హుమా ఖురేషి క్వీన్ అవుతుందా?

బాలీవుడ్ నటి హుమా ఖురేషి క్వీన్ చిత్ర నాయకి అవుతుందా?. కోలీవుడ్‌లో తాజాగా చర్చల్లో నలుగుతున్న పేరు ఈ బ్యూటీదే. బాలీవుడ్‌లో సంచలన విజయం సాధించిన క్వీన్ చిత్ర దక్షిణాది రీమేక్ హక్కులను సీనియర్ నటుడు, దర్శకుడు త్యాగరాజన్ పొందిన విషయం తెలిసిందే. ఈ చిత్ర ఒరిజినల్‌లో నటించిన కంగణా రనౌత్ పాత్రను దక్షిణాదిలో నటించిన నటి ఎవరన్నది ఇప్పటికీ సస్పెన్స్‌గానే మారింది. ప్రముఖ నటీమణులు నయనతార, త్రిష, సమంత, కాజల్ వంటి వారి పేర్లు ప్రచారంలో ఉన్నాయి. తాజాగా హుమా ఖురేషి పేరు వెలుగులో కొచ్చింది.

ఈ బ్యూటీ ఇంతకుముందు గ్యాంగ్స్ ఆఫ్ వాస్సేపూర్ చిత్రంలో నటించింది. ఇప్పుడీ భామ దక్షిణాది క్వీన్ కాబోతోందన్న ప్రచారం జోరందుకుంది. ఈ విషయం గురించి దర్శక, నిర్మాత త్యాగరాజన్ మాత్రం స్పష్టత ఇవ్వడం లేదు. అయితే హుమా ఖురేషి క్వీన్ చిత్ర రీమేక్‌లో నటించే విషయమై తనను సంప్రదించిందని చెప్పారు. అయితే ఈ విషయం గురించి తామింకా ఎలాంటి నిర్ణయం తీసుకోలేదని తెలిపారు. ప్రస్తుతం తన దృష్టి అంతా ప్రశాంత్ హీరోగా నటిస్తున్న సాహసం చిత్రం పైనే ఉన్నట్లు చెప్పారు. క్వీన్ చిత్రం వచ్చే ఏడాది మార్చిలోనే సెట్‌పై వెళుతుందని త్యాగరాజన్ స్పష్టం చేశారు.