పాలమూరు ఆగం

బీఆర్‌ఎస్‌ పాలనలో

● రైతులను రెచ్చగొట్టేందుకే జూరాలకు..

● మంత్రులు జాపల్లి కృష్ణారావు,

వాకిటి శ్రీహరి

2015లో కేంద్ర ప్రభుత్వం కృష్ణానది జలాల వాటాపై ఏర్పాటు చేసిన సమావేశంలో 299 టీఎంసీల నీటివాటా చాలని బీఆర్‌ఎస్‌ నాయకులు సంతకాలు చేసి ఆంధ్రప్రదేశ్‌కు 512 టీఎంఎస్‌ల వాటాను అప్పగించిన నాడే పాలమూరు రైతులకు అన్యాయం చేశారని వనపర్తి ఎమ్మెల్యే తూడి మేఘారెడ్డి అన్నారు. పాలమూరు రైతులకు భవిష్యత్‌లో సాగునీటి కష్టాలు రావద్దని 15 టీఎంసీల సామర్థ్యంతో జూరాలకు సమాంతరంగా మరో ప్రాజెక్టు నిర్మాణం చేసేందుకు ముఖ్యమంత్రి గ్రీన్‌సిగ్నల్‌ ఇవ్వడంతో పాటు రూ.165 కోట్లు విడుదల చేసినట్లు చెప్పారు. మరో 20 ఆన్‌లైన్‌ రిజర్వాయర్ల నిర్మాణాలకు ప్రతిపాదనలు ఉన్నాయన్నారు. అనావృష్టి పరిస్థితుల్లో ఎక్కడా సాగునీటికి ఇబ్బందులు తలెత్తకుండా నీటి నిల్వకు సీఎం ప్రణాళికలు సిద్ధం చేస్తున్నారని తెలిపారు.

వనపర్తి: తెలంగాణ రైతుల సాగునీటి అవసరాలు అధికారం కోల్పోయిన తర్వాత బీఆర్‌ఎస్‌ నేతలకు గుర్తుకురావడం హాస్యాస్పదమని మంత్రులు జూపల్లి కృష్ణారావు, వాకిటి శ్రీహరి అన్నారు. గురువారం కలెక్టరేట్‌లో ఎంపీ మల్లు రవి, వనపర్తి, గద్వాల, దేవరకద్ర ఎమ్మెల్యేలు మేఘారెడ్డి, కృష్ణమోహన్‌రెడ్డి, మధుసూదన్‌రెడ్డితో కలిసి ఎన్‌నినో ప్రభావం.. సాగు, తాగునీటి అవసరాలు, నీటి నిల్వలు, వరద జలాల అంశంపై ఇరిగేషన్‌ అధికారులతో సమీక్ష నిర్వహించారు. అనంతరం ఏర్పాటు చేసిన విలేకర్ల సమావేశంలో మాట్లాడుతూ.. పదేళ్ల పాటు అధికారంలో ఉన్న బీఆర్‌ఎస్‌ పాలకులు పాలమూరును ఎండబెట్టి ఉత్తర తెలంగాణలో ప్రాజెక్టులను త్వరితగతిన పూర్తి చేసుకున్నది వాస్తవం కాదా అని ప్రశ్నించారు. రాజకీయ లబ్ధి కోసం బీఆర్‌ఎస్‌, బీజేపీ నాయకులు ప్రాజెక్టు వద్దకు వెళ్లి అమాయకులైన రైతుల ఎదుట వీరంగం చేయడం సరికాదన్నారు. నవంబర్‌ వరకు సాగునీరు అందించేందుకు ప్రజా ప్రభుత్వం పక్కా ప్రణాళికతో ఉందని తెలిపారు. ప్రస్తుతం వస్తున్న వరద కొనసాగినంత వరకు రోజు కాల్వలకు నీరందించి.. వరద ఆగిన తర్వాత వారాబందీ లెక్కన అందించాలని నిర్ణయించినట్లు వెల్లడించారు. భవిష్యత్‌ అవసరాలను దృష్టిలో ఉంచుకొని నిల్వ నీటిని పొదుపుగా వినియోగించుకోవాలని రైతులకు సూచించారు. పదేళ్లు రైతులను నిర్లక్ష్యం చేసిన వారు ఇప్పుడు రాజకీయ స్వార్థంతో కపట ప్రేమ చూపుతున్నారంటూ విమర్శించారు. జూరాలలో నిల్వ ఉన్న కొద్దిపాటి నీటితో పాలమూరు జిల్లాలోని 4.70 లక్షల ఎకరాలకు సాగునీరు అందించడం సాధ్యం కాదని తెలిసినా.. పదేళ్ల పాలనలో నీటి నిల్వ కోసం ప్రాజెక్టుల రూపకల్పన ఎందుకు చేయలేదని ప్రశ్నించారు. 2015లో శంకుస్థాపన చేసిన పాలమూరు–రంగారెడ్డి ఎందుకు పూర్తి కాలేదు.. ఆ తర్వాత శంకుస్థాపన చేసిన కాళేశ్వరం ఎలా పూర్తి చేశారనే విషయాన్ని రైతులు గమనించాలన్నారు. వారాబందీ విధానంలో లష్కర్లు, ఇతర సిబ్బందిని వినియోగించి డిస్ట్రిబ్యూటరీ వారీగా ఆన్‌అండ్‌ఆఫ్‌ పద్ధతిలో సమానంగా నీరు వదలాలని ఇరిగేషన్‌శాఖ అధికారులను ఆదేశించారు. వ్యవసాయ విస్తరణ అధికారులు వారాబందీపై రైతులకు అవగాహన కల్పించే విధంగా చర్యలు తీసుకోవాలని కలెక్టర్‌కు సూచించారు. డిస్ట్రిబ్యూటరీ కాల్వల్లో జమ్ము, పూడిక తొలగింపు, ఇతర నిర్వహణకు ప్రతిపాదనలు సిద్ధం చేసి అందజేయాలన్నారు. ఆయకట్టు రైతులు సాగుచేసిన వానాకాలం పంటలను కాపాడటానికి ముందుగానే కర్ణాటక ముఖ్యమంత్రికి నీటి విడుదలపై ప్రతిపాదనలు సిద్ధం చేశామని.. అసెంబ్లీ కారణంగా రెండ్రోజులు ఆలస్యమైందని, అంతలోపే ప్రతిపక్షాలు రాద్దాంతం చేశాయని తెలిపారు. నీటి విడుదలకు సహకరించిన కర్ణాటక ముఖ్యమంత్రి డీకే శివకుమార్‌కు జిల్లా రైతుల తరఫున ప్రత్యేక ధన్యవాదాలు తెలిపారు. వానకాలం పంటలు కాపాడటానికి నవంబర్‌ 27 వరకు వా రాబందీ విధానంలో నీటిని విడుదల చేస్తామని.. రైతులు అధైర్యపడొద్దని మంత్రులు చెప్పారు.

రాజకీయ లబ్ధి కోసం రైతులను రెచ్చగొడుతున్న మాయగాళ్ల మాటలను పాలమూరు రైతాంగం నమ్మవద్దని దేవరకద్ర ఎమ్మెల్యే జి.మధుసూదన్‌రెడ్డి విమర్శించారు. జిల్లా వరప్రదాయిని అంటున్న పాలమూరు ప్రాజెక్టులోని ప్రధాన ఐదు రిజర్వాయర్ల పనులు ఎందుకు నిర్లక్ష్యం చేశారని ప్రశ్నించారు. రైతులకు పరిహారం ఇచ్చే విషయంలో నిర్లక్ష్యం, గుత్తేదారులకు బిల్లులు చెల్లించేందుకు కమీషన్ల కోసం ఆసక్తి చూపించిన కారణంగానే ఎక్కడి పనులు అక్కడే పడకేశాయని తెలిపారు.

కృష్ణానది పరీవాహక ప్రాంతంలోని పంటల కోసం నీటిని విడుదల చేయాలని కోరుతూ కర్ణాటక ప్రభుత్వానికి సీఎం రేవంత్‌రెడ్డి, నీటిపారుదలశాఖ మంత్రి ఉత్తమ్‌కుమార్‌రెడ్డి లేఖ రాసిన విషయం తెలుసుకొనే బీఆర్‌ఎస్‌, బీజేపీ నేతలు జూరాల ప్రాజెక్టుకు వద్దకు వెళ్లి రైతుల ముందు రాజకీయ రాద్దాంతం చేశారని ఎంపీ మల్లు రవి ఆరోపించారు. వారి అసత్యపు ఆరోపణలు రైతులు నమ్మే పరిస్థితి లేదని.. నాటి నుంచి నేటి వరకు రైతుల పక్షపాతి ప్రభుత్వం కాంగ్రెస్సేనని తెలిపారు.