ప్రైవేటుకు సై..

రోడ్డు ప్రమాదాల నివారణే లక్ష్యంగా ఏర్పాటైన రవాణాశాఖపై బాబు సర్కారు ప్రై‘వేటు’ వేసింది. ఇప్పటికే ఈ శాఖలో ఒక్కే ఒక సేవ మినహా అన్నీ ప్రైవేటు పరమయ్యాయి. దీంతో రవాణాశాఖ నిబంధనలు గాలికి కొట్టుకుపోనున్నాయి. కాసుల గలగలలతో ఏదైనా సాధ్యం కానుంది. ప్రజలపై పెనుభారం పడనుండగా.. రవాణా చట్టాలకు తూట్లు పడనున్నాయి. రోడ్డు ప్రమాదాలు మరిన్ని పెరగనున్నాయని ప్రజలు ఆరోపిస్తున్నారు.
డబ్బులిస్తే వాహనాలకు ఫిట్‌నెస్‌ సర్టిఫికెట్లు

వాహనదారులు లేక వెలవెలబోయిన తిరుపతి జిల్లా రవాణాశాఖ కార్యాలయం

శ్రీకాళహస్తి రాచగన్నేరి వద్ద ప్రై వేటు ఏజెన్సీ వాళ్లు ఏర్పాటు చేస్తున్న వాహన ఫిట్‌నెస్‌ పరీక్షల సెంటర్‌(ఏటీసీ)

ప్రభుత్వ సంస్థలు ప్రైవేటుపరమే బాబు లక్ష్యం

జిల్లాలో వాహనాల వివరాలు

ప్రయాణికుల బస్సులు 3,551

స్కూల్‌ బస్సులు 1,105

గూడ్స్‌ క్యారియర్లు 19,427

మోటార్‌ కార్లు 23,541

త్రీ వీలర్‌ 47,388

అగ్రికల్చర్‌ ట్రాక్టర్లు 10,858

కమర్షియల్‌ ట్రాక్టర్లు 9,802

ఇతర వాహనాలు 9,012

తిరుపతి మంగళం : రవాణాశాఖ కార్యాలయాలు వాహనచోదకులతో నిత్యం కళకళలాడుతుండేవి. అయితే క్రమేణా రవాణా శాఖ సేవలు ఒక్కొక్కటి గా ప్రైవేటుపరమైపోయాయి. దీంతో నేడు వెలవెల బోతున్నాయి. రవాణాశాఖలో మొత్తం 86 సేవలకుగానూ ఎల్‌ఎల్‌ఆర్‌ మినహా మిగిలిన సేవలన్నీ అప్పన్నంగా ప్రైవేట్‌ చేతుల్లోకి వెళ్లిపోయాయి. మిగిలిన ఎల్‌ఎల్‌ఆర్‌ను కూడా ప్రైవేటుకు కట్టబెట్టేలా ప్రయత్నాలు జరుగుతున్నాయి. తద్వారా ప్రైవేటు నిర్వాహకుల ఇష్టారాజ్యం కానుంది. వాహనచోదకులకు సేవలందించడంలో ఏదొక కొరివి పెడుతూ కాసులు దండుకుంటున్నారు. వావాన సేవ నిబంధనలను గాలికొదిలేశారు. అంతా ప్రైవేట్‌పరం కా వడంతో ఒకప్పుడు వందలాది మంది వాహనచోదకులతో కళకళలాడిన తిరుపతి జిల్లా రవాణాశాఖ కార్యాలయంతోపాటు జిల్లాలోని రవాణా కార్యాలయాలు నేడు వెలవెలబోతున్నాయి.

ప్రైవేట్‌ చేతుల్లోకి..

86 సేవల్లో 85 ప్రైవేటుపరం

చంద్రబాబు ఎప్పుడు అధికారంలోకి వచ్చిన ప్రభుత్వ సంస్థలను ప్రైవేటు పరం చేసి చేతులు దులుపుకోవాలన్నదే ఆయన లక్ష్యంగా కనిపిస్తోంది. ప్రభుత్వ సంస్థల్లో ఎంతో కీలకమైన రవాణాశాఖలోని 86 సేవల్లో 85 సేవలు ప్రైవేటుపరం చేశారంటే అర్థమవుతుంది. వాహన సామర్థ్యం, రవాణా నిబంధనలను వాహనచోదకులంతా పాటించేలా చూస్తూ ప్రమాదాలను అరికట్టడంలో రవాణాశాఖ కీలకపాత్ర పోషిస్తోంది. అటువంటి శాఖను ప్రైవేటు వ్యక్తులకు అప్పగించి నిర్వీర్యం చేశారు. అదే తరహాలో ప్రభుత్వ మెడికల్‌ కళాశాలలు, మంగళంలోని ఆర్టీసీ డిపోను ప్రైవేటు పరం చేసేందుకు చేయని ప్రయత్నాలు లేవు. ఇలా ఒక్కొక్కటిగా ప్రభుత్వ రంగ సంస్థలను ప్రైవేటు పరం చేసేయాలన్నదే చంద్రబాబు లక్ష్యంగా పెట్టుకున్నట్లు ఉన్నారు. దీంతో ప్రజలు ఎంత నష్టపోతారో, కష్టపడతారోనన్న ఆలోచన కనిపించడం లేదు.

ప్రభుత్వం ప్రైవేటు ఏజెన్సీల ద్వారా ఆటోమేటెడ్‌ టెస్టింగ్‌ స్టేషన్లు (ఏటీఎస్‌)లను ఇప్పటికే ఇతర జిల్లాల్లో ఏర్పాటు చేసింది. వాటి నిర్వాహకులు కావాల్సిన సర్టిఫికెట్‌ ఆధారంగా నగదు డిమాండ్‌పై ఆటో యూనియన్లు, రవాణా కార్మిక సంఘాలు అగ్రహం వ్యక్తం చేస్తున్నాయి. వీటిని పర్యవేక్షించే అధికారం రవాణాధికారులకు లేకపోవడంతో ఏజెన్సీ నిర్వాహకులకు అడ్డూఅదుపు లేకుండా పోతోంది. తిరుపతి జిల్లా మొత్తానికి శ్రీకాళహస్తి మండలంలోని రాచగున్నేరి వద్ద ఒకే ఒక్క ఏటీఎస్‌ ఏర్పాటు చేయగా జిల్లా సరిహద్దుల్లో ఉన్న వారు తమ వాహనాల ఫిట్‌నెస్‌ సర్టిఫికెట్ల కోసం సుమారు 70 కిలోమీటర్లు ప్రయాణించాల్సి వస్తుంది. దీంతో వారు అనేక వ్యయప్రయాసలకు గురవుతున్నారు.

ప్రైవేటుకు సై..

ప్రైవేటుకు సై..

ప్రైవేటుకు సై..