ఆమె చనిపోయింది, నిలువెల్లా వణికిపోతున్నాను: నటుడు

May 13, 2021, 11:09 IST

శక్తిమాన్‌ నటుడు ముఖేశ్‌ ఖన్నా ఇంట్లో విషాదం చోటు చేసుకుంది. కోవిడ్‌ను జయించిన అతడి సోదరి కమల్‌ కపూర్‌ అనారోగ్యం కారణంగా కన్నుమూసింది. ఈ విషయాన్ని ముఖేశ్‌ ఖన్నా సోషల్‌ మీడియాలో వెల్లడిస్తూ సోదరికి అశ్రునివాళులు అర్పించాడు.

"నేను బతికుండగానే చనిపోయానంటూ వచ్చిన వార్తలు ఫేక్‌ అని చెప్పడానికి ఎంతో ఇబ్బందిపడ్డాను. కానీ ఓ భయంకరమైన నిజం నన్ను ఇలా కుదిపేస్తుందని అస్సలు ఊహించలేదు. నా ఒక్కగానొక్క అక్క కమల్‌ కపూర్‌ ఢిల్లీలో చనిపోయింది. కరోనాతో 12 రోజులు పోరాటం చేసిన ఆమె ఆ మహమ్మారిపై పైచేయి సాధించింది. కానీ ఊపిరితిత్తుల్లో ఆటంకం కలగడంతో ఆమె ప్రాణాలు విడిచింది. ఆ దేవుడు రాసిన రాతలను మనం కలలో కూడా ఊహించలేము. నా జీవితంలో తొలిసారి బాధతో, భయంతో వణికిపోతున్నాను. కన్నీటితో నమస్కరిస్తూ.. భావోద్వేగ హృదయంతో నివాళులు అర్పిస్తున్నాను" అని ముఖేశ్‌ ఖన్నా రాసుకొచ్చాడు. ఈ పోస్ట్‌కు తన సోదరితో కలిసి దిగిన ఫొటోను జత చేశాడు.