కాసుల కోసం కక్కుర్తి !

Oct 16 2026 10:34 AM | Updated on Oct 16 2026 10:34 AM

● ఇటీవల సిరిసిల్ల సర్వేయర్‌ ప్రైవేటు సహాయకుడు సూర్యవంశీ, సర్వేయర్‌ మాడిశెట్టి వేణుగోపాల్‌ పట్టుబడ్డారు. ● గతేడాది మే 31న ఎల్లారెడ్డిపేట సర్వేయర్‌ నాగరాజు రూ.15వేలు లంచం తీసుకుంటూ ఏసీబీ అధికారులకు పట్టుబడ్డాడు. ● 2025 మే 8న జిల్లా ఇరిగేషన్‌శాఖ ఈఈ అమరేందర్‌రెడ్డి చెక్‌డ్యామ్‌ కాంట్రాక్టర్‌ వద్ద రూ. 60వేలు లంచం తీసుకుంటూ కరీంనగర్‌లో దొరికిపోయాడు. ● జిల్లా పరిశ్రమల శాఖ జనరల్‌ మేనేజర్‌ ఉపేందర్‌రావు రూ.13వేలు లంచం తీసుకుంటూ ఏసీబీకి చిక్కారు. ● సిరిసిల్ల భూసర్వే అధికారి ఇల్లంతకుంటలో ఏసీబీ అధికారులకు పట్టుబడ్డారు. ● వేములవాడ పంచాయత్‌రాజ్‌ డీఈఈ మహేందర్‌ తడగొండకు చెందిన కట్ట లచ్చయ్య వద్ద రూ.60వేలు లంచం తీసుకుంటూ ఏసీబీ అధికారులకు చిక్కారు. ● సిరిసిల్ల జిల్లా అటవీశాఖ అధికారి శ్రీనివాస్‌ రావు, రేంజ్‌ అధికారి అనిత, ఫారెస్టు సెక్షన్‌ అధికారి శ్రీనివాస్‌ వద్ద రూ.4లక్షలు లంచం తీసుకుంటూ ఏసీబీ అధికారులకు పట్టుబడ్డారు. ● వేములవాడ తహసీల్దార్‌ ఆఫీస్‌లో సర్వేయర్‌గా పనిచేస్తున్న సత్యనారాయణ నాలా మార్పిడి కోసం బాలరాజు వద్ద రూ.20 వేలు తీసుకుంటుండగా ఏసీబీ అధికారులకు దొరికారు. ● వేములవాడ ఆలయ ప్రాంత అభివృద్ధి సంస్థ(వీటీడీఏ) ముఖ్య ప్రణాళిక అధికారి(సీపీవో) తొరుపునూరి లక్ష్మణ్‌గౌడ్‌ లేఅవుట్‌ అనుమతి కోసం రియల్టర్లు జవ్వాజి సంపత్‌, రావికంటి సందీప్‌ వద్ద రూ.6.50లక్షలు తీసుకుంటూ హైదరాబాద్‌లో పట్టుబడ్డారు. లక్ష్మణ్‌గౌడ్‌తో పాటు అతని కొడుకు రోహిత్‌ ఏసీబీ అధికారులు చిక్కారు.

చిక్కుతున్నా ఆగని అవినీతి ఏసీబీ దాడులతో అవినీతిపరుల గుండెల్లో వణుకు పట్టుబడుతున్నా తీరుమారని అధికారులు తాజాగా ఏసీబీకి చిక్కిన వేములవాడరూరల్‌ తహసీల్దార్‌

సిరిసిల్ల: నిబంధనల మేరకు చేయాల్సిన పనులకూ సైతం పైసలిస్తేనే చేస్తామనే ధోరణి అధికారుల్లో ఇటీవల పెరిగిపోయింది. పాపభీతి లేకుండా లంచాల కోసం సామాన్యులను సైతం వేధించుకు వసూలు చేస్తున్నారు. ఇలా లంచాలు తీసుకుంటూ అవినీతి నిరోధక శాఖ అధికారులకు పట్టుబడుతున్నా కక్కుర్తి ఆగడం లేదు. డబ్బుల కోసం వేధిస్తున్న అవినీతి చేపలు జిల్లాలో తరచూ చిక్కుతున్నాయి. తాజాగా వేములవాడ రూరల్‌ తహసీల్దార్‌ ఎండీ అబూబాకర్‌, రెవెన్యూ ఆఫీస్‌లోని భూభారతి ప్రైవేటు వ్యక్తి సంకసాల అనిల్‌కుమార్‌ గురువారం రూ.8వేలు లంచం తీసుకుంటూ ఏసీబీ అధికారులకు పట్టుబడ్డారు. తరచూ ఏసీబీ దాడులు జరుగుతున్నా లంచావతరాలు మాత్రం మానుకోవడం లేదు.

వరుస సంఘటనలు

పెచ్చుమీరిన అవినీతి

లంచాలు తీసుకుంటూ ఏసీబీ అధికారులకు చిక్కుతున్నా అవినీతి అధికారుల్లో మార్పు రావడం లేదు. లంచం తీసుకోవడం చట్టభద్దమైన హక్కులాగా భావిస్తూ అందినకాడికి గుంజుతున్నారు. ఇది తప్పు అనే విషయాన్నే కొందరు అధికారులు ఎప్పుడో మరిచిపోయారు. దీంతో ఏసీబీ అధికారులు బాధితులతో ఫిర్యాదులు స్వీకరిస్తూ డబ్బులను ఎరగా చూపుతూ అవినీతి చేపలను పట్టుకుని జైలుకు పంపుతున్నారు. అయినా అధికారుల్లో మార్పు రావడం లేదు. అవినీతి అధికారులను పక్కాగా పట్టించడంలో ప్రజాచైతన్యం వెల్లువెత్తుతోంది. ఆ చైతన్యమే అవినీతి అధికారులు జైలు ఊచలు లెక్కించేలా చేస్తుంది.