‘నీకోసం.. టెర్రరిస్టు కూడా అవుతా’!

వరుస విజయాలతో ఊపుమీదున్న మెగా హీరో సాయిధరమ్‌ తేజ్‌ తాజాగా తన ‘తిక్క’ చూపేందుకు సిద్ధమవుతున్నాడు. సునీల్‌రెడ్డి దర్శకత్వంలో సాయి హీరోగా తెరకెక్కిన ఈ సినిమా టీజర్‌ గురువారం విడుదలైంది. ఈ సినిమాలో సాయి సరసన లారిస్సా బొన్సి, మన్నారా చోప్రా కథానాయికలుగా నటించారు.

‘జగమే మాయ.. బ్రతుకే మాయ’ అనే పాటతో ప్రారంభమైన ఈ టీజర్.. తాగుబోతు రమేష్‌ డైలాగులు క్యాచీగా ఉన్నాయి.  ఇక సాయి ‘ఒక్క మాట అడిగి చూడు.. నీకోసం హీరో ఏంటి? నిజంగా టెర్రరిస్టు కూడా అయిపోతా’ అంటూ పంచ్ డైలాగులు పేల్చాడు. శ్రీ వెంకటేశ్వర మూవీ మేకర్స్‌ పతాకంపై డాక్టర్‌ సి.రోహణ్‌రెడ్డి నిర్మించిన ఈ చిత్రానికి తమన్‌ సంగీతం అందించాడు. అన్నట్టు ‘తిక్క’ టైటిల్‌ సాంగ్‌ను తమిళ నటుడు ధనుష్‌ పాడిన సంగతి తెలిసిందే.