TV
ఫిబ్రవరిలో వేంకటేశాయ
శ్రీవారి విశిష్ఠ భక్తుడు... శంఖు చక్ర దండధారి... హాథీరామ్‌ బాబాగా అక్కినేని నాగార్జున నటించిన భక్తిరస చిత్రం ‘ఓం నమో వేంకటేశాయ’.
శ్రీవారి విశిష్ఠ భక్తుడు... శంఖు చక్ర దండధారి... హాథీరామ్‌ బాబాగా అక్కినేని నాగార్జున నటించిన భక్తిరస చిత్రం ‘ఓం నమో వేంకటేశాయ’. కె. రాఘవేంద్రరావు దర్శకత్వంలో సాయికృపా ఎంటర్‌టైన్‌మెంట్స్‌ ప్రై. లిమిటెడ్‌ పతాకంపై ఏ. మహేశ్‌రెడ్డి నిర్మించిన ఈ సినిమా టీజర్‌ను ఈ నెల 24న రిలీజ్‌ చేస్తున్నట్టు ప్రకటించారు. హాథీరామ్‌ బాబాగా నాగార్జున, కృష్ణమ్మగా అనుష్క, వెంకటేశ్వరస్వామిగా సౌరభ్‌జైన్, కీలక పాత్రధారి ప్రజ్ఞా జైస్వాల్‌ల ఫస్ట్‌ లుక్స్‌ అన్నిటినీ టీజర్స్‌ రూపంలో విడుదల చేసిన సంగతి తెలిసిందే.
నిర్మాత ఏ. మహేశ్‌రెడ్డి మాట్లాడుతూ – ‘‘నాగార్జున–రాఘవేంద్రరావు కలయికలో వచ్చిన భక్తి చిత్రాలు ‘అన్నమయ్య’, ‘శ్రీరామదాసు’, ‘శిరిడీసాయి’ తరహాలో ఈ చిత్రం కూడా ప్రేక్షకులను అలరిస్తుంది. త్వరలో పాటల విడుదల తేదీ ప్రకటిస్తాం. ఫిబ్రవరి 10న సినిమాను విడుదల చేయాలనుకుంటున్నాం’’ అన్నారు. జగపతిబాబు, విమలా రామన్, రావు రమేశ్‌ నటించిన ఈ చిత్రానికి కథ: జె.కె. భారవి, కెమేరా: ఎస్‌.గోపాల్‌రెడ్డి, సంగీతం: ఎం.ఎం.కీరవాణి.
