TV
‘మిషన్‌ ఎవరెస్ట్‌’కు ఆహ్వానం
ప్రపంచంలోనే ఎల్తైన ఎవరెస్ట్‌ శిఖరాన్ని అధిరోహించాలనుకునే ఔత్సాహికుల కోసం రాష్ట్ర ప్రభుత్వం 'మిషన్‌ ఎవరెస్ట్‌' కార్యక్రమాన్ని ప్రారంభించినట్లు జిల్లా యువజన సంక్షేమ శాఖ(సెట్కూరు) మేనేజర్‌ పీవీ రమణ చెప్పారు.
–ప్రభుత్వ ఖర్చుతో ఎవరెస్ట్‌ అధిరోహణ అవకాశం
– ఔత్సాహికుల నుంచి దరఖాస్తుల ఆహ్వానం
–సెట్కూరు మేనేజర్‌ పీవీ రమణ
కర్నూలు(హాస్పిటల్‌): ప్రపంచంలోనే ఎల్తైన ఎవరెస్ట్‌ శిఖరాన్ని అధిరోహించాలనుకునే ఔత్సాహికుల కోసం రాష్ట్ర ప్రభుత్వం 'మిషన్‌ ఎవరెస్ట్‌' కార్యక్రమాన్ని ప్రారంభించినట్లు జిల్లా యువజన సంక్షేమ శాఖ(సెట్కూరు) మేనేజర్‌ పీవీ రమణ చెప్పారు. ఈ మేరకు ఈ నెల 28వ తేదిన రాష్ట్ర ప్రభుత్వం జీవో ఆర్‌టీ నెం.300ను జారీ చేసిందని తెలిపారు. సోమవారం ఆయన సెట్కూరు కార్యాలయంలో ‘సాక్షి’తో మాట్లాడారు. ఆ వివరాలు ఇలా..
- ఎవరెస్ట్‌ను అధిరోహించడం కోసం రాష్ట్రంలోని ప్రతి జిల్లా నుంచి 10 మంది చొప్పున ఔత్సాహిక నిరుపేద యువతీయువకులను ఎంపిక చేస్తారు.
- సంవత్సరాదాయం గ్రామీణ ప్రాంతాల వారైతే ఏడాదికి రూ.81వేలు, పట్టణ ప్రాంతాల వారైతే రూ.1,03,000లు ఉండాలి.
- ఎంపికకు జిల్లా స్థాయి కమిటీలో చైర్మన్‌గా జిల్లా కలెక్టర్, కన్వీనర్‌గా యువజన సర్వీసుల శాఖ అధికారి, సభ్యులుగా శిఖరాలను అధిరోహించడంలో శిక్షణ ఇచ్చే సంస్థల నిర్వాహకులు, క్రీడల అధికారి, వైద్య ఆరోగ్యశాఖ నుంచి ఒక మెడికల్‌ ఆఫీసర్‌ ఉంటారు.
- రాష్ట్ర స్థాయిలో ఎంపికైన 130 మంది యువతకు ఐదురోజుల పాటు విజయవాడ/వైజాగ్‌లలో శిక్షణ ఇచ్చి వీరిలో 20 మందిని ఎంపిక చేస్తారు.
- 20 మందిని భారత రక్షణ శాఖతో శిక్షణ ఇచ్చి అందులోంచి 9 మందిని ఎంపిక చేస్తారు. వారికి మరోసారి శిక్షణ ఇచ్చి, శారీరక, మానసిక దారుఢ్యపరీక్షల కోసం హిమాలయ పర్వతాలకు తీసుకెళ్లి అక్కడ పర్వతాలు అధిరోహించడంలో అనుభవం ఉన్న లెఫ్ట్‌నెంట్‌ కల్నల్‌ స్థాయి అధికారిచే శిక్షణ ఇప్పిస్తారు.
- 9 మందిలో నుంచి చివరకు 5 మందిని ఎంపిక చేసి రెండు నెలల పాటు ఎత్తైన ప్రదేశాలలు ఎక్కడంలో శిక్షణ ఇస్తారు.
- వీరికి 2017 ఏప్రిల్‌ నుంచి జూన్‌ మధ్యలో ఎవరెస్ట్‌ పర్వతాన్ని ఎక్కిస్తారు.
- వివరాలకు కల్లూరు ఎస్టేట్‌లోని సెట్కూరు కార్యాలయం, 08518–229146ను సంప్రదించవచ్చు.
