వీఆర్వో, వీఆర్‌ఏ పోస్టుల భర్తీకి చర్యలు

ఏలూరు, న్యూస్‌లైన్ :రాష్ట్రంలో వీఆర్వో, వీఆర్‌ఏ పోస్టుల భర్తీ కోసం నోటిఫికేషన్ త్వరలో వెలువడుతుందని రాష్ట్ర భూ పరిపాలనా శాఖ ప్రధాన కమీషనర్ (సీసీఎల్‌ఏ) ఐవైఆర్ కృష్ణారావు వెల్లడించారు. కలెక్టర్లు, జాయింట్ కలెక్టర్లు, డీఆర్వోలు, ఆర్డీవోలతో ఆయన హైదరాబాద్ నుంచి వీడియో కాన్ఫెరెన్సు నిర్వహించారు. వీఆర్వో, వీఆర్‌ఏ ఖాళీ పోస్టుల భర్తీకి సంబంధించిన అంశాలపై అధికారులతో ఆయన మాట్లాడారు. ఈనెల చివరి వారం లేదా జనవరి మొదటి వారంలో నోటిఫికేషన్ జారీ చేస్తామని చెప్పారు. అభ్యర్థుల ఎంపిక ప్రక్రియను హైదరాబాదు జేఎన్‌టీయూ నిర్వహిస్తుందన్నారు.