ఒక అమ్మాయి.. ఇద్దరబ్బాయిల ప్రేమకథ

కాజీపేట  : కాజీపేట బాపూజీనగర్‌లో  సోమవారం రాత్రి  ఓ యువకుడు కత్తిపోట్లకు గురై ప్రాణాపాయ స్థితిలో చికిత్సపొందుతున్న ఘటన వెనక పలు ఆసక్తికర విషయాలు వెలుగు చూశాయి. కాజీపేట పట్టణానికి చెందిన ఓ యువతి వేర్వేరు కాలేజీలకు చెందిన ఇద్దరు అబ్బాయిలతో చనువుగా ఉంటూ రహస్యంగా ప్రేమాయణం సాగిస్తోంది.

ఇటీవల ఆమె ఓ యువకుడితో ఉన్నప్పుడు మరో యువకుడి కంటపడింది. దీన్ని జీర్ణించుకోలేని సదరు యువకుడు అక్కడే యువతి వెంట ఉన్న యువకుడితో ఘర్షణకు దిగాడు. అప్పటి నుంచి ఆ ఇద్దరు తమ తమ స్నేహితులతో రెండు వర్గాలుగా విడిపోయి సమయం దొరికినప్పుడుల్లా దాడులు, ప్రతిదాడులు చేసుకుంటున్నారు.

ఈ నేపథ్యంలో ఇటీవల తీవ్రస్థాయిలో గొడవలు జరగగా ఈ పంచాయతీ కాస్త పోలీస్ స్టేషన్ మెట్లు ఎక్కింది. దాంతో పోలీసులు ఇరువర్గాలను పిలిపించి సీరియస్‌గా వార్నింగ్ ఇచ్చి స్థానిక నాయకుల జోక్యంతో పంపించారు. రెండు రోజుల క్రితం కత్తిపోట్లకు గురైన నాగేశ్వర్‌రావు ....ప్రత్యర్థి వర్గానికి చెందిన ఓ యువకుడిని బెదిరించినట్లు తెలుస్తోంది. దాంతో ఆగ్రహించిన మిత్రులు మాటువేసి బాపూజీనగర్ చౌరస్తాలో అతడిపై దాడి చేశారని తెలిసింది. యువతి కోసం ఇద్దరు యువకులు రెండు వర్గాలుగా విడిపోయి కత్తులతో దాడులు చేసుకుని, కేసుల్లో ఇరుక్కోవడం చర్చనీయూంశంగా మారింది.