నచ్చని ఉద్యోగం చేయలేక..

కేపీహెచ్‌బీకాలనీ: నచ్చని ఉద్యోగం చేయలేక, తల్లిదండ్రులను కష్టపెట్టలేక మనస్తాపానికిలోనైన ఓ సాఫ్ట్‌వేర్‌ ఇంజినీర్‌ లేఖరాసి ఉరివేసుకుని ఆత్మహత్యకు పాల్పడిన సంఘటన కేపీహెచ్‌బీ పోలీస్‌స్టేషన్‌ పరిధిలో శుక్రవారం చోటు చేసుకుంది. స్థానికులు, పోలీసుల కథనం మేరకు వివరాలు ఇలా ఉన్నాయి. విశాఖపట్నం జిల్లా, దువ్వాడకు చెందిన గుండ్ల వెంకట నాగ చైతన్య (23) బీటెక్‌ పూర్తి చేశాడు. ఏడాది క్రితం నగరానికి వచ్చిన అతను కేపీహెచ్‌బీకాలనీ రోడ్‌ నంబర్‌–3లో బాలాజీ హాస్టల్‌లో ఉంటున్నాడు. స్థానికంగా కంప్యూటర్‌ కోర్సు  నేర్చుకున్న చైతన్య జూబ్లీహిల్స్‌లోని ఓ సాప్ట్‌వేర్‌ సంస్థలో ఉద్యోగం చేస్తున్నాడు. గురువారం హాస్టల్‌లో అతడితో పాటు గదిలో ఉంటున్న చైతన్య రాత్రి రూమ్‌కు వచ్చి తలుపులు కొట్టినా తీయలేదు.

దీంతో అతను పక్కనే ఉన్న మరో గదిలో నిద్రపోయాడు. శుక్రవారం ఉదయం మరోసారి తలుపు తట్టినా తెరవకపోవడంతో హాస్టల్‌ నిర్వాహాకులకు సమాచారం అందించాడు. వారు కేపీహెచ్‌బీ పోలీసులకు సమాచారం అందించారు. పోలీసులు తలుపులు తెరిచి చూడగా చైతన్య సీలింగ్‌ ఫ్యాన్‌కు బెడ్‌షీట్‌తో ఉరేసుకొని కనిపించాడు. అతని కుటుంబసభ్యులకు సమాచారం అందించారు. కేసు నమోదు చేసుకొని దర్యాప్తు చేపట్టిన పోలీసులు చైతన్య గదిలో  సూసైడ్‌ నోట్‌ను స్వాధీనం చేసుకున్నారు. ‘తాను చేస్తున్న ఉద్యోగం నచ్చలేదని, ఊరికి వెళ్లి తల్లిదండ్రులను ఇబ్బంది పెట్టడం ఇష్టంలేక ఆత్మహత్య చేసుకుంటున్నట్లుగా అందులో పేర్కొ న్నాడు. అంతే కాకుండా ‘నాన్నా.. అమ్మా..అక్క జాగ్రత్త అంటూ అందులో పేర్కొన్నట్లు పోలీసులు తెలిపారు.  వారి కుటుంబసభ్యులు వచ్చిన తర్వాతే చైతన్య మృతికి కారణాలు  తెలుస్తాయని పోలీసులు తెలిపారు. మృతదేహాన్ని పోస్టుమార్టం నిమిత్తం గాంధీ ఆసుపత్రికి తరలించారు.