పోరాడితే విజయం ఖాయం: యువరాజ్

కేన్సర్ వ్యాధికి నివారణ లేదన్నది అపోహ మాత్రమేనని, ఆత్మివిశ్వాసంతో ఎదుర్కొంటే పూర్తిగా నయమవుతుందని బాలీవుడ్ నటి మనీషా కోయిరాలా, టీమిండియా క్రికెటర్ యువరాజ్ సింగ్ అన్నారు. కేన్సర్ గురించి ప్రజల్లో చైతన్యం కలిగించేందుకు కోల్కతాలో జరిగిన ఓ కార్యక్రమంలో వీరిద్దరూ పాల్గొన్నారు. ఈ ప్రాణాంతక వ్యాధి బారినపడ్డ మనీషా, యువరాజ్ ఇద్దరూ పూర్తిగా కోలుకుని మళ్లీ కెరీర్ కొనసాగిస్తున్న విషయం విదితమే. యువీ జాతీయ జట్టులోకి రాగా, మనీషా సినిమాల్లో నటించేందుకు సిద్ధమవుతోంది.

కేన్సర్ను ఏ దశలో గుర్తించామన్నది విషయం కాదని, ఆత్మవిశ్వాసంతో పోరాడితే ఈ వ్యాధి నుంచి కోలుకోవచ్చని యువరాజ్ అన్నాడు.  'మనం సాధించగలమనుకుంటే తప్పకుండా జయించవచ్చని' చెప్పాడు. కేన్సర్ అయినా మరే వ్యాధి అయినా కోలుకోవాలంటే మనోనిబ్బరంతో పోరాడాలని మనీషా పేర్కొంది. నయం కాదని కృంగిపోకుండా పోరాటపటిమతో ఎదుర్కోవాలని వారిద్దరూ పిలుపునిచ్చారు.