రాంగోపాల్ వర్మకు సినీనటి శ్రీదేవి నోటీసులు!

 

తాజాగా తన పేరుతో టైటిల్ పెట్టడంపై అభ్యంతరం వ్యక్తం చేస్తూ నటి శ్రీదేవి రంగంలోకొచ్చారు. తన పేరుతో సినిమా తీయడం ఏంటి అంటూ వర్మకు లాయర్ నోటీసు పంపించారామె. దక్షిణ, ఉత్తరాది భాషల్లో శ్రీదేవి నటిగా మంచి పేరుందని, ప్రభుత్వం నుంచి ప్రతిష్టాత్మక పురస్కారం అందుకున్న ఆమె పేరుని.. అందులోనూ అభ్యంతరకరంగా ఉంటుందేమోననే భావనను ప్రచార చిత్రాలు కల్పించిన నేపథ్యంలో ఆమె పేరుని టైటిల్‌గా వాడటం తగదని శ్రీదేవి తరఫు న్యాయవాది పేర్కొన్నారు. 

 

‘శ్రీదేవి’ అనే టైటిల్ పెట్టిన విషయం తెలుసుకుని, ఆమె భర్త బోనీకపూర్ వివరణ కోరాలనుకున్నప్పుడు, ఫోన్‌లోని ‘వాట్సాప్’ ద్వారా ఓ ప్రెస్‌నోట్‌ని పంపించడం, సరైన వివరణ కాదని ఆ లాయర్ అన్నారు. పలు ఇంటర్వ్యూల్లో శ్రీదేవి అంటే తనకు చాలా ఇష్టమని, ఆమె భర్త బోనీని చూస్తే అసూయగా ఉందని వర్మ పేర్కొనడాన్ని ఈ సందర్భంగా సదరు న్యాయవాది గుర్తు చేశారు. ఈ నోటీసు అందిన మూడు రోజుల్లోగా స్పందించకపోతే తదుపరి చర్యలు చాలా తీవ్రంగా ఉంటాయని కూడా తన కక్షిదారు శ్రీదేవి తరఫున ఆ న్యాయవాది తెలిపారు. ఈ చిత్రం పేరు మార్చుతున్నట్లు లిఖితపూర్వకంగా ఇవ్వాలని, జాతీయ స్థాయి వార్తా పత్రికల్లో క్షమాపణలు చెబుతూ, ప్రకటన ఇవ్వాలని, వేరే కొత్త టైటిల్‌ని కూడా ప్రకటించాలని డిమాండ్ చేశారు. ఇంకా చట్టప్రకారం బోల్డన్ని నిబంధలను విధిస్తూ.. వర్మకు నోటీసు పంపించారు.