట్ల ప్రజల్లో విద్వేష భావం పెరుగుతున్నదన్నది వారి వాదన.
 
 ఇలాంటి పరిస్థితుల్లో ఏకంగా గే లకు మరణశిక్ష విధించాలనే డిమాండ్ తీసుకురావడం వారిలో భయాందోళనలను రేపుతోంది. స్థానికంగా ఉన్న ఓ అమెరికా కాలేజీ గోడలపై కనిపించిన ఈ పోస్టర్లను తక్షణమే తొలగించి, అందుకు బాధ్యులైన వారిపై చర్య తీసుకోవాలని గోపీ శంకర్ అనే ఓ గే ఉద్యమకారుడు పోలీసులకు ఫిర్యాదు చేశారు. అయితే ఇలాంటి పోస్టర్లపై చర్య తీసుకునేందుకు చట్టం అనుమతించదని పోలీసులు చెబుతున్నారు. గేలకు వ్యతిరేకంగా తామేమీ కొత్తగా ఈ డిమాండ్‌ను తీసుకరాలేదని, ఇది ముందునుంచి ఉన్నదేనని, పైగా తాము వేసిన పోస్టర్ 2013లో ముద్రించిందని ఇండియన్ నేషనల్ లీగ్ స్పష్టం చేసింది. గేలు గుమిగూడేచోట గే సంస్కృతికి వ్యతిరేకంగా ఐఎన్ఎల్ కరపత్రాలను పంచుతోందని, ఈ చర్య వల్ల విద్వేషాలు పెరిగే ప్రమాదం ఉందని శంకర్ అంటున్నారు.