ఉత్కంఠభరితంగా సాగిన కోడిపోరు

గుంటూరు జిల్లా కారంపూడిలో జరుగుతున్న పల్నాటి వీరారాధనోత్సవాలలో నాలుగో రోజు ఆదివారం కోడి పోరు ఉత్సవం ఉత్కంఠభరితంగా సాగింది. అలనాటి కోడి పందేలను తలపించేలా కోడి పోరును వీరులగుడి ఆవరణలో నిర్వహించారు. మాచర్ల ఎమ్మెల్యే పిన్నెల్లి రామకృష్ణారెడ్డి, వినుకొండ ఎమ్మెల్యే జీవీ ఆంజనేయులు కోడిపోరులో పాల్గొన్నారు.

బ్రహ్మనాయుడు కోడిపుంజును ఎమ్మెల్యే రామకృష్ణారెడ్డి, నాయకురాలు నాగమ్మ కోడిపుంజును ఎమ్మెల్యే ఆంజనేయులు బరిలోకి వదిలారు. సంప్రదాయం కోసం మూడు విడతలుగా నిర్వహించిన పోరులో రెండుసార్లు బ్రహ్మనాయుడు పుంజు గెలిచింది. రాజ్యాన్ని వీడి అరణ్యవాసం చేయాలనే షరతుతో జరిగిన మూడో పందెంలో నాయకురాలు పుంజు గెలిచినట్లుగా పోరును ముగించారు.