రిటైర్మెంట్‌ ప్రకటించిన వోజెస్‌

పెర్త్‌: ఆస్ట్రేలియా క్రికెటర్‌ ఆడమ్‌ వోజెస్‌ (37) అంతర్జాతీయ క్రికెట్‌ నుంచి తప్పుకుంటున్నట్లు ప్రకటించాడు. ఇటీవలే దక్షిణాఫ్రికాతో అతను తన ఆఖరి టెస్టు ఆడాడు. దాదాపు రెండేళ్ల క్రితం వెస్టిండీస్‌తో తన తొలి టెస్టు ఆడిన వోజెస్, అరంగేట్రంలోనే సెంచరీ చేసిన పెద్ద వయస్కుడిగా రికార్డు సృష్టించాడు. ఆ తర్వాత కూడా రెండు డబుల్‌ సెంచరీలతో సత్తా చాటినా... ఇటీవల శ్రీలంక, దక్షిణాఫ్రికా సిరీస్‌లలో విఫలం కావడంతో వోజెస్‌పై వేటు పడింది. 20 టెస్టుల్లో 5 సెంచరీలు సహా 1485 పరుగులు చేసిన వోజెస్‌... కనీసం 20 టెస్టులు ఆడినవారందరిలో డాన్‌ బ్రాడ్‌మన్‌ (99.94) తర్వాత అత్యధిక సగటు (61.87) కలిగిన ఆటగాడిగా రెండో స్థానంతో కెరీర్‌ ముగించడం విశేషం.