ఆస్కార్ అవార్డుల ప్రెజెంటర్‌గా...

ఆస్కార్ అవార్డుల వేడుకలో ఎర్ర తివాచీపై ప్రియాంకా చోప్రా లాంటి అందగత్తె నడుస్తూ, ఒయ్యారాలు ఒలికిస్తూ ఉంటే ఎలా ఉంటుంది? చూడడానికి రెండు కళ్లూ చాలవు. ఈ 2016 ఆస్కార్ వేడుకలో  ప్రియాంకా చోప్రా అలానే సందడి చేయడానికి సిద్ధమవుతున్నారు. ‘క్వాంటికో’ టీవీ సిరీస్‌తో ఒక్కసారిగా హాలీవుడ్ దృష్టిని ఆక ర్షించారామె. ఇప్పుడామెకు ఓ అరుదైన అవకాశం దక్కింది.

ఈ ఏడాది ఆస్కార్ వేడుకలో ప్రియాంకా చోప్రా అవార్డు ప్రెజెం టర్‌గా సందడి చేయనున్నారు. ఈ నెల 28న జరగనున్న ఆస్కార్ వేడుకల్లో పాల్గొననున్న ప్రెజెంటర్ల జాబితాను  అకాడమీ వెబ్‌సైట్  మంగళవారం ప్రకటించింది. జూలియానా మూర్, రీస్ విదర్‌స్పూన్, జేకే సిమ్మన్స్ లాంటి ప్రఖ్యాత హాలీవుడ్ స్టార్స్‌తో పాటు ప్రియాంకా చోప్రా ఈ జాబితాలో ఉన్నారు. ఆ రోజు వేడుకల కోసం ఎంతో ఆసక్తిగా ఎదురుచూస్తున్నానని ప్రియాంక తన ఆనందాన్ని వ్యక్తం చేశారు. ఆ మధ్య పీపుల్స్ ఛాయిస్ అవార్డును అందుకున్న ప్రియాంక ఇటీవల స్క్రీన్ యాక్టర్ గిల్డ్ అవార్డుల ఉత్సవంలోనూ ప్రెజెంటర్‌గా వ్యవహరించారు.