TV
నూజెండ్ల: ముందు వెళ్తున్న గుర్తుతెలియని వాహనాన్ని ఢీకొని డీసీఎం డ్రైవర్‌ మృతిచెందాడు. ఈ ఘటన నల్లగొండ జిల్లా మిర్యాలగూడ మండలం కిష్టాపురం గ్రామ సమీపంలో గురువారం రాత్రి జరిగింది. శుక్రవారం మిర్యాలగూడ రూరల్‌ పోలీసులు తెలిపిన వివరాల ప్రకారం..నూజెండ్ల గ్రామానికి చెందిన అమ్మిరెడ్డి క్రిష్ణారెడ్డి(52) డీసీఎం డ్రైవర్‌గా పనిచేస్తున్నాడు. అతడు గురువారం ఏపీలోని దర్శి నుంచి హైదరాబాద్‌కు డీసీఎంలో కరివేపాకు లోడుతో బయల్దేరాడు. మార్గమధ్యలో గురువారం రాత్రి మిర్యాలగూడ మండలం కిష్టాపురం వద్ద గల భారత్‌ పెట్రోల్‌ బంక్‌ సమీపంలో ముందు వెళ్తున్న గుర్తుతెలియని వాహనాన్ని ఢీకొట్టాడు. ప్రమాద తీవ్రతకు డీసీఎం రహదారి ఎడమ వైపునకు బోల్తాపడింది. క్రిష్ణారెడ్డి డీసీఎంలోనే ఇరుక్కుపోయి అక్కడికక్కడే మృతిచెందారు. సమాచారం తెలుసుకున్న పోలీసులు ఘటనా స్థలానికి చేరుకుని మృతదేహాన్ని డీసీఎం నుంచి బయటకు తీసి మిర్యాలగూడ ఏరియా ఆస్పత్రికి తరలించారు. ఈ ఘటనపై పోలీసులు కేసు నమోదు చేసుకోని దర్యాప్తు చేపట్టారు.
