‘ప్రత్యామ్నాయ’మే పనికొచ్చింది

‘ప్రత్యామ్నాయ’మే పనికొచ్చింది

సాక్షిప్రతినిధి, కరీంనగర్‌:

భారీ వర్షాల నేపథ్యంలో.. కామారెడ్డిలో రైల్వేట్రాక్‌ కొట్టుకుపోయిన క్రమంలో ప్రత్యామ్నాయంగా వేసిన పెద్దపల్లి – నిజామాబాద్‌ రైల్వేమార్గమే కీలకంగా మారింది. కామారెడ్డి మీదుగా వెళ్లాల్సిన పలు రైళ్లను అధికారులు ఈ మార్గం మీదుగా మళ్లించారు. గతేడాది నవంబర్‌లో పెద్దపల్లి సమీపంలోని రాఘవాపూర్‌ వద్ద రైలు పట్టాలు తప్పిన సమయంలోనూ పెద్దపల్లి– నిజామాబాద్‌ రైల్వేమార్గం కీలకంగా మారింది. తాజాగా కామారెడ్డిలో భారీ వర్షాల నేపథ్యంలో ఈ ప్రత్యామ్నాయ మార్గం తన ప్రాధాన్యాన్ని చాటుకుంది.

పెద్దపల్లి వెళ్లకుండా బైపాస్‌ మీదుగానే..

గతంలో బల్లార్షా–కాజీపేట మార్గం నుంచి పెద్దపల్లి–నిజామాబాద్‌ మార్గంలో మళ్లించాల్సి వస్తే.. ప్రతీ రైలు ముందుగా పెద్దపల్లి వెళ్లాల్సి వచ్చేది. అక్కడ రైలు ఇంజిన్‌ రివర్స్‌ తీసుకోవాలి. తిరిగి పెద్దపల్లి–నిజామాబాద్‌ వైపు సిద్ధమైన తరువాత సిగ్నల్‌ దొరకాలంటే కనీసం 40 నిమిషాల సమయం పట్టేది. ఇటీవల పెద్దపల్లి బైపాస్‌ అందుబాటులోకొచ్చాక.. నేరుగా బైపాస్‌ మీదుగా పెద్దపల్లి – నిజామాబాద్‌ సెక్షన్‌లోకి సులువుగా రైళ్లు మళ్లుతున్నాయి.

మళ్లించిన రైళ్లు ఇవే..

కాజీపేట నుంచి బల్లార్షా, పెద్దపల్లి నుంచి నిజామాబాద్‌ మార్గాల్లో నడిచే మెమూ, పలు ఎక్స్‌ప్రెస్‌ రైళ్లను రైల్వే అధికారులు పాక్షికంగా రద్దు చేశారు. పెద్దపల్లి–నిజామాబాద్‌ సెక్షన్‌ మీదుగా పలు రైళ్లను మళ్లించడంతో ఈ మార్గంలో ట్రాఫిక్‌ భారం పడింది. ఫలితంగా అధికారులు కొన్ని రైళ్లను పాక్షికంగా రద్దు చేశారు.

● రైలు నంబర్‌ 17033/17034 భద్రాచలం–బల్హ ర్షా– సిర్పూర్‌ టౌన్‌–భద్రాచలం సింగరేణి మెమూ ఎక్స్‌ప్రెస్‌ రైలు 29న భద్రాచలం రోడ్డు నుంచి వరంగల్‌ మధ్య మాత్రమే నడుస్తుంది.

● 17035 కాజీపేట నుంచి బల్లార్షా ఎక్స్‌ప్రెస్‌ గురు, శుక్రవారం కాజీపేట నుంచి బయలుదేరేది పూర్తిగా రద్దయ్యింది. బల్లార్షా– కాజీపేట 17036 ఎక్స్‌ప్రెస్‌ శుక్ర, శనివారం రద్దయ్యింది.

● 67771/72 , 67773/74 కరీంనగర్‌– సిర్పూర్‌ టౌన్‌, కరీంనగర్‌ – బోధన్‌ పుష్‌పుల్‌ ప్యాసింజర్‌ శుక్రవారం ఇరువైపులా రద్దు చేశారు.

● కాగజ్‌నగర్‌ వైపు శుక్రవారం నడిచే 17233 భాగ్యనగర్‌ ఎక్స్‌ప్రెస్‌ సికింద్రాబాద్‌ నుంచి కాజీ పేట మధ్యనే నడుస్తుంది. ఇదే ఎక్స్‌ప్రెస్‌ 17234 కాజీపేట, సికింద్రాబాద్‌ మధ్య నడుస్తుంది.

● 16031 అండమాన్‌ ట్రైవీక్లీ ఎక్స్‌ప్రెస్‌.. 16032 శ్రీమాతా వైష్ణోదేవి కాట్రా నుంచి చైన్నె సెంట్రల్‌ అండమాన్‌ ట్రై వీక్లీ ఎక్స్‌ప్రెస్‌ను రద్దు చేశారు.