కొత్త దనాన్ని ఆశిస్తున్నారు

- సంగీత దర్శకుడు కోటి

 ప్రస్తుతం సంగీత ప్రియులు కొత్తదనాన్ని ఆశిస్తున్నారని ప్రముఖ సంగీత దర్శకుడు కోటి అన్నారు. పాత తరం సంగీతాన్ని నేటికీ మరచిపోలేకున్నారన్నారు. ఓజిలి సమీపంలో తన మామిడి తోటలో సోమవారం ‘న్యూస్‌లైన్’తో తన అభిప్రాయాలను కోటి పంచుకున్నారు.  
 - న్యూస్‌లైన్, ఓజిలి

 న్యూస్‌లైన్: ఎన్ని సినిమాలకు సంగీతం అందించారు?
 కోటి:  1983లో తెలుగుచిత్రసీమకు పరిచయం అయ్యా. ప్రళయ గర్జన చిత్రం రాజ్‌తో కలసి తెలుగులో తొలి సినిమా చేశా. తెలుగు, కన్నడ, హిందీ భాషల్లో మొత్తం 475కు పైగా చిత్రాలకు సంగీతం అందించా.
 న్యూస్‌లైన్: రాజ్‌తో కలసి భవిష్యత్తులో సినిమాలు చేస్తారా?
 కోటి: పదేళ్ల పాటు రాజ్‌తో కలసి సినిమాలు చేశా. కొత్తగా ఫీల్డ్‌కు పరిచమైనప్పుడు సంగీతంలో నూతన ట్రెండ్‌ను తీసుకొచ్చా. పదేళ్ల అనంతరం రాజ్, నేను ఫ్రెండ్లీగా 1993లో విడిపోయాం. (రాజ్‌తో కలసి పనిచేయడంపై సున్నితంగా తిరస్కరించారు.)
 న్యూస్‌లైన్: అత్యంత ప్రజాదరణ తెచ్చిన చిత్రాలేవీ?
 కోటి: పెదరాయుడు, నువ్వేకావాలి, యముడికి మొగుడు, అరుంధతి, నువ్వు నాకు నచ్చావ్ వంటి సినిమాలు అత్యంత ప్రజాదరణ పొందాయి.  
 న్యూస్‌లైన్: ఖైదీ నం 786 వంటి చిత్రాలిచ్చిన సంగీతం ప్రస్తుతం రాకపోవడానికి కారణం?
 కోటి: కాలాన్ని బట్టి సంగీతం మారిపోతుంది. అప్పట్లో ఖైదీనంబర్ 786 సినిమాలోని గువ్వా గోరింక పాట సినిమా ప్రియులను ఎంతగానో ఆకట్టుకుంది. యువత కొత్తదనాన్ని  కోరుకుంటున్నారు. అందుకు తగ్గట్టుగానే సంగీతం అందిస్తున్నా.