మొన్న శివగామి... ఇప్పుడు మాతంగి

‘బాహుబలి–2’లో రాజమాత శివగామిగా రమ్యకృష్ణ తప్ప మరో నటి సాటి రాలేరనే స్థాయిలో ఆమె నటనపరంగా విజృంభించారు. ఇప్పుడు మరో సినిమాలో రమ్యకృష్ణ నట విశ్వరూపాన్ని చూడబోతున్నాం. మలయాళంలో ఆమె నటించిన ఓ చిత్రం ‘మాతంగి’ పేరుతో తెలుగులో విడుదల కానుంది.

కన్నన్‌ తమరక్కులమ్‌ దర్శకత్వంలో రూపొందిన ఈ హారర్‌ థ్రిల్లర్‌ మూవీని రమ్యకృష్ణ సోదరి వినయ్‌కృష్ణన్‌ తెలుగులోకి అనువదించారు. సోదరితో వెయ్యి ఎపిసోడ్స్‌ ‘వంశం’ సీరియల్‌ నిర్మించిన వినయ్‌కృష్ణన్‌ ఆ అనుభవంతో సినిమా నిర్మాణ రంగంలోకి అడుగుపెట్టారు. జూన్‌లో చిత్రాన్ని విడుదల చేయాలనుకుంటున్నారు. ‘‘మాతంగిగా రమ్యకృష్ణ అద్భుతంగా నటించారు. మదర్‌ సెంటిమెంట్‌తో తెరకెక్కిన ఈ చిత్రం మలయాళంలో ఘన విజయం సాధించింది. రితేష్‌ అందించిన నేపథ్య సంగీతం హైలైట్‌ అవుతుంది’’ అని వినయ్‌కృష్ణన్‌ తెలిపారు.