దైవ రహస్యం

తనికెళ్ల భరణి, ప్రేమ్‌ సుప్రీం

వినీత్, దేవయానీ శర్మ హీరో, హీరోయిన్లుగా పరిచయం అవుతున్న చిత్రం ‘తూనీగ.. ఒక దైవ రహస్యం’. ప్రేమ్‌ సుప్రీం దర్శకత్వం వహించారు. పద్మ దేవీప్రభ సమర్పణలో ప్రేమ్‌ పెయింటింగ్స్‌పై క్రౌడ్‌ ఫండింగ్‌తో నిర్మించిన ఈ సినిమా పోస్టర్‌ను రచయిత, దర్శకుడు, నటుడు తనికెళ్ల భరణి ఆవిష్కరించి, మాట్లాడుతూ– ‘‘దైవ రహస్యం వెల్లడించే క్రమంలో ఉత్కంఠ పెంపొందించే కథను తీసుకుని ఈ సినిమాని తెరకెక్కించిన తీరు బాగుంది.

తాత్విక చింతన నేపథ్యంలో సాగే ఈ చిత్రం ఘనవిజయం సాధించాలి. ఈ చిత్రం కొత్త ఆలోచనలకు చిరునామాగా నిలుస్తుందన్న నమ్మకం ఉంది’’ అన్నారు. ‘‘నా స్వస్థలం శ్రీకాకుళం. మా జిల్లాకు చెందిన పలువురు ఈ సినిమాకి సహ నిర్మాతలుగా వ్యవహరించారు. విశాఖపట్నం, హైదరాబాద్, బెంగళూరుతో పాటు శ్రీకాకుళం జిల్లాలో సీతంపేట మన్యం పరిసర ప్రాంతాల్లో షూటింగ్‌ చేశాం. ఆగస్టు మొదటివారంలో పాటలు విడుదల చేస్తాం’’ అన్నారు ప్రేమ్‌ సుప్రీం.