అటు 14... ఇటు 48

Youngest And Oldest Players In IPL 2020 Auction - Sakshi

ఐపీఎల్‌ వేలానికి ఆ ఇద్దరు

ముంబై: ఇండియన్‌ ప్రీమియర్‌ లీగ్‌ (ఐపీఎల్‌) ఎంతో మంది కుర్రాళ్లకు పట్టం కట్టింది. అలాగే అనుభవజ్ఞులకూ అవకాశమిచ్చింది. గత 12 ఏళ్లుగా ఆటలో కుర్రాళ్లకు, సహాయ సిబ్బందిలో అనుభవజ్ఞులకు  కూడా ఎంతో పేరు తెచ్చిపెట్టింది ఈ లీగ్‌. అయితే కొత్తగా ఈ సారి ఓ 14 ఏళ్ల కుర్రాడు, 48 ఏళ్ల అనుభవజ్ఞుడు ఇద్దరు కూడా ఆట కోసమే వేలం పాటకు అందుబాటులో ఉన్నారు. విచిత్రంగా ఉంది కదూ! ఆ టీనేజర్‌ అఫ్గానిస్తాన్‌ క్రికెటర్‌ నూర్‌ అహ్మద్‌ లఖన్‌వాల్‌  అయితే... ఆ వెటరన్‌ మన ముంబైవాలా ప్రవీణ్‌ తాంబే! చిత్రంగా ఇద్దరు స్పిన్నర్లే కాగా... లఖన్‌వాల్‌ చైనామన్‌. ఈ అఫ్గానీ ఆటగాడు రాజస్తాన్‌ రాయల్స్‌ నుంచి ఆహ్వానం దక్కడంతో ట్రయల్స్‌లో కూడా పాల్గొన్నాడు.

ఈ సందర్భంగా ఈ టీనేజ్‌ చైనామన్‌ జట్టు వర్గాల్ని ఆకట్టుకున్నట్లు తెలిసింది. ఇటీవల లక్నోలో భారత అండర్‌–19 జట్టుతో జరిగిన సిరీస్‌లో నూర్‌ అహ్మద్‌ లఖన్‌వాల్‌ 9 వికెట్లు తీసి అదరగొట్టాడు. దీంతోపాటు అఫ్గానిస్తాన్‌ అండర్‌–19 జట్టు తరఫున త్వరలో అండర్‌–19 ప్రపంచకప్‌ ఆడనున్నాడు. వచ్చే నెల దక్షిణాఫ్రికాలో కుర్రాళ్ల మెగా ఈవెంట్‌ జరగనుంది. ఈ నేపథ్యంలో మణికట్టు బౌలర్‌పై ఫ్రాంచైజీల ఆసక్తి పెరిగింది. మరోవైపు వయసురీత్యా అర్ధసెంచరీ కొట్టబోతున్న వెటరన్‌ స్పిన్నర్‌ తాంబే ఐపీఎల్‌లో ఇదివరకు రాజస్తాన్‌ రాయల్స్, గుజరాత్‌ లయన్స్‌ (ఇప్పుడు లేదు), సన్‌రైజర్స్‌ హైదరాబాద్‌ తరఫున ఆడాడు.

Read latest Sports News and Telugu News | Follow us on FaceBook, Twitter, Telegram



 

Read also in:
Back to Top